Ai Vakamacala Taumada

Na iVola i Momani e dua na isoqoni ni volanikalou tabu ka vakatautauvatataki ki na iVolatabu. Oqo e dua na itukutuku ni nona cakacaka na Kalou vei ira eso na itaukei makawa kei Amerika ka tu kina na taucoko ni kosipeli tawavakaiyalayala.

Na ivola oqo era a vola e vuqa na parofita ena gauna makawa, ena yalo ni parofisai kei na ivakatakila. Na nodra vosa ka volai ena peleti koula, e a cavuta ka vakalekalekataka e dua na parofita, ka kena dau ni itukutuku makawa, ka yacana ko Momani. E talanoataki kina e rua na gauna cecere ni tuvaki ni bula. E dua e a lako mai Jerusalemi ena 600 B.K. ka qai tawase e muri ki na rua na matanitu ka kilai ena Nifaiti kei na Leimanaiti. E dua tale ka a liu sara mai ena gauna a vakasesea kina na Turaga na nodra vosa na tamata ena Vale Cecere mai Pepeli. E kilai na ilawalawa oqo me ra Jeretaiti. Ni oti e vica vata na udolu na yabaki era sa vakarusai kece o ira oqo ka ra vakavo ga na Leimanaiti o ira oqo eso vei ira na nodra qase taumada na kai Idia Damudamu ni Amerika.

Na ka lagilagi duadua ka a yaco ka volai ena iVola i Momani sa i koya na nona cakacaka vakalotu na Turaga ko Jisu Karisito ena kedra maliwa na Nifaiti ni se qai oti ga na Nona tucake tale mai na mate. E vakamacalataka na ivunau ni kosipeli, ka tuva na ituvatuva ni veivakabulai, ka tukuna vei ira na tamata na ka mera kitaka mera rawata kina na vakacegu ena bula oqo kei na bula tawamudu ena bula sa bera mai.

Ni sa vakacavara na nona volavola ko Momani, sa qai solia na itukutuku ki vua na luvena tagane ko Moronai, o koya ka a qai tomana ena vica na nona vosa vakaikoya, ka qai vunitaka na peleti ena Delana ko Kumora. Ena 21 ni Sepiteba, 1823, ko Moronai vata ga oqo, ni sa tucake tale mai na mate, ka sa vakalagilagi tu; e, a rairai vua na Parofita ko Josefa Simici ka vakasalataki koya me baleta na itukutuku makawa kei na kena vakadewataki ki na vosa Vakaperitania.

Era a qai soli na peleti vei Josefa Simici ena kena gauna, o koya ka a vakadewataka ena isolisoli kei na kaukauwa ni Kalou. Sa tabaki tu ena vuqa na vosa ena gauna oqo me ikuri ka dua tale na ivakadinadina vou ni sa Luve ni Kalou Bula ko Jisu Karisito, ka ra na vakabulai ko ira kece era lako mai Vua ka talairawarawa ki na lawa kei na veicakacaka vakalotu ni Nona kosipeli.

E a kaya na parofita ko Josefa Simici me baleta na ivola oqo: “Au a tukuna vei ira na veitacini ni iVola i Momani e ivola dodonu duadua e vuravura, ka vatu ivakadei ni noda lotu, ka na toro voleka cake vua na Kalou e dua na tamata ena nona muria na kena ivakavuvuli mai na dua tale na ivola.”

Sa vakarautaki ira e lewe tinikadua tale na Turaga me ra tomani Josefa Simici, me ra raica sara ga vakai ira na peleti koula ka me ra ivakadinadina ena dina kei na vakalou ni iVola i Momani. Sa okati vata eke na nodra ivakadinadina volai me “iVakadinadina ni Lewe Tolu” kei na “iVakadinadina ni Lewe Walu.”

Keimami sa sureti ira na tamata e veivanua kece sara me ra wilika na iVola i Momani, vakasamataka vakamatua e lomadra na itukutuku e tu kina, ka qai taroga na Kalou, na Tamada Tawamudu, ena yaca i Karisito, ke sa dina na ivola. Ko ira era muria oqo, ka kerekere ena vakabauta, era na rawata na ivakadinadina ni kena dina, kei na kena vakalou, ena kaukauwa ni Yalo Tabu. (Raica na Moronai 10:3–5.)

O ira era rawata na ivakadinadina vakalou oqo mai vua na Yalo Tabu, era na kila talega ena kaukauwa vata oqori, ni sa iVakabula kei vuravura ko Jisu Karisito, ni sa Nona dauvakatakila ka parofita ena veisiga e muri oqo ko Josefa Simici, kei na Lotu i Jisu Karisito Ni Yalododonu Edaidai, sai koya na nona matanitu na Turaga, ka sa tauyavutaki tale e vuravura me vakarautaka na iKarua ni nona Lako Mai na Mesaia.