“Alama kei Amuleki e Valeniveivesu,” iTalanoa ni iVola i Momani (2023)
Alama kei Amuleki e Valeniveivesu
Vakabauta na Turaga ena gauna dredre
Erau a vakatavulica na kosipeli o Alama kei Amuleki ena koro levu o Amonaia. Eso na tamata era a vakabauta na Turaga ka veivutuni. Ia e vuqa tale na tamata era a cudruvi Alama kei Amuleki ka vinakata me vakarusai rau. Era a vesuki Alama kei Amuleki na tamata cudrucudru ka kauti rau vua na turaganilewa levu ni koro levu o ya.
A sega ni vakabauta na turaganilewa levu ni gadrevi vei ira na nona tamata me ra veivutuni. Era cudruvi Alama kei Amuleki na tamata. Era a vakavuna mera biuta na koro levu o ira na tagane era a vakabauta na ka erau a vakatavulica o Alama kei Amuleki. Era sa qai viritaki ira na yalewa kei na gone era vakabauta na Turaga ki na bukawaqa.
A rarawa vakalevu o Amuleki ni raici ira na tamata nira vakila tu na mosi. A kerei Alama me vakayagataka na kaukauwa ni Kalou me vakabulai ira. Ia a kaya o Alama ni sega ni vakatara vei koya na Yalo ni Kalou. A tukuna vei Amuleki ni ra na lai tiko vata kei na Turaga o ira na marama kei na gone. Na Turaga ena lewai ira na tamata era a vakamatei ira.
A veiwalitaki Alama kei Amuleki na turaganilewa levu baleta ni a sega ni taqomaki ira na marama kei na gone na Turaga. A biuti Alama kei Amuleki ki valeniveivesu.
Ni oti e tolu na siga, a gole ki vale ni veivesu na turaganilewa levu kei ira na nona bete vakailasu. Era a vakataroga e vuqa na taro. Ia erau a sega ni sauma mai o Alama kei Amuleki.
Era a vakayacora e levu na ka rarawa vei Alama kei Amuleki na turaganilewa levu kei ira na nona bete. Era sega talega ni solia vei Alama kei Amuleki na kakana se wai. Ka ra veiwalitaka na veika erau a vakatavulica o Alama kei Amuleki.
Erau a rarawa tu me vuqa na siga o Alama kei Amuleki. E a lako tale mai na turaganilewa levu kei ira na nona bete. A tukuna vei Alama kei Amuleki ni kevaka e tu vei rau na kaukauwa ni Kalou, e dodonu me rau sereka na dali e vesuki rau tu. Ka na qai vakabauti rau.
Erau vakila o Alama kei Amuleki na kaukauwa ni Kalou. Erau a tucake. A vakabauta na Turaga o Alama ka kerea na kaukauwa me sereka na dali.
Erau a sereka na dali o Alama kei Amuleki. E a rere na turaganilewa levu kei ira na nona bete. Era saga mera dro, ia sa tekivu me sakure na qele.
A lutuki turaganilewa levu kei ira na nona bete na lalaga ni vale ni veivesu ka ra mate kina. Ia a taqomaki Alama kei Amuleki na Turaga. Ni ra rogoca na tamata na rorogo, era sa cici yani mera raica na ka e yaco tiko. O Alama ga kei Amuleki erau a lako tani rawa mai na valeniveivesu. Era sa rerevaki Alama kei Amuleki vakalevu na tamata ka ra dro kina.