“Na Drotini ni Galala,” iTalanoa ni iVola i Momani (2023)
Na Drotini ni Galala
Taqomaki na dodonu me vakadinati na Kalou
O Amalikaia e dua na Nifaiti yagolevu, ka kaukauwa sara. A vinakata o koya me tui. A yalataka o koya me solia na kaukauwa vei ira na tamata era vukei koya. E vuqa na tamata era taleitaki koya ka tovolea mera muri koya. A liutaki ira na tamata o Amalikaia mera cakava na ka ca. O koya kei ira na era muri koya era a vinakata mera vakamatei ira na tamata era a vakatavulica na veika me baleti Jisu Karisito.
Sa vakabauti Jisu o Kavetani Moronai, na nodra iliuliu na mataivalu ni Nifaiti. A kila nira vakalougatataki na Nifaiti baleta nira muria na ivakaro ni Kalou. A cudru vakalevu sara ni a tuberi ira tani na tamata mai vua na Kalou o Amalikaia, ka saga tiko me tui, ka saga me vakamavoataki ira na tamata.
A dresuka na nona kote o Moronai. A vola kina o koya ni dodonu vei ira na tamata mera nanuma tiko na nodra Kalou, na nodra galala, kei na nodra matavuvale. A qai vesuka ki na dua na kau balavu ka vakatoka me drotini ni galala. A masuta o Moronai na veivakalougatataki ni Kalou. A vakaraitaka vei ira na Nifaiti na drotini ni galala ka kerei ira me ra duavata kei koya ena nona vala kei Amalikaia.
Era a tokara na nodra iyaragi na tamata ka cici yani vei Moronai. Era sa vakarau tu me ra veivala ena vuku ni Kalou kei na nodra itikotiko, matavuvale, kei na bula galala. Era a cakava e dua na veiyalayalati, se yalayala digitaki, vata kei na Kalou nira na dau muri Koya tikoga. Era sa qai vakavakarau me ra vala kei Amalikaia.
Era lewe levu sara na mataivalu nei Moronai. A sa rere ko Amalikaia. A saga o koya me dro vata kei ira na muri koya. Ia e vuqa vei ira era lomaleqataka ni a valu tiko o Amalikaia ena vuku ni inaki cala. E vuqa era a sega tale vakadua ni muri koya. Na mataivalu nei Moronai a tarovi ira era se muri Amalikaia tiko ga, ia a mani dro rawa o Amalikaia kei na vica tale.
Sa lako ko Amalikaia ki na nodra vanua na Leimanaiti. A vinakati ira na Leimanaiti me vukei koya me veivala kei ira na Nifaiti. Ena qai rawata o koya e dua na mataivalu levu, ka kaukauwa cake. A rawata o koya me vuqa na Leimanaiti mera cudruvi ira na Nifaiti. A tukuna na nodra tui na Leimanaiti vei ira kece na Leimanaiti me ra vakavakarau mera vala kei ira na Nifaiti.
Na tui a taleitaki Amalikaia. A buli Amalikaia me dua na iliuliu ena mataivalu ni Leimanaiti. Ia sa vinakata o Amalikaia e levu cake na kaukauwa.
Sa tuvatuva ko Amalikaia me lewai ira na Leimanaiti. A taura o koya na mataivalu taucoko ni Leimanaiti. O koya kei ira na nona tamata era sa qai vakamatea na tui ka lasutaka se o cei a cakava.
E a rarawa vakalasulasu o Amalikaia ni sa mate na tui. Era a taleitaki Amalikaia na Leimanaiti. A vakamautaka na ranadi ka yaco me tui vou. E a vinakata talega me lewai ira na Nifaiti. A vosa vakacacataki ira na Nifaiti me rawa nira cudruvi kina mai vei ira na Leimanaiti. Sega ni dede, era sa vinakata e vuqa na Leimanaiti mera valuti ira.
A rawata nona kaukauwa o Amalikaia ena lasu, ia ena gauna vata oya a vakarautaki ira tiko kina na Nifaiti o Moronai mera nuitaka na Kalou. A vakatikora na drotini ni galala ena veivale cecere kecega ena loma ni vanua me vakananuma vei ira na nodra yalayala. Era vakarautaka talega na mataivalu i Moronai na veikoro levu ni Nifaiti ki na ivalu. Era tara na lalaga ka kelia na ikeli me taqomaki ka kaukauwa kina na veikoro levu.
Ni ra lako mai me vala na Leimanaiti, era a sega ni rawa ni curu ki na veikoro levu vaka Nifaiti. Era tarovi mai na lalaga kei na ikeli ka ra a tara na mataivalu i Moronai. Era a mate e vuqa na Leimanaiti ena nodra valuti ira na Nifaiti. E a cudru sara vakalevu o Amalikaia. A yalataka me na vakamatei Moronai.
Era vakavinavinaka na Nifaiti vua na Kalou ena Nona vukei ira ka taqomaki ira. Era cakava na nodra veikoro levu me taqomaki vakavinaka cake ka tara eso tale na koro levu. A tomani tiko na ivalu kei ira na Leimanaiti, ia a vukei Moronai na Kalou kei na nona mataivalu mera taqomaki ira na Nifaiti. Era a marau na Nifaiti. Era a talairawarawa vua na Kalou ka yalodina tiko ga Vua.