“Abril 22–28: ‘Napuno sa Gugma ngadto sa Dios ug sa Tanan nga mga Tawo.’ Mosiah 1–3,” Dali, Sunod Kanako—Alang sa Panimalay ug sa Simbahan: 2024 (2024)
“Abril 22–28. Mosiah 1–3,” Dali, Sunod Kanako—Alang sa Panimalay ug sa Simbahan: 2024 (2024)
Receiving the Teachings of King Benjamin [Pagdawat sa mga Pagtulon-an ni Hari Benjamin], ni Maria Alejandra Gil
Abril 22–28: “Napuno sa Gugma ngadto sa Dios ug sa Tanan nga mga Tawo”
Mosiah 1–3
Kon inyong madungog ang pulong nga hari, tingali makahunahuna ka og mga korona, mga sulugoon, ug mga trono. Diha sa Mosiah 1–3, inyong mabasa ang mahitungod sa usa ka lain nga matang sa hari. Kay sa magpakabuhi gikan sa hinagoan sa iyang katawhan, si Hari Benjamin “naghago uban sa [iyang] kaugalingon nga mga kamot” (Mosiah 2:14). Imbis nga adunay uban nga moalagad kaniya, siya mialagad sa iyang katawhan “uban sa tanan nga gahom, hunahuna ug kusog diin gihatag sa Ginoo [ngadto kaniya]” (Mosiah 2:11). Kini nga hari dili gusto nga ang iyang katawhan mosimba kaniya; hinoon, siya nagtudlo kanila sa pagsimba sa ilang Langitnong Hari, si Jesukristo. Si Hari Benjamin nakasabot nga mao kadto “ang Ginoong Makagagahom kinsa naghari” (Mosiah 3:5), kinsa “manaog gikan sa langit” ug miadto “makig-uban taliwala sa mga tawo, … nga ang kaluwasan unta modangat ngadto sa mga katawhan gani pinaagi sa hugot nga pagtuo sa iyang ngalan” (Mosiah 3:5, 9).
Mga Ideya alang sa Pagkat-on diha sa Panimalay ug sa Simbahan
“Siksika [ang kasulatan] sa Makugihong Paagi.”
Niining mga bersikulo, batyagi kon sa unsang paagi ang sagradong mga rekord mipanalangin sa katawhan ni Hari Benjamin. Sa unsang paagi ang inyong kinabuhi nahimong mas maayo tungod kay kamo adunay kasulatan?
Kon ako nag-alagad sa uban, ako nag-alagad usab sa Dios.
Unsa kaha ang isulti ni Hari Benjamin kon kamo mangutana kaniya ngano nga siya mialagad uban sa iyang tanan nga “gahom, hunahuna ug kusog”? (Mosiah 2:11). Pamalandongi kini samtang magbasa ka sa Mosiah 2:10–26. Unsa ang gitudlo ni Hari Benjamin nga makapadasig ninyo sa pagserbisyo sa uban sa mas makahuloganon nga paagi? Pananglitan, unsay kahulogan niini nganha kaninyo ang mahibalo nga kon kamo nag-alagad sa ubang mga tawo, kamo nag-alagad usab sa Dios? (tan-awa diha sa Mosiah 2:17). Tinguhaa ang inspirasyon kon sa unsang paagi nga kamo makaserbisyo sa usa ka tawo niining semanaha.
Bisan kon kita masayod nga kita kinahanglang moserbisyo sa uban, kita usahay mag-atubang og mga hagit. Laing paagi sa pagtuon sa Mosiah 2:10–26 mao ang paghimo og usa ka lista sa mga kamatuoran nga gitudlo ni Hari Benjamin nga makatabang kaninyo sa pagbuntog sa mga hagit nga tingali mopugong kaninyo sa pagserbisyo. Unsa nga mga kasinatian ang nakapakita kaninyo nga ang unsay gitudlo ni Hari Benjamin tinuod?
Si Presidente Joy D. Jones mipakigbahin og usa ka makapatandog nga kasinatian nga miusab sa iyang pagtan-aw sa pagserbisyo sa uban. Basaha ang mahitungod niini diha sa “Alang Kaniya” ( Liahona, Nob. 2018, 50–52), ug paghunahuna mahitungod sa mga oportunidad nga inyong naangkon sa pagserbisyo sa uban. Mahimo pa gani ka nga maglista og pipila ug pamalandongan kon sa unsang paagi ang mensahe ni Presidente Jones, uban sa Mosiah 2:17, lagmit nakaimpluwensiya sa paagi nga kamo moatubang niining mga oportunidad. Ang usa ka himno sama sa “Ang Subo nga Magpapanaw” (Mga Himno, nu. 20) mahimong makatabang ninyo nga makahunahuna og dugang nga mga panabot.
Tan-awa usab sa Mateo 25:40; “Si Hari[ng] Benjamin Nagtudlo sa Iyang Katawhan sa Pagtuman sa mga Sugo sa Dios” (mga bidyo), Gospel Library; JustServe.org.
Kon ako nag-alagad sa uban, ako nag-alagad usab sa Dios.
Ang kalipay maggikan sa pagtuman sa mga sugo sa Dios.
Unsaon ninyo paghulagway ang kalipay nga maggikan sa pagkamasulundon ngadto sa Dios? Aduna bay mga hugpong sa mga pulong diha sa Mosiah 2:38–41 nga makatabang ninyo sa pagpasabot nganong kamo nagtuman sa Iyang kasugoan?
Ako mahimo nga usa ka santo pinaagi sa Pag-ula ni Jesukristo.
Si Hari Benjamin, sama sa tanang mga propeta, mipamatuod ni Jesukristo aron nga ang iyang katawhan “mahimo nga makadawat sa kapasayloan sa ilang mga sala, ug magmaya sa tuman nga kalipay” (Mosiah 3:13). Ania ang pipila ka mga pangutana nga pamalandongan samtang basahon ninyo ang pagpamatuod ni Hari Benjamin kabahin sa Manluluwas diha sa Mosiah 3:1–20:
-
Unsay akong nakat-onan gikan niini nga mga bersikulo mahitungod sa Manluluwas ug sa Iyang misyon?
-
Unsa ang akong makat-onan gikan sa Mosiah 3:18–19 mahitungod sa unsay gipasabot sa pagkahimong usa ka santo?
-
Sa unsang paagi si Jesukristo mitabang kanako nga mabuntog ang sala, mausab ang akong kinaiyahan, ug mamahimong mas sama sa usa ka santo?
“Ang Ginoong Makagagahom … manaog gikan sa langit.”
Unsa ang ikahatag sa gahom sa kuryente sa inyong abilidad sa pagbuhat? Sa unsang paagi ang inyong kinabuhi lahi kon wala kini? Kini nga mga pangutana makatabang kaninyo nga makapamalandong pa sa mas dako gayod nga gahom nga mahatag sa Manluluwas diha sa inyong kinabuhi.
Ang anghel kinsa mipakita ngadto ni Hari Benjamin mipasabot kang Jesukristo isip “ang Ginoong Makagagahom,” usa ka titulo nga nangahulogan nga anaa Kaniya ang tanan nga gahom. Unsay inyong nakat-onan gikan sa Mosiah 3:5–21 kon giunsa sa Manluluwas paggamit kana nga gahom? Sa unsang paagi ninyo nakita ang gahom sa Manluluwas diha sa inyong kinabuhi ug diha sa mga kinabuhi sa mga tawo nga naglibot kaninyo? Unsa ang nahimo sa Iyang gahom nga nakahatag kaninyo og gahom sa pagbuhat ug mamahimong? Sa unsang paagi ang inyong kinabuhi lahi kon wala kini?
Alang sa dugang nga mga ideya, tan-awa ang mga isyu karong bulana sa Liahona ug sa Alang sa Kalig-on sa mga Kabatan-onan nga mga magasin.
Mga Ideya sa Pagtudlo sa mga Anak
Kon ako mag-alagad sa uban, ako nag-alagad sa Dios.
-
Ang pahina sa kalihokan niining semanaha adunay usa ka yano nga korona nga mahimong buhaton sa inyong mga anak. Tingali ganahan sila nga magpuli-puli sa pagbarog diha sa usa ka lingkoranan o bangko ug kunohay nga si Hari Benjamin samtang inyong ipakigbahin ang pipila ka butang nga gitudlo ni Hari Benjamin sa iyang katawhan, makita diha sa Mosiah 2–3. Mahimo ka nga mopakigbahin kanila sa “Kapitulo 12: Si Hari Benjamin” (Mga Istorya sa Basahon ni Mormon, 32–35) aron mahatagan sila og kinatibuk-ang pagpasabot sa mga pagtulon-an ni Hari Benjamin.
-
Ang Mosiah 2:17 tingali mahimong usa ka maayong bersikulo alang sa inyong mga anak aron makakat-on. Mahimo ninyo sila nga tabanga sa pagbalik balik niining pipila ka mga pulong sa usa ka higayon. O mahimo ninyong isulat ang mga bersikulo, gamit ang pagtangtang og pipila ka mga importanteng mga pulong, ug hangyoon ang inyong mga anak sa pagpangita sa kulang nga mga pulong. Dayon mahimo ninyong istoryahon ang inyong mga anak kon nganong gusto sa Dios nga kita moserbisyo sa usag usa.
-
Makatabang kamo sa inyong mga anak sa pagsiksik sa Mosiah 2:11–18 aron sa pagsuta kon unsay gibuhat ni Hari Benjamin sa pagserbisyo sa uban. Dayon ang inyong mga anak mahimong mosulat diha sa mga gilis sa papel og pipila ka mga paagi nga sila makaserbisyo sa mga sakop sa pamilya. Ibutang ang mga papel diha sa usa ka sudlanan, sama sa bag o garapon, aron ang inyong mga anak makakuha og usa sa matag adlaw ug buhaton kana nga buhat sa pagserbisyo alang sa usa ka tawo.
Ang mga bata makabenepisyo sa pagbalik-balik. Ayaw kahadlok sa pagsubli sa mga kalihokan sa makadaghang higayon, ilabi na sa mas manghod nga mga bata. Ang pagbalik-balik makatabang sa mga bata nga mahinumdom sa unsay ilang nakat-onan.
Si Hari Benjamin mitudlo nga makaserbisyo kita sa Dios pinaagi sa pagserbisyo sa uban.
Ang tanan nakong mga panalangin naggikan sa Langitnong Amahan.
-
Ang pagserbisyo ni Hari Benjamin ngadto sa iyang katawhan dinasig sa iyang lawom nga pagpasalamat ngadto sa Dios. Unsaon ninyo sa pagdasig sa sama nga mga pagbati diha sa inyong mga anak? Mahimo kamo nga mag-uban sa pagbasa sa Mosiah 2:21 ug magsugod og usa ka lista sa mga panalangin nga nahatag sa Langitnong Amahan ngari kanato. Dayon tingali makadugang ka ngadto sa lista sa uban nga mga panalangin nga mahunahunaan sa mga bata.
-
Ania ang usa ka duwa nga mahimo ninyong ipadula aron sa pagtabang sa inyong mga anak nga makaila sa mga panalangin sa Langitnong Amahan. Mahimong ipasa-pasa sa mga bata ang usa ka hulagway sa Manluluwas samtang ilang kantahon o maminaw sa usa ka awit mahitungod sa pagpasalamat. Hunonga ang pagkanta o hunonga ang musika panagsa, ug dapita kon si kinsa man ang naggunit sa hulagway aron maghisgot og usa ka panalangin nga sila mapasalamaton. Sumala sa Mosiah 2:22–24, unsaon nato sa pagpakita nga kita mapasalamaton sa atong mga panalangin?
Si Jesukristo motabang kanako nga mahimong mas sama Kaniya.
-
Usa ka anghel misulti ni Hari Benjamin og importante nga mga kamatuoran mahitungod sa kinabuhi ug sa pangalagad ni Jesukristo. Tingali kamo ug ang inyong mga anak makapangita og mga hulagway sa pipila ka mga panghitabo nga nahisgotan diha sa Mosiah 3:5–10 (tan-awa, pananglitan, sa Libro sa mga Hulagway sa Ebanghelyo, nu.30, 41, 42, 57, 59). Samtang magbasa kamo sa Mosiah 3:5–10, ang inyong mga anak mahimong mopataas sa ilang mga kamot kon sila makadungog sa mga tudling nga makita diha sa usa sa mga hulagway.
-
Nakasulay na ba sukad ang inyong mga anak sa pagtabang og andam sa pagkaon gamit ang usa ka resipe? Tingali mahimo ninyong hisgotan ang mahitungod niana nga kasinatian ug gamita ang Mosiah 3:19 aron makahimo og usa ka “resipe” kon unsaon nato aron mahimong sama ni Jesukristo. Sa unsang paagi nga si Jesukristo motabang kanato nga mahimong sama Kaniya?
Alang sa dugang nga mga ideya, tan-awa ang isyu karong bulana sa Higala nga magasin.
King Benjamin’s Address [Pakigpulong ni Hari Benjamin], ni Jeremy Winborg