“Lesu ki Jerusalemi,” iTalanoa ni iVola i Momani (2023)
“Lesu ki Jerusalemi,” iTalanoa ni iVola i Momani
Lesu ki Jerusalemi
iLakolako ki na peleti parasa
Eratou lako ena lekutu na matavuvale nei Liai kei Seraia. Ena tadra, a tukuna na Turaga vei Liai na ivolanikalou ka volai tu ena peleti parasa. E dua na tamata na yacana o Lepani e tiko vua mai Jerusalemi. E kaya na Turaga ni ratou gadreva na matavuvale nei Liai me ratou kauta vata kei iratou na peleti parasa ena nodratou ilakolako.
A kaya vei Liai na Turaga me talai iratou lesu tale ki Jerusalemi me ratou kauta mai na peleti parasa. Erau a vosa kudrukudru na tuakai Nifai. Era tukuna vei Liai ni sa dua na ka dredre me caka. Eratou a sega ni vinakata me ratou laki valu.
Sa dua dina na ka dredre na cakava, ia a vinakata o Nifai me talairawarawa. E kila o koya ni na vukei koya kei iratou na tuakana na Turaga. A tukuna o Nifai vei Liai ni na lesu tale ki Jerusalemi ka kauta mai na peleti parasa.
Eratou lesu tale ki Jerusalemi o Leimani, Lemueli, Semi, kei Nifai. Ni ratou sa yaco ki kea, eratou sa qai lewa me sa gole o Leimani ki na vale nei Lepani ka kerea na peleti parasa.
Ni kerea o Leimani na peleti parasa, a vakatokai koya o Lepani me dua na daubutako. A kaya o Lepani ni na vakamatei Leimani.
A dro o Leimani ka tukuna vei iratou na tacina na ka a yaco.
Eratou a rarawa na veitacini e va. Eratou vinakata o Leimani, Lemueli, kei Semi me ratou lesu tale vei rau na nodratou itubutubu ena lekutu, ia e tiko vei Nifai e dua na vakasama. E kaya ni rawa ni ratou cakava e dua na veisau vata kei Lepani me ratou rawata kina na peleti parasa. Eratou lesu tale ki na nodratou itikotiko ena koro ka kauta mai na nodratou koula kei na siliva me ratou veivoli.
Ni ratou vakaraitaka na koula kei na siliva vei Lepani, e vinakata o koya me nona kece. Ia e se sega tikoga ni solia vei iratou na peleti parasa. Ia, a tukuna vei ira na nona italai me ra vakamatei iratou na veitacini me rawa ni taura na nodratou koula kei na siliva.
Eratou a drovaki bula na veitacini e va ka biuta tu mai na nodratou koula kei na siliva. Era sega ni rawa ni toboki iratou na dauveiqaravi nei Lepani. Eratou vuni ena dua na qaravatu na veitacini.
Ni oti na veika dredre kece oqo, erau sa cudruvi Nifai o Leimani kei Lemueli. Erau mokuti Nifai kei Semi ena dua na kau.
Vakasauri ga, a lako mai e dua na agilosi ka taroga se cava na vuna erau mokuti Nifai tiko kina. A kaya na agilosi ni sa digitaki ko Nifai me liutaki iratou. Sa qai tukuna vei iratou na agilosi me ratou lesu tale ki Jerusalemi. Ena vakarautaka na Turaga e dua na sala me ratou rawata kina na peleti parasa.