“Nifai kei na Peleti Parasa,” iTalanoa ni iVola i Momani (2023)
Nifai kei na Peleti Parasa
Vulica me muria na Yalotabu
O Leimani, Lemueli, Semi, kei Nifai a lesu tale ki Jerusalemi ena bogi. A lako o Nifai ki na vale nei Lepani ni ratou vuni tiko na tuakana ena taudaku ni koro.
E vakatara o Nifai me tuberi koya na Yalo. E sega ni kila o koya na ka me cakava, ia e kila ni na vukei koya na Turaga me kauta mai na peleti parasa.
Ni sa volekata na vale nei Lepani ko Nifai, a kunei Lepani e dela ni qele. A mateni tu o Lepani. A raica o Nifai na iseleiwau nei Lepani ka tomika cake.
Ni raica yani o Nifai na iseleiwau, a tukuna vua na Yalotabu me vakamatei Lepani. Ia a sega ni vinakata o Nifai me vakamatei koya. A tukuna vei Nifai na Yalotabu ni sa vinaka cake me mate o Lepani mai na kena sega vei iratou na matavuvale nei Nifai na ivolanikalou. Era gadreva na ivakaro ni Kalou ka a volai tu ena peleti parasa.
E kila tu o Nifai ni a tovolea o Lepani me vakamatei koya. A butakoca talega o Lepani na nodratou iyau ka sega ni talairawarawa ki na ivakaro ni Kalou.
A tukuna tale vei Nifai na Yalo me vakamatei Lepani. Sa kila o Nifai ni sa vakarautaka tu na Turaga e dua na sala me rawata kina na peleti parasa. A digitaka o koya me talairawarawa vua na Yalo. A vakamatei Lepani o Nifai ka daramaka na isulu i Lepani.
Sa qai lako o Nifai ki na vale ni yau i Lepani ka sotavi Soramu na tamata i Lepani. A ivukivuki o Nifai ka vosa me vakataki Lepani.
A tukuna o Nifai vei Soramu ni gadreva na peleti parasa. Sa qai tukuna o Nifai vei Soramu me lako vata mai kei koya. A nanuma o Soramu ni o Nifai o Lepani, a mani cakava na ka e vinakata o Nifai.
Ni rau sa biuta mai na koro ko Nifai kei Soramu, eratou nanuna o Leimani, Lemueli, kei Semi ni o Nifai o Lepani. Eratou sa rere ka tekivu dro.
A kacivi ratou na tuakana o Nifai. Ena gauna eratou kila kina ni o Nifai, eratou sa tu vakadua. Ia a qai rere o Soramu ka tovolea me lesu tale ki Jerusalemi.
Tarovi Soramu o Nifai A tukuna vei Soramu ni sa vakaroti iratou na Turaga me ratou kauta mai na peleti. A sureti Soramu me lako vata kei ira ki na vanua yalataki. Sa kila o Soramu ni sa rawa me tamata galala, sega ni tamata lewai, ka yalataka me lako vata kei Nifai kei na nona matavuvale.
Eratou a lesu tale vei Liai kei Seraia. Erau a marau vakalevu o Liai kei Seraia ni raici ratou na luvedrau tagane. Sa nanuma o Serai ni ratou sa mate na luvena tagane. Baleta ni sa taqomaki ratou tiko na luvena tagane na Turaga, sa nuitaka kina ni sa vakaroti na nodratou matavuvale me ratou biuti Jerusalemi. Eratou sa vakacabo isoro na matavuvale nei Liai kei Seraia me ratou vakavinavinaka vua na Turaga.
Wilika na peleti parasa o Liai. A raica ni tu ena peleti na nodra ivakavuvuli na parofita. A vulica talega ni dua vei ira na tubuna o Josefa, ka a volitaki ki Ijipita mai vei iratou na tuakana ena dua na gauna makawa sara. Sa kila tu o Liai ni sa rui bibi na peleti parasa. E kila o koya ni vinakata na Turaga me tu vei iratou na nona matavuvale na ivakaro.