“Tui o Penijamini,” iTalanoa ni iVola i Momani (2023)
Na Tui o Penijamini
Qaravi ira na tamata kei na Kalou
O Penijamini na Tui e dua na parofita ni Kalou ka a vakatulewataka na vanua o Saraemala. A cakacaka vakaukauwa me qaravi ira na nona tamata ka vakavulici ira me baleta na Kalou. Ena nodra veivuke eso tale na parofita ni Kalou, a vakayacora o Penijamini me dua na vanua ni sautu ka taqomaki vinaka o Saraemala.
Na Vosa i Momani 1:17–18; Mosaia 1:1–7
A sa qase mai o Penijamini. A kerei Mosaia na luvena me kauti ira vata mai na tamata. A vinakata o Penijamini me tukuna vei ira ni sa nodra tui vou o Mosaia.
Era lako mai na veivanua kecega na tamata. Era a tara na nodra valelaca volekata na valetabu mera vakarorogo vei Penijamini.
A vosa o Penijamini mai na dua na vale cecere me rawa ni vuqa na tamata era rogoci koya. A kaya o Penijamini ni a vukei koya na Kalou me liutaki ira. Me vaka ni tui, a vakavulici ira me ra talairawarawa ki na ivakaro ni Kalou. A sega ni taura na nodra ilavo se cakava me ra qaravi koya. Ia, a cakacaka ga me qaravi ira na nona tamata kei na Kalou.
A tukuna vei ira na tamata o Penijamini ni gauna era veiqaravi vakai ira kina, era sa qarava tale tikoga na Kalou. A qai tukuna vei ira o koya ni veika kece e tu vei ira e lako mai vua na Kalou. Me kena isau, e vinakata na Kalou me ra talairawarawa ki na Nona ivakaro. Ni ra talairawarawa, a solia vei ira na Kalou e vuqa tale na veivakalougatataki.
A tukuna vei ira o Penijamini ni sa sega ni rawa me nodra tui se qasenivuli tale. Na luvena, o Mosaia sa nodra tui vou.
Sa qai tukuna vei ira na nona tamata o Penijamini ni a sikovi koya e dua na agilosi. E kaya na agilosi ni na lako mai ki vuravura na Luve ni Kalou, o Jisu Karisito. Ena cakava na cakamana ka vakabulai ira na tamata. Ena sotava o Koya na mosi ka na mate me vakabulai ira na tamata kecega. A vakavulica o Penijamini ni o Jisu ena vosoti ira kece era vakabauti Koya ka veivutuni.
Era vakabauta na tamata na veika a vakavulica vei ira o Penijamini me baleti Jisu. Era kila ni dodonu me ra veivutuni. Era a masu kece na tamata ka kerea vua na Kalou me vosoti ira. Ni ra sa masu oti, a tiko vata kei ira na Yalo ni Kalou. Era vakila na marau ka kila ni sa vosoti ira na Kalou ena vuku ni nodra vakabauti Jisu.
Era vakila na tamata na duidui ka vou e loma baleta ni ra vakabauti Jisu. Oqo era sa vinakata me ra cakava na veika vinaka ena veigauna kece. Era a yalataka me ra muria na ivakaro ni Kalou ena vo ni nodra bula. Baleta ni ra vakabauti Jisu ka cakava na yalayala oqo, era sa vakatokai kina me ra tamata i Jisu.