Kristo ug ang Apostoles, ni Del Parson

Marso 25–31: “Ang Iyang Pagkamatarong Mosubang sama sa Adlaw … nga adunay Kaluwasan sa Iyang mga Pako”

Pasko sa Pagkabanhaw

Ang karaang Apostoles maisogon sa ilang mga pagpamatuod ni Jesukristo ug sa Iyang Pagkabanhaw (tan-awa sa Mga Buhat 4:33). Minilyon sa mga tawo motuo ni Jesukristo ug maningkamot sa pagsunod Kaniya tungod sa ilang mga pulong nga narekord diha sa Biblia. Apan pipila sa mga tawo tingali matingala, kon si Jesukristo mao ang Manluluwas sa tibuok kalibotan, nan ngano nga ang Iyang mga saksi limitado ra man sa pipila lang ka pundok sa mga tawo diha sa usa ka gamay nga rehiyon?

Ang Basahon ni Mormon nagbarog isip usa ka dugang, makapakombinser nga saksi nga si Jesukristo mao ang Manluluwas sa kalibotan, “nagpaila sa iyang kaugalingon ngadto sa tanan nga mga nasod” (ulohan nga pahina sa Basahon ni Mormon) ug nagtanyag og kaluwasan ngadto sa tanan nga moduol ngadto Kaniya. Agig dugang, kining ikaduha nga saksi giklaro usab kon unsay kahulogan sa kaluwasan. Mao kini hinungdan nganong sila si Nephi, Jacob, Mormon, ug ang tanang mga propeta naghago nga “makugihon [kaayo] sa pagkulit niini nga mga pulong diha sa mga palid”—sa pagpahayag ngadto sa umaabot nga mga henerasyon nga sila usab “nasayod kang Kristo, ug … adunay usa ka paglaom sa iyang himaya” (Jacob 4:3–4). Niining panahon sa Pasko sa Pagkabanhaw, pamalandongi ang mga pagpamatuod diha sa Basahon ni Mormon nga ang gahom sa Manluluwas alang sa tanan ug sa personal—nagtubos sa tibuok kalibotan ug nagtubos kaninyo.

Mga Ideya alang sa Pagkat-on diha sa Panimalay ug sa Simbahan

Tungod ni Jesukristo, ako mabanhaw.

Tradisyon kini sa panahon sa Pasko sa Pagkabanhaw ang pagpamalandong sa Pagkabanhaw ni Jesukristo, apan unsa gayod ang gipasabot nga mabanhaw? Unsa nga mga panabot ang itanyag sa Basahon ni Mormon mahitungod sa pagkabanhaw? Tingali niining Pasko sa Pagkabanhaw makalista ka og mga kamatuoran mahitungod sa pagkabanhaw nga inyong makita diha sa 2 Nephi 9:6–15, 22; Alma 11:42–45; 40:21–25;ug 3 Nephi 26:4–5.

Mahimo usab inyong irekord kon sa unsang paagi kining mga kamatuoran mahitungod sa pagkabanhaw nakaimpluwensiya sa inyong mga aksiyon ug sa paagi nga kamo nagpakabuhi. Pananglitan, hunahunaa kon unsaon ninyo pagkompleto kining mga kapahayag: Kon ako wala pa masayod niining mga butanga … ug Tungod kay ako nasayod niining mga butanga …

Usa ka himno sama sa “Buhi ang Manunubos Ko, Niini Nasayod Ako” (Mga Himno, nu. 80) makatabang kaninyo sa paghunahuna kon nganong ang Pagkabanhaw sa Manluluwas importante ba nganha kaninyo. Samtang kamo mokanta, maminaw sa, o mobasa sa himno, tingali mangutana ka sa inyong kaugalingon, “Sa unsa nga paagi ang akong kinabuhi lahi tungod sa pagkabanhaw ni Jesukristo?”

Ang Gospel Library adunay usa ka koleksiyon sa mga bidyo sa Pasko sa Pagkabanhaw nga mahimong makahuluganon nga bahin sa inyong pagtuon. Tingali makatatan-aw ka og usa og dugang pa niiining mga bidyo ug mamalandong kon unsa ang nadugang niini sa inyong pagsabot o pagpasalamat sa Pagkabanhaw sa Manluluwas.

Tan-awa usab sa Lucas 24:36–43; Mga Buhat 24:15; 1 Mga Taga-Corinto 15:12–23; Reyna I. Aburto, “Ang Lubnganan Walay Kadaogan; Liahona, Mayo 2021, 85–86.

Gidala ni Jesukristo diha sa Iyang Kaugalingon ang akong mga sala, mga kasakit, ug mga kahuyang.

Ang Biblia klarong nagtudlo nga si Jesukristo miula alang sa atong mga sala. Gipadak-an sa Basahon ni Mormon ang atong pagsabot sa sakripisyo ug pag-antos ni Kristo sa importante nga mga paagi. Makaplagan ninyo ang pipila niini nga mga pagtulon-an diha sa Mosiah 3:7; 15:5–9 ug sa Alma 7:11–13. Human ninyo mabasa kini nga mga tudling, hunahunaa ang pagrekord unsay inyong nadiskobrehan diha sa usa ka tsart nga sama niini:

Unsa ang giantos sa Manluluwas?	Nganong nag-antos Siya?	Unsa ang kahulogan niini ngari kanako?

Ania ang laing paagi sa pagtuon niining mga tudling: Pangitaa ang mga himno nga sa inyong pamati mohaom sa mga mensahe nga gitudlo niini. Ang “Mga Kasulatan” nga indeks sa luyo sa himno makatabang. Unsa nga mga hugpong sa mga pulong nga gikan niining mga himno ug mga kasulatan nga makatabang kaninyo nga mas mapasalamatan pa gayod ang sakripisyo sa Manluluwas?

Tan-awa usab sa Isaias 53; Mga Hebreohanon 4:14–16; Gérald Caussé, “Usa ka Buhi nga Saksi sa Buhi nga Kristo,” Liahona, Mayo 2020, 38–40.

Si Jesukristo makalimpyo kanako ug motabang nako nga mahingpit.

Mahimong ikasulti nga ang Basahon ni Mormon mao ang asoy sa katawhan kinsa nausab tungod sa Pag-ula ni Jesukristo. Makabasa kamo og pipila niining mga kasinatian diha sa Mosiah 5:1–2; 27:8–28; Alma 15:3–12; 24:7–19. Mahimo usab ka nga maghunahuna og uban pang mga ehemplo nga tun-an. Unsay inyong namatikdan nga komon niining mga kasinatian? Unsa nga mga kalainan ang inyong namatikdan? Unsa ang natudlo niining mga kasinatian diha ninyo mahitungod sa unsang paagi ang Manluluwas makausab kaninyo?

Tan-awa usab sa Alma 5:6–14; 13:11–12; 19:1–16; 22:1–26; 36:16–21; Ether 12:27; Moroni 10:32–33.

Alang sa dugang nga mga ideya, tan-awa ang mga isyu karong bulana sa Liahona ug sa Alang sa Kalig-on sa mga Kabatan-onan nga mga magasin.

Mga Ideya sa Pagtudlo sa mga Anak

Tungod kay karong Dominggo mao ang Ikalima nga Dominggo sa bulan, ang mga magtutudlo sa Primary giawhag sa paggamit sa mga kalihokan sa pagkat-on diha sa “Apendiks B: Pag-andam sa mga Bata nga Maanaa sa Dalan sa Pakigsaad sa Dios sa Tibuok Kinabuhi.”

Tungod kay nabanhaw si Jesukristo, ako mabanhaw usab.

• Makagamit kamo sa “Kapitulo 53: Jesus Gilansang sa Krus” ug “Kapitulo 54: Jesus Nabanhaw” (sa Mga Istorya sa Bag-ong Tugon, 136–38, 139–44) sa pagsulti sa inyong mga anak mahitungod sa Pagkabanhaw ni Jesukristo. O tugoti ang inyong mga anak nga mosulti kaninyo sa istorya, gamit ang mga hulagway niini nga mga kapitulo.

• Ang pagbisita sa Nabanhaw nga Manluluwas ngadto sa Amerika usa ka gamhanan nga saksi sa Iyang Pagkabanhaw. Hunahunaa ang pagsulti sa inyong mga anak mahitungod niini, gamit ang 3 Nephi 11, 17; ang kanta nga “Easter Hosanna” o ang kataposan nga bersikulo sa “Mga Istorya sa Basahon ni Mormon” (Songbook sa mga Bata, 62). Awhaga ang inyong mga anak sa paghanduraw kon unsa kaha ang pamati nga mahikap ang mga samad ni Jesus (tan-awa sa 3 Nephi 11:14–15) o mahimong usa sa mga anak nga Iyang gipanalanginan (tan-awa sa 3 Nephi 17:21). Ipakigbahin sa usag usa ang inyong mga pagbati mahitungod ni Jesukristo ug sa Iyang Pagkabanhaw.

• Aron matabangan ang inyong mga anak sa pagdiskobre sa unsay gitudlo sa Basahon ni Mormon mahitungod sa pagkabanhaw, mahimo ninyong dapiton sila sa pagpakaaron-ingnon nga kamo walay nahibaloan mahitungod niini ug hangyoa sila sa pagpasabot niini diha kaninyo. Tabangi sila nga mangita diha sa 2 Nephi 9:10–15; Alma 11:41–45; ug Alma 40:21–23 alang sa mga tubag sa mga pangutana sama niini: Unsa ang gipasabot nga mahimong mabanhaw? Kinsa ang mabanhaw? Dapita usab sila sa paghatag og pagpamatuod bahin sa Pagkabanhaw sa Manluluwas isip kabahin sa ilang tubag.

Si Jesukristo nasayod unsaon sa paghupay kanako.

• Ang Mosiah 3:7 ug Alma 7:11 naghulagway sa pipila sa unsay giagian sa Manluluwas isip kabahin sa Iyang Pag-ula. Mahimo ninyong basahon ang usa niining mga bersikulo ngadto sa inyong mga anak ug hangyoon sila sa pagpaminaw sa mga pulong nga nagsulti kanila kon unsa ang giantos ni Jesus alang kanato. Dayon mabasa ninyo ang Alma 7:12 aron masuta kon nganong Siya miantos niini. Ipamatuod nga si Jesukristo mibati sa tanan natong mga kasakit ug mga balatian aron nga Siya makahupay kanato.

• Ang inyong mga anak aduna bay usa ka paborito nga himno o awit mahitungod ni Jesukristo ug sa Iyang Pag-ula? Mahimong magdungan kamo sa pagkanta niini—o magkat-on og usa nga bag-o. Paghisgot mahitungod sa mga pulong o hugpong sa mga pulong diha sa lyriks nga nagtudlo mahitungod sa kahupay ug kalinaw nga gitanyag sa Manluluwas ngari kanato.

Getsemani, ni Michael T. Malm

Si Jesukristo makalimpyo kanako ug makatabang nako nga mausab.

• Ang Basahon ni Mormon naghatag og daghang mga ehemplo sa mga tawo nga nausab tungod sa Pag-ula sa Manluluwas. Tingali ang inyong mga anak makapili og usa nga kat-onon, sama ni Enos (tan-awa Enos 1:2–8), ni Alma nga Batan-on (tan-awa sa Mosiah 27:8–24), o sa mga Anti-Nephi-Lehi (tan-awa sa Alma 24:7–19). Sa unsang paagi kini nga tawo o grupo nausab tungod sa Pag-ula ni Jesukristo? Unsaon nato sa pagsunod sa ilang mga ehemplo?

• Kamo ug ang inyong mga anak mahimo usab mokomparar og butang nga limpyo ug sa butang nga hugaw ug maghisgot kon sa unsang paagi ang hugaw mahimong limpyo. Mag-uban sa pagbasa sa Alma 13:11–13. Unsa ang gibuhat ni Jesus aron nga kita mahimong limpyo gikan sa atong mga sala? Unsa ang atong bation niini mahitungod sa sala? Unsay atong bation niini mahitungod sa Manluluwas?

Alang sa dugang nga mga ideya, tan-awa ang isyu karong bulana sa Higala nga magasin.

Pagpakabuhi nga takos sa giya sa Espiritu. Ang Espiritu mao ang tinuod nga magtutudlo. Samtang magtinguha kamo sa Iyang giya ug magpakabuhi nga takos, Siya mohatag kaninyo og mga hunahuna ug mga pag-aghat kon unsaon sa pagtubag ang mga panginahanglan sa mga tawo nga inyong tudloan.

Paghulagway bahin ni Kristo uban sa mga Nephite, ni Ben Sowards