“Marso 11–17: ‘Usa ka Kahibulongan nga Buhat ug usa ka Katingalahan.’ 2 Nephi 26–30,” Dali, Sunod Kanako—Alang sa Panimalay ug sa Simbahan: Basahon ni Mormon 2024 (2024)
“Marso 11–17. 2 Nephi 26–30,” Dali, Sunod Kanako—Alang sa Panimalay ug sa Simbahan: Basahon ni Mormon 2024 (2024)
He Will Lead Thee by the Hand [Siya Moagak Kaninyo pinaagi sa Kamot], ni Sandra Rast
Marso 11–17: “Usa ka Kahibulongan nga Buhat ug usa ka Katingalahan”
2 Nephi 26–30
“Ako managna nganha kaninyo mahitungod sa kataposan nga mga adlaw,” misulat si Nephi (2 Nephi 26:14). Sa laing pagkasulti, siya nagsulat mahitungod sa atong panahon. Ug adunay rason nga mabalaka mahitungod sa unsay iyang nakita: ang mga tawo nga milimod sa gahom ug mga milagro sa Dios, grabe nga kasina ug panagbangi. Apan agig dugang niining ulahing adlaw nga “mga buhat sa kangitngit” (2 Nephi 26:10, 22) nga gipangulohan sa kaaway, si Nephi namulong usab sa “usa ka kahibulongan nga buhat ug usa ka katingalahan” nga gipangulohan sa Dios Mismo (2 Nephi 27:26). Ang sentro ngadto niana nga buhat mao ang usa ka basahon—usa ka basahon nga nagbutyag sa mga bakak ni Satanas ug magapundok sa mga matarong. Kana nga basahon mao ang Basahon ni Mormon, ang kahibulongan nga buhat mao ang buhat sa Simbahan sa Ginoo sa ulahing mga adlaw, ug ang katingalahan mao nga—bisan labing ubos—nga ang Dios nagdapit kanatong tanan, bisan pa sa atong mga kahuyang, sa pag-apil sa panagpundok.
Mga Ideya alang sa Pagkat-on diha sa Panimalay ug sa Simbahan
Ang Dios miandam sa Basahon ni Mormon alang sa atong panahon.
Sa 2 Nephi 26–27, si Nephi mikutlo gikan sa nahaunang panagna ni Isaias (tan-awa diha sa Isaias 29) ug gigamit kini ngadto sa iyang katawhan ug sa ilang rekord––ang Basahon ni Mormon. Nahibalo Siya pinaagi sa pagpadayag, bisan sa wala pa makompleto pagsulat ang Basahon ni Mormon, nga kini usa ka adlaw “mahimo nga mahinungdanon og bili ngadto sa mga katawhan” (2 Nephi 28:2). Ngano nga ang Basahon ni Mormon bililhon kaayo nganha kaninyo? Hunahunaa kini nga pangutana samtang kamo magbasa diha sa 2 Nephi 29–30. Unsa nga “kahibulongan nga buhat” sa (2 Nephi 27:26) nga gihimo sa Dios sa kalibotan ug sa inyong kinabuhi pinaagi sa Basahon ni Mormon?
Tan-awa usab sa Joseph Smith—Kasaysayan 1:62–65.
Si Jesukristo nagdapit kanatong tanan sa pagduol ngadto Kaniya.
Adunay daghang maanindot nga kamatuoran nga ikonsiderar diha sa 2 Nephi 26:23–24. Pananglitan, mahimo ka nga maghunahuna kon unsa ang nabuhat ni Jesukristo “alang sa kaayohan sa kalibotan”—ug alang kaninyo. Sa unsang paagi nga Siya “makadani sa tanan nga mga tawo”—ug kaninyo—“ngadto kaniya”? Unsa ang inyong gibati nga nadasig nga buhaton agig tubag sa Iyang mga pagpahayag sa gugma?
Ipadayon ang pagbasa ug mangita sa mga kamatuoran mahitungod sa Manluluwas diha sa mga bersikulo 25–33. Timan-i ilabi na ang Iyang mga imbitasyon. Unsaon ninyo sa pagsulti sa laktod ang mensahe ni Jesukristo diha kaninyo sa usa ka kapahayag [sentence]? Usa ka himno sama sa “Duol Kang Jesus” (Mga Himno, nu. 66) makaabli sa inyong hunahuna ngadto sa dugang nga mga impresyon.
Ikonsiderar kon sa unsang paagi nga kining mga bersikulo makaimpluwensiya sa paagi nga kamo makig-interaksiyon sa uban ug modapit kanila sa pagduol ngadto kang Kristo. Tingali makakita ka og pipila ka mga ideya diha sa mensahe ni Elder D. Todd Christofferson “Ang Doktrina sa Pagkasakop” (Liahona, Nob. 2022, 53–56).
Tan-awa usab sa 3 Nephi 18:30–32; Dallin H. Oaks, “Unsa ang Nabuhat sa Manluluwas alang Kanato?,” Liahona, Mayo 2021, 75–77.
Ayaw og kahadlok sa kahilom. Ang maayo nga mga pangutana nagkinahanglan og panahon sa pagtubag. Kini nagkinahanglan og pagsiksik, paghunahuna, ug inspirasyon. Ang panahon nga inyong gigahin sa pagpaabot alang sa tubag sa usa ka pangutana mahimong usa ka sagrado nga panahon sa pagpamalandong. Likayi ang tintasyon nga hunongon dayon kini nga panahon pinaagi sa pagbalhin ngadto sa laing butang.
Si Satanas nagtinguha sa paglingla.
Kadaghanan sa mga bakak ug mga taktika ni Satanas gibutyag diha sa 2 Nephi 28. Pangitaa kini diha sa mga bersikulo 6, 8, 21–23, 29. Nganong kinahanglan ninyong masayod sa mga bakak ni Satanas? Unsay inyong buhaton kon ang kaaway mosulay sa pag-ilad kaninyo?
Gilista sa ubos ang pipila ka mga kasulatan nga nagsalikway sa mga bakak ni Satanas. Tan-awa kon inyong mapares ang tinuod nga doktrina niining mga bersikulo sa dili tinuod nga doktrina nga kita gipasidaan ni Nephi bahin niini diha sa 2 Nephi 28:
-
2 Nephi 2:17: adunay yawa (2 Nephi 28:22: “ako dili yawa, kay walay yawa”)
Tan-awa usab sa Gary E. Stevenson, “Ayaw Paglingla Kanako,” Liahona, Nob. 2019, 93–96.
Ang Dios nagpadayon sa paghatag og pagpadayag sa paggiya sa Iyang mga anak.
Isip mga Santos sa Ulahing mga Adlaw kita napanalanginan sa kabuhong sa pulong sa Dios. Ug bisan pa niana, ingon sa pagpasidaan ni Nephi, kita dili gayod kinahanglang mobati nga “[kita] adunay igo na!” Samtang nagbasa ka sa mga pasidaan diha sa 2 Nephi 28: 27–31 ug 2 Nephi 29, hunahunaa ang mga pangutana nga sama niini:
-
Unsa ang gusto sa Dios nga akong bation mahitungod ug sa pagtubag sa Iyang mga pulong?
-
Ngano nga ang mga tawo usahay “[m]asuko” mahitungod sa pagdawat og dugang pa nga kamatuoran gikan sa Dios? (2 Nephi 28:28). Mibati ba gayod ako niini nga paagi? Kon mao, unsaon nako nga mag-usab?
-
Unsay ipasabot sa pagdawat sa pulong sa Dios? Unsaon nako sa pagpakita Kaniya nga ako gusto nga modawat og dugang pa sa Iyang pulong?
Alang sa dugang nga mga ideya, tan-awa ang mga isyu karong bulana sa Liahona ug sa Alang sa Kalig-on sa mga Kabatan-onan nga mga magasin.
Mga Ideya sa Pagtudlo sa mga Anak
Gusto ni Jesukristo nga ang tanan moduol ngadto Kaniya.
-
Sa pagtudlo sa inyong mga anak mahitungod sa mga imbitasyon sa Manluluwas niining mga bersikuloha, tingali makig-istorya kamo nila mahitungod sa mga panahon nga sila midapit og mga tawo ngadto sa usa ka espesyal nga kalihokan, sama sa party sa adlawng natawhan. Dayon mahimong magbasa kamo og dungan sa 2 Nephi 26:23–28 ug sutaon kon unsa ang imbitasyon ni Jesus nga atong buhaton. Ang inyong mga anak tingali ganahan maghimo og kard nga magdapit og usa ka tawo sa pagduol ngadto kang Jesukristo. Awhaga sila sa paggamit og usa ka hugpong sa pulong gikan niini nga mga bersikulo sa ilang imbitasyon.
-
Ang painting sa kataposan niining latid nagpakita og mga tawo gikan sa daghang kaagi. Tingali ang inyong mga anak makatan-aw niini nga hulagway samtang kamo mobasa sa 2 Nephi 26:33. Mahimo ninyong balikon ang hugpong sa pulong nga “Si Jesus nagdapit sa tanan sa pagduol ngadto Kaniya” samtang ang inyong mga anak motudlo sa matag tawo diha sa hulagway—ug dayon ngadto sa ilang kaugalingon. Unsaon nato pagduol ngadto kang Jesus?
-
Usa ka awit mahitungod sa paghigugma sa tanang katawhan, sama sa “Mouban Ko ninyo” (Songbook sa mga Bata, 78–79), mahimong makatabang ninyo sa pagtudlo sa mensahe sa 2 Nephi 26:33.
Ang Basahon ni Mormon usa ka panalangin.
-
Aron matabangan ang inyong mga anak nga mobati nga ang Basahon ni Mormon “mahinungdanon og bili” (2 Nephi 28:2), mahimo kamo nga magputos og usa ka kopya isip usa ka regalo ug tugoti sila nga motag-an kon unsa ang sulod. Mahimo silang makapangita og mga clue diha sa 2 Nephi 30:3–6. Sultihi ang inyong mga anak nganong ang Basahon ni Mormon adunay dakong bili kaninyo, ug tugoti sila sa papakigbahin usab sa ilang mga pagbati.
-
Ikonsiderar ang paghangyo sa inyong mga anak sa paghanduraw nga ang usa ka higala moingon, “Dili nako kinahanglan nga mobasa sa Basahon ni Mormon. Nakabasa na ko sa Biblia.” Unsay pwede natong isulti ngadto sa atong higala? Mag-uban sa pagbasa sa 2 Nephi 29:7–11 aron makakat-on kon nganong ang Dios gusto nga atong maangkon ang duha ka basahon.
Ang Langitnong Amahan motudlo kanako sa hinay-hinay.
-
Tingali makahunahuna ka og usa ka butang sa leksiyon nga makatabang sa inyong mga anak nga masabtan kon unsa ang kahulogan sa pagkat-on “pagtulon-an human sa usa ka pagtulon-an.” Pananglitan, sila makahimo og usa ka kalibogan [puzzle] o maghimo og usa ka butang gamit ang mga bloke, usa ka piraso sa usa ka higayon. O makatudlo ka nila og inanay nga kahanas, sama sa paghigot og laso o pagdrowing og usa ka hulagway. Makabasa dayon kamo sa 2 Nephi 28:30 ug maghisgot kon sa unsang paagi ang Langitnong Amahan nagtudlo kanato og usa ka kamatuoran sa usa ka higayon.
-
Lain nga idea mahimong magpili og usa ka hugpong sa pulong gikan sa 2 Nephi 28:30 ug magpuli puli sa pagsulat niini, usa ka pulong sa usa ka higayon. Sa unsang paagi nga nahisama kini sa paagi nga ang Dios naghatag kanato og kamatuoran? Ngano nga ang Dios magpadayag og kamatuoran ngari kanato “pagtulon-an human sa usa ka pagtulon-an, lagda human sa usa ka lagda, diyotay dinhi ug diyotay didto” imbis tingbon ang tanan og kausa? Sa unsang paagi kita makapakita sa Dios nga kita gusto nga modawat og dugang kamatuoran gikan Kaniya?
Alang sa dugang nga mga ideya, tan-awa ang isyu karong bulana sa Higala nga magasin.
Christ in the Midst [Si Kristo anaa sa Taliwala], ni Judith A. Mehr