“E Dua na Waqa me Kosova na Wasawasa,” iTalanoa ni iVola i Momani (2023)
“E Dua na Waqa me Kosova na Wasawasa,” iTalanoa ni iVola i Momani
E Dua na Waqa me Kosova na Wasawasa
Vakavakarau me ra gole ki vanua yalataki
O Vanuasautu e dua na vanua ka sinai tu kina na vuata kei na oni. Sa dua dina na vanua totoka me da tiko kina. Eratou vakaitikotiko voleka e matasawa na matavuvale nei Liai kei Seraia ka tu vei iratou na veika kece eratou gadreva.
Ni oti e vuqa na siga, a tukuna na Turaga vei Nifai me gole ki na dua na ulunivanua me laki masu. E kea, a tukuna vua na Turaga me taya e dua na waqa me kauta na nona matavuvale me kosova na wasawasa.
E a vakavulica vua na Turaga na itata ni waqa. Ia a sega ni kila o Nifai na vanua me kunea kina na kaukamea me caka kina na iyaya ni cakacaka. Sa vakaraitaka na Turaga vei Nifai na vanua me vakasaqarai kina na kaukamea.
E muri, a waqaca o Nifai e dua na buka me cakava kina na iyaya ni cakacaka. Erau sarava na tacidrau o Nifai, o Leimani kei Lemueli . Erau sega ni vinakata me vukei koya me taya na waqa. Erau nanuma ni sega ni vakasama vinaka me kosovi na wasawasa.
Erau sega ni vakabauta o Leimani kei Lemueli ni a tukuna na Turaga vei Nifai me taya e dua na waqa. A tarogi rau o Nifai se cava na vuna erau se sega tikoga kina ni vakabauta na Turaga. A vakananuma vei iratou na tuakana ni ratou a raica e dua na agilosi ka kila na kaukauwa ni Turaga. Rau sa cudru sara vakalevu o Leimani kei Lemueli ka rau vinakata me rau vakamatei Nifai.
Ia a vakasinaiti o Nifai ena kaukauwa ni Kalou. A vakasalataki Leimani kei Lemueli o Nifai me rau kakua ni tarai koya. Erau a rere ka sega ni bau bolea me rau tarai Nifai ena vuqa na siga. Sa qai tukuna na Turaga vei Nifai me dodoka yani na ligana vei iratou na tuakana. Ni dodoliga yani vei rau o Nifai, erau vakila ni rau yavalati mai na kaukauwa ni Turaga.
Rau a sokalou vua na Turaga o Leimani kei Lemueli ka veivuke ena kena tarai cake na waqa. A masu o Nifai vua na Turaga ena vuqa na gauna me vukei. E totoka na waqa eratou tara na matavuvale nei Nifai. Ni sa oti e vuqa na siga, sa qai oti na waqa, ka ra raica ni sa vinaka. Eratou kila na matavuvale nei Nifai ni sa vukei iratou na Turaga.