“Biuti Jerusalemi ko Liai kei Seraia ,” iTalanoa ni iVola i Momani (2023)
“Biuti Jerusalemi ko Liai kei Seraia,” iTalanoa ni iVola i Momani
Rau sa Biuti Jerusalemi o Liai kei Seraia
Na ivakaro ni Turaga ki na dua na matavuvale
Erau vakaitikotiko mai Jerusalemi o Liai kei Seraia kei ira na luvedrau. A raica o Liai e dua na raivotu mai vua na Turaga. A raica ni dua na iVakabula ena lako mai ki vuravura ena dua na siga. A vakaraitaka talega vua na Turaga ni na vakarusai ko Jerusalemi.
A tukuna vei ira na tamata o Liai me baleta na nona raivotu. A tukuna vei ira ni na lako mai ena dua na siga o Jisu Karisito me vakabula na vuravura.
A kaya o Liai vei ira na tamata ni na vakarusai ko Jerusalemi. Sa tukuna vei ira me ra veivutuni.
Era cudru na tamata. A vosa tale na Turaga vei Liai ena tadra. A vulica o Liai ni o koya kei na nona matavuvale eratou na sega ni taqomaki e Jerusalemi. Sa dodonu me ratou biubiu.
Erau talairawarawa vua na Turaga o Liai kei Seraia. Erau biuta na koro levu kei na nodrau matavuvale. O Liai kei Seraia e va na luvedrau tagane na yacadratou o Leimani, Lemueli, Semi, kei Nifai. Era sa biuta tu mai na nodra vale kei na nodra veika vinaka.
Eratou a lako yani na matavuvale ena lekutu ena yasa ni Wasa Damudamu. A vakavinavinakataka na Turaga o Liai ni vakalougatataka na nona matavuvale. A vakavulici iratou na nona matavuvale me ratou muria na Turaga ka muria na Nona ivakaro.
Erau vosakudrukuduru o Leimani kei Lemueli. Eratou nanuma vakalevu na nodratou itikotiko kei na veika kece era sa biuta tu yani. Era sega ni kila na vuna a kaya kina na Turaga me ra biubiu. Era sega ni vakabauta ni rawa me vakarusai e dua na koro levu vakataki Jerusalemi.
Erau nanuma o Leimani kei Lemueli ni vakanananu ga nei Liai na raivotu oya. Vakacava ke sa yali vakadua tu na nodratou matavuvale ena lekutu?
A vinakata o Nifai me kila vakataki koya ni dina na ka e tukuna o Liai. A masu o koya ka taroga vua na Turaga.
A tala mai na Yalo Tabu na Turaga me vukei Nifai me vakabauta na vosa nei tamana. E vakabauta na Turaga o Nifai ka wasea na veika a vulica vei iratou na tuakana. A vakarorogo o Semi vei Nifai ka vakabauti koya, ia o rau o Leimani kei Lemueli erau a sega ni vakarorogo.