“Jun kaq-sut-iq’ sa’ li palaw,” Eb’ li Seraq’ sa’ lix Hu laj Mormon (2023)
“Jun kaq-sut-iq’ sa’ li palaw,” Eb’ li Seraq’ sa’ lix Hu laj Mormon
Jun kaq-sut-iq’ sa’ li palaw
Xtawb’al tuqtuukilal rik’in li Qaawa’
Li Qaawa’ kixye re laj Lehi naq xwulak xhoonal naq te’ok sa’ li jukub’. Eb’ li junkab’al ke’xch’utub’ naab’al li tzakemq choq’ re lix xikikeb’. Toja’ naq ke’ok chixjunileb’ sa’ li jukub’ ut ke’xchap xb’e sa’ xjayal li yeechi’inb’il ch’och’.
Chirix k’iila kutan sa’ xb’een li palaw, junjunq reheb’ li kristiaan ke’ok chixb’aanunkil ut chixyeeb’al li k’a’ru yib’ ru. Kisach sa’ xch’ooleb’ naq ke’tenq’aak xb’aan li Qaawa’.
Laj Nefi ki’ok xk’a’uxl naq te’xk’e chi josq’o’k li Qaawa’. Chi maak’a’ xtenq’ li Qaawa’, moko kolb’ilaq ta rix li jukub’. Laj Nefi kixpatz’ reheb’ li ras naq te’xkanab’ li k’a’ru yookeb’ chixb’aanunkil.
Laj Laman ut laj Lemuel ke’josq’o’ rik’in laj Nefi. Ke’xb’ak’ rik’in k’aam ut ke’xrahob’tesi. Ink’a’ ke’ab’in chiru li Qaawa’, ut li Liahona kixkanab’ k’anjelak. Kichal jun nimla kaq-sut-iq’. Chirix oxib’ kutan sa’ li kaq-sut-iq’, ke’xxuwa naq te’ok chi ha’.
Lix junkab’al laj Nefi ke’relaji re laj Laman ut laj Lamuel naq te’rach’ab’ laj Nefi. A’b’an laj Laman ut laj Lemuel ink’a’ ke’xkanab’eb’ chirach’ab’ankil laj Nefi. Ke’raho’ xch’ool li xSariah ut laj Lehi ut ke’yajer. Li kaq-sut-iq’ ink’a’ kich’ana.
Sa’ xkaa li kutan, laj Laman ut laj Lemuel ke’xnaw naq sub’e’k re li jukub’. Ke’xjal xk’a’uxl ut ke’rach’ab’ laj Nefi. Naq kitijok laj Nefi, kich’ana li kaq-sut-iq’. Li Liahona ki’ok wi’chik chi k’anjelak. Laj Nefi kiroksi a’an re xjayalinkil li jukub’.
Chirix xnumik k’iila kutan, ke’wulak li junkab’al sa’ li yeechi’inb’il ch’och’.