“Na Vakabauta ni Dua na Ranadi,” iTalanoa ni iVola i Momani (2023)
“Na Vakabauta ni Dua na Ranadi,” iTalanoa ni iVola i Momani
Na Vakabauta ni Dua na Ranadi
Kunea na Reki vei Karisito
A veiliutaki e dua na ranadi ni Leimani kei na watina, o Tui Lamonai. A kerea na tui e dua na Nifaiti na yacana o Amoni me vakavulici koya me baleta na Turaga. A vakabauta na tui na ka a tukuna vua o Amoni. A tekiduru na tui me masu ka kerea vua na Turaga me vosoti koya. Ni masu tiko, a bale sobu ki na qele na tui. E vaka me sa mate tu.
Era kauti koya na dauveiqaravi ni tui vua na ranadi. Erau biuti koya ena nona idavodavo. A davo toka e kea ka sega ni toso me rua na siga ka rua na bogi.
Ena gauna o ya, eratou sa rarawa sara vakalevu na ranadi kei iratou na luvena. Era a tiko vata kei na tui ka tagicaki koya tiko. Eso na tamata era kaya ni dodonu me sa bulu na tui. Ia a vinakata na ranadi me vosa taumada vei Amoni. A rogoca ni tu vua na kaukauwa ni Kalou. Era a kerei Amoni na dauveiqaravi ni ranadi me lako mai vua na ranadi.
A tukuna na ranadi vei Amoni ni rogoca ni parofita ni Kalou o koya. A kerei Amoni o koya me laki raica na tui. Sa kila o Amoni ni se bula na tui. Na kaukauwa ni Kalou e vakavuna me moce na tui. A tukuna o Amoni vua na ranadi ni na yadra mai na watina ena siga ka tarava.
A nuitaki Amoni na ranadi ka vakabauta vakalevu na Kalou. E vakabauta ni na yadra o watina ena siga ka tarava. A kaya o Amoni ni a vakalougatataki ena vuku ni nona vakabauta cecere. A tukuna vua na ranadi ni levu cake na nona vakabauta mai vei ira na nona tamata. A tiko voleka na ranadi ka vakaraici watina ena bogi taucoko.
Ena siga tarava sa yadra mai na tui. A tukuna vua na ranadi ni sa raici Jisu Karisito. Erau kila na ranadi kei na tui na levu ni nona lomani rau o Jisu, ka rau sa vakasinaiti ena reki.