Gipasaylo, ni Greg Olsen. Gigamit nga adunay pagtugot. www.GregOlsen.com

Abril 1–7: “Pakig-uli ngadto sa Dios pinaagi sa Pag-ula ni Kristo”

Jacob 1–4

Ang mga Nephite miisip ni Nephi nga ilang “gamhanan nga tigpanalipod” (tan-awa sa Jacob 1:10). Siya mipanalipod usab kanila batok sa espirituhanong mga peligro, nagpasidaan kanila batok sa sala ug nag-aghat kanila sa pagduol ngadto ni Kristo. Karon kana nga tahas nahatag ngadto ni Jacob, kinsa gipahinungod ni Nephi nga mahimong usa ka pari ug magtutudlo (tan-awa sa Jacob 1:18). Si Jacob mibati og usa ka responsibilidad nga magmaisogon sa pagpasidaan niadtong mga “nagsugod sa pagbuhat diha sa pagpakasala” samtang naghupay usab “sa samaran nga kalag” niadtong kinsa nasakitan pinaagi sa mga sala sa uban (tan-awa sa Jacob 2:5–9). Unsaon man niya pagbuhat ang duha? Siya motudlo kanila ngadto ni Jesukristo—tungod kay ang duha ka pundok nagkinahanglan sa pag-ayo sa Manluluwas (tan-awa sa Jacob 4). Sama sa mensahe ni Nephi nga nag-una kaniya, ang pagpamatuod ni Jacob usa ka tawag sa “pakig-uli ngadto sa [Dios] pinaagi sa pag-ula ni Kristo” (Jacob 4:11).

Mga Ideya alang sa Pagkat-on diha sa Panimalay ug sa Simbahan

Jacob 1:6–8, 15–19; 2:1–11

Ako adunay “sugo gikan sa Ginoo.”

Ngadto ni Jacob, ang pagtudlo sa pulong sa Dios usa ka “sugo gikan sa Ginoo,” busa siya mikugi sa paghago nga “mipalambo sa [iyang] buluhaton” (Jacob 1:17, 19). Unsa ang kahulogan niining hugpong sa mga pulong nga gigamit ni Jacob nganha kaninyo? Hunahunaa kon unsa ang mahimo sa usa ka lente. Nakahatag ba kana kaninyo og bisan unsang mga ideya? Samtang kamo mamalandong sa Jacob 1:6–8, 15–19 ug 2:1–11, hunahunaa ang mahimong mga sugo nga ang Ginoo anaa alang kaninyo. Unsa ang inyong gibati nga nadasig nga buhaton sa “pagpalambo” niini?

Jacob 2:12–21

“Ayaw himoa kini nga ang garbo sa inyong mga kasingkasing molaglag sa inyong mga kalag!”

Ang mga Nephite adunay usa ka problema sa garbo ug nakatutok diha sa mga bahandi (tan-awa sa Jacob 2:13), ug kana nga problema komon didto kanila o sa ilang panahon. Sa unsang paagi ang kaaway modasig sa paghigugma sa mga bahandi karon? Human sa pagbasa sa Jacob 2:12–21, ihulagway diha sa inyong kaugalingong mga pulong kon sa unsang paagi nga gusto sa Dios nga inyong lantawon ang katigayonan. Usa ka himno sama sa “Kay Gihatagan Ko og Daghan” (Mga Himno, nu. 132) makahatag og dugang nga mga panabot. Unsa ang inyong gibati nga nadasig nga buhaton mahitungod sa unsay inyong nakat-onan?

Jacob 2:22–35; 3:10–12

Ang Dios mahimuot sa kaputli.

Samtang magbasa kamo sa Jacob 2:22–35; 3:10–12, unsa ang inyong nakit-an nga makatabang kaninyo nga makasabot kon ngano ang kaputli mao ang importante kaayo ngadto sa Dios? Unsa ang pipila ka negatibo nga mga sangpotanan sa imoralidad—diha sa panahon ni Jacob ug sa atoa? Unsa ang mga panalangin sa pagpuyo og putli nga kinabuhi?

Si Elder David A. Bednar nagtudlo nga nagpuyo kita “sa kalibotan nga mibiay-biay sa kasagrado sa pagpasanay ” (“Kita Nagtuo sa Pagkaputli,” Liahona, Mayo 2013, 41–44). Unsaon ninyo sa pagtabang sa uban nga masabtan kon nganong kamo nagsunod sa balaod sa kaputli? Usa ka maayo nga dapit sa pagsugod mao ang pagpasabot sa mga sumbanan sa Dios kabahin sa sekswal nga mga pagbati ug mga relasyon diha sa “Ang inyong lawas sagrado” sa Alang sa Kalig-on sa mga Kabatan-onan (mga pahina 22–29). Unsa pa ang inyong nakit-an diha niana nga kapanguhaan nga makatabang kaninyo sa pagpasabot kon nganong kamo mosunod sa balaod sa kaputli?

Mahimo ninyong makit-an ang dugang nga mga tubag diha sa mensahe ni Elder Bednar nga gipakisayran sa ibabaw.

Sa unsang paagi ang sumbanan sa Dios bahin sekswal nga kaputli lahi gikan sa ubang mga mensahe nga inyong tingali masugatan? Unsa ang mga panalangin sa pagpuyo og putli nga kinabuhi?

Jacob 4

Makahimo ako sa pagpakig-uli ngadto sa Dios pinaagi sa Pag-ula ni Jesukristo.

Nangamuyo si Jacob sa iyang katawhan nga “makig-uli ngadto sa [Dios] pinaagi sa pag-ula ni Kristo” (Jacob 4:11). Usa ka kahulogan sa pakig-uli mao ang pagpahiuli sa panaghigala o pagsinabtanay. Samtang kamo mamalandong sa inyong kaugalingong kinabuhi, hunahunaa ang mahitungod sa usa ka panahon sa dihang kamo tingali mibati nga nahilayo gikan sa Langitnong Amahan. Sa unsa nga paagi ang Manluluwas makatabang kaninyo sa pagpahiuli niini nga relasyon? Unsa nga tambag ang inyong makit-an niining kapitulo nga makatabang kaninyo sa pagpakig-uli ngadto sa Dios? (tan-awa sa mga bersikulo 4–14).

Unsa nga dugang nga mga panabot ang inyong naangkon gikan sa Mateo 5:23–24? Sa unsang paagi ang Manluluwas makatabang kaninyo nga makig-uli ngadto sa Dios—ug sa uban?

Tan-awa usab sa 2 Nephi 10:24.

Jacob 4:8–18

Ako makalikay sa espirituhanon nga pagkabuta pinaagi sa pagtutok diha sa Manluluwas.

Samtang naningkamot si Jacob nga iyang mabaling sa mas hingpit nga paagi ang iyang katawhan ngadto sa Ginoo, siya mipasidaan kanila nga dili magpakabuta sa espirituhanong paagi ug dili mobiay-biay sa “kayano sa mga pulong” (tan-awa sa Jacob 4:13–14). Sumala sa Jacob 4:8–18, unsay atong mahimo nga makalikay sa espirituhanon nga pagkabuta?

Sa dihang Siya nagtudlo, ang Manluluwas migamit og mga ikatandi sa inadlaw-adlaw nga kinabuhi. Ang mga sambingay ni Jesus nakatabang sa mga tawo nga makakaplag og espirituwal nga mga kamatuoran sa ilang komon nga mga kasinatian. Sulayi sa pagbuhat ang samang butang kon kamo magtudlo. Pananglitan, sa dihang nagtudlo sa Jacob 4:8–18, mahimo kamong mangutana sa mga tigkat-on kon sila nakasulay ba sukad nga magpa-check up sa mata. Giunsa sa paghiling sa doktor ang ilang pisikal nga panan-aw? Sa unsang paagi kita makahiling sa atong espirituwal nga panan-aw?

Alang sa dugang nga mga ideya, tan-awa ang mga isyu karong bulana sa Liahona ug sa Alang sa Kalig-on sa mga Kabatan-onan nga mga magasin.

Mga Ideya sa Pagtudlo sa mga Anak

Jacob 2:8

Ang Dios moayo sa nasamdan nga kalag.

• Aron matabangan ang inyong mga anak sa pagsabot kon sa unsang paagi ang usa ka “samaran nga kalag” mahimong maalim, mahimo ninyong hisgotan kon sa unsang paagi ang atong mga lawas masamdan ug unsay makatabang niini nga maayo. Tingali ang inyong mga anak makahisgot mahitungod sa mga panahon nga sila nasakitan ug unsay nakatabang nila nga mamaayo. Mahimo pa gani kamo nga mopakita kanila og mga bendahe o medisina isip kabahin niining panag-istorya. Tingali mahimo ninyong ipakigbahin kanila kon sa unsang paagi ang Manluluwas mitabang kaninyo sa dihang ang inyong espiritu nagkinahanglan og pagkaayo.

Jacob 2:17–19

Makatabang ako sa uban nga nanginahanglan kon ako mopakigbahin kanila.

• Pipila sa mga tawo sa panahon ni Jacob mga adunahan kaayo, apan dili sila gusto nga mopaambit sa unsay anaa kanila ngadto sa uban nga mga tawo. Samtang magbasa kamo sa mga pagtulon-an ni Jacob ngadto kanila diha sa Jacob 2:17–19, makahatag kamo sa inyong mga anak og mga hulagway o mga butang nga gunitan nga mohaom sa mga pulong o hugpong sa mga pulong niining mga bersikulo. Tingali inyong ipasabot nga kamo mopakigbahin niining mga butang ngadto kanila; tingali mahimo kamo dayon nga modapit kanila sa pagpakigbahin sa mga butang nga anaa kaninyo o sa usag usa. Paghisgot kon unsa ang inyong gibati sa dihang kamo mipakigbahinn. Unsa pay atong ikapakigbahin sa uban aron matabangan sila nga mobati og kalipay?

• Pagkahuman nga mag-uban sa pagbasa sa Jacob 2:17, tingali ang inyong mga anak makahingalan og pipila ka mga panalangin nga gipakigbahin sa Langitnong Amahan ngadto kanila. Nganong gusto man Niya nga kita mopakigbahin sa usag usa?

Jacob 4:6, 10–11

Ako makapalig-on sa akong pagtuo kang Jesukristo.

• Ang hugot nga pagtuo ni Jacob hilabihan ka lig-on nga kini dili matandog. Sa pagtudlo sa inyong mga anak kon unsaon sa paglig-on sa hugot nga pagtuo nga sama niana, mahimo ninyo silang pangutan-on mahitungod sa mga butang nga atong gibuhat nga makapalig-on sa atong mga lawas. Unsa ang atong mabuhat aron ang atong hugot nga pagtuo diha ni Jesukristo mahimong mas lig-on? Mag-uban sa pagbasa sa Jacob 4:6 aron matabangan ang mga anak sa pagdiskobre kon unsa ang gibuhat ni Jacob ug sa iyang katawhan aron ang ilang hugot nga pagtuo “dili matarog.”

• Laing paagi sa pagtabang sa inyong mga anak nga makasabot kon unsa ang kahulogan sa pagkahimong “dili matarog” ang ilang hugot nga pagtuo mao ang pagpangita og usa ka dako nga punoan sa kahoy ug sugoa sila sa pag-uyog sa tagsa-tagsa ka mga sanga. Dayon ipasulay kanila ang pag-uyog sa punoan. Ngano nga mas lisod ang pag-uyog sa punoan? Unsa nga hugpong sa mga pulong diha sa Jacob 4:6, 10–11 ang naghulagway sa unsay atong mabuhat aron sa paghimo sa atong hugot nga pagtuo diha ni Jesukristo nga dili matarog?

  

  Sama sa punoan sa kahoy, ang atong hugot nga pagtuo ni Kristo mahimong “dili matarog.”

• Alang sa uban nga mga pagtandi sa pagtudlo sa inyong mga anak mahitungod sa dili matarog nga hugot nga pagtuo diha ni Jesukristo, tan-awa sa Neil L. Andersen, “Espirituhanong mga Alimpulos” (Liahona, Mayo 2014, 18–21; ) o “Ang Tawong Maalam ug Ang Tawong Walay Kaalam” (Songbook sa mga Bata, 132; tan-awa usab sa Mateo 7:24–27).

  Espirituhanong mga Alimpulos

  Ayaw tuguti nga ang mga alimpulos mobuntog kaninyo. Kini ang inyong panahon—nga lig-ong mobarug isip mga disipulo ni Ginoong Jesukristo.

Alang sa dugang nga mga ideya, tan-awa ang isyu karong bulana sa Higala nga magasin.

I Will Send their Words Forth (Jacob the Teacher) [Akong Ipadala ang Ilang mga Pulong (Jacob ang Magtutudlo)], ni Elspeth Caitlin Young