“Na Tui ni Leimanaiti Kecega,” iTalanoa ni iVola i Momani (2023)
“Na Nodra Tui na Leimanaiti Kecega,” iTalanoa ni iVola i Momani
Na Nodra Tui na Leimanaiti Kecega
Gadreva me vulica na veika me baleta na Turaga
E dua tiko na nodra tui na Leimanaiti ka liutaki ira na tui kecega. O koya na tamai Tui Lamonai. E nanuma o koya ni ra meca na Nifaiti. Dua na siga, a raici Lamonai vata kei Amoni. A tarogi Lamonai na tui se cava e cakava tiko kei na dua na Nifaiti. A tukuna vua na tui o Lamonai ni ratou na sereki iratou na tuakai Amoni mai na vale ni veivesu.
Mosaia 10:11–17; Alama 20:1–12
A cudru kina na tui. A nanuma ni ra lasu tiko na Nifaiti me ra butako kina mai vei ira na Leimanaiti. A tukuna vei Lamonai me vakamatei Amoni ka lako vata kei koya.
A sega ni rawa ni vakamatei Amoni o Lamonai. A tukuna vua na tui ni o Amoni kei iratou na tacina e ratou parofita ni Kalou. A kaya ni na vukei iratou na taci Amoni.
A taura mai na nona iseleiwau na tui me vakamavoataki Lamonai, ia a tarovi koya o Amoni. A mani golevi Amoni na tui. A taqomaki koya o Amoni. A vakamavoataka na liga ni tui me kakua kina ni vala na tui. Sa rere na tui ena vuku ni kaukauwa e tu vei Amoni. A yalataka ni na solia vei Amoni na veimama ni nona matanitu kevaka ena vakatara o Amoni me bula.
A sega ni vinakata o Amoni na matanitu. Ia, a kerea na tui me sereki iratou na tuakana mai na vale ni veivesu. A kerea talega vua na tui me kakua ni cudruvi Lamonai. A kaya o Amoni ni dodonu me laiva na tui me lewa o Lamonai na sala e nanuma ni vinaka duadua.
E kurabui na tui ena levu ni nona lomani Lamonai o Amoni. A vakadonuya me cakava na ka kece e kerea o Amoni.
A vinakata na tui me vulica eso tale na ka me baleta na veika rau a tukuna vua o Amoni kei Lamonai me baleta na Kalou. A kerea vei Amoni kei iratou na tacina me ratou lako mai ka vakavulici koya.
Erau gole o Amoni kei Lamonai ki na vanua ko Mitonai. Eratou tiko e kea na taci Amoni ena vale ni veivesu. Eratou sa vesu tu ena dali ka sega ni soli vei iratou na kakana se wai. A vakadeitaka o Lamonai vua na daunilewa i Mitonai me sereki iratou na taci Amoni.
Ni ratou sa sereki, rau a gole na taci Amoni kivei tamai Lamonai. Eratou cuva vua na tui ka kerea me ratou nona dauveiqaravi. A kaya na tui sega . Ia, a vinakata me ratou vakavulici koya me baleta na kosipeli. E dua vei iratou na veitacini na yacana o Eroni. A wilika na ivolanikalou vua na tui ka vakavulici koya me baleta na Kalou kei Jisu Karisito.
A vakabauti Eroni na tui. A kaya ni na solia yani na nona matanitu taucoko me kila na Kalou. A tarogi Eroni ena ka e dodonu me cakava. A tukuna o Eroni vua na tui me veivutuni ka masuta na Kalou ena vakabauta. Sa veivutunitaka na tui na nona ivalavala ca kece sara ka masu.
Sa bale sobu ki na qele na tui. Era a cici na dauveiqaravi ni tui me ra tukuna vua na ranadi.
A lako mai na ranadi ka raica na tui e dela ni qele. E nanuma ni ratou a vakamatea na tui o Eroni kei iratou na tuakana. A cudru kina na ranadi.
Sa tukuna na ranadi vei ira na italai me ra vakamatei Eroni kei iratou na tuakana. Ia era sa rere na italai. Era kaya ni ratou sa rui kaukauwa sara o Eroni kei iratou na tuakana. A sa rere na ranadi. A talai ira na italai o koya me ra tukuna vei ira na tamata ena koro na veika sa yaco. A nuitaka ni ra na vakamatei Eroni kei iratou na tuakana o ira na tamata .
Sa kila tu o Eroni ni ra na cudru na tamata. Sa kila talega ni sega ni mate na tui. Sa qai vukea na tui me tucake. A rawata lesu mai na tui na nona kaukauwa ka tucake. Era kurabui na ranadi kei ira na italai.
Na tui a vakavulica na ranadi kei ira na italai me baleti Jisu. Era sa vakabauti Jisu taucoko. Sa vinakata na tui me ra vulica taucoko na nona tamata na veika baleti Jisu. A cakava e dua na lawa me rawa kina vei Eroni kei iratou na tuakana me ratou vakavulica na kosipeli ena vanua cava ga ena nona matanitu. Era a vakavulici ira na tamata ka kacivi ira na bete kei na ivakavuvuli ena vanua.