Jacob ug Enos, ni Scott Snow

Abril 15–21: “Siya Naglihok Diri Kanako aron sa Pagbuhat Sumala sa Iyang Kabubut-on”

Enos–Mga Pulong ni Mormon

Bisan tuod si Enos miadto sa lasang sa pagpangayam og mga hayop sa pagtagbaw sa pisikal nga kagutom, misangpot nga mipabilin siya didto sa tibuok adlaw ug midangat sa kagabhion tungod kay ang iyang “kalag gigutom.” Kini nga kagutom nagdasig ni Enos nga “mipataas sa [iyang] tingog pag-ayo nga kini miabot sa kalangitan.” Siya mihulagway niini nga kasinatian isip usa ka pagpakigbisog sa atubangan sa Dios (tan-awa sa Enos 1:2–4). Gikan ni Enos atong nakat-onan nga ang pag-ampo usa ka kinasingkasing nga paningkamot sa pagpaduol ngadto sa Dios ug paninguha nga mahibalo sa Iyang kabubut-on. Kon kamo mag-ampo uban niini nga katuyoan, kamo mas adunay kalagmitan sa pagdiskobre, sama ni Enos, nga ang Dios nakadungog kaninyo ug tinuod nga nagpakabana mahitungod kaninyo, sa inyong mga minahal, ug bisan sa inyong mga kaaway (tan-awa sa Enos 1:4–17). Kon kamo makahibalo sa Iyang kabubot-on, kamo mas maayo nga makahimo sa Iyang kabubot-on. Sama ni Mormon, kamo mahimong “wala masayod sa tanan nga mga butang; apan ang Ginoo nasayod sa tanan nga mga butang … ; busa, siya naglihok diha [kaninyo] aron sa pagbuhat sumala sa iyang kabubut-on” (Mga Pulong ni Mormon 1:7).

Mga Ideya alang sa Pagkat-on diha sa Panimalay ug sa Simbahan

Enos 1:1–17

Ang Dios modungog ug motubag sa akong mga pag-ampo.

Ang inyong mga kasinatian sa pag-ampo mahimong dili kaayo mahinuklogon kay sa kang Enos, apan kini dili kinahanglan nga dili kaayo makahuloganon. Ania ang pipila ka pangutana nga angayng hunahunaon samtang kamo magtuon sa Enos 1:1–17:

• Unsa nga mga pulong ang naghulagway sa mga paningkamot ni Enos samtang siya nag-ampo?

• Sa unsa nga paagi ang mga pag ampo ni Enos nausab gikan sa mga bersikulo 4 hangtod 11?

• Unsa man ang akong nakat-onan kang Enos nga makatabang nako nga mapalambo ang akong mga pag-ampo?

Tan-awa usab sa “Si Enos Hugot nga Nag-ampo” (bidyo), Gospel Library; “Tam-is nga Takna sa Pag-ampo,” Mga Himno, nu. 84.

Si Enos Hugot nga Nag-ampo | Enos 1

Enos 1 | Si Enos hugot nga nag-ampo sa Dios ug gipasaylo. Nag-ampo sab siya alang sa iyang kaigsoonang mga Nephite, dayon para sa mga Lamanite. Dayon mihangyo siya sa Ginoo nga protektahan ang rekord sa iyang katawhan.

Mga pangutana nga ipakigbahin sa panaghisgotan. Kon kamo nagtudlo sa uban, ikonsiderar ang pagbutang sa mga pangutana nga ganahan ninyong hisgotan diha sa usa ka prominente nga dapit aron ang tanan makakita niini. Kini makatabang sa mga tawo nga makapamalandong sa mga pangutana ug mohatag og dugang dinasig nga mga tubag.

Enos 1:1–4

Ang Ginoo makatabang kanako nga makaimpluwensiya sa akong pamilya alang sa maayo.

Tingali adunay tawo diha sa inyong pamilya kinsa inyong gipangandoy nga inyong matabangan nga moduol ngadto kang Kristo, apan naghunahuna ka kon ang inyong mga paningkamot nakahimo ba og bisan unsang kalainan. Unsa ang inyong nakat-onan gikan sa Enos 1:1–4 mahitungod sa impluwensiya ni Jacob sa iyang anak nga si Enos? Pananglitan, unsa ang kahulogan sa mga pulong nga “pagmatuto ug sa pagpahimatngon sa Ginoo” nganha kaninyo? Unsaon ninyo sa pagdapit ang Iyang impluwensiya diha sa inyong panimalay?

Samtang kamo maghunahuna mahitungod sa inyong kaugalingong pamilya, ikonsiderar kining mga pangutana ug mga kapanguhaan:

• Sa unsang paagi nga kamo makaimpluwensiya sa inyong pamilay diha sa positibo nga mga paagi? (tan-awa sa 1 Nephi 2:16–18; 3:15–21; 5:1–6; 7:20–21; Alma 36:17–20; “Ang Pamilya: Usa ka Pamahayag ngadto sa Kalibotan”). Unsa ang inyong mabuhat kon ang usa ka tawo ingon og dili gusto sa inyong tabang og dili mabination diha kaninyo?

• Unsa nga mga baroganan nga inyong nakit-an sa mosunod nga mga kasulatan nga makagiya sa inyong mga relasyon uban sa mga sakop sa inyong pamilya? Mateo 5:21–24, 38–44; 6:14; 7:1–5; 22:36–39; 3 Nephi 18:21; Moroni 7:33; Doktrina ug mga Pakigsaad 18:10–13.

Si Elder Dieter F. Uchtdorf mipakigbahin og tambag nga makatabang alang sa mga pamilya diha sa “Agig Pagdayeg Niadtong Miluwas” ( Liahona, Mayo 2016, 77–80). Unsa ang nakapadasig sa iyang mensahe nga inyong buhaton aron mapalig-on ang inyong pamilya? (tan-awa ilabi na sa seksiyon nga giulohan og “Pagluwas sa Atong mga Pamilya”).

Enos 1:1–18

Ako mahimong makadawat og kapasayloan kon ako mopakita og hugot nga pagtuo diha ni Jesukristo.

Sa mga higayon tingali matingala kamo kon ang inyo bang mga sala gipasaylo na, bisan human kon inyo nang gihinulsolan kadto nga mga sala. Unsa nga mga panabot ang inyong nabatonan gikan sa kasinatian ni Enos diha sa Enos 1:1–8? Sa unsang paagi si Enos nagpakita sa iyang hugot nga pagtuo diha ni Jesukristo sa wala pa ug sa pagkahuman nga siya nakadawat og kapasayloan?

Jarom–Omni

Samtang ako maningkamot sa pagtuman sa Iyang mga sugo, ang Dios mopanalangin kanako.

Ang duha ka basahon ni Jarom ug Omni naghulagway sa relasyon tali sa pagkamatarong ug kauswagan. Unsa ang inyong nakat-onan gikan sa Jarom 1:7–12; Omni 1:5–7, 12–18? Sa unsang paagi ang kalibotanon nga mga kahulogan sa kauswagan molahi gikan sa kahulogan sa Ginoo? Sa unsang paagi ang Ginoo motabang sa Iyang katawhan nga mouswag? (tan-awa sa Alma 37:13; 48:15–16).

Omni 1:25–26

“Duol ngadto kang Kristo, kinsa mao ang Usa nga Balaan sa Israel.”

Ang imbitasyon nga “Duol ngadto kang Kristo” kasagaran makita diha sa Basahon ni Mormon. Gani, usa sa nag-unang mga katuyoan sa basahon mao ang pagpadangat niining imbitasyon ngadto sa tanan. Samtang magbasa ka sa Omni 1:25–26, unsa nga mga pulong o hugpong sa mga pulong ang inyong nakit-an nga naghulagway kon unsaon sa pagduol ngadto ni Kristo? Unsa ang inyong butahon aron mas hingpit nga makaduol ngadto Kaniya?

Mormon Compiling the Plates [Mormon Naghugpong sa mga Palid], ni Jorge Cocco

Mga Pulong ni Mormon 1:1–8

Ang Dios mobuhat pinaagi kanako kon ako mosunod sa Iyang paggiya.

Usa ka rason ang Ginoo midasig ni Mormon nga ilakip ang gamay nga mga palid ni Nephi diha sa Basahon ni Mormon tungod kay ang Dios nasayod nga ang unang 116 ka hinubad nga mga pahina mawagtang (tan-awa sa Doktrina ug mga Pakigsaad 10; Mga Santos, volume 1, kapitulo 5). Nganong mapasalamaton man ka nga si Mormon misunod sa sugo sa Ginoo sa paglakip niining mga sinulat (gilangkoban sa 1 Nephi hangtod sa Omni)? Unsa ang mga rason nga gihatag ni Mormon sa paglakip niini? (tan-awa sa Mga Pulong ni Mormon 1:3–7). Kanus-a ninyo nakita nga ang Dios naghimo sa buhat pinaagi ninyo o sa uban?

Alang sa dugang nga mga ideya, tan-awa ang mga isyu karong bulana sa Liahona ug sa Alang sa Kalig-on sa mga Kabatan-onan nga mga magasin.

Mga Ideya sa Pagtudlo sa mga Anak

Enos 1:1–5

Mahimo akong makigsulti sa Langitnong Amahan pinaagi sa pag-ampo.

• Unsaon ninyo sa pagtabang sa inyong mga anak nga mohimo sa ilang mga pag-ampo nga mas makahuloganon? Ikonsiderar ang pagpakita kanila og usa ka hulagway ni Enos nga nag-ampo; ipahulagway kanila unsa ang ilang nakita. Mahimo nilang piyongon dayon ang ilang mga mata ug maghanduraw nga sila nakig-istorya sa Langitnong Amahan nga nag-atubangay. Unsa ang gusto nilang hisgotan? Unsa kaha ang Iyang gustong isulti ngadto kanila?

• Samtang inyong basahon og kusog ang Enos 1:1–5, ang mas manghod nga mga bata mahimong moasta kunohay nga si Enos pinaagi sa paglihok nga nangayam, miluhod aron mag-ampo, ug uban pa. Ang mas magulang nga mga bata makapaminaw sa usa ka pulong o hugpong sa pulong nga naghulagway sa mga pag-ampo ni Enos. Unsa man ang gisulti niini nga mga pulong mahitungod sa mga pag-ampo ni Enos? Pagpaambit og usa ka kasinatian sa dihang ang inyong kalag “gigutom” ug kamo “nangamuyo ngadto” sa Ginoo (Enos 1:4).

Isip mga anak sa Dios, makahimo kita sa pag-ampo ngadto sa atong Langitnong Amahan.

Enos 1:2–16

Ang Langitnong Amahan maminaw ug motubag sa akong mga pag-ampo.

• Unsaon ninyo pagtabang ang inyong mga anak nga makasabot nga ang Langitnong Amahan maminaw ug motubag sa ilang mga pag-ampo? Ikonsiderar ang pagdapit kanila sa paglista og pipila ka mga butang nga kasagaran nilang giampo. Dayon makatabang ka nila sa pagsuta kon unsa ang giampo ni Enos diha sa Enos 1:2, 9, 13–14, ug 16 (tan-awa usab sa “Kapitulo 11: Si Enos,” Mga Istorya sa Basahon ni Mormon, 30–31).

  Unsa ang mga resulta sa mga pag-ampo ni Enos? (tan-awa sa mga bersikulo 6, 9, 11).

  Unsa ang atong makat-onan gikan sa kasinatian ni Enos mahitungod kon unsaon sa pagpalambo sa atong mga pag-ampo?

• Mag-uban sa pagpanganta og usa ka awit mahitungod sa pag-ampo, sama sa “Ampo sa Usa ka Bata” (Songbook sa mga Bata, 6–7). Tingali ang inyong mga anak mahimong mopataas sa ilang mga kamot sa matag higayon nga ilang madungog ang pulong “ampo” o “pag-ampo” o laing gibalik-balik nga pulong. Sultihi ang inyong mga anak mahitungod sa pipila ka paagi nga ang Langitnong Amahan mitubag sa inyong mga pag-ampo.

Mga Pulong ni Mormon 1:3–8

Makapanalangin ko sa uban kon maminaw ko sa Espiritu Santo.

• Si Mormon misunod sa giya sa Espiritu Santo nga ilakip ang gamay nga mga palid ni Nephi diha sa Basahon ni Mormon. Ang tanan butang nga atong natun-an sa Basahon ni Mormon niining tuiga naabot kanato tungod kay si Mormon mipili sa pagpaminaw sa Espiritu. Sa unsang paagi nga makatabang kamo sa inyong mga anak nga makat-on mahitungod sa pagpaminaw ngadto sa Espiritu? Dapita sila sa pagbanos-banos sa pagbasa sa mga bersikulo gikan sa Mga Pulong ni Mormon 1:3–8. Mahimo ninyo nga hisgotan kon unsa ang ilang nakat-onan gikan sa matag bersikulo. Dayon ang inyong mga anak makahimo sa:

  • Pagpakigbahin kon unsa ang ilang nakat-onan gikan sa mga istorya diha sa Basahon ni Mormon niining tuiga (ang mga litrato gikan sa Dali, Sunod Kanako makatabang kanila nga makahinumdom).

  • Mag-uban sa pagpanganta sa usa ka awit mahitungod sa Espiritu Santo, sama sa “Ang Malinawon nga Gamay nga Tingog” (Songbook sa mga Bata, 141).

  • Paghisgot mahitungod sa mga kasinatian diin sila nagiyahan pinaagi sa Espiritu sa pagbuhat sa usa ka butang nga mipanalangin sa laing tawo.

Alang sa dugang nga mga ideya, tan-awa ang isyu karong bulana sa Higala nga magasin.

Si Enos Nag-ampo, ni Robert T. Barrett