Sa Yaga Tiko Beka na iTuvatuva?

Mai vei Elder Adrián Ochoa

Ena Vitusagavulu

Au vakadinadinataka ni yaga na ituvatuva ni veivakabulai. A bulia na Tamada Vakalomalagi, ka lomani iko vakavinaka sara.

Sa yaga tiko beka na ituvatuva?

Ena dua na gauna walega oqo keirau a veitalanoa kei na dua na cauravou itabaqase ka a kaulotu ena vica na yabaki sa oti ka sa cakacaka tiko ena gauna oqo. Ena so na tikina, sa toso vinaka tiko nona bula. Ia, nona vakabauta sa lutu sobu tikoga. Sa lutu sobu tikoga ki na dua na tobu ni vakatitiqataki tiko na iVakabula kei na Nona Lotu. E vakamacalataka ni sa sega ni ciqoma tiko na veivakalougatataki e namaka mai na kosipeli vakalesui mai. Sa sega ni vakila ni sa yaga tiko na ituvatuva ni marau ki na nona bula.

Na noqu tukutuku nikua e vagolei vei kemuni kece e vaka tiko oya na nomuni nanuma. Au vosa vei ira ena dua na gauna era sa “nanuma me ra lagata na sere ni veisereki loloma” ia era sa “sega ni vakila ena gauna oqo.”¹

Sa vakarautaka na Tamada Vakalomalagi e dua na ituvatuva vakasakiti me baleta na noda marau tawamudu. Ia ni sega ni vaka eda nuitaka na itosotoso ni noda bula, ena vaka beka ni sa sega tiko ni yaga na ituvatuva.

De dua, eda dau vakila na veika eratou a vakila na tisaipeli nei Jisu ni ratou tiko voli ena dua na waqa, “ena loma ni wasawasa a sa suaigelegele ena ua: ni sa cagi leca.”²

Ia, ena ikava ni wase ni bogi:

Sa lako vei ira ko Jisu, ka lako voli ena dela ni wai;

“Ia ni sa raica ko ira na tisaipeli ni sa lako voli ko koya e dela ni wai, era sa kidroa, a ra sa qoqolou ni ra sa rere.

“A sa vosa sara vei ira ko Jisu, ka kaya, Dou vakacegu; koi au ga; dou kakua ni rere.

“A sa vosa vei koya ko Pita, ka kaya, Na Turaga, kevaka sai kemuni, kacivi au me bau yani vei kemuni e dela ni wai.

“A sa kaya ko koya, Lako ga mai. Ia ni sa sobu mai waqa ko Pita, sa lako e dela ni wai me lako vei Jisu.

“Ia ni sa raica sa kaukauwa na cagi, sa qai rere; ia ni sa vakatekivu me lutudromu, sa kaci sara, ka kaya, na Turaga, ni vakabulai au.

“Sa qai dodoka sara na ligana ko Jisu, a sa taura, ka kaya vua, O iko sa lailai na nomu vakabauta, o sa vakatitiqa ena vuku ni cava?”³

E rawa beka niu wasea vei kemuni e tolu na ivakavuvuli au vulica mai vei Pita? Au masuta me veivuke na veivakavuvuli oqo vua e dua e nanuma ni sa sega tiko ni yaga ki na nona bula na iituvatuva ni marau.

Taumada, cakacaka ena vakabauti Jisu Karisito.

Au qoroya na vakabauta nei Pita. Ena veisureti rawarawa nei Jisu me “lako yani,” a biuta na nona waqa ka suaigelegele voli ena cava. E vaka me kila tiko ni kevaka e sureti koya ko Jisu Karisito me cakava e dua na ka ena rawa ni cakava.⁴ E nuitaka vakalevu cake o Pita na iVakabula mai na nona nuitaka na nona waqa. Na vakabauta oqori e solia vua na kaukauwa me yaloqaqa ena dua na ituvaki dredre ka rerevaki.

Na vakabauta nei Pita e vakananuma vei au e dua na ka au rogoca mai vei Elder José L. Alonso. Ni oti vakalailai na nona takali yani na luvei Elder Alonso tagane, ka biuta tu mai e dua na matavuvale era tu kina na gonelalai, a rogoci ira na gonelalai o Elder Alonso ni ra veivosaki.

“Na cava beka eda na cakava?” era taroga.

A sauma e dua na luvena goneyalewa yabaki ciwa, “e sega ni dua na leqa vei Ta. E vunautaka tiko o koya na kosipeli i Jisu Karisito.”

Me vakataki Pita, e raibaleta na goneyalewa lailai na nona bolebole ka nuitaki Jisu Karisito kei na Nona Veisorovaki. Na vakabauta na iVakabula e kauta mai na sautu kei na igu ni toso ki liu.

Kevaka o raica lesu na nomu bula, au vakabauta ni ko na raica ni ko sa dau cakacakataka na nomu vakabauta ena vuqa na gauna. Nomu lewena na Lotu e cakacaka ni vakabauta. Nomu veivosaki kei Tamada Vakalomalagi ena masu e cakacaka ni vakabauta. Na wilika na ivolanikalou e cakacaka ni vakabauta. Na vakarorogo ki na noqu itukutuku ni koniferedi raraba oqo e cakacaka ni vakabauta. Me vaka sa kaya o Peresitedi Russell M. Nelson, “Kakua ni vakalailaitaka na vakabauta sa tiko rawa vei iko.”⁵

E dua tale na lesoni au vulica mai vei Pita e vaqo:

Ena gauna ni leqa, gole vei Jisu Karisito ena gauna vata sara ga.

Ni lako yani vua na iVakabula, a rere ko Pita ena vuku ni cagi, ka sa tekivu me lutudromu. Ia ni kila o Pita na veika sa yaco tiko, a sega ni tovolea me tudonu tu e loma ni wai se qalo lesu ki na waqa. A sega ni laiva na nona vakabauti Karisito, a kukuva matua sara, ka kailavaka, “Turaga, ni vakabulai au.”

Sa qai dodoka sara na ligana ko Jisu, a sa taura.”¹⁰

O keda kece eda dau sotava na cagi vakacevaruru ka rawa ni kurelaka noda vakabauta ka vakavuna noda lutudromu. Ni yaco oqori, yalovinaka nanuma tiko ni dua tale tiko na yaca ni nona ituvatuva ni marau na Tamada Vakalomalagi—na ituvatva ni veivueti. E sega ni inaki ni ituvatuva me mai rawarawa vei keda na bula, sega na tarabe, sega na lutudromu, me matadredredre tikoga na matada. E kila na Tamada Vakalomalagi ni da na gadreva me da vueti. Oqori na vuna e vakarautaka kina na ituvatuva ni veivueti.⁷ Oqori na vuna e tala mai kina e dua na Dauveivueti. Ni da sotava na dredre—se cava ga na vuna—sega ni kena ibalebale qori ni sa sega tiko ni yaga na ituvatuva. Oqori na gauna eda gadreva vakalevu duadua kina na ituvatuva!

Ena veigauna vaqori, muria na ivakaraitaki nei Pita. Goleva na iVakabula ena gauna vata ga.

“Ia raica, oqo na kena gauna kei na siga ni nomuni vakabulai. Kakua ni lokuyarataka na siga ni nomuni veivutuni.”⁸

Veitalia na vanua eda sa tu kina se na vanua eda a tu mai kina, na veivutuni sa sala ki liu. Me vaka e vakavulica o Peresitedi Nelson:

E sega na ka e veisereki cake, vakaturaga cake, se bibi cake ki na noda torocake yadudua me vakataka na raicimatua tiko e veisiga ni veivutuni.

Se o gu tiko ki liu ena sala ni veiyalayalati, o sa sikalutu se kalawa tani mai na sala ni veiyalayalati, se sega ni raica rawa na sala ni veiyalayalati mai na vanua o tiko kina oqo, au vakamasuti iko oqo mo veivutuni. “O na sotava na kaukauwa qaqaco ni veivutuni e veisiga—ni ko cakava ka vinaka cake vakalailai e veisiga.”⁹

Na lako mai vei Karisito e levu cake na kena ibalebale mai na noda vakasamataki koya walega se veivosakitaki Koya se lomani Koya sara mada ga. E kena ibalebale na muri Koya. E kena ibalebale me da bula me vaka na ivakarau e vakavulica vei keda o Koya me da bula kina. Vei keda kece e kena ibalebale oqori na veivutuni me kua ni lokuyarataki.

E dua na luvequ yalewa e dau cakacaka tu ena koronivuli ni vakavakarau ki na kaulotu. A tukuna vei au me baleta e dua na cauravou daukaulotu ka tusanaka vua ni se sega ni vakadeitaka rawa ni dina na iVola i Momani. A masulaka vakalevu me dua na ivakadinadina vakayalo, ia a sega ni dua mai na kena isau.

A masulaka na noqu goneyalewa me kila na veika me cakava me vukea kina na daukaulotu oqo. Na veivakauqeti a ciqoma sai koya ni a sega ni soli walega na ivolanikalou me da wilika ka rawata e dua na kena ivakadinadina; era a soli talega me ra vakavulici keda me da rokova na ivakaro ni Kalou. A wasea na noqu goneyalewa na vakasama oqo vua na daukaulotu.

E muri, rau qai sota tale kei na daukaulotu oqo, sa mamarau cake na kena irairai. A tukuna vua ni sa qai ciqoma e dua na ivakadinadina ni dina na iVola i Momani. E kila o koya ni yaco mai na ivakadinadina oqo baleta ni sa levu cake na nona sasaga me cakava na veika e vakavuvulitaka na iVola i Momani.

Me da muria na ivakaraitaki nei Pita ena noda gole vua na iVakabula ena gauna ni leqa. Muri Jisu Karisitoka kakua ni vakararavi ki na nomu yalomatua kei na nomu kaukauwa. Se vakacava na balavu ni nomu saga tiko mo tudonu tu e loma ni wai ka sega kina o Koya, se sega ni bera mo sasaga yani Vua. Sa yaga tiko na ituvatuva!

Na ikatolu ni ivakavuvuli au vulica mai na veika a sotava o Pita oqo:

Vakayalomalumalumutaki iko vua na Turaga, ena laveti iko cake ko koya ki na veika cecere cake.

A vakaraitaka o Pita na vakabauta, ena nona lako e dela kei na nona dolele yani vua na iVakabula ni sotava na leqa. Ia, na iVakabula e raica vei Pita na levu tale ni veika e rawa ni rawata. “O iko sa lailai na nomu vakabauta,” a kaya o Koya, “ko sa vakatitiqa ena vuku ni cava?”¹⁰

A rawa me cata o Pita na veivosataki oya. Ia a ciqoma ena yalomalumalumu. A tomana nona segata me vakabauti Jisu Karisito vakalevu cake. Ni oti e vuqa tale na veika ni tara vakabauta cake a sotava—eso vei ira a sa dredre sara—a yaco o Pita me dua na iliuliu dei vakavatu ka gadreva na Turaga me vakakina. A rawata e levu na veika cecere ena nona veiqaravi vua na Turaga.

Na cakacaka cecere cava e vinakata vei keda na Turaga me da cakava? Ena Nona Lotu kei na matanitu, e vuqa kina na madigi ni veiqaravi vei ira na tani me vaka a dau vakayacora na iVakabula. E vinakati iko o Koya mo vakaitavi e na Nona cakacaka cecere. Ena sega vakadua ni yaco me kadina cake vei iko na ituvatuva ni marau me vaka ena gauna o sa vukei ira tiko kina na tani me ra bulataka.

Ena tarai cake ni vakabauta, era a veisautaka na bula na veimalanivosa oqo nei Alama: “Era sa kalougata kina ko ira era vakayalomalumalumutaki ira ga ka sega ni ra vakasaurarataki me ra yalomalumalumu.”¹¹ Me da biuti keda ena yalomalumalumu ena dua na vanua ka na rawa kina ni laveti keda, tuberi keda, ka vakayagataka vakavinaka kina na noda kaukauwa ko Jisu.¹²

Au vakadinadinataka ni yaga na ituvatuva ni veivakabulai. A bulia na Tamada Vakalomalagi, ka lomani iko vakavinaka sara. E cakacaka baleta ni sa vakadruka o Jisu Karisito na ivalavala ca kei na mate ena Nona Veisorovaki. Lako mai Vua, muri Koya, ka “ena kau yani vakatotolo vei kemuni na ituvatuva cecere ni veisereki.”¹³ Ena yacai Jisu Karisito, emeni.