“Laj Jakob ut laj Xerem,” Eb’ li Seraq’ sa’ lix Hu laj Mormon (2023)
Laj Jakob ut laj Xerem
Lix nawom xch’ool jun profeet chirix li Jesukristo
Laj Jakob a’an chaq jun profeet li ki’ilok re li Jesukristo. A’an kiraj naq li tenamit te’xpaab’ li Jesus. Laj Jakob kixtzol li tenamit naq te’xpaab’eb’ lix taqlahom li Dios. Kik’anjelak chi kaw re xtzolb’aleb’ li tenamit chirix li Jesus.
2 Nefi 11:2–3; Jakob 1:1–8, 17–19
Sa’ jun li kutan, jun winq aj Xerem xk’ab’a’ ki’ok chixtzolb’aleb’ li tenamit. A’b’an laj Xerem kixk’ut naq moko yaal ta li Jesus. Seeb’ chi aatinak laj Xerem, ut naab’aleb’ laj Nefita ke’xpaab’ li kixye. Xb’aan a’an, naab’aleb’ ke’xkanab’ xpaab’ankil li Jesus. Laj Xerem kiraj ajwi’ naq laj Jakob tixkanab’ xpaab’ankil li Jesus.
Laj Xerem kixye naq maa’ani taaruuq tixnaw k’a’ru taak’ulmanq chalel. Kixye naq a’an naraj naxye naq maa’ani taaruuq tixnaw ma yaal li Jesus, xb’aan naq maji’ nak’ulun li Jesus sa’ ruchich’och’. A’b’an laj Jakob kixye naq eb’ li loq’laj hu ut chixjunileb’ li profeet ke’k’utuk chirix li Jesus. Li Dios ak kixk’ut chiru laj Jakob naq taak’ulunq li Jesus sa’ ruchich’och’.
Laj Xerem toj ink’a’ kipaab’an. A’an kiraj naq laj Jakob tixk’ut jun eetalil chiru naq yaal li Jesus.
Laj Jakob kixye naq laj Xerem ak naxnaw naq taak’ulunq li Jesus jo’kan naq ink’a’ taa’ajmanq jun eetalil. A’ut laj Jakob kixye naq li Dios tixk’e chi luktaak laj Xerem re xk’utb’al naq wan xwankil li Dios ut naq yaal li Jesus.
Sa’ junpaat, laj Xerem kiyajer ut kit’ane’ chi ch’och’. Chirix naab’al kutan, kixnaw chik naq kamk re. A’an kixye reheb’ li tenamit naq kib’alaq’iik xb’aan laj Satanas. Kixye naq kitikʼtiʼik chiru li Dios. Junelik kixnaw naq yaal li Jesus. Toja’ naq kikam laj Xerem. Li tenamit ke’rileb’ li loq’laj hu ut ke’xpaab’ li Jesus.