Li Jesus narosob’tesiheb’ li kok’al

“Li Jesus narosob’tesiheb’ li kok’al,” Eb’ li Seraq’ sa’ lix Hu laj Mormon (2023)

Li Jesus narosob’tesiheb’ li kok’al

Xk’utb’al lix rahom choq’ reheb’

li Jesukristo naxaqli sa’ xb’een li taqleb’aal toj saʼ li santil ochoch ut na’aatinak rik’ineb’ li kristiaan

Li Jesukristo ak kixk’ut naab’al li na’leb’ chiruheb’ li kristiaan. Kixk’e reetal naq hoonal te’raj re xk’oxlankil chixjunil li k’a’ru ke’xtzol. Kixpatz’ reheb’ naq te’q’ajq sa’ rochocheb’ ut te’tijoq chiru li qaChoxahil Yuwa’ re naq te’xtaw ru li na’leb’ kixk’ut chiruheb’. Li Jesus kixyeechi’i naq wulajaq taarula’aniheb’ wi’chik.

3 Nefi 17:1–4

li Jesukristo nase’ek ut naxtaqsi li ruq’

Ke’yaab’ak li kristiaan xb’aan naq ke’raj naq taakanaaq li Jesus. Li Jesus naxraheb’ li kristiaan. Kixk’e reetal naq jwal kaweb’ xpaab’aal. Kixpatz’ reheb’ naq te’xk’am chaq rik’in yalaq ani yaj malaj rahob’tesinb’il. A’an kiraj xk’irtesinkileb’ chixjunjunqaleb’.

3 Nefi 17:5–8

li Jesukristo naxtenq’a jun ch’ina al wan xyajel, ut wankeb’ chik li kok’al li neke’se’ek

Li kristiaan ke’chal rik’in a’an rochb’eeneb’ lix komon ut li ramiiw li yajeb’. Li Jesus kixk’irtesiheb’ chixjunjunqaleb’. Jwal ke’saho’ xch’ool. Ke’xwiq’ib’ rib’ ut ke’xtz’ub’ li roq.

3 Nefi 17:9–10

li Jesukristo na’aatinak rik’in jun ch’ina al, ut li kristiaan neke’xch’utub’ rib’ chixk’atq li Jesus rik’ineb’ lix kok’al

Li Jesus kixpatz’ reheb’ naq te’xk’am chaq lix kok’al rik’in. Li kristiaan ke’xk’am chaq lix kok’al ut ke’xk’eheb’ chi ch’och’ chixk’atq li Jesus.

3 Nefi 17:11–12

li Jesukristo nawiq’la ut natijok, ut eb’ li kok’al ut li ninq neke’wiq’la ut neke’tijok

Chirix naq ch’utub’anb’ileb’ chixjunil li kok’al aran, li Jesus kixpatz’ reheb’ li kristiaan naq te’xwiq’ib’ rib’. A’an kiwiq’la ajwi’. Toja’ naq kitijok chiru li qaChoxahil Yuwa’. K’a’jo’ xchaq’alil ru li aatin kixye, jo’kan naq ink’a’ kiru chi tz’iib’amank. Ke’nujak li kristiaan rik’in sahil ch’oolejil.

3 Nefi 17:13–18

li Jesukristo nase’ek, ut na’el xya’al ru

Li Jesus kixye reheb’ li kristiaan naq osob’tesinb’ileb’ xb’aan lix paab’aaleb’ chirix a’an. Xb’aan xnimal li sahil ch’oolejil nareek’a, li Jesus ki’ok chi yaab’ak.

3 Nefi 17:19–21

li Jesukristo naxq’alu jun ch’ina al, ut neke’se’ek lix komoneb’ li kok’al li wankeb’ chi nach’

Li Jesukristo kirosob’tesiheb’ li kok’al chixjunjunqaleb’. Kitijok chirixeb’ chiru li qaChoxahil Yuwa’. Kixpatz’ reheb’ li kristiaan naq te’iloq wankeb’ wi’ lix kok’al.

3 Nefi 17:21–23

li Jesukristo na’aatinak rik’ineb’ li kok’al, ut eb’ li anjel neke’kub’e chaq sa’ choxa ut neke’xch’utub’ rib’ chixsutameb’ li kok’al

Eb’ li anjel ke’kub’e chaq sa’ choxa ut ke’xch’utub’ rib’ chixsutameb’ li kok’al. Naq ke’osob’tesiik li kok’al xb’aaneb’ li anjel, ke’sute’ rix xb’aan li choxahil saqen. Sa’ jalan chik li kutan, li Jesus kixch’utub’eb’ wi’chik li kok’al ut kirosob’tesiheb’. Kirosob’tesiheb’ ajwi’ li kok’al re naq te’ruuq chi aatinak. Ke’aatinak ajwi’ li k’uula’al. Li kok’al ke’xk’ut xninqal ru na’leb’ chiruheb’ lix na’ xyuwa’.

3 Nefi 17:23–25; 26:14, 16