“22–28 Jenuware: ‘Oli Blokem Olgeta Wetem Stret mo Gud Fasin mo Paoa blong God.’ 1 Nifae 11–15,” Kam Folem Mi—Blong Hom mo Jos: Buk blong Momon 2024 (2024)
“22–28 Jenuware. 1 Nifae 1–7,” Kam Folem Mi—Blong Hom mo Jos: 2024 (2024)
Lav blong God, i kam long Sabrina Squires
22–28 Jenuware: “Oli Blokem Olgeta Wetem Stret Fasin mo Paoa blong God”
1 Nifae 11–15
Taem God i gat wan spesel wok blong profet blong Hem blong mekem, oltaem bae i givim wan spesel visen long profet ia. Moses, Jon, Lihae, mo Josef Smit, evriwan oli bin gat wan visen olsem hemia—ol visen we i openem ol maen blong olgeta mo helpem olgeta blong luk olsem wanem wok blong God i bigwan mo i kam wetem insperesen.
Nifae i bin gat wan visen ia we i bin jenisim laef blong hem. Hem i bin luk seves blong Sevya, fiuja laen blong Lihae long graon blong promes, mo fiuja long taem blong ol las dei blong wok blong God. Afta long visen ia, i bin mekem Nifae i rere gud from wok we i stap long fored. Mo stap ridim abaot visen ia i save helpem yu rere tu—from God i gat wok blong yu tu blong mekem long kingdom blong Hem. Yufala i stap insaed long grup blong “ol sent blong Jos blong Smol Sipsip” we Nifae i bin luk, “we i bin seraot olbaot long ful fes blong wol; mo oli blokem olgeta wetem stret mo gud fasin mo paoa blong God long bigfala glori” (1Nifae 14: 14).
Luk tu long “Nephi Sees a Vision of Future Events” (vidio), Gospel Library.
Ol Tingting blong Stap Lan long Hom mo long Jos
God i sendem Jisas Kraes olsem wan wei blong soemaot lav blong Hem.
Taem Nifae i bin askem enjel long mining blong tri ia we Lihae i luk long visen blong hem, enjel i sapos blong talem nomo se, “I minim lav blong God.” Be wanem hem i mekem hem i soem Nifae wan pat blong ol simbol mo ol taem we i tokbaot laef blong Sevya. Lukaotem ol simbol ia mo ol taem ia taem yu stap rid mo tingting hevi 1 Nifae 11. ?Wanem nao yu faenem we i helpem yu andastanem from wanem Jisas Kraes i wei ia nao blong soemaot lav blong God?
Ating bae yu gat tingting ia blong watjem ol Baebol Vidio long Gospel Library we i go gud wetem ol taem we Nifae i bin luk. ?Olsem wanem Sevya i bin helpem yu filim lav blong Papa long Heven?
Luk tu long Susan H. Porter, “Lav blong God: Glad we I Bigwan Olgeta long Sol,,” Liahona, Nov. 2021, 33–35.
Oli save “blokem mi wetem stret mo gud fasin” mo paoa.
Nifae bae i no laef longtaem blong witnesem plante long ol samting we hem i bin luk long visen blong hem. ?From wanem yu ting se i impoten tumas blong Nifae i mas save olgeta samting ia? “?From wanem hem i impoten blong yu yu save ol samting ia? Askem ol kwestin ia evri taem we yu rid abaot wan samting we Nifae i bin luk long visen blong hem (luk long 1 Nifae 12–14). ?Wanem ol filing we yu kasem abaot pat blong yu long “bigfala mo … gudfala wok” ia blong Lod? (1 Nifae 14:7). ?Wanem nao sam long ol bigfala mo gudfala samting we God i bin mekem blong yu?
Tingbaot speseli promes long 1 Nifae 14:14. Olsem wanem nao Sevya i bin fulfilim promes ia long laef blong yu? (Blong sam eksampol, luk long David A. Bednar, “Wetem Paoa blong God long Bigfala Glori,” Liahona, Nov. 2021, 28–30, speseli tufala las seksen.)
?Wanem ia hem i “bigfala mo rabis jos” we Nifae i bin luk?
Presiden Dallin H. Oaks i bin eksplenem se “bigfala mo rabis jos” ia we Nifae i tokbaot gud, i ripresentem “eni tingting o oganaesesen we i no bilif long God. Mo ‘fasin blong stap slef’ we ‘jos’ ia i wantem tekem ol sent oli go long hem, bae i no blong oli slef long saed blong bodi, be slef blong ol giaman tingting” (“Stand as Witnesses of God,” Ensign, Mar. 2015, 32). ?Olsem wanem nao Sevya i stap helpem yu blong kamaot—mo ronwe long—fasin blong stap slef wetem ol giaman tingting?
God bae i ansarem mi sapos mi askem wetem fet.
?Yu bin filim finis olsem se yu no stap kasem revelesen blong yuwan—se God i no stap toktok wetem yu? ?Wanem advaes nao Nifae i bin givim long ol brata blong hem taem oli bin filim olsem? (Luk long 1 Nifae 15:1–11.) ?Olsem wanem nao yu save yusum kaonsel blong Nifae insaed long laef blong yu?
Stap Holemtaet toktok blong God i helpem mi blong mi save winim paoa blong Setan.
Oltaem Nifae i gat ol impoten samting blong talem long ol brata blong hem. Be i luk olsem hem i gat dip filing abaot wanem we hem i bin talem long olgeta long 1 Nifae 15:23–25. ?Wanem mesej blong Nifae, mo from wanem yu ting se hem i gat strong tingting long saed ia?
Elda Deved A. Bednar i bin tijim se “toktok blong God” i save minim olgeta skripja, ol toktok blong ol profet we i laef, mo long Jisas Kraes Hemwan. ? Yu ting se i minim wanem blong “hang strong” long ol skripja mo ol toktok blong ol profet we oli stap laef? ?Wanem nao i minim blong “hang strong” long Jisas Kraes? Ating bae yu save faenem sam ansa long ol kwestin ia long mesej blong Elda Bednar “Be Mifala I No Lisin long Olgeta” (Liahona, Mei 2022, 14–16).
?Olsem wanem blong stap holemtaet toktok blong God i helpem yu blong winim Setan? Fulumap wan jat olsem hemia we i stap daon ia bae i save help blong oganaesem ol tingting blong yu:
|
… ?helpem mi winim ol temtesen blong tudak? (luk long 1 Nifae 12:17) |
… ?helpem mi blong “no lisin” long olgeta wetem praed blong wol (1 Nifae 12:18) | |
|
Olsem wanem blong stap hang strong long ol skripja mo ol toktok blong ol profet we oli stap laef … | ||
|
Olsem wanem blong stap hang strong long Sevya … |
Luk tu long “The Iron Rod,” Hymns, no. 274; Jorge F. Zeballos, “Bildimap wan Laef blong Winim Enemi,” Liahona, Nov. 2022, 50–52.
pipol we i stap holem aean rel we i lidim olgeta i go long tri blong laef.
Blong moa tingting, luk long ol namba blong manis ia Liahona mo Blong Ol Yut Oli Kam Strong magasin.
Sam Tingting blong Tijim Ol Pikinini
Papa long Heven i sendem Jisas Kraes i kam long wol ia from se Hem i lavem mi.
-
Blong tijim Nifae abaot lav blong God, wan enjel i soem Nifae ol taem blong laef blong Sevya Yu save mekem sem samting blong ol pikinini blong yu—givim ol pikja blong ol taem we Nifae i bin luk, long 1 Nifae 11:20, 24, 27, 31, mo 33 (luk long Gospel Art Buk, ol namba ia. 30, 35, 39, 42, 57). Taem yu stap ridim ol ves ia, helpem ol pikinini blong yu blong faenem pikja we i go wetem ol ves ia. ?Wanem nao yumi lanem abaot Jisas Kraes long ol ves ia mo ol pikja ia?
-
Singsing wan singsing olsem “He Sent His Son” (Children’s Songbook, 34–35) i save helpem ol pikinini blong yu oli filim lav blong God. Afta singsing, askem ol pikinini blong yu long wanem nao oli lanem aot long singsing ia. Wanem bakegen yumi lanem abaot lav blong God long 1 Nifae 11:22–23?
Yusum ol pikja blong helpem ol pikinini blong stap lan. Taem yu tijim wan skripja stori long ol pikinini, faenem ol wei we bae i helpem olgeta blong luk ol stori ia long maen blong olgeta. Yu save yusum ol pikja, ol vidio, ol papet, ol klos, mo sam narafala moa.
Buk blong Momon i tijim sam naesfala trutok.
-
Blong helpem ol pikinini blong yu oli tekem ol trutok insaed long Buk blong Momon oli “klia mo gudgudfala”, yu save droem wan pikja mo invaetem ol pikinini blong yu blong jenisim o karemaot ol pat blong pikja ia blong mekem i defren. Yu save yusum hemia blong tijim se ol samting long Baebol i bin jenis mo oli bin karemaot blong sam taem i pas. Rid tugeta long 1 Nifae 13:40 mo tokbaot olsem wanem Buk blong Momon (“ol las rekod ia”) i helpem yumi blong andastanem “ol klia mo gudgudfala samting” we i bin lus aot long Baebol (ol “fas” rekod). ?Wanem klia mo gudgudfala trutok nao yu bin lanem aot long Buk blong Momon?
-
Vidio ia “The Book of Mormon—a Book from God” (Gospel Library) i save helpem ol pikinini blong yu oli luk from wanem i impoten blong gat tugeta Baebol mo Buk blong Momon. Ol pikinini bae oli glad blong mekem bakegen ol pikja aot long vidio we oli wajem.
Buk blong Momon i putumbak ol trutok blong gospel we oli bin lus long taem blong Apostasi.
Stap holemtaet toktok blong God i helpem mi blong winim temtesen.
-
Givim janis long ol pikinini blong yu blong serem wanem oli tingbaot long visen blong Lihae. Bae i help blong gat wan pikja blong oli yusum, olsem hemia long aotlaen blong laswik. ?Wanem nao i stap blokem ol man blong kasem tri ia? ?Wanem nao i helpem olgeta blong kasem tri ia? Maet yu save askem olgeta blong faenem aean rel long pikja ia. Tugeta ridim 1 Nifae 15:23–24 blong faenemaot wanem aean rel i minim mo olsem wanem i save helpem yumi.
Blong kasem moa tingting, luk long namba blong manis ia blong Fren magasin.
Visen blong Nifae abaot Meri, i kam long James Johnson