Ai
Vola i Momani

Ia, oqo e dua na vakalekaleka ni kedra itukutuku na tamata i Nifai, kei ira talega na Leimanaiti—A volai ki vei ira na Leimanaiti, o ira e dua na ivovo ni mataqali i Isireli; ia, sa vakatalega kina ki vei ira na Jiu kei ira na kai Matanitu tani—Sa volai vaka ivakaro, kei na yalo talega ni parofisai kei na ivakatakila—A sa volai ka dregati, ka vunitaki ena vukuna na Turaga me ra kakua kina ni vakacacani—Me na qai vakalesui tale mai ena isolisoli kei na kaukauwa ni Kalou ki na kena ivakavakadewa sa tu oqori—A dregati mai na liga i Moronai, ka qai vunitaki ena vukuna na Turaga, me na qai vakalesui mai ena kena gauna mai vei ira na kai Matanitu tani—Sa vakadewataki mai na isolisoli ni Kalou.

E dua na ivakalekaleka ka a tauri mai na iVola i Ica, ka kedra itukutuku na tamata i Jereti, ko ira era a veiseyaki ena gauna e a vakasesea kina na Turaga na nodra vosa na tamata, ena gauna era a tara tiko kina e dua na vale cecere me ra yaco kina ki lomalagi—Me vakaraitaki kina vei ira na ivovo ni mataqali i Isireli na veika lelevu sa vakayacora na Turaga vei ira na tamadra; me ra kila kina na veiyalayalati ni Turaga, ni ra na sega ni biu tani sara me sega ni mudu—Ka, me ra na kila talega kina ko ira na Jiu kei ira na kai Matanitu tani ni, sa Karisito ko Jisu, na Kalou Tawamudu, ka sa dau vakaraitaki koya vei ira na veimatanitu kecega—Ia oqo, kevaka era tu na cala, era sa cala ga ni tamata; o koya me kakua kina ni vakalewai na ka sa nona na Kalou, mo dou kunei kina ni sa sega ni tauvi kemudou e dua na duka mai na idabedabe ni veilewai i Karisito.