Sa Noda iNakinaki na Saumaki

Mai vei Mark L. Pace

Peresitedi Raraba ni Matawilivola ni Sigatabu

E sega tale ni dua na ka me sosomitaka na gauna iko vakayagataka ena ivolanikalou, mo rogoca kina na Yalo Tabu me vosa saraga vei iko

Sa oti oqo e tolu na yabaki na noda lako vata voli vakalewe ni Lotu ni Turaga. A yaco ena Okotova 2018 na nodra sureti keda na Mataveiliutaki Taumada kei na Apositolo Le Tinikarua me da kilai Jisu Karisito ena noda vulica na ivolanikalou ena dua na ivakarau vou ka vakalou, ena ivurevure ni Lako Mai, Mo Muri Au me noda idusidusi.

Ena ilakolako oqo, e vinaka me da cegu ena so na gauna ka digova na veika eda vulica me muataki keda tiko ki na noda inakinaki.

Sa Noda iNakinaki na Saumaki

Raica mada na itukutuku momona mai na itukutuku taumada ni Lako Mai, Mo Muri Au:

“Na inaki ni vuli kei na vakatavulici ni kosipeli sai koya me vakatitobutaka na noda saumaki ka vukei keda meda vakataki Jisu Karisito vakalevu cake. …

“… Na mataqali vuli kosipeli e vaqaqacotaka noda vakabauta ka vakavuna na saumaki mai e veivakurabuitaki, e sega ni yaco kecega ena dua na gauna. E tete yani ki taudaku ni rumu ni vuli ki na yaloda kei na itikotiko. E gadreva na sasaga, gugumatua ena veisiga me kilai deivaki ka bulataki na kosipeli. Na vulici ni kosipeli e veimuataki ki na saumaki dina e gadrevi kina na veivakauqeti ni Yalo Tabu.”¹

Sa okoya oqo na cakamana eda vakasaqara—ni dua e sa vakila na dina ni ivolanikalou, ² na veika e vakila ena vakalougatataki mai na veivakayarayarataki ni Yalo Tabu. Na veika e lako curumi oqo e vatu tale ni nomu yavu ni saumaki mai Vua na iVakabula. A vakananuma tiko ga oqo vei keda o Peresitedi Nelson, na noda yavu vakalou e dodonu me vakadeitaki tiko vakawasoma.³ Na saumaki vakadede ena taura na noda bula taucoko na kena sasagataki tiko.⁴ Sa Noda Takete na Saumaki

Me vakaibalebale sara vakalevu, na kilaka mai na wili ivolanikalou e dodonu me nomu.⁵ Na wilika se rogoca na nodra kilaka se nanuma tale eso erawa ni veivuke vei iko, io e sega ni na kauta mai na kaukauwa ni saumaki o gadreva. E sega tale ni dua na ka me sosomitaka na gauna iko vakayagataka ena ivolanikalou, mo rogoca kina na Yalo Tabu me vosa saraga vei iko.

Na cava e vakatavulica tiko vei au na Yalo Tabu?

Na veimacawa niu dolava na noqu ivola ni Lako Mai, Mo Muri Au, au dau vola na taro oqo ena muana icake ni tabana: “Na cava e vakatavulica tiko vei au na Yalo Tabu ena macawa oqo?”

Ni da vulica na ivolanikalou, eda na ciqoma na veivakauqeti me baleta na noda bula. Sega ni dau cala, e dau yaco mai na veivakauqeti vakayalo, kau dau vola sara ena noqu ivolavakarau.

Ia, au kila vakacava ni vakatavulici au tiko na Yalo Tabu? E dau yaco vaka lalai ka rawarawa. E so na gauna e dau rikavi au saraga mai e dua na tiki ni ivolanikalou mai na tabana oya me kauta na noqu vakanananu. Eso tale na gauna, au dau vakila ni vakararamataki na noqu vakasama ena kena vakarabailevutaki na noqu kilaka ni ivakavuvuli ni kosipeli. Au dau vakila talega na veivakayarayarataki ni Yalo Tabu ni keirau dau veitalanoataka na veika au wilika tiko kei na watiqu o Anne Marie. Na nona rai edau sureta vakalevu sara na Yalo.

Na Parofita kei na Kanavata ni Lakosivia.

Ena yabaki oqo eda sa vulica tiko kina na Veiyalayalati Makawa—na ivolanikalou tabu koya e vakasinaita na yaloda ena rarama. Noqu wilika voli na Veiyalayalati Makawa, e vaka au gade tiko kei ira na idusidusi au vakararavi kina: Atama, Ivi, Inoke, Noa, Eparama, kei na vuqa tale eso.

Na macawa oqo na noqu vulica tiko na Lako Yani wase 7–13, eda vulica na nona sereki ira na luvei Isireli na Turaga mai na nodra tauri tu vakabobula e Ijipita vakadrau na yabaki. Eda wilika me baleta e ciwa na matedewa bibi—e ciwa na kaukauwa vaKalou a vakaraitaki—koya raica o Pharaoh ia e sega ga ni vakayalomalumalumutaka na yalona.

Sa qai tukuna na Turaga vei nona parofita o Mosese, na ikatini ni matedewa—kei na sala erawa ni ra vakarautaki ira kina na vuvale i Isireli. E tiki ni dua na ivalavala tudei era vakatoka na Kanavata ni Lakosivia, oya na nodra vakacabora e dua na lami tagane, savasava. Era qai makataka na tutuna e cake ni nodra katuba ni vale ena dra ni lami. E yalataka na Turaga ni o ira kece na vale era makataki ena dra ena taqomaki mai na matedewa rerevaki koya ena lako mai.

E tukuna na ivolanikalou,“Ara sa lako yani na Isireli …ia me vaka sa vakarota vei Mosese ko Jiova” (Lako Yani 12:28). E dua na kaukauwa e tiko ena itukutuku matata oya ni talairawarawa.

Baleta ni ra muria na luvei Isireli na vakasala nei Mosese ka vakayacora ena vakabauta, era a vakabulai mai na matedewa bibi, e muri a qai sereki mai na tiko vakavesu.

Na cava e vakatavulica vei au na Yalo Tabu ena veiwase aqo?

Oqo e vica na vakasama e lako mai ena noqu vakasama:

Na Turaga e cakacaka ena vuku ni parofita me taqomaka ka vakabula na Nona Tamata.
Na vakabauta kei na yalomalumalumu me muri kina na parofita edau muria ga na cakamana ni veitaqomaki kei na veisereki.
Na dra e boroi ena matani katuba sa ivakatakilakila ni vakabauta e tiko i Jisu Karisito, na Lami ni Kalou.

Na Parofita kei na Yalayala ni Turaga

Au taleitaka na tautauvata eda raica ena sala e vakalougatataki ira kina na Nona tamata na Turaga ena itukutuku ni Veiyalayalati Makawa kei na sala e vakalougatataki ira na Nona tamata ena siga nikua.

Na gauna e kacivaka taumada kina na Parofita bula ni Turaga nikua o Peresitedi Nelson na Lako Mai, Mo Muri Au me dua na ivakarau ni noda na wilika ka kila na ivolanikalou, a sureti keda o koya me da veisautaka vakadua na noda veilomanivale me ivanua ni vakabauta kei na veivale ni vulici ni kosipeli.

A qai yalataka o koya e va na veivakalougatataki matata:

Na nomu Siga ni Vakacecegu ena ka rekitaki vakaidina,
O ira na luvemu era na taleitaka me ra vulica ka bulataka na nona ivakavuvuli na iVakabula.
“Ena malumalumu na veivakauqeti ni vu-ni-meca ena nomuni bula kei na nomuni itikotiko, ka
Na veisau ena nomu matavuvale ena vakilai levu ka veitokoni.”⁶

E sega vei keda ena gauna oqo na ivolaniveisiga mai vei ira era lakocuruma na Kana ni Lakosivia vatakei Mosese e Ijipita. Ia, e vuqa na ivakadinadina mai vei ira na Yalododonu, era tautauvata na nodra vakabauta, na nodra muria na vakasala nei Peresitedi Nelson nikua ka ciqoma tiko na veivakalougatataki e yalataki.

Oqo e vica vei ira na ivakadinadina:

E dua na tina ni dua na vuvale gone a kaya, “Eda veivosakitaki Karisito, eda reki ena vukui Karisito ena neitou vale. Vei au, oqo e dua na veivakalougatataki levu duadua—ni ra tubucake na luvequ ena mataqali veitalanoa vakosipeli ena loma ni vale koya e kauti ira vakavoleka vua na iVakabula”⁷

E dua na turaga qase e vakatoka na nona vulica na ivolanikalou mai na Lako Mai, Mo Muri Au me “dua na sala ni wai ka vakasinaiti ena rarama vakalou koya e vukea na noda raica na ivakavuvuli vakosipeli eda gadreva me vukea na noda bula vakayalo.”⁸

E dua na yalewa vakawati vou e vakamacalataka na veivakalougatataki ena loma ni nona vakamau: “Au sa mai kila vaka titobu na yaloi watiqu, ka sa mai dolava talega kina na yaloqu vei koya ni keirau vulica vata tiko.”⁹

E dua na tina ena dua na vuvale levu e liaca na nona sasaga me vakavulica na nona matavuvale e sa veisau: “Niu rai lesu, e vaka meu vaka qaniliga ni qito ena snow ka qai tabaka tiko na piano. E dua na tina ena dua na vuvale levu e liaca na nona sasaga me vakavulica na nona matavuvale e sa veisau: “Niu rai lesu, e vaka meu vaka qaniliga ni qito ena snow ka qai tabaka tiko na piano. E vaka meu sa vakamuria tuga na ka e dau caka, ia e sega ni rorogo donu na ivakatagi. Qo ni sa luvati na qaniliga, se sega sara ni rogo donu sara na ivakatagi, ia sa bau dua na veisau au raica. Na Lako Mai Mo Muri Au e sa solia vei au e dua na rai e liu, kaukauwa, makare na rai, kei na inaki.”¹⁰

E dua na tagane vakawati vou e tukuna: “Eso na veika bibi duadua e vale e sa vaka me qai makare mai ena gauna au cakava me tiki ni noqu vei mataka na Lako Mai, Mo Muri Au . Na vuli e vakavuna meu vakasamataka vakalevu na veika e bibi duadua vei au, me vaka na valetabu, neirau veimaliwai kei na watiqu, kei na noqu itutu ni lotu. Au vakavinavinakataka ni na noqu lomanivale e dua na vanua e imatai duadua kina na Kalou.”¹¹

A wasea e dua na marama: Na noqu gauna e veisiga kei na Lako Mai, Mo Muri Au e tutu yadudua meu dau vola, ia ni lako tiko na gauna au rawa ni raica na veisau niu vulica vakawasoma, ka vakamatata na ivolanikalou. Na mataqali vuli vakaoya e vakayalomalumalumutaki au, e vakavulici au, ka veisautaki au vakalailai ena dua na gauna.”¹²

E wasea e dua na daukaulotu oti: Na porokaramu ni Lako Mai, Mo Muri Au e vakavolekati au ki na dua na itagede ni wili ivolanikalou koya au cakava ena noqu gauna ni kaulotu, e kauti au tani mai na vakasama me caka ga me rawa ki na dua na gauna veivakavutuniautaki dina ni veikilai kei na Kalou”¹³

Tukuna e dua na turaga: “Au vakila na Yalo Tabu e kidavaki vakalevu ena noqu bula kau vakila na vakatakila ni nona veidusimaki na Kalou ena noqu caka digidigi. E vuqa tale na veitalanoa momona me baleta na talei kei na kena rawarawa na vakavuvuli i Karisito kei na Nona Veisorovaki.”¹⁴

Wasea e dua na gone-yabaki-vitu: “Au sa vakarau papitaiso, na Lako Mai, Mo Muri Au e sa vakarautaki au tiko. Keitou dau veitalanoataka kei noqu vuvale na veika baleta na papitaiso, kau sa sega niu nuiqawaqawataka na papitaiso. Na Lako Mai, Mo Muri Au e vukea me lako mai ki na yaloqu na Yalo Tabu, kau dau vakila na katakata niu wilika na ivolanikalou.”¹⁵

Na iotioti, mai vei dua na tina e vuqa na luvena: “Ni keitou vulica na vosa ni Kalou, e vukei keitou o Koya me tosoya na neitou lomaleqa ki na kaukauwa, mai na ibolebole, ki na veisereki; mai na cudrucudru kei na valelewa ki na loloma kei na vakacegu; kei na veivakayarayarataki ni vunica ki na veivakayarayarataki ni Kalou.”¹⁶

Oqo, kei na vuqa tale na ilawalawa vakabauta i Karisito era vakatakarakarataka na dra ni Lami ni Kalou ena icurucuru ni nodra lomanivale. O ira oqo era vakaraitaka tiko na nodra dinata tiko eloma na muria na iVakabula. E liu na nodra vakabauta qai tarava mai na cakamana. Sa okoya oqo na cakamana ni dua e sa vakila na dina ni ivolanikalou na veika e vakila oya e vakalougatataki mai na veivakayarayarataki ni Yalo Tabu.

Ni da vulica na ivolanikalou, e na yali na lauqa vakayalo. E kaya o Nifai, “Ia ko koya yadua sa vakabauta ka muria sara na vosa ni Kalou, ka tautauri matua sara kina, ena sega ni rusa; ena sega talega ni rawai ira na veitemaki kei na gasau vidi waqa ni meca, me vakamatabokotaki ira, ka kauti ira yani ki na veivakarusai” (1 Nifai 15:24).

Ena gauna e liu, ni ra muria na ivakaro ni Kalou o ira na luvei Isireli koya e soli vei Mosese, era vakalougatataki ena tataqomaki kei na tugalala. Nikua, ni da vakamuria na veidusimaki ni Turaga e lako mai vei na parofita bula o Peresitedi Nelson, eda kalougata vakakina ni saumaki ni yalo kei na taqomaki ni noda lomanivale.

Au vakadinadinataka ni bula tiko o Jisu Karisito. Oqo na Nona Lotu, sa vakalesui mai e vuravura vua na Parofita o Josefa Simici. Sa nona parofita bula na Turaga nikua o Peresitedi Russell M. Nelson. Au lomani koya ka tokoni koya. Ena yacai Jisu Karisito, emeni.