“Alama ena Wai ko Momani,” iTalanoa ni iVola i Momani (2023)
Alama ena Wai ko Momani
Yaco mo tamata ni Kalou
O Alama a bete tu ni dua na tui na yacana o Noa. A tovolea o Alama me vakabulai Apinatai, e dua na parofita ni Kalou, me kua ni vakamatei mai vei Noa. Ia a cudruvi Alama o Noa ka vinakata talega me vakamatei Alama. A dro tani mai vei Noa o Alama me taqomaki tikoga. Ena siga, a vuni o Alama ena dua na vanua volekata na Wai ko Momani.
E vakabauta o Alama na veika a vakavulica o Apinatai me baleti Jisu Karisito. A kerea vua na Kalou me vosota na nona ivalavala ca kei na caka cala.
A sotavi ira lo na tamata o Alama ka vakavulici ira me baleti Jisu. A vakavulici ira kece era vinakata mera vakarorogo.
E vuqa na tamata era a vakabauti Alama. Era sa lako ki na Wai ko Momani me ra rogoci Alama ni veivakavulici.
Era a vinakata na tamata vakabauta mera vakatokai mera tamata ni Kalou, vukei ira na tamata era vakaleqai tu, ka tukuna vei ira na tamata me baleta na Kalou. Sa mani sureti ira o Alama mera papitaiso. Ena nodra papitaiso, era na cakava edua na veiyalayalati, se yalayala, vata kei na Kalou me qaravi Koya ka muria na Nona ivakaro. Me kena isau, ena vakalougatataki ira na Kalou ena Yalona.
Era a marau vakalevu na tamata. Era a vakasausau ka kaya ni ra vinakata me ra papitaiso. A papitaisotaki ira o Alama ena Wai ko Momani. Era a vakasinaiti kece ena Yalo ni Kalou ka vakila na loloma ni Kalou vei ira. Era sa yaco me ra lewe ni Lotu i Karisito.
A raica o Noa ni so vei ira na nona tamata era sa biuta tiko na nona vanua. A talai ira na nona italai me ra vakaraici ira. Era sa raica na italai ni ra lako na tamata ki na vanua ko Momani me ra rogoca na ivakavuvuli nei Alama. Sa cudru sara vakalevu o Noa. A talai ira na nona mataivalu me vakamatei Alama kei ira na tamata a vakavulica tiko o Alama.
Sa vakaroti Alama na Kalou me baleta na mataivalu. Ena veivuke ni Kalou, era a biuta kina na vanua o Alama kei ira na nona tamata ka ra taqomaki. Era sega ni rawa ni vesuki ira na mataivalu. Eratou a lako voli me walu na siga ena lekutu ka yaco ki na dua na vanua totoka. Era a cakava e kea na nodra itikotiko vou. A vakavulici ira na tamata o Alama, ka ra maroroya na nodra yalayala vua na Kalou.