Sa O Keda Na Lotu i Jisu Karisito ni Yalododonu Edaidai

Mai vei Reyna I. Aburto

iKarua ni Daunivakasala ena Mataveiliutaki Raraba ni iSoqosoqo ni Veivukei

Na Lotu e sega walega ni kena veivalenilotu kei na ituvatuva vakaliuliu ni lotu; na Lotu sa okeda saraga, na lewenilotu, o Karisito na iulu ni Lotu kei na parofita e Gusudra vei keda.

Ni oti na noqu ciqoma na veisureti meu “lako mai ka raica,”¹ Au a tiko ena imatai ni noqu soqoni ni Lotu i Jisu Karisito ni Yalododonu Edaidai ena yabaki 26, Keirau seqai sere sara tikoga kei na imatai ni watiqu. E dua na luvequ tagane yabaki tolu, Ka vakamalumalumutaki au na rere. Noqu curu yani ena loma ni valenilotu, e vakasinaiti au e dua na katakata kau vakila na nodra vakabauta kei na nodra marau o ira era tu wavoliti au. “E dua dina na ivakaruru mai na cava.”² Oti e tolu na macawa, au vakayacora na noqu veiyalayalati ni papitaiso kei na Tamada Vakalomalagi ka tekivutaka na noqu lakolako meu tisaipeli i Karisito, dina ga ni se sega ni taucoko sara na ilakolako oya.

Meu ciqoma na veivakalougatataki tawamudu oya, e vuqa na veika vakayago ka vakayalo me ra tuvai ena kena vanua donu. Na kosipeli i Jisu Karisito e sa vakalesui mai ka vunautaki; na valenilotu oya a tara ka samaki vinaka tu; e tuvai vinaka na kena iliuliu ni lotu, mai vua na parofita ki na iliuliu ni tabana; e dua na tabana era sinai kina na lewenilotu ni veiyalayalati ka era tuvakarau mera ciqomi au kei na luvequ tagane ni keirau sa toro mai vua na iVakabula, “vakabulabulataki ena vosa vinaka ni Kalou,”³ ka vakaitavi ena madigi ni veiqaravi.⁴

Mai na ivakatekivu, era soqona vata ka cokonaki ira na luvena na Kalou ⁵ “meu vakavuna na tawa mate rawa kei na bula tawamudu ni tamata.”⁶ Ena inakinaki oya, e sa vakarota ko Koya me taraicake na vale ni sokalou,⁷eda ciqoma kina na vuku kei na cakacaka vakalotu ni veivakabulai kei na bula vakalou; vakaitavi ka bulataka na noda veiyalayalati koya e vauci keda vei Jisu Karisito;⁸era vakarautaki ena “kaukauwa vakalou”; ⁹era qai vakasoqonivata vakawasoma me vakananumi Jisu kei na nodra veivakaqaqacotaki ena Vukuna.¹⁰ Na ituvatuva ni Lotu kei na kena veivalenilotu era tu me baleta na noda bula vakayalo. “Na Lotu… sa ikabakaba ni kena taraicake na vuvale me tawamudu.”¹¹

Neirau veitalanoa kei dua noqu itokani a lako curuma tiko e dua na gauna dredre, au taroga sara se vakacava tiko na nona bula vakailavo. Ena mata tagitagi, a sauma o koya ni vukei koya tiko na bisopi mai na isolisoli ni lolo. A kuria o koya, “Au sega ni kila ivei na vanua ena tu kina qo o au kei na noqu matavuvale ke sega na Lotu.” Au sauma sara, “Na Lotu sai koya na lewenilotu. O ira saraga era solia mai na yalodra kei na yalo mamarau na nodra solisoli ni lolo mera vukei kina o keda eda gadreva na veivuke. O sa tauca tiko o iko na ivua ni nodra vakabauta kei na qaqaco ni muri Jisu Karisito.”

Kemuni na wekaqu tisaipeli i Karisito, me da kakua ni beca na cakacaka veivakurabuitaki e cakava tiko na Turaga ena vukuda, na Nona Lotu, se mani vakacava na noda cakacala. Eso na gauna eda dau soli ka, ka so na gauna eda na taura na ka, ia eda dua vata kece ena vuvale i Karisito. Na Nona Lotu e tuvai ena ituvatuva e solia o Koya me liutaki ka vakalougatataki keda ni da qaravi Koya ka veiqaravi vakataki keda.

Eso na marama era kere veivosoti vei au, era nanuma ni ra sega ni wili me ra vakaitavi ena Soqosoqo ni Veivukei baleta ni ra veiqaravi ena Lalai se Goneyalewa. O ira na marama oya era wili vata kei ira na dau vakaitavi duadua vakalevu ena Soqosoqo ni Veivukei baleta ni ra vukei ira tiko na luveda vakamareqeti kei na itabagone me ra vaqaqacotaka na nodra vakabauti Jisu Karisito.

Na iSoqosoqo ni Veivukei e sega ni yalani ga ena nodra rumu ni valenilotu, na lesoni ni Sigatabu, e dua na itaviqaravi, se e dua na mataveiliutaki ena tabana se ena lotu raraba. Na Soqosoqo ni Veivukei era marama ni veiyalayalati ni Lotu; sa o keda—yadudua kei keda kece. Oqori na “ilawalawa raraba e vuravura ni yalololoma kei na veiqaravi.”¹² Dua na vanua se veivanua eda lako kina, eda na tiki tuga ni Soqosoqo ni Veivukei ni da sasagataka ka bulataka na kena inakinaki vakalou, sa o koya me ra rawata na marama na cakacaka ni Kalou ena vei tamata yadua vakatalega kina na kena vakaisoqosoqo ¹³ ena kena vakarautaki na veivuke “veivuke vei ira na dravudravua, veivuke vei ira na tauvimate; veivuke vei ira na vakatitiqa, veivuke vei ira na sega ni kila—na veimataqali veivuke me kauta tani na tatao, marau kei na toso e liu.”¹⁴

Na gagadre ni wiliki vata e tiko talega ena kuoramu ni talatala qase kei na mataisoqosoqo ni lotu ni veiyabaki ni bula, oka kina na lalai kei ira na itabagone. Na Lotu e sega walega ni kena vei valenilotu kei na ituvatuva vakaliuliu ni lotu, na Lotu sa o keda, na lewena. Sa O Keda na Lotu i Jisu Karisito ni Yalododonu Edaidai, o Karisito e Ulu ni lotu kei na parofita e Gusudra vei keda. E kaya kina na Turaga:

“Raica, oqo na noqu ivunau—ko koya sa veivutuni ka lako mai vei au, sai koya na lewe ni noqu lotu.

“Ia …ko koya yadua sa lewena na noqu lotu, ka vosota tiko ena noqu lotu me yacova na ivakataotioti, sai koya ena yavutaki ena noqu uluvatu.”¹⁵

Kemuni na taciqu kei na ganequ, me da liaca tiko na veivakalougataki ni da lewena na Lotu i Jisu Karisito, na vanua erawa ni sema kina na noda vakabauta, na utoda, kaukauwa, vakasama, kei na liga ni kena cakacakataki na Nona caka mana cecere. Ni sa sega ni dua walega na tikina ena yago [ni Lotu i Karisito], sa vuqa ga.¹⁶

A tukuna e dua na itabagone cauravou vei tinana, “Noqu se lailai, na veigauna kece au solia e dua na dola me noqu ikatini, au dau nanuma ni na dua na dola oya e dua taucoko na valenilotu e rawa ni tara kina. E rawa li ni da tukuna ni yalowai?

E tarai tinana, ka sauma o koya, “Totoka dina oqori! O raitayaloyalotaka e na nomu vakasama?”

“Io!” e kaya o koya. Io!” kailavaka o koya, “Era totoka, qai vuqa vaka milioni na kedra levu!” ¹⁷

Kemuni noqu itokani, me tiko vei keda na vakabauta ni gone ka marautaka ni da kila tiko na noda sasaga lailai duadua e cau tiko ki na dua na veisau matalia ena matanitu ni Kalou.

Na noda inaki ena Nona matanitu e dodonu me kauti keda vata mai vei Karisito. Me vaka ni da wiilka ena ivolanikalou, na iVakabula e dodoka na nona veisureti ki vei ira na Nifaiti:

“Sa tiko li e so … na nomudou tauvimate? Mo ni kauti ira mai. Sa tiko li e so …era tauvimate tu? Dou kauti ira mai kau na vakabulai ira, niu sa lomani kemudou; io sa vuabale sara na noqu loloma.

“Ia, au kila ni sa kilikili meu vakabulai kemudou, me vaka na nomudou vakabauta.”¹⁸

E sega li vei keda kece na veivakatovolei e rawa ni da kauta ki na yavani iVakabula? Dina eso vei keda eda vakaleqai vakayago, ia e vuqa tale e valuta tu na bikai ni mona kei na vakasama, eso tale e dredre na nodra veimaliwai raraba, ka eda vakasaqara kece tu na vakacegu ni da sotava na ibolebole vakayalo. Eda vakaleqai kece tu ena so na ivakatagedegede duidui.

Eda wilika ni “era sa lako yani ena dua vata na gauna ko ira na lewevuqa, era sa kauta mai na nodra tauvimate kei … ira kece ka bikai ena vei mataqali kece ga; ka qai vakabulai ira kece sara ni ra kau yani vua.

“A ra sa cuva sobu kecega e yavana ka vakarokorokotaki koya, ko ira sa vakabulai kei ira sa bula vinaka tu; era sa reguca na yavana, ka era sokalou vua.”¹⁹

Mai na dua na gonetagane lailai e sauma na nona ikatini ena vakabauta ki vua e dua na tina duadua e gadreva na veivakaukauwataki kei na loloma cecere ni Kalou ki vua e dua na tama ka vakasaqara voli na gaunisala me na veivakarautaki kina vua na nona vuvale kei ira na noda qase e liu na nodra gadreva na cakacaka vakalotu ni veivakabulai kei na bula vakalou vei keda yadua eda vakavouia tiko na noda veiyalayalati vua na Kalou ena veimacawa, eda na veitauriliga, ka veivuketaka na noda toso vua na veivakabulai dauveivueti ni iVakabula.

Kemuni na taciqu kei na ganequ, meda muria na nona veisureti o Jisu Karisito me da kauti keda kei na noda icolacola ki Vua. Ni da lako Vua ka kauta ira eda lomana ki vei Koya, ena raica na noda vakabauta o Koya. Ena vakataucokotaki ira, ka na vakataucokotaki keda talega.

Ni “dou sa curu ki na ivakacegu ni Turaga,”²⁰ eda sasagataka tiko me da “yalovata ka duavata” ka mo ni yalomalumalumu, mo ni talairawarawa ka yalomalua; mo dou vakamasuti vakarawarawa; sinai ena yalodei kei na vosota vakadede; ka matau ena ka kecega; ia mo dou gugumatua ka muria tikoga na ivakaro ni Kalou ena gauna taucoko; sinai ena vakabauta, na nuinui, kei na loloma uasivi; ka ko ni qai uasivi sara ena cakacaka vinaka.²² Eda sasagataka tiko me da vakataki Jisu Karisito.

Au vakadinadinataka ena Lotu nei Karisito, sa o keda na gaunisala ena vakaraitaka kina na, me vaka e vakavuvulitaka o Peresitedi Nelson, “noda iVakabula kei na Dauveivueti, ko Jisu Karisito, ena vakayacora eso na Nona cakacaka cecere duadua ena maliwa ni gauna oqo kei na Nona lesu mai.”²³

E kaya kina na Turaga:

“Raica, au na kitaka kusarawa na noqu cakacaka ena kena gauna.

Kau na tukuna vei kemudou, … e dua na ivakaro mo dou vakasoqoni kemudou vata, dou cokonaki kemudou, ka vakarautaki kemudou, ka vakatabui kemudou; io, dou vakasavasavataka sara na lomamudou, ka savata na ligamudou kei na yavamudou e mataqu, meu vakasavasavataki kemudou kina.”²⁴

Me da na sauma lesu na veisureti vakalou oqo ka vakasoqoni ena yalo mamarau, cokonaki, vakarautaki ka vakatabui keda sa noqu masu malumalumu ena yaca i Jisu Karisito, emeni.