“Alama, Amuleki, kei Sisoromi,” iTalanoa ni iVola i Momani (2023)
Alama, Amuleki, kei Sisoromi
Digitaka mo vakadinata ka talairawarawa vua na Kalou
A raica o Alama ni vuqa na lewe ni Lotu era a sega ni talairawarawa ki na ivakaro ni Kalou. Sa mani lako o Alama mai na dua na koro levu ki na dua tale ka vakavulica na vosa ni Kalou. Era sa veivutuni e levu na tamata. Sa qai yaco mai o Alama ki na dua na koro levu ka vakatokai ko Amonaia. Era a sega ni rogoci koya na tamata e kea. Era kasiviti koya ka vakasevi koya tani mai na koro levu oya.
A rarawa o Alama ni sa biuta na koro levu. A lomaleqataki ira na tamata. Sa qai lako mai vua e dua na agilosi. A kaya na agilosi ni rawa vei Alama me marau baleta ni sa talairawarawa vua na Kalou. A kaya na agilosi vei Alama me lesu tale ki na koro levu ka vakaroti ira na tamata. Kevaka era sega ni veivutuni, era na vakarusai. A lesu totolo tale o Alama.
Ni sa yaco yani o Alama ki na koro levu, sa via kana sara vakalevu. A lolo tu me vuqa na siga. A kere kakana o Alama vua e dua na turaga na yacana o Amuleki.
A tukuna vei Alama o Amuleki e dua na raivotu a raica. Ena raivotu, a tukuna e dua na agilosi vei Amuleki ni o Alama e dua na parofita ni Kalou. A vinakata o Amuleki me vukei Alama.
A kauti Alama ki vale o Amuleki ka solia vua na kakana me kania. A tiko o Alama ena vale nei Amuleki me vuqa na siga. A vakalougatataki Amuleki kei na nona matavuvale na Kalou. E muri, a qai tukuna na Kalou vei Alama kei Amuleki me rau tukuna vei ira na tamata ena koro levu me ra veivutuni. Erau talairawarawa kina o Alama kei Amuleki A solia vei rau na Kalou na Nona kaukauwa me vukei rau me rau veivakavulici.
E dua vei ira na tamata ka rogoca nodrau veivakavulici ka yacana o Sisoromi. E tamata vuku sara o koya ka vinakata me lawakitaki rau o Alama kei Amuleki. A kaya o Sisoromi vei Amuleki ni na solia vua e levu na ilavo kevaka e kaya ni sega ni dina na Kalou. E vinakata o koya me lasu o Amuleki me rawa ni ra sega ni vakabauta na tamata na ka erau a vakatavulica o Amuleki kei Alama.
Alama 10:29–32; 11:21–25; 12:4–6
Ia sa sega ni lasu ko Amuleki me baleta na Kalou. E kaya ni bula dina tiko na Kalou. Erau kila o Amuleki kei Alama na vakanananu nei Sisoromi. A kurabui o Sisoromi ka tarogi rau ena vuqa na taro. Erau vakavuvulitaka vei Sisoromi ni tiko e dua na nona ituvatuva na Kalou me baleta na tamata kecega. E vakabauta o Sisoromi na veika rau a vakatavulica o Alama kei Amuleki me baleta na Kalou kei Jisu Karisito.
Alama 11:23–46; 12:1–18, 24–34; 14:6–7; 15:6–7
A rarawa sara vakalevu o Sisoromi ena vuku ni veika ca a cakava. Sa tauvimate o koya. Erau a sikovi koya o Alama kei Amuleki. E kaya o Alama ni rawa ni vakabulai o Sisoromi ena vuku ni nona vakabauti Jisu. Sa kerekere o Alama vua na Kalou me vakabulai koya. A lade sara o Sisoromi ki yavana. Sa vakabulai o koya! A papitaiso ka vakavulici ira na tamata ena vo ni nona bula taucoko.