Allegory of the Olive Tree [Sambingay sa Kahoy nga Oliba], ni Brad Teare

Abril 8–14: Ang Ginoo Magtrabaho uban Kanato

Jacob 5–7

Adunay daghan, daghan pa nga mga tawo kinsa wala pa makadungog sa ebanghelyo ni Jesukristo. Kon kamo mibati sukad nga nabug-atan sa kadako sa tahas sa pagpundok kanila diha sa Simbahan sa Ginoo, ang unsay giingon ni Jacob mahitungod sa mga kahoy nga oliba sa Jacob 5 adunay mapasaligong pahinumdom: ang ubasan iya sa Ginoo. Siya naghatag kanato og usa ka gamay nga luna sa pagtabang sa Iyang buhat—ang atong pamilya, ang atong pundok sa mga higala, ang gilapdon sa atong impluwensya. Ug usahay ang unang tawo nga atong tabangan og pundok mao ang atong mga kaugalingon. Apan wala gayod kita mag-inusara niini nga buhat, kay ang Ginoo sa ubasan nag-ugmad kauban sa Iyang mga sulugoon (tan-awa sa Jacob 5:72). Nahibalo ang Dios ug nahigugma sa Iyang mga anak, ug Siya moandam og paagi alang sa matag usa kanila nga makadungog sa Iyang ebanghelyo, bisan kadtong kinsa misalikway Kaniya sa nangaging panahon (tan-awa sa Jacob 4:15–18). Ug unya, kon mahuman na ang buhat, kadtong tanan kinsa “nagkugi sa pag-ugmad uban [Kaniya] … makaangkon og hingpit nga kalipay uban [Kaniya] tungod sa bunga sa [Iyang] ubasan” (Jacob 5:75).

Si Jacob Nagtudlo sa Sambingay sa Kahoy nga Oliba | Jacob 5

Naghisgot si Jacob bahin sa usa ka tawo ug sa iyang ubasan. Ang tawo nagtanom og mga sanga sa ihalas ug maayo nga kahoyng oliba ug miputol sa mga sanga nga namunga og ihalas nga bunga, nagbilin lamang sa maayo nga bunga.

Mga Ideya alang sa Pagkat-on diha sa Panimalay ug sa Simbahan

Jacob 5

Si Jesukristo mao ang Ginoo sa ubasan.

Ang Jacob 5 mao ang usa ka istorya nga adunay simbolikanhon nga kahulogan. Kini naghulagway sa mga kahoy ug bunga ug mga mamumuo, apan mahitungod gayod kini sa pakig-inter-aksiyon sa Dios sa Iyang katawhan sa tibuok kasaysayan. Busa samtang magbasa ka sa sukaranan nga istorya, paghunahuna mahitungod sa unsa ang pipila sa mga butang diha sa istorya nga tingali nagsimbolo.

Pananglitan, kon ang ubasan nagrepresentar sa kalibotan, ug ang maayo nga kahoy nga oliba nagrepresentar sa Israel (o niadtong kinsa nakahimo og mga pakigsaad sa Dios; tan-awa sa Jacob 5:3), unsa kaha ang girepresentar sa ihalas nga kahoy sa oliba? Unsa kaha ang girepresentar sa maayo ug sa dili maayo nga bunga? Unsa pay lain nga mga simbolo ang inyong nakita?

Bisan og ang Jacob 5 nagtudlo mahitungod sa mga nasod ug mga siglo sa kasaysayan sa kalibotan, kini mahitungod usab kaninyo ug sa inyong kinabuhi. Unsa nga mga mensahe ang inyong makita alang sa inyong kaugalingon diha sa Jacob 5?

Tingali ang labing importante sa, Jacob 5 mao ang mahitungod ni Jesukristo. Pangitaa Siya samtang kamo magbasa. Unsa ang inyong nakat-onan mahitungod Kaniya, pananglitan, diha sa mga bersikulo 40–41, 46–47?

Alang sa dugang nga mga panabot mahitungod sa Jacob 5, tan-awa ang diagram sa kataposan niining latid.

Jacob 5:61–75

Ang Ginoo midapit kanako sa pagtrabaho uban Kaniya diha sa Iyang ubasan.

Ang “uban pa nga mga sulugoon” (Jacob 5:70) kinsa gitawag ngadto sa ubasan sa Ginoo naglakip sa mga tawo sama kaninyo. Unsa nga mga kamatuoran ang inyong nakit-an diha sa Jacob 5, ilabi na sa mga bersikulo 61–62 ug 70–75, mahitungod sa pagtrabaho diha sa ubasan sa Ginoo? Unsa ang inyong nakat-onan mahitungod Kaniya pinaagi sa pagtabang sa Iyang buhat?

Samtang kamo magbasa mahitungod sa “kataposan nga higayon” nga ang Ginoo maghago diha sa Iyang ubasan, unsa ang nakapadasig kaninyo sa pag-alagad sa Ginoo “uban sa inyong kusog”? (Jacob 5:71). Tingali makahunahuna ka og usa ka personal nga kasinatian diin inyong nabati ang kalipay samtang nagserbisyo sa Ginoo diha sa ubasan—pananglitan, pinaagi sa pagpakigbahin sa ebanghelyo, pag-alagad diha sa templo, o pagpalig-on sa uban. Mahimo usab ninyong suhiron ang mga ehemplo nga gipakigbahin ni Elder Gary E. Stevenson sa iyang mensahe “Yano ang Katahom—Matahom ang Kayano” (Liahona, Nob. 2021, 47–50).

Si Presidente Russell M. Nelson nagtudlo nga, “Bisan kanus-a nga mobuhat kamo og bisan unsa sa pagtabang ni bisan kinsa—sa matag habig sa tabil—nga mopadulong sa paghimo og mga pakigsaad sa Dios ug sa pagdawat sa ilang mahinungdanong mga ordinansa sa bunyag ug templo, kamo nagtabang sa pagpundok sa Israel. Ingon lang niana ka yano” (“Paglaom sa Israel” [tibuok kalibotan nga debosyonal sa kabatan-onan, Hunyo 3, 2018], ChurchofJesusChrist.org). Hunahunaa ang pagsugod og usa ka lista sa mga ideya sa unsay inyong mahimo aron sa pagtabang sa pagpundok sa Israel. Gikan sa inyong lista, unsa ang inyong gibati nga ipabuhat sa Ginoo kaninyo karon diha sa Iyang ubasan? Sumala sa bersikulo 75, sa unsang paagi ang Ginoo moganti kanato alang sa pagserbisyo diha sa Iyang ubasan?

Tan-awa usab sa “Israel, Israel, Dios Nagtawag,” Mga Himno, nu. 7.

Ubasan sa Oliba sa Karaang Tugon

(Jacob 5–6) Seminary students visit an Old Testament olive vineyard and are taught how to care for olive trees. They discover conditions in the vineyard that parallel the conditions in Zenos’s allegory. Segment 1, Old Testament Olive Vineyard

Itudlo ang doktrina. Seguroa nga ang inyong mga panaghisgotan nakatutok sa sukaranan nga doktrina diha sa mga kasulatan. Mabuhat ninyo kini pinaagi sa pagdungan og basa sa mga kasulatan ug dayon ipakigbahin sa usag usa ang mga kamatuoran nga inyong nakit-an, ingon man ang mga kasinatian sa pagsunod niadto nga mga kamatuoran.

Jacob 6:4–5

Ang Ginoo mohinumdom sa Iyang katawhan diha sa gugma ug kalooy.

Usa ka kahulogan sa pulong nga magmatinud-anon [cleave] mao ang pagsunod o lig-on, hugtanon, ug dili matarog nga magpabilin sa usa ka butang. Sa unsang paagi kana nga kahulogan moapekto sa paagi sa inyong pagsabot sa Jacob 6:4–5? Diha sa istorya sa kahoy nga oliba, sa unsang paagi ang Ginoo sa ubasan mituyhad sa iyang mga “bukton sa kalooy”? (tan-awa, pananglitan sa, Jacob 5:47, 51, 60–61, 71–72). Sa unsang paagi Siya mibuhat niini alang kaninyo?

Jacob 7:1–23

Makabarog ako nga lig-on kon ang uban mohagit sa akong hugot nga pagtuo diha ni Jesukristo.

Ang kasinatian sa mga Nephite uban ni Sherem kasagaran nga gisubli karon: ang mga tawo mosulay sa paglaglag sa hugot nga pagtuo diha ni Kristo. Giunsa pagtubag ni Jacob sa dihang ang iyang hugot nga pagtuo giataki? Unsay inyong nakat-onan gikan sa iyang mga tubag? Unsay inyong mahimo karon sa pag-andam alang sa mga panahon kon ang inyong hugot nga pagtuo diha sa Manluluwas pagahagiton?

Tan-awa usab sa Jeffrey R. Holland, “Ang Bili—ug mga Panalangin—sa Pagkadisipulo,” Liahona, Mayo 2014, 6–9; “Si Sherem Milimod kang Kristo” (bidyo), Gospel Library.

Si Sherem Milimod kang Kristo | Jacob 7

Jacob 7 Si Sherem misangyaw batok sa doktrina ni Kristo ug nangita’g timailhan. Gisilutan siya sa Dios ug namatay human mitug-an sa katawhan sa iyang mga sala. 

Alang sa dugang nga mga ideya, tan-awa ang mga isyu karong bulana sa Liahona ug sa Alang sa Kalig-on sa mga Kabatan-onan nga mga magasin.

Mga Ideya sa Pagtudlo sa mga Anak

Jacob 5

Ang Ginoo nagpangga sa Iyang katawhan.

• Unsaon ninyo sa pagpakigbahin ang istorya sa mga kahoy nga oliba sa paagi nga ang inyong mga anak makasabot? Usa ka paagi mao ang paglakaw sa gawas aron motan-aw sa usa ka kahoy ug rebyoha kadali ang nag-unang mga punto sa istorya. Unsa ang gibuhat sa Ginoo sa ubasan alang sa Iyang mga kahoy? Unsaon nato nga mahimong sama sa mga mamumuo diha sa istorya ug motabang sa uban nga mobati sa gugma sa Manluluwas?

• Si Jacob mipaambit sa istorya sa mga kahoy nga oliba aron sa pagdapit sa iyang katawhan sa pagduol ngadto kang Kristo. Makahimo usab kini og sama niana alang sa inyong mga anak. Tingali mahimo ninyong ilaktod saysay ang istorya gamit ang mga bersikulo sama sa Jacob 5:3–4, 28–29, 47, ug 70–72. Ikaw ug ang inyong mga anak makabasa dayon sa Jacob 5:11, 41, 47, ug 72, nga mangita sa mga butang nga nagpakita kon unsa ka pinangga sa Ginoo sa ubasan (si Jesukristo) ang mga kahoy. Unsa ang gibuhat sa Manluluwas aron mapakita nga nagpakabana Siya kanato?

  Ubasan sa Oliba sa Karaang Tugon

  (Jacob 5–6) Seminary students visit an Old Testament olive vineyard and are taught how to care for olive trees. They discover conditions in the vineyard that parallel the conditions in Zenos’s allegory. Segment 1, Old Testament Olive Vineyard

Jacob 6:4–5

Ang Langitnong Amahan nagmahal kanako ug mopasaylo kanako kon ako maghinulsol.

• Ang Jacob 6:4–5 adunay importanteng mensahe alang kanato kon kita makahimo og sayop nga mga pagpili. Tingali makatabang kamo sa inyong mga anak sa pagpangita niini. Hain sa mga pulong niining mga bersikulo ang makahatag kanato og paglaom diha sa matubsanong gugma sa Dios? Ang istorya ni Elder Allen D. Haynie mahitungod sa nagkabulingit diha sa lungag sa lapok, sa iyang mensahe “Paghinumdom kang Kinsa Kita Mosalig” (Liahona, Nob. 2015, 121–22), mahimong makatabang. Unsa ang gitudlo kanato niini nga istorya ug sa Jacob 6:4–5 mahitungod sa unsa atong gikinahanglan nga buhaton aron maluwas diha sa gingharian sa Dios?

Jacob 7:1–23

Mahimo nakong panalipdan ang unsay nahibaloan nako nga tinuod.

• Unsaon ninyo sa pagdasig ang inyong mga anak sa pagpanalipod alang sa kamatuoran sama sa gibuhat ni Jacob? Sa unsang paagi gipanalipdan ni Jacob ang unsay iyang nahibaloan nga matarong? Hangyoa ang inyong mga anak sa pagpaambit og mga kasinatian sa dihang sila mipanalipod alang sa matarong, o ipakigbahin ang inyong kaugalingong kasinatian. Tingali mahimo usab silang mokanta og awit nga mopahayag og kaisog sama ni Jacob, sama sa “Barogan ang Kamatuoran,” Songbook sa mga Bata, 81.

Alang sa dugang nga mga ideya, tan-awa ang isyu karong bulana sa Higala nga magasin.