“Alama Lailai,” iTalanoa ni iVola i Momani (2023)
“Alama Lailai,” iTalanoa ni iVola i Momani
O Alama Lailai
Dua na Veisau Levu
Sa lesi Alama o Mosaia na Tui me iliuliu ni Lotu e Saraemala. A vakavulici ira na tamata o Alama me ra veivutuni ka vakabauta na Turaga.
E tiko e dua na luvei Alama ka yacana talega o Alama. A sega ni vakabauta o Alama Lailai na veika a vakavulica o tamana.
E tiko talega na luvei Mosaia ka ratou sega talega ni vakabauta na Turaga. Eratou veitokani vata kei Alama Lailai. Eratou vinakata kece me ra biuta na Lotu na tamata. A liutaki ira e vuqa na tamata o Alama kei iratou na luvei Mosaia me ra cakava na veika e saqata na ivakaro ni Kalou.
Ena dua na siga, a tala mai na Turaga e dua na agilosi me tarovi ratou. A tukuna vei iratou na agilosi me ratou kakua ni tovolea me vakarusa na Lotu. Eratou sa rere vakalevu o Alama kei iratou na luvei Mosaia ka ratou bale sobu ki na qele.
A sega tu ni rawa ni vosa se toso o Alama me tolu na siga ka tolu na bogi. A vakila o koya na ca dina ena vuku ni veika cala kece e sa cakava. A lomaleqa talega o koya baleta ni a kauti ira tani e vuqa na tamata mai vua na Turaga.
Sa rarawa vakalevu sara o Alama ena vuku ni nona ivalavala ca. A qai nanumi tamana ni tukuna tiko na veika baleti Jisu Karisito, na Luve ni Kalou.
A masuti Jisu o Alama me vosoti koya. Ni sa masu oti, sa sega ni nanuma rawa na nona mosi. E kila o koya ni sa vosoti koya na Turaga. Sa sega tale ni yaloca me baleta na nona ivalavala ca. Ia, a marau ga o Alama.
Mosaia 27:24, 28–29; Alama 36:18–22
A rawata lesu tale o Alama na nona kaukauwa. Eratou sa lewa o koya kei iratou na luvei Mosaia tagane me ratou veivutuni ka tovolea me vakavinakataka na mosi kece eratou sa vakavuna. Era a qarava na Turaga mai na gauna oya ka lako yani ena nodra vukei na tani me ra veivutuni. Era lakova na vanua a lewa o Mosaia ka vakavulici ira na tamata baleti Jisu.
Mosaia 27:20–24, 32–37; Alama 36:23–26
Eratou vinakata o Alama kei iratou na luvei Mosaia me ratou wasea na marau e kauta mai ki na nodratou bula na ivakavuvuli i Jisu. Eratou a cakacaka vakaukauwa sara me ratou qarava na Turaga kei ira na tamata. Eratou a digitaka na luvei Mosaia tagane me ratou biubiu ka vakavulici ira na Leimanaiti baleti Jisu. A digitaka o Alama me tiko ka vakavulici ira tikoga na Nifaiti.