Kakua ni Yalolailai: Vakadinata Ga!
Tekivuna na nomu vasaqara na marau ena nomu solega na uasivi ena veika eda sa ciqoma mai vua na dausoli isolisoli vinaka kecega.
Au na vosa vakadodonu nikua vei ira na itabagone ni Lotu, o ya vei ira era yabaki vata kei Peresitedi Russell M. Nelson se gone sobu. Au dau sega ni vakayagataka na iyaloyalo, ia e dredre meu sega ni wasea yani na kena oqo.
Na kerekere talei kaukauwa oqo e lako mai vua na noqu itokani yabaki vitu o Marin Arnold. Au na vakadewataka yani na nona vosa vaka Ijipita taumada:
Kivei Bisopi
koniferedi raraba
sa vaka Vucesa dina cava
meda na
Cakava kina? tukuna mai na vuna
Wekamu, o Marin
Arnold.1
Marin, na noqu vosa au na tukuna yani oqo o na rairai rarawa tale kina. Ia ni ko vola vei Bisopi mo kudruvaka, sa ka bibi mo tukuna vua ni yacaqu o “Kearon. Elder Patrick Kearon.”
Voleka ni rua na yabaki ni matetaka levu e vakayavutaki vakaivolatabu sa solega na noda vuravura, na matelevu oqo e tarova vakadua na veika raraba kece, dina, ni sega ni tarova na veiravuti, vakacaca, kei na veivakacacani butobuto vakapolitiki. Ke lailai beka oqori, eda se sotava tikoga na ibolebole makawa vakatamata kei na itovo, mai na luluqa vakailavo ki na vakacacani ni veika bula ki na veilecayaki vakakawatamata ka vuqa tale.
Na cagi kaukawa vakaoqo kei na veisiga butobuto e vakayalolailaitaki ira na noda itabagone, o ira eda nuitaki ira tiko yani mera gugumatua ena vuku ni siga ni mataka ni noda bula. Sa dau tukuni tu ni “nodra kaukauwa na itabagone o ya na iyau nuitaki ni vuravura taucoko. O ira … na itabagone … sa ituvaki ni matada … ni mataka.”2 Me kena ikuri, o ira na luveda era sa dauniyau sa tu e ligadra na icavacava ni Lotu me dei kina.
Ni gauna oqo, sa kilai vinaka tiko kevaka me yaco nodra ituvatuva na itabagone me na luluqa vakalailai. O Dr. Laurie Santos, e dua na parofesa ena Yale University, ra tauyavutaka e dua na kalasi a vakatokai na “Saikolaji kei na Bula Vinaka.” “Na imatai ni yabaki a tekivu kina na kalasi oqo, voleka ni [dua na ikava] [taucoko] ni gonevuli me geretueti a curu kina.”3 Sivia e 64 na milioni na tamata era a sikova na nona posi. Ni volai na itukutuku cecere oqo, e raica e dua na dauvolaitukutuku na kena mosi sara me raici ni vuqa na gonevuli vuku, ka gone—kei na qase—era saga vakaukauwa mera “raica e dua na ka era a vakayalia” se bibi sara, era gadreva voli dua na ka a sega vei ira.4
Au sa kerea nikua vei ira na noda itabagone, kei kemuni na itubutubu kei na qase sa vakasalataki ira, mo ni tekivu vakasaqara na marau ena kena ciqomi na ka vinaka eda sa ciqoma maivei koya sa dau solia na veisolisoli vinaka.5 Ena kena gauna donu e vuqa e vuravura era taroga vakabibi na veika ni yalo, ka meda sauma yani ena “itukutuku vinaka”6 ni kosipeli i Jisu Karisito. Na Lotu i Jisu Karisito ni Yalododonu Edaidai, e taura cake tu na ilesilesi kei na itukutuku ni iVakabula kei vuravura, ka solia na sala bibi tawamudu me kunei kina na vinaka ka caka vinaka ena gauna sa gadrevi dina kina.
A kaya o Peresitedi Russell M. Nelson ni itabatamata ni itabagone oqo era sa gumatua me “kaukauwa cake nodra [caka vinaka] e vuravura ni mai na itabatamata sa oti.”7 O keda, mai na tamata kece, me da na “laga[ta tiko] na sere ni loloma veivueti,”8 ia ena vakaivakarau—“vakatisaipeli,” ke o gadreva—na mataqali e veitaqomaki mai na nanuma cala kei na itovo veivakarusai e domovelataki keda ni da via lagata na sere veivakabulai tawamudu.
Dina ga ni da tiko ena “yasa rarama ni gaunisala,”9 eda rawa ni sotavi koya sa gumatua me kunea e dua na ka luluqa ka vakatani ni ka kece. Ko kila na nona ibole: “Sa dau buto sara ni bera ni yaco me katabuto dina.” Sa qai dua na rai cala, kei na bula rarawa! Io, eso na gauna eda via dro tani mai na noda tikina, ia e dodonu meda kua ni dro tani maivei keda—na luvena na Kalou bula sa lomani keda, sa dau tu vakarau me vosoti keda, ka na sega vakadua ni biuti keda. Ko sa Luvena vakamareqeti duadua sara. Oi kemuni na Luvena, sa solia kina na parofita kei na yalayala, na isolisoli vakayalo kei na ivakatakila, na cakamana kei na itukutuku, kei ira na agilosi ena yasa e rua ni ilati.10
Sa solia talega vei iko e dua na Lotu e qaqaco kina na vuvale ni bula oqo ka vauca vata me tawamudu. E vakarautaka e sivia e 31,000 na tabanalevu kei na tabana era soqoni kina na tamata, lagasere, lolo, ka veimasulaki vakai ira ka solia nodra iyau kivei ira na dravudravua. Oqo na vanua era vakayacani kina na tamata yadua, wiliki, ka qaravi, ka veiqaravi vakai ira na itokani kei na veiwekani ena veikacivi mai na cakacaka ni vunivola ki na ilesilesi ni veitaqomaki. Na itabagone qase cake—kei ira na veiwatini qase—era kaulotu ka ra sauma ga ka sega ni digia na vanua mera laki kaulotu kina, kei ira na lewenilotu gone kei na qase era gole ki valetabu me caka na cakacaka vakalotu sa gadrevi me vauca vata na vuvale tamata---e dua na itaviqaravi qaqa ena vuravura tawase ia e dua e tukuna ni tatawase oqo sa vagauna ga. Oqo e vica na vuna eda solia ena vuku ni “inuinui sa tu vei [keda].”11
E dina, ena noda gauna oqo, na veika dredre sara ena sotava na tisaipeli cava ga i Jisu Karisito. Ira na iliuliu ni Lotu oqo era sa solia na nodra bula mera vakasaqara na veidusimaki ni Turaga me wali na ibolebole oqori. Kevaka e so era sa sega ni wali rawa mera marau kece kina, e rairai era sa kovuti me tiki ni kauveilatai a kaya o Jisu eda na colata me da na muri Koya kina.12 Na kena dina sa baleta ni na yaco na veigauna butobuto kei na veika dredre a yalataka na Kalou, mai na o ena siga ka duru bukawaqa ena bogi, me dusimaki ira na parofita, solia na itautauri kaukamea, dolava na matamata qiqo e mua ki na salatu dodonu, ka kena ilutua sa solia vei keda na kaukauwa meda vakacavara na ilakolako.13
Yalovinaka sara, tiko ga ena kana magiti taucoko ke o lecava mada ga na borokoli. Mo cilavi ena Nona rarama ka solia na nomu kadrala ki na kena inaki.14 Era taura donu tiko na Lalai: O Jisu e vinakata dina “[vei iko] mo dua na matanisiga.”15
Na gauna sa kerea kina o liuliu ni Jiu o Jairo vei Jisu me vakabula na luvena yalewa yabaki 12 e davo bibi tiko mai vale, kei ira na tamata era sa wavolita na iVakabula vakadede ka yaco mai e dua na tamata me kaya vei tamani gone rarawa, “Sa mate na luvemu yalewa; kakua ni vakaocataka na iVakavuvuli.”
“Ia ni sa rogoca ko Jisu, sa vosa vua ka kaya, Kakua ni yalolailai, vakadinata ga, ena qai vakabulai ga ko koya.”16
E dina sara o koya. O iko talega! “Kakua ni yalolailai; vakadinata ga.”
Baleta ga ni kemuni yadua ena soqoni oqo sa mareqeti vua na Kalou kei na Lotu oqo, meu tinia ena ivakaro vakaiapositolo cecere oqo. Ni bera ni ko bau ciqoma na isolisoli ni Yalo Tabu, a teivaki vei iko na Rarama i Karisito e yalomu,17 na “rarama oqo sa tiko ena ka kecega, … sa solia na bula ki na ka kecega,”18 ni sa veivakauqeti ni ka vinaka ena yalodra kecega na tamata era se bau bula se mera na qai bula. Na rarama o ya a soli me taqomaki iko ka vakavulici iko. Dua na usutu ni kena itukutuku o ya ni bula sa isolisoli talei duadua ni isolisoli kece, na isolisoli tawamudu ga ena Veisorovaki ni Turaga o Jisu Karisito. Ni sa Rarama ka Bula kei Vuravura,19 na Luvena Duabau na Kalou sa tadu mai me solia vei keda na bula ena nona valuta rawa na mate.
E dodonu meda yalodina vakataucoko ki na isolisoli ni bula ka cici yani mo vukei ira sa vakarau vakaleqai mera vakasuka nodra isolisoli tabu. Kemuni na iliuliu, daunivakasala, itokani, vuvale—ni yadrava na ivakatakilakila ni lomaocaoca, veilecayaki, se na ka mo vakamavoataki iko kina. Mo veivukei. Vakarorogo. Cakava eso na ka mo veivakabulai kina ni gadrevi.
Ki vua e dua na noda itabagone o sasaga bula tiko, se cava nomu kauwai se dredre, na mate ena kukuna e sega dina ni kena isau. Ena sega ni vakaceguya na mosi ko vakila tiko se o nanuma ni ko vakavuna. Ena vuravura e gadreva vakabibi na rarama kece e rawa ni taura, yalovinaka kakua ni vakalailaitaka na rarama tawamudu sa biuta na Kalou ena yalomu ni bera ko vuravura oqo. Vosa vua e dua. Kerea na veivuke. Mo kakua ni vakarusa na bula a solia na Karisito na Nona bula me maroroi. Ena rawa ni ko lako curuma ka vosota na veidraki ni bula dredre ni bula oqo baleta ni keitou na vukei iko mo ko colata. O sa kaukauwa cake sara mai na kena o nanuma rawa. Na veivuke sa tiko, maivei ira eso vakabibi mai vua na Kalou. Ko sa lomani, vakamareqeti ka gadrevi sara. Keimami gadrevi kemuni! “Kakua ni yalolailai; vakadinata ga.”
E dua a sotava na ituvaki eso a dredre vakalevu cake maivei iko kei au, a kaya taumada: “Toso yani ki liu [noqu itokani gone lomani]. Na yaloqaqa ka toso tikoga ki liu ka qaqa! Me reki na lomamudou, ka marau vakalevu sara.”20 E levu na ka meda sa marautaka yani. Eda sa tiko vata, ka sa noda o Koya. Kakua ni bureitaka na madigi mo neimami, sa noqu vakamamasu, ena yacana tabu na Turaga, o Jisu Karisito, noda iVakavuvuli, emeni.