“E Dua na iTikotiko Vou ena Vanua Yalataki,” iTalanoa ni iVola i Momani (2023)
“E Dua na iTikotiko Vou ena Vanua Yalataki,” iTalanoa ni iVola i Momani
E dua na iTikotiko vou ena Vanua Yalataki
O ira na Nifaiti kei na Leimanaiti
Eratou tubu tikoga ena vanua yalataki na matavuvale nei Liai kei Seraia. Era sa dui vakaluveni na luvedrau. A sa qase sara tiko mai o Liai. Ni bera ni mate, a solia na veivakalougatataki vei ira na lewe ni nona matavuvale. A tukuna vei ira ni gauna era muria kina na ivakaro ni Kalou, ena vukei ira na Turaga.
Ni sa mate o Liai, a liutaki ira na tamata o Nifai. A tukuna vei ira me ra talairawarawa vua na Turaga. Erau sa cudru sara ko Leimani kei Lemueli. Erau vinakata me rau vakamatei Nifai me rawa ni rau veiliutaki ga kina.
A kaya na Turaga vei Nifai me biubiu vata kei na nona matavuvale kei ira tale eso era vinakata me ra muria na Turaga. Era a lako voli me vuqa na siga ka kunea e dua na vanua vou me ra vakaitikotiko kina.
O ira era lako vata kei Nifai era vakatokai me Nifaiti, kei ira era tiko mai era vakatokai me Leimanaiti. Era a kerei Nifai na Nifaiti me liutaki ira. Era a cakacaka vakaukauwa. Era teitei, susu manumanu, ka tara e dua na valetabu kei na veivale tale eso. Era vakatavulici ira na bete kei na ivakavuvuli me baleta na Turaga, ka ra marau na tamata.