“Li rey aj Benjamin,” Eb’ li Seraq’ sa’ lix Hu laj Mormon (2023)
Li rey aj Benjamin
Li k’anjelak chiruheb’ li tenamit ut li Dios
Li rey aj Benjamin a’an chaq xprofeet li Dios li ki’awa’b’ejin sa’ li ch’och’ Tzarahemla. A’an kik’anjelak chi kaw chiru lix tenamit ut kixtzoleb’ chirix li Dios. Chi tenq’anb’il xb’aan xkomoneb’ chik lix profeet li Dios, laj Benjamin kixk’e chi uxk li tuqtuukilal ut li kolok-ix aran Tzarahemla.
Raatin laj Mormon 1:17–18; Mosiah 1:1–7
Kitix laj Benjamin. A’an kixpatz’ re laj Mosiah, li ralal, naq tixch’utub’eb’ li tenamit. Laj Benjamin kiraj xyeeb’al reheb’ naq laj Mosiah taa’ok choq’ xreyeb’.
Ke’chal chaq naab’al li tenamit sa’ chixjunil li ch’och’. Ke’xyiib’eb’ lix muheb’aal t’ikr chixsutam li santil ochoch re naq te’rab’i li raatin laj Benjamin.
Laj Benjamin ki’aatinak sa’ xb’een jun najt xteramil kab’l re naq li tenamit te’ruuq chirab’inkil. Laj Benjamin kixye naq kitenq’aak xb’aan li Dios sa’ xb’eresinkileb’. Jo’ rey, a’an kixk’ut chiruheb’ naq te’xpaab’eb’ lix taqlahom li Dios. Ink’a’ kixk’ul xtumineb’ chi moko kixmineb’ ru chi k’anjelak chiru. Kik’anjelak b’an chiru lix tenamit ut chiru li Dios.
Laj Benjamin kixye re li tenamit naq sa’ li k’anjelak chiruheb’ li ras riitz’in, yookeb’ ajwi’ chi k’anjelak chiru li Dios. Toja’ naq kixye reheb’ naq chixjunil li wan reheb’ k’eeb’il xb’aan li Dios. Jo’ reeqaj, li Dios kiraj naq te’xpaab’eb’ lix taqlahom. Naq ke’paab’an, li Dios kixk’e xkomon chik li rosob’tesihom reheb’.
Laj Benjamin kixye reheb’ naq ink’a’ chik naru nawan jo’ xreyeb’ ut aj tzolonel reheb’. Laj Mosiah, li ralal, taa’ok choq’ xreyeb’.
Chirix a’an laj Benjamin kixye re lix tenamit naq x’ula’aniik xb’aan jun li anjel. Li anjel kixye naq li Ralal li Dios, li Jesukristo, taak’ulunq sa’ ruchich’och’. A’an tixb’aanuheb’ li sachb’a-ch’oolej ut tixk’irtesiheb’ li kristiaan. Tixk’ul rahilal ut taakamq re xkolb’al chixjunileb’ li kristiaan. Laj Benjamin kixk’ut naq li Jesus tixkuy xmaakeb’ chixjunileeb’ li neke’paab’ank re ut neke’xjal xk’a’uxl.
Li tenamit ke’xpaab’ li na’leb’ kixk’ut li rey aj Benjamin chiruheb’ chirix li Jesus. Ke’xnaw naq tento te’xjal xk’a’uxl. Chixjunileb’ ke’tijok ut ke’xpatz’ re li Dios naq tixkuyeb’ xmaak. Chirix naq ke’tijok, lix Musiq’ li Dios kiwan rik’ineb’. Ke’saho’ xch’ool ut ke’xnaw naq li Dios xkuyeb’ lix maak xb’aan lix paab’aaleb’ chirix li Jesus.
Li tenamit ke’reek’a naq jalb’ileb’ ut ak’ob’resinb’il li raameb’ xb’aan naq wankeb’ xpaab’aal chirix li Jesus. Anajwan ke’raj chik xb’aanunkil li us sa’ chixjunil hoonal. Ke’ok sa’ aatin naq te’xtaaqeheb’ lix taqlahom li Dios chiru chixjunil lix yu’ameb’. Xb’aan naq ke’xpaab’ li Jesus ut ke’ok sa’ aatin, ke’k’ab’a’iik lix tenamit li Jesus.