“Eb’ li reetalil lix yo’lajik li Jesus,” Eb’ li Seraq’ sa’ lix Hu laj Mormon (2023)
Eb’ li reetalil lix yo’lajik li Jesus
Xpaab’ankil lix k’utum jun li profeet
Ak oob’ chihab’ chaq naq kik’utuk li profeet aj Samuel chirixeb’ li reetalil lix yo’lajik li Jesukristo. Ke’wan naab’aleb’ li ke’paab’an ut ke’yo’len re xk’eeb’al reetaleb’ li eetalil. Ke’wan chik li ke’xye naq moko yaal ta li raatin laj Samuel ut naq ak numenaq li kutan re te’k’utmanq li eetalil. Ke’reetz’uheb’ laj paab’anel ut ke’xye naq li Jesus ink’a’ taak’ulunq.
Ke’ok xk’a’uxl laj paab’anel, a’b’an ke’wan xpaab’aal. Toj ke’yo’len re xk’eeb’al reetaleb’ li eetalil. Jun reheb’ li eetalil, a’an naq taawanq jun li q’ojyin li chanchan li kutan. Taawanq li kutan chiru li q’ojyin chanchan naq a’an ajwi’ kutan us ta nakub’e li saq’e. Li q’ojyin maak’a’ wi’ li q’ojyin a’anaq reetalil naq taayo’laaq li Jesus sa’ li jun kutan chik sa’ jalan chik li ch’och’.
Eb’ li ink’a’ ke’paab’an ke’xk’uub’ xna’leb’eb’. Ke’xsik’ ru jun kutan ut ke’xye naq wi maji’ nak’utun li eetalil naq ak taawulaq li kutan a’an, te’kamsiiq laj paab’anel.
Jun winq aj Nefi xk’ab’a’ a’an li profeet sa’ li kutan a’an. Kiraho’ xch’ool naq ke’wan li ani ke’raj xkamsinkileb’ laj paab’anel.
Laj Nefi kiwiq’la chi ch’och’ ut kitijok chiru li Dios choq’ reheb’ laj paab’anel li te’kamsiiq xb’aan lix paab’aaleb’. Kitijok chiru chixjunil li kutan.
Jo’ xsumenkil lix tij, laj Nefi kirab’i lix yaab’ xkux li Jesus. Li Jesus kixye naq taak’utmanq li eetalil sa’ li q’ojyin a’an ut naq a’an taayo’laaq wulajaq.
Chiru li q’ojyin a’an maak’a’ li q’ojyin us ta kikub’e li saq’e. Eb’ li ink’a’ ke’xpaab’ li raatin laj Samuel jwal ke’sach xch’ool jo’kan naq ke’t’ane’ chi ch’och’. Ke’chal xxiw xb’aan naq moko ke’paab’an ta. Eb’ laj paab’anel ink’a’ ke’kamsiik.
Wulajaq, kik’utun li saq’e ut toj kikana chi kutanob’resinb’il li choxa. Chixjunileb’ ke’xnaw naq a’an a’in li kutan taayo’laaq wi’ li Jesus.
Eb’ li tenamit ke’xk’e reetal jun chik eetalil. Kik’utun jun li ak’ chahim sa’ choxa. Ke’tz’aqlok ru chixjunileb’ li eetalil yeeb’ileb’ resil xb’aan laj Samuel. Naab’aleb’ chik li tenamit ke’xpaab’ li Jesus ut ke’kub’e xha’.