Loloma, Wasea, Sureta
Ni da loloma, wasea, ka sureta eda vakaitavi tiko ena cakacaka cecere ka lagilagi o ya ka vakarautaka tiko na vuravura ki na lesu tale mai ni nona Mesaia.
Raitayaloyalotaka vata kei au ni o duri tu ena dua na delana e Kalili ka sarava tu na totoka kei na lagilagi ni nona sikovi ira na nona tisaipeli na iVakabula sa tucaketale. Sa ka qoroi dina meda vakasamataka vakayadua ni da rogoca na veivosa oqo, ka wasea o Koya vei iratou, na Nona ivakaro bibi me “ratou lako yani, ka vakalotutaki ira na lewe ni veivanua kecega, ka papitaisotaki ira ena yaca ni Tamamudou, kei na Luvena, kei na Yalo Tabu.”1 Sa dina sara, na veivosa oqo ena veivakaukauwataki, veiuqeti, ka vakayavalati keda yadua, me vaka a yaco vei iratou Nona i Apositolo. E vakakina, eratou a solia na vo ni nodratou bula me vakayacora na ka sara ga o ya.
Ia e taleitaki, ni a sega walega ni o iratou nai Apositolo eratou a tugana e lomadratou na vosa i Jisu. O ira na lewenilotu taumada, mai vei ira na lotu vou ka yacovi ira na lotu dede, era a vakaitavi ena ilesilesi cecere ni iVakabula, ena wasei ni itukutuku vinaka vei ira era sotava ka kila. Na nodra sasaga me wasea na nodra ivakadinadina baleti Jisu Karisito a vukea me tubu ka tete yani na Nona Lotu ka se qai tauyavu vou.2
O keda tale ga ni da tisaipeli i Karisito, eda sureti meda rogoca na Nona ilesilesi ni kua, me vaka ga eda a tiko ena ulunivanua o ya e Kalili ena imatai ni gauna a tukuna kina. Nai lesilesi oqo a tekivu tale ena 1830, ena gauna a vakatikori Samuela kina na tacina o Josefa Simici me dua na daukaulotu taumada ni Lotu i Jisu Karisito.3 Mai na gauna o ya, sa sivia na 1.5 na milioni na daukaulotu era sa lakova na veiyasai vuravura me vakavulica na lewe ni veivanua ka paipaisotaki ira na ciqoma nai tukutuku marautaki ni kosipeli vakalesui mai.
Oqo na nodai vunau. Oqo na noda gagadre talei.
Mai vei ira na luveda gone duadua ki vei ira ka qase duadua ena keda maliwa, eda nanamaki ki na gauna eda na rawa ni rogoca kina na kaci ni iVakabula meda wasea na kosipeli ki na veimatanitu e vuravura. Au kila ni o kemuni talega na cauravou kei na goneyalewa o ni a vakila e dua na veibolei veivakayaloqaqataki vata o ya ena noa mai vua na noda parofita ni a sureti kemuni me vakavakarau ki na veiqaravi ni daukaulotu tudei me vaka a cakava na iVakabula vei iratou Nona i Apositolo.
Me vakataki ira na daucici ni bera ni tekivu na cici, eda wawa ena nanamaki ki na veisureti vakaivola ka tiko kina na saini ni parofita me tekivu kina cici! Na gagadre oqo e vakaturaga ka veiuqeti; ia, meda vakasamataka mada na taro oqo: vakacava meda sa tekivu kece ena gauna sara ga oqo?
O na taroga beka, “Ena rawa vakacava meu daukaulotu ni sega na beji ni yaca?” Se eda dau kaya vakai keda, “O ira na daukaulotu tudei era vakatikori ki na cakacaka oqo. Au vinakata meu veivuke ia tei malua mada me ruru mai na bula.”
Kemuni na taciqu kei na ganequ, e rawarawa sara mai na veika oqori! E marautaki, ni ilesilesi cecere ni iVakabula e rawa ni rawati ena ivakavuvuli kilai rawarawa, ka vakavulici vei keda yadua ena gauna ni gone: loloma, wasea, sureta.
Loloma
Nai matai ni ka eda rawa ni cakava sai koya meda loloma me vaka na loloma i Karisito.
E bibi tu na lomada ena vuku ni rarawa ni kawa tamata kei na veileqa ka da raica tu e vuravura ena gauna yavalavala oqo. Ia, eda rawa tale ga ni vakauqeti mai na sovaraki ni yaloloma kei na veikauwaitaki vakatamata ka vakaraitaki mai vei ira na tamata e veivanua ena nodra sasaga mera yacovi ira yani na biligi tani—o ira ka sa vakatolosevi mai nodrai tikotiko, tawasei mai vei ira nodra vuvale, se sotava eso tale na veika rarawa kei na yali ni nuinui.
Wale tiko ga oqo, a ripotetaki mai na so nai vurevure ni tukutuku ni dua nai lawalawa tina e Poladi, ena nodra kauwaitaki ira na veivuvale ka ra drotaki bula tiko, era a biuta tu kina na qiqi ni gone ka cokonaki ka yatuni vinaka tu ena dua na tavata ni sitima ni vanua me waraki ira na tina kei ira na gone ise ni valu era na gadreva na qiqi oqo me takosova kina nai yalayala ni vanua ni ra sobu mai na dua na sitima ni vanua. Sa dina, na Tamada Vakalomalagi e marautaka na cakacaka ni loloma sega ni nanumi koya vakaoqo, ni da veivuke ni colata nodai colacola eda “vakayacora kina nai vunau i Karisito.”4
Ena veigauna eda vakaraitaka kina na loloma va-Karisito vei ira na tu tikivi keda, eda vunautaka tiko na kosipeli—veitalia mada ga ke da sega ni cavuta e dua na vosa.
Na lomani ira na tani e ivakaraitaki kaukauwa ni ikarua ni vakaro cecere mo lomana na kai nomu;5 e vakaraitaka na cakacaka ni veivakasavasavataki ni YaloTabu ena noda bula. Ena noda vakaraitaka na loloma i Karisito vei ira na tani, eda rawa ni vakavuna vei ira era raica na nodai valavala vinaka mera “vakarokorokotaka [na] Tamada sa tiko mai lomalagi.”6
Eda vakayacora oqo ka sega ni namaka lesu e dua na ka.
Na noda vakanuinui, o ya, ni ra na ciqoma na noda loloma, ia na ka era na cakava lesu mai eda sega ni rawa ni lewa.
Na cava eda cakava se o cei o keda, oqo eda rawa ni vakatulewa kina.
Ena loloma va-Karisito vei ira na tani, eda sa vunautaka tiko kina nai tuvaki lagilagi ni kosipeli i Karisito, ka rawa ni veisautaka na bula, ka da vakataivi vakabibi ena vakayacori ni Nona ilesilesi cecere.
Wasea
Nai karua ni ka eda rawa ni cakava oya meda wasea.
Donuya na veivula taumada ni matedewa na COVID-19, a vakauqeti o Baraca Wisan mai Thailand me wasea na lomana kei na veika a vulica tiko mai na nona vulica na iVola i Momani ena nona akaude ni vakau itukutuku raraba. Ena dua gona vei ira na posi oqori, a wasea kina nai talanoa me baleta e rua na daukaulotu ni iVola i Momani, o Amuleki kei Alama.
E dina ga ni sa dei tu ena nona vakabauta vakalotu o Winai na tacina, a tarai ena posi ka taroga mai, “E rawa ni dua vei au nai vola oqori ena vosa vaka Thai?”
E a vakarautaka sara vakavuku o Wisan e dua nai lavelave ni iVola iMomani me rau solia na sisita daukaulotu, ka rau tekivu vakavulici tacina tiko.
E a veitomani o Wisan ki na lesoni ena initaneti, ka wasea kina na lomana me baleta na iVola i Momani. A vulica o Winai me masu ka vuli ena dua na yalo ni vakasaqara-na-dina, me ciqoma ka karona na dina. Ena loma ga ni vica na vula, a papitaiso sara o Winai!
A qai tukuna e muri o Wisan, “E tiko e dua na noda itavi meda iyaragi ena liga ni Kalou, ka dodonu meda tu vakarau vei Koya me cakava na Nona cakacaka ena Nona sala ga ena vukuda.” Na cakacaka mana ki na nodrau vuvale a yaco baleta ni a wasea walega o Wisan na kosipeli ena ivalavala matau ni veitaratara e veisiga.
Eda dau veiwaseitaka kece na ka kei ira na tani. Eda dau cakava vakawasoma. Eda dau wasea nai yaloyalo yavala kei na kakana eda taleitaka, na veika lasa eda raica, na veivanua eda sikova, na cakacaka ni liga eda marautaka, kei na vosa cavuti eda vakauqeti kina.
Na sala cava eda rawa ni tomana kina ki na lisi ni veika sa wasei oti, na veika eda taleitaka baleta na kosipeli i Jisu Karisito?
O Elder Dieter F. Uchtdorf e vakamacalataka: “Kevaka e dua e taroga baleta na nomu mua ni macawa, kakua ni vakasuka mo tukuna na veika o a sotava ena lotu. Tukuna me baleti ira na gonelalai era dau tu e matadra na ivavakoso ka lagasere ena yalo marau ni ra tovolea tiko me ra vakataki Jisu. Tukuna me baleti ira na ilala itabagone era dau vukei ira na qase ena vale ni malumalumu me vakasokumuna na kedra itukutuku makawa.”7
Na veiwasei e sega ni baleta na “volitaki” ni kosipeli. E sega ni gadrevi mo vola e dua nai vunau se vakadodonutaka na nona rai cala e dua na tamata.
Ni veitalanoataki na cakacaka ni kaulotu, na Kalou e sega ni gadrevi iko mo nona ovisa; ia o Koya, e kerei iko mo nona dauniveiwasei.
Ena noda wasea vei ira tani na veika vinaka eda sotava ena kosipeli, eda sa vakaitavi tiko kina ena ilesilesi cecere ni iVakabula.
Sureta
Nai ka tolu ni ka o rawa ni cakava o ya mo sureta.
O Sisita Mayra e dua na saumaki vou mai Ecuador. Na nona rekitaka na kosipeli a tubu ki lagi ni oti ga na nona papitaiso ena nona sureti ira nai tokani kei na daulomani wavoliti koya ena vakayagataki ni akaude ni vakau itukutuku raraba. E levu na lewe ni vuvale kei nai tokani era a raica nona posi era a taro lesu mai. A sema yani vei ira o Myra, vakavuqa me sureti ira ki na nona itikotiko mera sota vata kei ira na daukaulotu.
O rau nai tubutubu nei Mayra, ira na tacina, nona nei, rua na tavalena, kei na vica na nonai tokani era a papitaiso baleta ni a veisureti ena yaloqaqa vei ira mera “lako mai ka raica,” “lako mai ka veiqaravi” ka “lako mai me okati.” Ena nona ivalavala matau ni veisiga ni veisureti, sivia na 20 na tamata era sa ciqoma na nona veisureti me papitaiso ka lewena na Lotu i Jisu Karisito. Oqo a yaco baleta ni o Sisita Mayra a veisureti vakarawarawa vei ira na tani mera mai vakila na reki a yaco vua ni mai lewena na Lotu.
E drau na veisureti eda rawa ni vakatetea vei ira na tani. E rawa ni da sureti ira na tani mera “lako mai ka raica” e dua na soqoni ni sakaramede, nai taviqaravi ni tabanalevu, e dua na vidio ena initaneti ka vakamacalataka na kosipeli i Jisu Karisito. “Lako mai ka raica” e rawa ni dua na veisureti me wiliki na iVola i Momani se sikova e dua na valetabu vou ena gauna ni kena dolavi raraba ni bera ni vakatabui. Ena so na gauna na veisureti e dua na ka eda na vakatetea ki lomada—e dua na veisureti vei keda, meda vakila ka raica na veimadigi e wavoliti keda tu meda cakacakataka.
Ena noda itabagauna vakalivaliva, era dau veiwasei itukutuku na lewenilotu ena sala ni vakau itukutuku raraba. Era drau, ka mani udolu sara na veika veilaveti o rawa ni kunea ka kilikili me wasei. Na lewe ni vosa oqo e vakatetea tiko na veisureti “lako mai ka raica,” “lako mai ka veiqaravi,” ka “lako mai ka okati.”
Ni da sureti ira na tani mera vulica e levu cake na ka baleta na kosipeli i Jisu Karisito, eda vakataivi tiko ena kaci ni iVakabula meda cakava na Nona ilesilesi.
iTinitini
Kemuni na taciqu kei na ganequ lomani, keitou sa vosa ni kua ena tolu na ka rawarawa—e rawarawa sara ka rawa ni dua ga e cakava. Veika o rawa ni cakava! E rairai o sa cakava tiko beka—ka sega ni kila ni o sa cakava tiko!
Au sureti iko mo vakasamataka na sala eso o rawa ni loloma, wasea ka veisureti kina. Ni o cakava oqo, o na rawata e dua nai vakarau ni reki ni o kila ni o sa muria tiko na nona vosa na noda iVakabula lomani.
Na ka au uqeti kemuni tiko mo ni cakava e sega ni dua na parokaramu vou. O ni sa rogoca oti na vei ivakavuvuli oqo mai liu. Oqo e “sega ni dua na ka levu” e gadreva tiko na Lotu mo cakava. Na veika e tolu oqo era keda isema ga me vaka ni da sa tisaipeli tu i Jisu Karisito.
E sega ni gadrevi e dua na beji ni yaca.
E sega ni gadrevi e dua na veikacivi vakaivolataki.
Ni ratou yaco na veika e tolu oqo me tiki ni noda itovo kei na noda bula, era na yaco vakataki ira mera ivakaraitaki sega ni vakasaurarataki ni loloma tawavakailasu.
Me vakataki ira na tisaipeli i Karisito ka ra a soqoni vata me vuli mai vei Koya e Kalili ena 2,000 na yabaki sa oti, o keda talega eda rawa ni ciqoma nai vakaro ni iVakabula ka lako yani ki vuravura taucoko me vunautaka na kosipeli.
Ni da loloma, wasea, ka sureta eda vakaitavi tiko ena cakacaka cecere ka lagilagi ka vakarautaka tiko na vuravura ki na lesutale mai ni nona Mesaia.
Meda rogoca na kaci ni iVakabula ka tovolea me vakaitavi ena Nona ilesilesi cecere e sa noqu masu ena yaca i Jisu na Karisito, emeni.