“Jekope kei Seremi,” iTalanoa ni iVola i Momani (2023)
Jekope kei Seremi
Nona ivakadinadina e dua na parofita baleti Jisu Karisito
O Jekope e dua na parofita ka raici Jisu Karisito. A vinakata me ra vakabauti Jisu na tamata. A vakatavulica vei ira na tamata o Jekope me ra muria na ivakaro ni Kalou. A cakacaka vakaukauwa me vakavulici ira na tamata baleti Jisu.
2 Nifai 11:2–3; Jekope 1:1–8, 17–19
Ena dua na siga, a tekivu vakavulici ira na tamata e dua na turaga na yacana o Seremi. Ia a vakavulica o Seremi ni o Jisu e sega ni dina. A vinaka sara o Seremi ena vosa, ka vuqa na Nifaiti era vakabauta na ka e tukuna. Era sa sega ni vakabauti Jisu e vuqa na tamata ena vukuna. A vinakata talega o Seremi me tarova nona vakabauti Jisu o Jekope.
A kaya o Seremi ni sega ni dua e kila rawa na ka ena yaco ena veisiga ni mataka. E kaya ni kena ibalebale oqo ni sega ni dua e rawa ni kila ni kadina o Jisu, baleta ni se bera ni lako mai ki vuravura o Jisu. Ia a kaya o Jekope na ivolanikalou kei ira kece na parofita era vakatavulica me baleti Jisu. A vakaraitaka vei Jekope na Kalou ni na lako mai ki vuravura o Jisu.
Se sega tikoga ni vakabauta o Seremi. E vinakata o koya me vakaraitaka vua o Jekope e dua na ivakatakilakila ni ka dina o Jisu.
E kaya o Jekope ni kila o Seremi ni na lako mai o Jisu ka sega ni gadreva e dua na ivakatakilakila. Ia a kaya o Jekope ni na vakamalumalumutaki Seremi na Kalou me vakaraitaka ni tiko vua na Kalou na kaukauwa ni ka dina o Jisu.
Vakasauri, sa tauvimate o Seremi ka lutu ki na qele. Ni oti e vuqa na siga, sa kila o koya ni sa na mate. A tukuna vei ira na tamata ni sa lawakitaki koya o Setani. E kaya ni a lasu vua na Kalou. Sa kila tu o Koya na gauna taucoko ni sa bula dina tiko o Jisu. Sa qai mate o Seremi. Era wilika na tamata na ivolanikalou ka vakabauti Jisu.