Atama kei Ivi, mai vei Douglas Fryer

5–11 ni Feperueri: “Galala mo Digitaka na Galala kei na Bula Tawamudu, ena vukui Koya na Dauveivakaduavatataki ni Tamata Kecega”

2 Nifai 1–2

Kevaka o kila ni sa vakarau cava na nomu bula, na cava na iotioti ni tukutuku o vinakata mo wasea kei ira o lomana vakalevu? Ni sa vakila na parofita o Liai ni sa voleka ni cava na nona bula, a soqona vata na nona matavuvale ena iotioti ni gauna. A wasea vei ira na veika sa vakatakila vua na Tamada Vakalomalagi. A wasea na nona ivakadinadina me baleta na Mesaia. A vakatavulica na dina ni kosipeli e dau vakamareqeta vei ira na tamata e dau vakamareqeta. E vakatavulica na tu galala, talairawarawa, na Lutu nei Atama kei Ivi, na veivueti mai vei Jisu Karisito, kei na reki. E sega ni o ira kece na luvena era digitaka me ra bula ena veika a vakavulica—e sega ni dua vei keda e rawa ni cakava na digidigi oqo me baleti ira na noda daulomani. Ia e rawa ni da veivakavulici ka vakadinadinataka na Dauveivueti, o koya e vakavuna meda “galala meda digitaka na galala kei na bula tawamudu” (raica na 2 Nifai 2:26–27).

Vakasama eso ni Vuli ena iTikotiko kei na Lotu

2 Nifai 1:13–29

Au sa rawa ni “yadra! ka tucake mai na kuvu ni soso.”

Ena 2 Nifai 1:13–29, raica na vosa a vakayagataka o Liai me vakamacalataka kina na ituvaki vakayalo nei Leimani kei Lemueli. Na cava e vukei iko mo yadra mai na “moce lutu”? Na cava e vukei iko mo kuretaka tani na “sinucodo” vakayalo ena nomu bula? Vakasamataka mada na ivakadinadina i Liai ena tikina e 15 kei na nona veisureti ena tikina e 23. Na itukutuku cava e solia vei iko na Tamada Vakalomalagi ena veitikina oqo?

Vakayagataka na ivakaraitaki. Na vakayagataki ni ivakaraitaki ena vukei ira na vuli me ra kila na dina ni kosipeli ka nanuma tiko vakabalavu. Ni o vakavakarau mo veivakavulici mai na ituvatuva oqo, vakasamataka na vakaraitaki cava o rawa ni vakayagataka. Me ivakaraitaki, e rawa ni dua na sinucodo pepa e rawa ni vukei ira na vuli me ra kila na vosa nei Liai ena 2 Nifai 1:13 se 2 Nifai 2:27.

2 Nifai 2

Ena vukui Jisu Karisito, au sa “galala meu digitaka na galala kei na bula tawamudu.”

Sa yaco tiko oqo ena dua na vanua vou na matavuvale nei Liai, ka sinai tu ena veika vovou. Na nodra digidigi ena vanua vou oqo ena bibi sara ki na nodra qaqa kei na bula marau. Oqo beka na vuna a vakavulica kina o Liai vei luvena o Jekope me baleta na galala ni digidigi, se na rawati ni digidigi, ena 2 Nifai 2. Ni o vulica na tikina e 11–30, vola na isau ni taro eso oqo:

• Na cava sa rui bibi kina vua na Tamada Vakalomalagi na galala ni digidigi, e dina ga ni so na tamata era vakayagataka ena sala mosimosi?

• E saga vakacava o vu-ni-ca me vakamalumutaka se vakarusa na nomu galala ni digidigi?

• E dau vukei keda vakacava na iVakabula meda “digitaka na galala kei na bula tawamudu” (na tikina e 27)?

Oqo e dua tale na sala me vulici kina na galala ni digidigi ena 2 Nifai 2: Vakaraica na veika e yaga vei keda me da galala kina me da digidigi ka yacova na keda inaki vakalou. Me kena ivakaraitaki:

• 2 Nifai 2:5: Na kilai ni vinaka kei na ca; e dua na lawa

• 2 Nifai 2:11, 16:

• 2 Nifai 2:16:

• 2 Nifai 2:21:

• 2 Nifai 2:6–9, 26–28:

Na cava ena yaco ki na noda galala kevaka e yali e dua se sivia na veitikina oqo?

Na iwase yadua ena ono ni Me iSakisaki ni iTabagone: E Dua na iDusidusi me Vakayacori na Digidigi e tiko kina na “Veisureti” kei na “Kalougata Yalataki.” Raica e dua se sivia na iwase oqo, ka digitaka e dua na veivakalougatataki yalataki o nuitaka ena nomu bula. Na veisureti cava o gadreva mo cakacakataka mo ciqoma kina na veivakalougatataki oqo? Sa rawa mo wasea vua e dua na veivakalougatataki o sa ciqoma ena nomu muria na veisureti oqo.

Raica talega na Ulutaga Vakosipeli, “Agency and Accountability,” Gospel Library; “Know This, That Every Soul Is Free,” Serenilotu, naba 240.

2 Nifai 2:1–4, 6–25

Na Kalou e rawa ni vukica na noqu veivakatovolei ki na veivakalougatataki.

E kila o Liai ni a sotava na luvena tagane o Jekope na “leqa” kei na “veika rarawa e vuqa” ena gauna se gone kina (2 Nifai 2:1). Na cava na vuna o nanuma kina ni na yaga sara vei Jekope na ivakadinadina i Liai ena 2 Nifai 2:1–3, 6–25 ? Na cava e yaga vakalevu kina vei iko? Vakaraica na vosa kei na malanivosa o kunea ni kaukauwa sara. Sa vakatabuya vakacava na Kalou na nomu rarawa me yaga vei iko? Raica na 2 Nifai 2:2.)

Raica talega na Roma 8:28; Dale G. Renlund, “Veika Tawadodonu Veivakacudrui,” Liaona, Me 2021, 41–45.

2 Nifai 2:15–29

Na Lutu kei na Veisorovaki i Jisu Karisito e tiki bibi ni ituvatuva ni Tamada Vakalomalagi.

E vuqa na tamata era vakabauta ni Lutu e dua walega na vakacalaka ka rau a cakava o Ivi kei Atama e dua na cala tudei ena nodrau digitaka me rau kania na vuanikau. Ena 2 Nifai 2:15–28, e vakavulica kina o Liai na ikuri ni dina me baleta na Lutu—kei na veivueti ena vukui Karisito. Ni o vakasaqara na veitikina oqo, vola na dina eso me baleta na veika a yaco ena Were o Iteni. Na vei taro vaka oqo ena rawa ni veivuke:

• Na cava na vuna e yaga kina na Lutu?

• Na itavi cava a vakayacora o Jisu Karisito me ulabaleta kina na revurevu ni Lutu?

• Ena vukei keda vakacava noda kila vakadodonu na Lutu meda kila vinaka cake kina ni da sa gadrevi Jisu Karisito?

Raica talega na Dallin H. Oaks, “The Great Plan of Happiness,” Ensign, Nov. 1993, 72–75.

Me baleta na vakasama tale eso, raica na ilavelave ni vula oqo ni Liaona kei na Me iSakisaki ni iTabagone ena kena mekasini.

Me Kakua ni Rarawa na Lomamudou, mai vei Howard Lyon

Vakasama ni Nodra Tuberi na Gonelalai

2 Nifai 1:13, 15, 23.

E vukei au o Jisu Karisito meu ulabaleta na revurevu ni ivalavala ca.

• Me vukei ira na luvemu me ra kila na veisureti nei Liai me ra “kuretaka tani na sinucodo” ni ivalavala ca, de rawa ni o cakacaka vata mo cakava e dua na sinucodo mai na tiki ni pepa. Ena veitiki ni pepa, e rawa ni ra vukei iko na luvemu mo vola eso na ka e temaki keda kina o Setani me da cakava. Mo ni qai wilika vata na 2 Nifai 1:13, 15, 23 ni ra matanataka eso na malanivosa ena veitikina oqo—oka kina na kuretaka tani na sinucodo pepa. E tautauvata vakacava na ivalavala ca kei na sinucodo? E vukei keda vakacava o Jisu me da “kuretaka tani na sinucodo” ni ivalavala ca?

2 Nifai 1:20

Au sa vakalougatataki niu talairawarawa ki na ivakaro ni Kalou.

• Ena vukei ira beka na luvemu me ra vakatauvatana na ivakaro ni Kalou ki na ivava, isala, qaniliga, se so tale na ka e taqomaki keda? Sa rawa mo laivi ira mera tovolea eso ni ko veivosakitaka na sala e taqomaki keda kina na ivakaro. Oti mo qai wilika na 2 Nifai 1:20, ka vakabibitaka ni da na “sautu” (ka sa vakalougatataki se taqomaki) ni da muria na ivakaro. Wasea e dua na gauna o a vakalougatataki se taqomaki kina ena nomu muria na ivakaro.

• Mo vakaraitaka na duidui ni sautu kei na muduki tani mai vua na Kalou (raica na 2 Nifai 1:20), sa rawa vei iko kei ira na luvemu mo raica e dua na kau bulabula kei na dua na draunikau se tabana sa muduki tani mai na vunikau. Sa rawa ni ra qai railesuva na luvemu na digidigi a cakava o Nifai kei iratou na tuakana (raica na 1 Nifai 2:11–16; 3:5–7; 18:9–11). Na cava na revurevu ni digidigi oqo? Na digidigi cava ena vukei keda meda sema tikoga vua na Kalou?

2 Nifai 2:11, 16, 27).

E solia vei au na Kalou na galala meu digidigi.

• Mo vukei ira na luvemu me ra kila vinaka na veika a vakavulica o Liai me baleta na veibasai kei na digidigi, e rawa ni o cakava e dua na qito o cavuta kina e dua na vosa (me vaka na rarama) ka ra kaya na luvemu na kena veibasai (butobuto). Vukei ira me ra vulica na vuna e tiki ni ituvatuva ni Kalou na veibasai ni o wilika vata na 2 Nifai 2:11, 16. Tukuna vei ira na gone na kena italanoa e dua na gone a temaki me digitaka na cala. E rawa ni ra wasea na luvemu na cava na veibasai ni digidigi cala oya ka matanataka.

• Mo vulica na kedrau duidui na “galala” kei na “tiko vakavesu” (2 Nifai 2:27), e rawa ni ra droinitaka na luvemu na iyaloyalo ni dua na manumanu ena kena bai kei na dua na manumanu ena vanua e tu kina vakai koya. Na manumanu cava e galala? Sureti ira na gone me ra dusia na iyaloyalo dodonu ni o wilika na vosa “galala” ena 2 Nifai 2:27. Vakadinadinataka ni sa sereki keda o Jisu Karisito.

• Lagata vata na sere me vakataka na “Digitaka na Dodonu” (Serenilotu, naba 142). Na cava eda vulica mai na sere oqo me baleta na digidigi?

Me baleta na vakasama tale eso, raica na ilavelave ni vula oqo ni iTokani ena kena mekasini

Era sa Yaco mai ki na Vuravura Vou o Liai kei na Nona Tamata, mai vei Clark Kelley Price