“O Kavetani Moronai kei Saraemana,” iTalanoa ni iVola i Momani (2023)
O Kavetani Moronai kei Saraemana
E dua na ivalu kei na yalayala meda bula ena vakacegu
E a iliuliu ni mataivalu ni Leimanaiti o Saraemana. A vinakata me lewai ira na Nifaiti ka cakava mera qaravi ira na nona tamata. Sa liutaki ira na nona mataivalu ko Saraemana me valuti ira na Nifaiti.
Era a vinakata na Nifaiti mera taqomaka na nodra itikotiko, matavuvale, kei na lotu. Era kila nira na sega ni rawa ni sokalou vua na Turaga kevaka era lewai mai vei ira na Leimanaiti. Era a digitaka na Nifaiti mera valuta na nodra meca.
E dua na tagane na yacana o Moronai e a turaganivalu ni mataivalu ni Nifaiti. A raica o Moronai mera vakarau vinaka tu na nona mataivalu me ra vala.
Era a kauta mai na iyaragi na sotia i Moronai, ka solia vei ira o Moronai na peleti ni sere kaukauwa kei na isasabai me taqomaki ira.
A kauti ira na nona mataivalu ko Moronai mera valuti ira na Leimanaiti. Ia ni ra sa raica na Leimanaiti ni ra sa vakapeleti ni sere kei na isasabai na Nifaiti, era sa rere ni vala. E tiko walega na nodra isulu mamare na Leimanaiti ka sega na peleti ni sere me taqomaki ira.
Era sa biubiu na Leimanaiti. Era tovolea mera lako lo ki na dua tale na nodra vanua na Nifaiti. Era a nanuma ga ni na sega ni kila o Moronai na vanua era lako kina.
Ia ena gauna ga era biubiu kina na Leimanaiti, a tala eso na yamata o Moronai mera muri ira.
Sa qai vakauta o Moronai e dua na itukutuku vua na parofita o Alama. A vinakata vei Alama me taroga na Turaga se cava era nakita tiko na Leimanaiti me ra cakava. A kaya na Turaga vei Alama ni ra nakita tiko na Leimanaiti mera valuta edua na vanua malumalumu e vakatokai ko Manitai. A vakarorogo vei Alama o Moronai. A liutaka na nona mataivalu mera valuti ira na Leimanaiti.
Era a vala na mataivalu. Era a kaukauwa ka cudru sara vakalevu na Leimanaiti. Era sa rerevaki ira na Leimanaiti na Nifaiti ka ra sa vakarau dro yani. Ia a vakananuma vei ira o Moronai na nodra matavuvale kei na vakabauta, ka ra mani vala tikoga.
Era sa masulaka na Nifaiti na veivuke ni Turaga. A sauma na Turaga na nodra masu ka solia vei ira na kaukauwa cecere. Era sa rere na Leimanaiti. Era a viribaiti ka ra sega ni rawa ni dro. Ni raica o Moronai ni ra sa rere na Leimanaiti, a tukuna vei ira na nona sotia me sa rauta na vala. A sega ni vinakata o Moronai me vakamatei ira na Leimanaiti.
A tukuna o Moronai vei Saraemana ni rawa nira lako na Leimanaiti kevaka era yalataka mera kakua tale ni valuti ira na Nifaiti. A sa cudru sara o Saraemana ka saga me vala tiko ga, ia a sega ni rawa me vakadrukai ira na sotia i Moronai. Sa qai yalataka o Saraemana kei na nona mataivalu mera na kua ni veivala, ka laivi ira o Moronai me ra lako.