Li profeet aj Mormon

Xtz’iib’ankil lix Hu laj Mormon

li kristiaan neke’xyiib’ li k’anjeleb’aal re pleet, ut laj Mormon, naq toj ka’ch’in chaq, ut lix na’ neke’xaqli chixk’atq jun meex nujenaq rik’ineb’ li yok’leb’ ch’iich’

Laj Mormon a’an jun aj Nefita li naxpaab’ li Jesukristo. Kiyo’la sa’ jun kutan naq lix k’ihaleb’ li kristiaan ink’a’ neke’ab’in chiruheb’ lix taqlahom li Dios. Li kristiaan ke’elq’ak ut ke’xkamsi rib’ chirib’ileb’ rib’ re xtawb’al li tumin ut li wankilal. Ke’wanje’ k’iila pleet.

3 Nefi 5:12–13; 4 Nefi 1:27–49; Mormon 1:1–3, 15, 18–19

laj Ammaron na’aatinak rik’in laj Mormon ut lix na’ naq neke’raw li rawimq, ut yookeb’ chi k’anjelak ajwi’ naab’aleb’ li kristiaan sa’ li awimq

Naq laj Moroni wan chaq lajeeb’ chihab’ re, jun winq aj Ammaron xk’ab’a’ kiwulak rik’in. A’ laj Ammaron kik’uulan resilaleb’ laj Nefita. Laj Ammaron kixpaab’ re laj Mormon ut kixye re naq muqmuukeb’ li tz’iib’anb’il esil sa’ jun li tzuul. Laj Ammaron kixye naq sa’ li hoonal naq laj Mormon tixket 24 chihab’, laj Mormon tento tixtz’iib’a li k’a’ru rilom sa’ lix tenamiteb’ a’an ut tixtiq sa’ xyanqeb’ li tz’iib’anb’il esil.

4 Nefi 1:47–49; Mormon 1:2–4

li saaj aj Mormon natijok sa’ k’iche’, ut li saqen naxsut rix

Naq yoo chi k’iik laj Mormon, kijultiko’ re li k’a’ru kixpatz’ laj Ammaron naq tixb’aanu. Naq 15 chihab’ wan chaq re, laj Mormon ki’ula’aniik xb’aan li Qaawa’. Laj Mormon kixtaw xna’leb’ chirix lix chaab’ilal li Jesus.

Mormon 1:5, 15

li saaj aj Mormon tiqto sa’ kolb’a-ib’ aq’ej ut na’ilok wan wi’ jun teep aj pleet aj Nefita

Us ta toj saaj laj Mormon, q’axal kaw rib’. Eb’ laj Nefita ke’xsik’ ru jo’ aj taqlanel sa’ xb’eeneb’ lix teep aj pleet. Laj Mormon kixraheb’ li kristiaan chi anchal xch’ool. Kiraj naq te’ab’inq chiru li Dios ut naq te’saho’q xch’ool.

Mormon 2:1–2, 12, 15, 19; 3:12

laj Mormon ra xch’ool ut natijok, ut yoo chi k’atk li ch’och’ chirix

Laj Mormon kixyal xtenq’ankileb’ li kristiaan. Kitijok chirixeb’ a’an wulaj wulaj. Li kristiaan ke’xnaw naq ink’a’ us lix b’aanuhomeb’, a’b’an ink’a’ ke’raj xjalb’aleb’ xk’a’uxl. Lix wankilal li Dios ink’a’ chik naxtenq’aheb’. Xb’aan naq maak’a’eb’ xpaab’aal, maak’a’eb’ chik li sachb’a-ch’oolej. Ink’a’ ke’xkanab’ pleetik, ut naab’aleb’ ke’kam. Ra xch’ool laj Mormon.

Mormon 1:13–14, 16–19; 2:23–27; 3:1–12; 4:5, 9–12; 5:1–7

laj Mormon naxk’uub’eb’ ut natz’iib’ak chiruheb’ li perel ch’iich’

Naq wan tana 24 chihab’ re, laj Mormon kiwulak sa’ li tzuul muqmuukeb’ wi’ li tz’iib’anb’il esil. Ki’ok chixtz’iib’ankileb’ lix seraq’ ut lix k’utum lix tenamit chiruheb’ li perel ch’iich’. Li Dios kixtenq’a chixnawb’al k’a’ru tixtz’iib’a. Laj Mormon kixk’uub’ li tz’iib’anb’il esil chiru k’iila chihab’. Sa’ li kutan a’in, li esil a’an nawb’il ru jo’ lix Hu laj Mormon.

Raatin laj Mormon 1:3–9; Mormon 1:3–4; 2:17–18

laj Mormon, li rixaqil, ut eb’ li kok’al neke’b’eek

Chirix k’iila pleet, eb’ laj Lamanita ak neke’xkamsi lix k’ihaleb’ laj Nefita. Laj Mormon kixnaw naq oso’k re lix tenamit. Kiraho’ xch’ool xb’aan naq ink’a’ ke’xjal xk’a’uxl ut ink’a’ ke’xpatz’ xtenq’ankileb’ rik’in li Dios. A’an kitijok ut kixpatz’ re li Dios naq tixkoleb’ rix li perel ch’iich’. Kixnaw naq kolb’ilaqeb’ rix li perel ch’iich’ xb’aan naq tz’iib’anb’il li raatin li Dios chiruheb’.

Raatin laj Mormon 1:11; Mormon 5:11; 6:6, 16–22

laj Mormon naq ak cheek chik naxk’eheb’ li perel ch’iich’ re laj Moroni, li ralal

Laj Mormon kiraj naq li kristiaan te’xpaab’ li Jesus. Kiroyb’eni naq naab’aleb’ li kristiaan te’ril li hu sa’ junaq kutan chalel. Q’axal kiraj naq eb’ lix junkab’aleb’ laj Lamanita te’ril ru sa’ junaq kutan. Wi te’ril, te’tzoloq chirix li Jesus. Rub’elaj naq kikam laj Mormon, kixk’e li tz’iib’anb’il esil re laj Moroni, li ralal, re naq kolb’ilaq rix.

Raatin laj Mormon 1:1–2; Mormon 3:17–22; 5:8–24; 6:6; 7; 8:1