Mosaia 23–25

Alama kei ira na Nona Tamata

Kaukauwa mai vua na Kalou ena gauna dredre

O Alama kei na so tale era raica tiko na nodra vale

O Alama kei ira na nona tamata era a bula tiko ena dua na vanua totoka. Era teivaka na sorenikau ka tara na nodra vale. O Alama a bete ni Kalou. A vakavulici ira na nona tamata mera veilomani vakai ira. Era a vakarorogo na tamata vei Alama ka muria na ivakaro ni Kalou. Sa tubu na nodra matavuvale, ka ra tara e dua na koro levu.

Mosaia 23:4–5, 15–20

E vosa tiko vei ira na Leimanaiti o Alama

Ena dua na siga, era a lako mai e dua na mataivalu ni Leimanaiti. Era a sese. Era yalataka na Leimanaiti mera vagalalataki ira na tamata i Alama kevaka ena vukei ira o Alama mera kunea na nodra ilakolako ki vale. A vakaraitaka o Alama vei ira na Leimanaiti na sala me ra lesu tale kina ki na nodra vanua.

Mosaia 23:25, 30, 36–37

Era yadravi Alama kei ira na nona tamata o Emuloni kei ira na nona sotia

Ia, era a sega ni vakayacora na nodra yalayala na Leimanaiti. Ia, era a taura na vanua ka ra yadravi ira na tamata i Alama o ira na sotia. Era a cakava talega e dua na Nifaiti na yacana o Emuloni me tui vei ira na tamata i Alama. O Emuloni e a dua na nodra iliuliu na bete vakailasu. O koya kei ira na nona bete era a vakamatea edua na parofita ni Kalou ka cakava e vuqa tale na ka ca.

Mosaia 17:12–13; 23:31–32, 37–39; 24:9

Sa cudru o Emuloni

Sa cudruvi Alama o Emuloni. A cakava me ra cakacaka vakaukauwa sara na tamata i Alama ka dau cudruvi ira. A dredre sara vei ira na tamata i Alama.

Mosaia 24:8–9

Sa masu o Alama, ka sa cudru sara o Emuloni mai dakuna

Era sa kerea na veivuke ni Kalou. A tukuna vei ira o Emuloni mera kakua ni masu. A kaya o koya ni na vakamatei edua kevaka e masu.

Mosaia 24:10–11

E rau vukea edua na tagane qase me tucake o Alama kei na dua yalewa

Era sa sega ni qai masu ena domo levu o Alama kei ira na nona tamata. Ia, era a masu ga e lomadra. Sa sauma na Kalou na nodra masu. A vakacegui ira ka yalataka ni na vukei ira me ra dro. Na Kalou a vakamamadataka na nodra icolacola bibi. Era a dauvosota ka marau na tamata nira vakarorogo vua na Kalou. Era kila ni na vukei ira tiko o Koya.

Mosaia 24:12–15

Sa kauti ira tani na nona tamata o Alama ena bogi

Era sa vakararavi vua na Kalou na tamata i Alama ka ra vakabauti Koya vakalevu. Dua na siga, a tukuna vei ira na Kalou ni sa gauna me ra biubiu kina. Ena bogi o ya, era a vakavakarau kina o Alama kei ira na nona tamata. Era vakasoqona vata kece na nodra manumanu kei na kakana. Ena mataka, a biuti ira na Leimanaiti na Kalou mera mocelutu. A qai dro o Alama kei ira na nona tamata ka lako ena siga taucoko.

Mosaia 24:16–20

E raici Saraemala tu o Alama kei ira na nona tamata

Ena bogi o ya, o ira kece na tagane, yalewa, kei na gone era a vakavinavinaka vua na Kalou. Era kila ni Kalou duadua ga a rawa ni vukei ira. Era a lako tiko me vuqa na siga ka yaco ki na vanua ko Saraemala. Era kidavaki ira na Nifaiti, ka vakavulici ira kece o Alama me baleta na vakabauti Jisu Karisito. E vuqa na tamata era a vakabauta ka papitaisotaki.

Mosaia 24:20–25; 25:14–24