“Amoni,” iTalanoa ni iVola i Momani (2023)
Amoni
E dua na italai yalomalumalumu
O Amoni kei iratou na tacina eratou a vinakata me vakavulici ira na Leimanaiti me baleta na Turaga. Eratou a lako ki na vanua era tiko kina na Leimanaiti. Ena nodratou ilakolako, eratou a lolo ka masu me kere veivuke vua na Turaga. Sa vakacegui iratou na Turaga. A tukuna vei iratou me ratou dau vosota ka ivakaraitaki vinaka. Eratou a dui gole ki na veivanua duidui me veivakavulici.
A lako o Amoni ki na dua na vanua ka vakatokai ko Isimeli. O ira na tamata e kea era a vesuki koya ka kauti koya vua na Tui o Lamonai. A tukuna o Amoni vei Lamonai ni a vinakata me bula vata kei ira na Leimanaiti. A taleitaki Amoni o Lamonai ka sereki koya. A vinakati Amoni me vakamautaka e dua na luvena yalewa, ia a digitaka o Amoni me dauveiqaravi ga i Lamonai.
A tukuna o Lamonai vei Amoni me qarauni ira na manumanu. Ena dua na siga, a kauti ira na manumanu o Amoni kei na so tale na italai mera lai gunu wai. Ni ra gunu tiko na manumanu, era a lako mai na daubutako ka vakasavi ira tani. Era a rere na vo ni italai ni ra na totogitaki ena nodra vakayalia na manumanu nei Lamonai.
A kila tu o Amoni ni oqo sa madigi me vakaraitaka kina na kaukauwa ni Turaga. A tukuna vei ira na vo ni italai tale mera kakua ni lomaleqa ka vukei ira me ra kunea na manumanu era yali tu.
Era a lesu tale mai na daubutako mera vakasevi ira tale na manumanu. Ia ena gauna oqo, a tukuna o Amoni vei ira na vo ni italai mera tiko ka taqomaki ira na manumanu mera kua ni dro.
A lako o Amoni me tarovi ira na daubutako mai na nodra vakarerei ira na sipi. Era a sega ni rerevaki Amoni na daubutako. Era nanuma ni ra sa kaukauwa cake mai vua. Ia era sega ni kila ni a vukei Amoni tiko na Turaga.
A viritaka na vatu o Amoni vei ira na daubutako ena nona irabo. Eso vei ira era mate. Oqo a vakacudrui ira na vo ni daubutako, ka ra vinakata mera vakamatei Amoni. Eratou kurabui baleta ni a sega ni lauti Amoni na nodra vatu. Era a sega ni namaka me kaukauwa sara o koya.
Era tovolea na daubutako me lauti Amoni na nodra iwau. Ia ena veigauna kece era tovolea kina, a taya laivi na ligadra ko Amoni ena nona iseleiwau mera kakua kina ni vala. Sega ni dede, era sa rere vakalevu mera vala tikoga ka ra dro tani.
Era kaya na italai vei Lamonai na sala a vakabulai ira kina na manumanu o Amoni. E a kurabui kina o Lamonai. A nanuma o koya ni o Amoni na Yalo Cecere, ka tu vua na kaukauwa levu ka kila na ka kecega.
A vinakata o Lamonai me vosa vei Amoni, ia a lomaleqa talega o koya.
Sa laki raici Lamonai o Amoni, ia a sega ni kila o Lamonai na ka me tukuna. A vukei Amoni na Turaga me kila na nanuma nei Lamonai. A vakamacalataka o Amoni ni o koya e sega ni Yalo Cecere. A tukuna vei Lamonai ni Yalo Cecere sai koya na Kalou. O Lamonai a via vulica eso tale na ka me baleta na Kalou.
A kaya o Amoni ni Kalou a bulia na vuravura kei na tamata kecega e tiko kina. Sa qai tukuna o Amoni vei Lamonai ni tiko vua na Kalou e dua na ituvatuva ni veivakabulai. Me tiki ni ituvatuva oya, ena lako mai kina o Jisu Karisito. A vakabauta o Lamonai na ka a tukuna o Amoni. A masu o Lamonai ka kerea vua na Kalou me lomani koya kei ira na nona tamata.