29 ni Janueri-4 ni Feperueri: “Kau na Vakarautaka na Sala Vei Kemudou”

1 Nifai 16–22

Ena nodratou ilakolako ki na vanua yalataki o Liai kei na nona matavuvale, e yalataka vei iratou na veika oqo na Turaga: “Ka’u na vakarautaka na sala vei kemudou kevaka dou na muria na noqu ivakaro” (1 Nifai 17:13 E matata sara, ni yalayala oqori e sega ni kena ibalebale ni na rawarawa na ilakolako—era veiba tikoga na lewe ni vuvale, e ramusu na dakai titi, era sotava tiko na dredre na tamata ka ra mate, ka gadrevi me ratou tara e dua na waqa mai na yaya sega ni vakarautaki rawa tu. Ia, ena gauna era sotava kina na vuvale na dredre kei na itavi e voleka ni sega ni vakaoti rawa, e vakila tikoga o Nifai ni sega ni yawa mai vei iratou na Turaga. E kila o koya ni Kalou e “na karoni ira [na yalodina], ka vakaukauwataki ira, ka vakarautaka talega na sala me ra rawata kina na ka sa vakarota vei ira” (1 Nifai 17:3). Kevaka o vakataroga se cava e yaco kina na ka ca vei ira na tamata vinaka me vakataki Nifai kei na nona vuvale, ena rawa ni o kunea na rai titobu ena wase ni vola eso oqo. Ia e bibi cake mo raica, na veika era cakava na tamata vinaka ni yaco na veika ca.

Vakasama eso ni Vuli e Vale vakakina ena Lotu

1 Nifai 16–18

Ena vukei au na iVakabula meu sotava na bolebole ni bula oqo.

A sotava na matavuvale nei Nifai eso na bolebole dredre—me vakataki keda kece. Na cava o rawa ni vulica mai vei Nifai me baleta na sotavi ni dredre ena vakabauti Jisu Karisito? Wilika na veika a sotava o koya ena 1 Nifai 16:17–32; 16:34–39; 17:7–16; 18:1–4; kei na 18:9–22. Navuca mo vola na veika o kunea ena ruku ni ulutaga vakaoqo: “iBolebole,” “A Sauma Vakacava o Nifai,” kei na “A Veivuke Vakacava na Turaga,” Na cava o vulica ni rawa ni o vakayagataka ki na veibolebole o sotava?

Ni oti na vuli mai vei Nifai kei na nona matavuvale, sa rawa mo vola na ikuri ni vakasama ena ruku ni ulutaga oqo: “Noqu iBolebole,” “Au na Sauma Vakacava,” ka “Ena Vukei au Vakacava na Turaga.” Ni ko cakava oqo, sa rawa mo raica na ivolanikalou vakaoqo: Maciu 11:28–30; Joni 14:26–27; Mosaia 24:13–15. Na serenilotu me vakataka na: “Meu Gole Tu Kivei? (Serenilotu, naba 71), e rawa ni vaqaqacotaka na nomu vakabauta na iVakabula kei na veivuke e solia o Koya ena gauna ni veivakatovolei.

Raica talega na Anthony D. Perkins, “Oi Kemuni na Kalou, Mo ni Nanuma na Nodra Vakararawataki na Nomuni Yalododonu,” Liaona, Nove. 2021, 103–5; “He Will Give You Help,” “The Lord Guides Lehi’s Journey,” “The Lord Commands Nephi to Build a Ship,” kei na “Lehi’s Family Sails to the Promised Land” (vidio), Gospel Library; “Life Help,” Gospel Library.

1 Nifai 16:10–16, 23–3118:11–22

E dusimaki au na Turaga ena veisala lalai ka rawarawa.

Ni sa liutaki iratou na matavuvale nei Liai na Kalou ki na lekutu, a sega ni solia vei iratou o Koya e dua na mape me vakaraitaka na matailalai ni ilakolako. Ia, a solia vei iratou na Liaona me dusimaki iratou ena veisiga. Ni o wilika 1 Nifai 16:10–16, 23–31, kei na 18:10–22, vakasamataka mo cakava e dua na ituvatuva ni vakavuvuli e vakaraitaka na sala e dusimaki ira kina na Luvena na Kalou (me ivakaraitaki, ena 1 Nifai 16:10 e rawa ni vakavulica ni Kalou e rawa ni dusimaki keda ena so na gauna ena sala e sega ni namaki). Na veika cava soti o raica e rau via tautauvata kina na Liaona kei na Yalo Tabu? Na cava soti na “veika lalai” sa kauta mai kina o Koya na “veika lelevu” ena nomu bula?

Raica talega na Alama 37:7, 38–47; Vunau kei na Veiyalayalati 64:33–34.

Kevaka Dou sa Vakarau Dou na sega ni Rere, mai vei Clark Kelley Price

1 Nifai 17:1-6, 17–22

Na noqu vakatovolei e rawa ni veivakalougatataki.

E dina ga ni ratou a sotava o Nifai kei iratou na tuakana na bolebole vata ga ena lekutu, e duidui sara na veika eratou a sotava. Ena rawa mo vakatautauvatataka na itukutuku ni ilakolako nei Nifai ena lekutu (raica na 1 Nifai 17:1–6) kei na nodrau itukutuku na tuakana (raica na 1 Nifai 17:17–22) Na cava a kila se cakava o Nifai ka vukei koya me rawata e dua na rai yalodina? Sa rawa mo vola e dua na veivakatovolei sa oti se ena gauna oqo mai na rai ni vakabauta kei na vakavinavinaka. Na cava o vakila se vulica mai na ka oqo?

Raica talega na Amy A. Wright, “E Vakabula o Karisito na Veika sa Kavoro,” Liaona, Me 2022, 81–84; “No Strength without Struggle” (vidio), Gospel Library.

Gauna ni vakanananu vakanomodi. Na tauri ni gauna ni veika me vakanananutaki, vakasamataki vakatitobu, raitayalotaki, se volavola e rawa ni veimuataki ki na veivakauqeti. E rawa ni vukei keda me da raica na sala e semati kina ki na noda bula na ivunau se ivakavuvuli ni kosipeli. Ni o vakavulici ira na tani, solia vei ira na gauna me ra vakasamataka ka vola na veika era vakauqeti kina. Oqo e rawa talega ni vakalevutaka na nodra lomasoli me ra wasea na nodra nanuma kei na veika era vakila vei ira na tani.

1 Nifai 19:22–24; 20–22

Au rawa ni “vakatautauvatataka vei [au] na ivolanikalou”.

Baleta ni a volai ena dua na gauna balavu sa oti na ivolanikalou, e vaka me sega ni ganiti keda nikua. Ia sa kila vinaka cake o Nifai. “Au sa vakatautauvatataka vei keimami na ivolanikalou,” a kaya o koya, “me rawa ni yaga vei keimami ka me keimami vuli kina” (1 Nifai 19:23 Oqo e dua na vuna e kunea kina o Nifai e levu sara na kaukauwa vakayalo ena ivolanikalou.

Vakasamataka na veitaro vakaoqo ni o wilika na 1 Nifai 20–22:

1 Nifai 20:1–9Na cava era vakavulica na veitikina oqo baleti ira na tamata ena gauna nei Aisea? Na cava o sa kunea sa baleti iko talega?

1 Nifai 20:17–22Na cava era vakavulica na veitikina oqo me baleta na sala a liutaki ira kina na tamata ena gauna nei Aisea na Tamada Vakalomalagi? E sureti iko vakacava o Koya mo muri Koya?

Na cava tale o kunea ena 1 Nifai 20–22 o rawa ni “vakatautauvatataka” vei iko?

Me baleta na vakasama tale eso, raica na ilavelave ni vula oqo ni Liaona kei na Me iSakisaki ni iTabagone ena kena mekasini.

Vakatutu baleta Nodra Tuberi na Gonelalai

1 Nifai 16:10, 28–29; 18:8–13, 20–22

Niu muria na ivunau, ena dusimaki au na Turaga.

• Kevaka e tiko e dua na nomu kabasi, dua na mape, se dua tale na ka e vukei keda me da kunea na noda sala, e rawa ni o vakaraitaka vei ira na luvemu. Oqo e rawa ni dua na sala vinaka me tekivu kina e dua na veivosaki me baleta na Liaona, ka rawa ni o wilika ena 1 Nifai 16:10, 28–29. Na cava eso na vuna e sega ni rawa ni cakacaka kina e dua na kabasi se mape? Na cava e sega ni dau cakacaka kina na Liaona ena so na gauna vei iratou na matavuvale nei Liai? (raica na 1 Nifai 18:9–12, 20–22). Na cava sa solia vei keda nikua na Tamada Vakalomalagi me dusimaki keda lesu Vua?

• Me vukei ira na luvemu me ra bulataka na veika era sa vulica me baleta na Liaona ena 1 Nifai 16:10, 26–31; 18:8–22, sa rawa mo sureti ira mera vakasamataka e dua na vakatulewa bibi se dredre. Na cava sa solia vei keda na Kalou me dusimaki keda nikua e cakacaka me vaka na Liaona? (Me vakataka, raica na Alama 37:38-44.) Sa rawa mo wasea e dua na ka o sotava vakai iko ka a tuberi iko kina na Tamada Vakalomalagi.

1 Nifai 16:21–32

E rawa niu ivakaraitaki vinaka ki na noqu matavuvale.

• Ni o wilika vata na 1 Nifai 16:21–32 vukei ira na luvemu me ra raica na sala a vakalougatataka kina na nona matavuvale na ivakaraitaki nei Nifai (raica talega na vidio “The Lord Guides Lehi’s Journey” [Gospel Library]). Oqo ena rawa ni veimuataki ki na dua na veivosaki me baleta na sala eda rawa ni vakataki Nifai kina. Sureti ira na luvemu me ra tuva e dua na ka e rawa ni ra cakava me ra veivakauqeti vinaka kina vei ira na lewe ni matavuvale tale eso.

1 Nifai 17:7–19; 18:1–4

Na Tamaqu Vakalomalagi e rawa ni vukei au meu cakava na veika dredre.

• Era dau taleitaka na gone na italanoa. E rawa ni o sureti ira me ra vukei iko mo tukuna na italanoa kei Nifai ni a vakaroti me tara e dua na waqa (raica na 1 Nifai 17:7–19; 18:1–4; raica talega na “Wase 7: Building the Ship,” ena Book of Mormon Stories, 21–22; se na vidio “The Lord Instructs Nephi to Build a Ship” [Gospel Library]). Lagata vata na ikarua ni tikina ni “Nephi’s Courage” (Nodra Sere na Lalai, 120–21). Na cava a vukei Nifai me yaloqaqa tiko ena gauna era vakalialiai koya kina na tuakana ni tovolea tiko me taya e dua na waqa?

• E sega ni kila o Nifai na kena tara e dua na waqa, sa qai vakararavi ga ki na veidusimaki ni Turaga. Ni wiliki oti na 1 Nifai 18:1 vata kei iko, e rawa ni ra vakacavara na luvemu na tabana ni itaviqaravi ena macawa oqo. Ni ra cakava oqo, veitalanoataka vata kei ira na sala e rawa ni vukei keda kina na Tamada Vakalomalagi me da cakava na veika dredre, me vaka ga a vukei Nifai kina o Koya.

Me baleta na vakasama tale eso, raica na ilavelave ni vula oqo ena iTokani ena kena mekasini.

Eratou Vakaraitaka vei Au na iTovo Kaukauwa, mai vei Walter Rane