Moronai na Parofita

Me noda na loloma savasava i Jisu Karisito.

Sa vakaraica o Moronai e dua na koro levu sa kama tiko

O Moronai e a iotioti ni parofita ni Nifaiti. A vala ena dua na ivalu levu vei ira na Nifaiti kei ira na Leimanaiti. Era a mate na nona matavuvale kei ira kece e kila ena ivalu. Era sa daucaka ca na tamata era tiko ena vanua. Era vakamatei ira kece era vakabauti Jisu Karisito. A vakabauti Jisu o Moronai. A sega vakadua ni cakitaka ni o Jisu na iVakabula.

Momani 8:2–10; Moronai 1:2–3

Sa kauta yani o Moronai na peleti kaukamea ka vunitaka koya vata kei na peleti mai na dua na ilawalawa sotia.

Sa vola tiko mai o Momani na tamai Moronai, na kedra itukutuku makawa na nodra tamata ena peleti kaukamea. Ni bera ni mate o Momani, a solia na peleti vua na luvena o Moronai. Sa vinakati vei Moronai me vuni me taqomaka na nona bula kei na peleti.

Momani 6:6; 8:1–5, 13; Moronai 1:1–3

Sa dabe toka o Moronai ena dua na qara vatu ka volavola ena peleti kaukamea

A dredre na bula vei Moronai, ia a yalodina tikoga. A vola na veika e vakavulica o Momani me baleta na loloma cecere, na loloma savasava i Karisito. E kaya o Momani ni dodonu me ra masu vua na Kalou na tamata ena kaukauwa taucoko ni yalodra me ra rawata na loloma oqo. E kaya ni Kalou e solia na loloma cecere vei ira era muri Jisu dina.

Moronai 7:32–33, 40–48; 10:20–21, 23

e marautaka e dua na matavuvale ni soli vei iratou na kakana, ka matadredredre o Moronai

E lomani ira na Leimanaiti o Moronai e dina ga ni so vei ira era vakamatei ira kece e kila ka vinakata me ra vakamatei koya. A vola e levu na ka ena peleti kaukamea me vukei ira na Leimanaiti ena veisiga mai muri. A nuitaka ni ra na wilika na itukutuku oqo ena dua na siga ka vakabauti Jisu tale.

Momani 8:1–3; Moronai 1:1–4; 10:1

E dabe toka o Moronai ena dua na delana veico ka volavola ena peleti kaukamea

A sureti ira kece na tamata era wilika na itukutuku mera vakasamataka na nona dau veikauwaitaki na Kalou ena loloma vei ira na Luvena. A sureti ira mera masu ka kerea vua na Kalou ke sa dina na itukutuku oqo. E kaya o koya kevaka era vakabauti Jisu ka vinakata dina me ra kila, ena tukuna vei ira na Kalou na ka dina. Era na kila oqo ena kaukauwa ni Yalo Tabu.

Ai Vakamacala Taumada ni iVola i Momani; Moronai 10:1–5

Sa buluta o Moronai na peleti kaukamea ka tosoya e dua na vatu ena vanua e vunitaki tiko kina.

Sa mai tinia o Moronai na nona vola na itukutuku. Sa qai buluta ena qele na peleti kaukamea. A kaya o Jisu vei Moronai ni itukutuku makawa e volai tu ena peleti ena dua na siga ena vakalougatataka na nodra bula na luve ni Kalou e vuravura raraba.

Momani 8:4, 14–16

sa tosoya o Josefa Simici e dua na vatu ka raica na peleti kaukamea kei na Liaona

Ni oti e vuqa na yabaki, a talai Moronai na Kalou, ni sa agilosi, me vakaraitaka vua e dua na gonetagane lailai na yacana o Josefa Simici na vanua e bulu tiko kina na peleti kaukamea. A kacivi Josefa na Kalou me parofita. A vukei Josefa na Kalou me vakadewataka na peleti me rawa ni ra wilika na tamata na veika e volai tu kina. Na itukutuku oqo sa vakatokai ena gauna oqo na iVola i Momani.

iVakamacala taumada ni iVola i Momani.