E Vakabula o Karisito na Veika sa Kavoro
E rawa Vua me vakabula na isema vua na Kalou sa kavoro, na keda isema vei ira tale eso sa kavoro, kei na veitikida e sa kavoro, ruarua vakayago ka vakayalo.
Ena vica na yabaki sa oti, ena dua na soqo vakamatavuvale, a kerei Briton na luvei keirau tagane qase duadua na vugoi keirau yabaki walu ena gauna oya o William, kevaka e vinakata me rau qito polo. A sauma ena marau o Briton, “Io! Au taleitaka sara ga!” Ni sa balavu toka nodrau qito tiko, a lutu vei Briton e dua na polo ka mani voroka e dua na nodrau kuro maroroi makawa na tubuna.
Sa rarawa sara o Briton. Ni cuva sobu ka tekivu tomika vakamalua na veitikina kavoro, a lako yani o Willliam lailai vei tavalena ka vakatavitavia na dakuna ena yalo loloma. A qai vosa vinaka, “Kua ni lomalaeqa, Briton. Dua na gauna au a voroka dua na iyaya ena nodrau vale o Bu kei Tukai, a qai mokoti au o Bu ka kaya, ‘Kua ni leqa William. Iko se qai yabaki lima.’”
A sauma o Briton ka kaya, “Ia, William, au sa 23!”
E rawa ni da vulica mai na ivolanikalou e levu sara na ka me baleta na Nona rawa ni vukei keda na noda iVakabula, ko Jisu Karisito, me da lewa vakamatau na veika ni noda bula e sa kavoro, se cava ga na noda yabaki ni bula. E rawa Vua me vakabula na isema vua na Kalou sa kavoro, na keda isema vei ira tale eso sa kavoro, kei na veitikida e sa kavoro, ruarua vakayago ka vakayalo.
iSema Vua na Kalou sa Kavoro
Nona veivakavulici voli ena valetabu na iVakabula, era a kauta mai Vua o ira na vunivola kei na Farisi e dua na yalewa. Eda sega ni kila na kena italanoa taucoko, ia e tukuni ga ni a “kune ni dautagane.”1 E vakavuqa, ni dau tukuni ga ena ivolanikalou e dua na iwase lailai ni nona bula e dua, ni yavutaki ena iwase lailai oya, e vaka me da qai vakacerecerea se vakacacani koya kina. E sega ni rawa ni kilai na nona bula e dua ena dua na gauna totoka se gauna ca laurai e matanalevu. Na inaki ni italanoa vakaivolanikalou eso oqo me vukea noda raica ni Karisito a kena iwali ena gauna oya, ka kena iwali ena gauna oqo. E kila o Koya na keda italanoa taucoko kei na veika dredre eda sotava, vakakina na veika eda kaukauwa kina kei na noda malumalumu.
Na nona vosa na Karisito vua na luvena yalewa vakamareqeti oqo na Kalou e vaqo “Au sa sega talega ni lewai iko mo cudruvi: mo lako, ka mo kakua ni ivalavala ca tale.”2 E dua tale ga na ivosavosataki ni “mo lako, ka mo kakua ni ivalavala ca tale” e rawa ni vaqo “mo lako ka veisautaki iko.” A sureti koya tiko na iVakabula me veivutuni, me veisautaka na nona itovo, na nona ilawalawa ni veimaliwai, na ivakarau ni nona nanuma me baleti koya, na yalona.
“Ena vuku i Karisito, na noda lewa meda ‘lako yani ka veisau’ sa rawa talega vei keda meda ‘lako yani ka veivakabulai,’ ni sai Koya na ivurevure ni veivakabulai sa kavoro ena noda bula. Me vaka ni Dautataro cecere ka Gusunivosa vei Tamada, sa vakasavasavataka ka vakavinakataka o Karisito na isema ni veiwekani sa kavoro tu—vakabibi sara na keda isema vua na Kalou.
E vakamatatataka na iVakadewa nei Josefa Simici ni a muria dina na ivakasala ni iVakabula na marama oya ka veisautaka na nona bula “Sa vakalagilagia na Kalou mai na siga ko ya ka lako yani ka vakabauta na yacana na marama ko ya.”3 E kalouca ga ni da sega ni kila na yacana, se so tale na ka lalai me baleta nona bula ni oti na gauna oqo, baleta ni na gadrevi na yalodina cecere, na yalomalua, kei na vakabauta na Turaga ko Jisu Karisito me veivutuni ka veisau. Na ka eda kila ni o koya e dua na marama ka a “vakabauta na yacana” ka da kila ni se rawa tiko ga ni yacovi koya na Nona isoro tawavakaiyalayala ka tawamudu.
iSema Vei Ira Tale Eso sa Kavoro
Ena Luke wase 15 na italanoa vakaibalebale ni dua na tamata sa rua na luvena tagane. A kerea vei tamana o koya ka gone na nona ivotavota ka lako yani ki na dua na vanua vakayawa ka vakamaumautaka na nona iyau ena ivalavala vakamarau ca.4
“Ia ni sa vakaotia kece sa qai tubu na dausiga levu ena vanua ko ya, a sa qai dravudravua sara ko koya.
“A sa laki tiko kei na dua na lewe ni vanua ko ya; a sa talai koya ki na nona veiwere me vakani ira na vuaka.
“A sa garova na qana era dau kania na vuaka, me mamau kina na ketena, a sa sega e dua sa vakani koya.
“Ia ni sa kilai yalona tale, sa kaya, sa lewe vuqa na tamata nei tamaqu sa voli ena nodra cakacaka, era sa mamau ena madrai ka vo tu yani, ia koi au kau sa mate ena viakana!
“Au na ia ka lako vei tamaqu, kau na kaya vua, Tamaqu au sa ivalavala ca ki lomalagi vei kemuni talega,
“Kau sa sega kina ni yaga meu vakatokai tale meu luvemuni, lesi au meu vakataka e dua na nomuni tamata sa voli na nona cakacaka.
“A sa ia ka lako vei tamana. “Ia ni sa yawa sara, sa raici koya ko tamana, a sa lomana, ka cici, ka mokota, ka reguca.”5
Na nona cicivi luvena o tama, au vakabauta ni dua na vakasama bibi. Na mosi ni yalo e vakavuna o gone vei tamana e titobu sara ka bibi. Sa vakakina, ni a madualaka dina tu beka na ivalavala nei luvena o tama.
Na cava beka e sega ni waraki luvena kina o tama me lako mai vua ka mai kere veivosoti? Na cava a sega ni wawa kina okoya me ia mada na kere veivosoti kei na veivakaduavatataki ni se bera ni qai ia na veivosoti kei na loloma? Oqo e dua na ka au dau vakananuma tu vakatitobu.
E vakavulica vei keda na Turaga ni vosoti ira na tani e ivakaro raraba: “Koi Au na Turaga, au na vosoti ira ga au via vosota, ia koi kemudou sa gadrevi me dou vosota na tamata kecega.”6 Na veivosoti e rawa ni taura na yaloqaqa kei na yalomalua vakalevu sara. E rawa talega ni taura na gauna. E gadrevi kina me da biuta na noda vakabauta kei na vakanuinui vua na Turaga ni da vakatulewataka na ituvai ni yaloda. E koto eke na bibi kei na igu ni noda galala ni vakatulewa.
Ena ivakaraitaki ni tama ena italanoa vakaibalebale oqo ni gone cidroi, e vakabibitaka kina na iVakabula ni veivosoti e dua na isolisoli vakaturaga e rawa ni da veisolitaka ka vakabibi sara vei keda vakataki keda Noda vakamamadataka na yaloda ena noda veivosoti e sega ni dau rawarawa, ia ena mana vei vakaukauwataki nei Jisu Karisito, ena rawa kina.
Na tikina e Kavoro vei Keda
Ena Cakacaka wase 3 eda vulica me baleta e dua na tamata ka a sucu lokiloki ka “era sa vakadavora ena mata ni katuba ni vale ni soro sa vakatokai ko Lagilagi, me kere ka ni loloma vei ira sa curu ki na valenisoro.”7
Sa 40 vakacaca na nona yabaki na daukerekere lokiloki oqo 8ia ena nona bula taucoko sa dau kerekere voli ga ka wawa, ni sa vakararavi tu ga ki na nodra veivuke kei na yalololoma na tani.
Ena dua na siga “ni sa raici Pita kei Joni ni rau sa voleka ni curu ki na vale ni soro, sa kerekere me dua na ka ni loloma.
“A rau sa raici koya matua ko Pita kei Joni, ka kaya vua, Raici keirau matua.
“A sa vakaraici rau ko koya ni sa nanuma ena rawata mai vei rau e dua na ka.
“Sa qai kaya ko Pita, A siliva kei na koula sa sega ni tu vei au; ia na ka ga sa tu vei au kau na solia vei iko, Ena yaca i Jisu Karisito na kai Nasareci mo tucake ka lako.
“Sa qai taura na ligana imatau, ka sa qai tubera cake sa qai vakaukauwataki sara na yavana kei na nona qurulasawa.”
“Sa qai rika cake ko koya ka wavu tu ka lako voli, a sa curu vata kei rau kina valenisoro, a sa lako ka rika, ka vakarokorokotaka na Kalou.”9
Ena vuqa na gauna ena noda gauna taucoko ni bula eda rawa ni kunei keda, me vaka na daukerekere paralase ena mata ni katuba ni valetabu, so na gauna ena yalovosota—se so na gauna ena vuturi ni—“waraki Jiova.”10 Wawa me vakabulai vakayago se vakayalo. Waraka na isaunitaro ka na curuma yani na tiki ni yaloda titobu duadua. Waraka e dua na cakamana.
Na vanua ni sasamaki kei na veisavai eda rawa ni kila kina na iVakabula ena dua na sala titobu vakatamata yadua. Na waraka tiko na Turaga e rawa ni da kunea talega ni da na taroga, “Oi Kemuni na Kalou, ko ni sa tiko evei? Evei na vale ni vakaruru sa ubia na nomuni ivunivuni? 11—e dua na vanua ena gadreva na vosota vakayalo na vakabauti Karisito ka digitaki Koya tiko ena veigauna, ena veigauna, ena veigauna. Au kila na vanua oqo, kau sa ciqoma na mataqali wawa vakaoqo.
Au a tu vakabalavu sara ena dua na vanua ni qaravi kenisa, ka duavata ena noqu kune rarawa kei ira e lewevuqa tale era gadreva tu na veivakabulai. Eso era bula, eso tale e sega. Au a vulica ena dua na sala matata ni noda sereki mai na noda vakatovolei e duidui vei keda yadudua, o koya gona na noda vakanamata e dodonu me vakalailai ena ivakarau eda sereki kina ka me vakalevu cake vei koya na Dauveisereki Vakataki Koya. Na noda rai me vakanamata tikoga vei Jisu Karisito!
Na cakacakataki ni vakabauti Karisito e kena ibalebale ni sega walega nida vakararavi ena nona lewa na Kalou ia eda vakararavi talega ena Nona gauna. Sa kila tu o Koya na veika eda gadreva kei na gauna eda gadreva kina. Ni da vakaio ki na gagadre ni Turaga, ena vakarautaki vei keda e vuqa cake sara mai na veika eda gadreva.
Kemuni noqu itokani lomani, e dui tu na veika ni noda bula sa kavoro tu ka gadrevi me botani, vakavinakataki se vakabulai. Ni da gole vua na iVakabula, ni da vakataudonutaka na yaloda kei na noda vakasama Vua, ni da veivutuni, ena lako mai ko Koya vei keda ka “kauta lako e tabana na veivakabulai,”12 mokoti keda e Ligana ena yalololoma, ka kaya, “Kua ni leqa. Ko se qa yabaki 5—se 16, 23, 48, 64, 91. E rawa ni da vakavinakataka vata oqo!”
Au vakadinadinataka vei kemuni ni sega ni dua na ka ena nomu bula e kavoro tu e rawa ni uabaleta na kaukauwa ni ligana maqosa, dauveisereki o Jisu Karisito. Ena yacana tabu o Koya sa kaukauwa me ia na veivakabulai, ko Jisu Karisito, emeni.