Laj Jakob ut laj Enos, xb’aan laj Scott Snow

15–21 abril: “Nakʼanjelak wikʼin re xbʼaanunkil joʼ chanru li rajom xchʼool”

Enos–Li Raatin laj Mormon

Laj Enos xko’o chixyoob’aleb’ li xul sa’ li k’iche’, a’b’an kikana aran chiru chixjunil li kutan ut toj sa’ li q’ojyin xb’aan naq “kitzʼokaak li raam.” Xbʼaan lix tzʼokajik naq laj Enos “kixtaqsi xyaab’ xkux taqe’q, re naq toj sa’ choxa kiwulak.” Aʼan kixye naq aʼan jun yalok-u kiwan wiʼ chiru li Dios (chiʼilmanq Enos 1:2–4). Rik’in laj Enos naqatzol naq li tijok naraj anchalil li ch’oolej re jilok rik’in li Dios ut re xsik’b’al xnawb’al li rajom a’an. Naq nakattijok chi jo’kan, naru chik nakataw, jo’ kixtaw laj Enos, naq li Dios nakatrab’i ut naq nakatxra chi yaal laa’at, eb’ li raarookeb’ aab’aan, ut eb’ ajwi’ li xik’ neke’ilok aawe (chi’ilmanq Enos 1:4–17). Naq nakanaw k’a’ru li rajom, naru nakab’aanu chi chaab’il. Jo’ laj Mormon, maare “ink’a’ nakanaw chixjunil li k’a’aq re ru; … ; joʼkan naq nakʼanjelak aawikʼin re xbʼaanunkil joʼ chanru li rajom xchʼool” (Raatin laj Mormon 1:7).

Li na’leb’ re tzolok sa’ li ochoch ut sa’ li iglees

Enos 1:1–17

Li Dios taarab’i ut tixsumeheb’ lin tij.

Maare ink’a’ jwal nim li xak’ul laa’at rik’in tijok chiru jo’ li kixk’ul laj Enos, a’b’an toj naru taawanq xwankil. Wahe’ junjunq li patz’om naru nakak’oxla naq yooqat chirilb’al Enos 1:1–17:

• K’a’ruheb’ li aatin li neke’xch’olob’ lix yalb’al xq’e laj Enos chi tijok?

• Chan ru naq kijala lix tij laj Enos chalen li raqal 4 toj 11?

• K’a’ru nintzol rik’in laj Enos li naru nikinixtenq’a chixchaab’ilob’resinkileb’ lin tij?

Chi’ilmanq ajwi’ “Enos ora fervorosamente” (video), Biblioteca del Evangelio; “Xhoonal tijok, kʼaʼjoʼ xsahil,” Ebʼ li Bʼich, 83.

Xwotzb’aleb’ li na’leb’ tat-aatinaq wi’. Wi yooqat chi k’utuk, chaab’ilaq raj xtz’iib’ankileb’ li patz’om taawaj wi’ aatinak re naq chixjunileb’ naru te’ril. A’in naxtenq’aheb’ li kristiaan chixk’oxlankileb’ li patz’om ut chixsumenkileb’ chi chaab’il wi’chik.

Enos 1:1–4

Li Qaawa’ naru nikinixtenq’a chixchaab’ilob’resinkil lin junkab’al.

Maare wan jun laa komon li nakawaj xtenq’ankil re naq taachalq rik’in li Kristo, a’b’an ink’a’ nakanaw ma yoo chi tenq’aak xb’aan li nakab’aanu. K’a’ru naru nakatzol sa’ Enos 1:1–4 chirix li kixb’aanu laj Jakob choq’ re laj Enos, li ralal? Qayehaq, k’a’ru naraj naxye choq’ aawe li ch’ol aatin “lix chʼoolanihom ut lix tijom li Qaawaʼ”? Chan ru naru nakawoksi lix wankil a’an sa’ laa wochoch?

Naq yooqat chixk’oxlankil laa junkab’al, k’e reetaleb’ li patz’om ut k’anjeleb’aal a’in:

• Chan ru naru nakatenq’a laa junkab’al rik’in chaab’ilal? (chi’ilmanq 1 Nefi 2:16–18; 3:15–21; 5:1–6; 7:20–21; Alma 36:17–20; “Li Junkab’al: Jun Jek’inb’il Aatin choq’ re li Ruchich’och’”). K’a’ru naru nakab’aanu wi wan jun kristiaan li ink’a’ naraj laa tenq’ malaj li nakatxrahob’tesi?

• K’a’ru li na’leb’ nakataw sa’eb’ li raqal a’in li naru naxk’am aab’e sa’ laa wanjik rik’in laa junkab’al? Mateo 5:21–24, 38–44; 6:14; 7:1–5; 22:36–39; 3 Nefi 18:21; Moroni 7:33; Tzol’leb’ ut Sumwank 18:10–13.

Li Elder Dieter F. Uchtdorf kixwotz li chaab’il na’leb’ choq’ reheb’ li junkab’al sa’ “B’antiox reheb’ li neke’kolok” (Jolomil ch’utub’aj-ib’ re abril 2016). K’a’ru nakatxmusiq’a li raatin chixb’aanunkil re xkawob’resinkil laa junkab’al? (chi’ilmanq tz’aqal li tasal “Xkolb’aleb’ li qajunkab’al”).

Chi’ilmanq ajwi’ Temas del Evangelio, “Familia,” Biblioteca del Evangelio; “El hogar y la familia—Por cosas pequeñas” (video), Biblioteca del Evangelio.

Enos 1:1–18

Naru nink’ul xkuyb’al inmaak naq nink’anjela lin paab’aal chirix li Kristo.

Wan naq maare nakapatz’ ma kuyb’ileb’ laa maak, us ta ak xajal aak’a’uxl chirixeb’ li maak a’an. K’a’ru li na’leb’ nakak’ul rik’in li kixk’ul laj Enos sa’ Enos 1:1–8? Chan ru kixk’ut laj Enos lix paab’aal chirix li Jesukristo rub’elaj ut chirix naq kuyb’ileb’ lix maak?

Jarom–Omni

Naq ninyal inq’e chixpaab’ankileb’ lix taqlahom, li Dios tinrosob’tesi.

Lix hu laj Jarom ut lix hu laj Omni neke’xk’ut chan ru naq neke’k’anjelak sa’ komonil li tiikil wank ut li usaak. K’a’ru nakatzol sa’ Jarom 1:7–12; Omni 1:5–7, 12–18? Chan ru naq li naxye li ruchich’och’ chirix li usaak jalan rik’in li naxye li Qaawa’? Chan ru naq li Qaawa’ naxtenq’a lix tenamit chi usaak? (chi’ilmanq Alma 37:13; 48:15–16).

Omni 1:25–26

“Chalqex rikʼin li Kristo, aʼan lix Santil Dios laj Israel.”

Li bʼoqok chi “chalk rikʼin li Kristo” nakʼeeman kʼiila sut saʼ lix Hu laj Mormon. Relik chi yaal, jun rehebʼ lix xbʼeenil ajom li hu aʼan xkʼeebʼal li bʼoqok aʼan re chixjunilebʼ li kristiaan. Naq nakawil Omni 1:25–26, k’a’ruheb’ li aatin malaj ch’ol aatin nakataw li neke’xch’olob’ chan ru naq toochalq rik’in li Kristo? K’a’ru taab’aanu laa’at re chalk rik’in a’an chi anchal aach’ool?

Laj Mormon kixch’utub’eb’ li perel ch’iich’, xb’aan laj Jorge Cocco

Raatin laj Mormon 1:1–8

Li Dios taak’anjelaq wik’in naq nintaaqe lix b’eresihom.

Li Qaawa’ kixmusiq’a laj Mormon re tixk’eheb’ lix perel ch’iich’ laj Nefi li kok’eb’ sa’ lix Hu laj Mormon xb’aan naq li Dios kixnaw naq te’sachmanq li 116 chi perel sa’ xtiklajik (chi’ilmanq Tzol’leb’ ut Sumwank 10; Santos, tomo 1, ch’ol 5). K’a’ut naq nakab’antioxi naq laj Mormon kixtaaqe lix na’leb’ li Qaawa’ re roksinkileb’ li tz’iib’ahom a’in (a’an 1 Nefi toj Omni)? K’a’ut naq kiroskiheb’, jo’ kixye laj Mormon? (chi’ilmanq Raatin laj Mormon 1:3–7). Jo’q’e aawilom li Dios chi k’anjelak aawik’in malaj rik’ineb’ laa was aawiitz’in?

Re xtawb’al xkomon chik li na’leb’, chi’ilmanq li hu Liahona ut li hu Para la Fortaleza de la Juventud re li po a’in.

Li na’leb’ re xtzolb’aleb’ li kok’al

Enos 1:1–5

Naru nin’aatinak rik’in lin Choxahil Yuwa’ rik’in li tijok.

• Chan ru naru nakatenq’aheb’ laa kok’al chixchaab’ilob’resinkileb’ lix tij? Naru nakak’ut chiruheb’ jun xjalam-uuch laj Enos naq yoo chi tijok; kanab’eb’ chixyeeb’al k’a’ru neke’ril. Naru neke’xmutz’eb’ li ru ut te’xk’oxla naq yookeb’ chi aatinak rik’in li qaChoxahil Yuwa’ tz’aqal sa’ kristiaanil. K’a’ raj ru teeraj aatinak wi’? K’a’ raj ru taaraj a’an chixyeeb’al reheb’?

• Naq yooqat chixyaab’asinkil Enos 1:1–5, eb’ laa kok’al li toj ka’ch’ineb’ naru neke’xk’oxla naq a’aneb’ laj Enos rik’in xk’utb’esinkil naq yookeb’ chi yohob’k, yookeb’ chi wiq’laak chi tijok, ut wan chik xkomon. Eb’ laa kok’al li ak ninqeb’ naru neke’xk’e reetal jun li aatin malaj ch’ol aatin li tixch’olob’ lix tij laj Enos. K’a’ru neke’xk’ut li aatin a’in chirix lix tij laj Enos? Wotz jun aanumsihom b’ar wi’ naq laa waam “kitz’okaak” ut “kat-elajin” chiru li Qaawa’ (Enos 1:4).

Jo’ ralal xk’ajol li Dios, naru nokotijok chiru li qaChoxahil Yuwa’.

Enos 1:2–16

Lin Choxahil Yuwa’ narab’iheb’ ut naxsumeheb’ lin tij.

• Chan ru naru nakatenq’aheb’ laa kok’al chixtawb’al ru naq li Dios taarab’i ut tixsumeheb’ lix tij? Naru nakapatz’ reheb’ naq te’xye k’a’ru neke’xpatz’ naq neke’tijok. Chirix a’an naru nakatenq’aheb’ chixtawb’al k’a’ru kixpatz’ laj Enos naq kitijok sa’ Enos 1:2, 9, 13–14, ut 16 (chi’ilmanq ajwi’ “Ch’ol 11: Laj Enos,” Eb’ li Esilal sa’ lix Hu laj Mormon, 30–31).

  K’a’ru kik’ulman xb’aan naq kitijok laj Enos? (che’ilmanq li raqal 6, 9, 11).

  K’a’ru naqatzol rik’in li kixb’aanu laj Enos chirix xchaab’ilob’resinkil li qatij?

• B’ichahomaq jun li b’ich chirix li tijok, maare “Natijok jun ch’ina al” (B’ichleb’aal choq’ reheb’ li Kok’al, 6–7). Laa kok’al naru neke’xtaqsi li ruq’eb’ rajlal sut naq te’rab’i li aatin “tijok” malaj junaq chik li aatin naka’sutiman. Ye reheb’ laa kok’al chan ru naq li qaChoxahil Yuwa’ xsumehomeb’ laa tij.

Li Raatin laj Mormon 1:3─8

Naru nawosob’tesiheb’ li was wiitz’in naq nawab’i li Santil Musiq’ej.

• Laj Mormon kixtaaqe xb’eresihom li Santil Musiq’ej naq tixk’eheb’ lix perel ch’iich’ laj Nefi li kok’eb’ ru sa’ lix Hu laj Mormon. Chixjunil li ak qatzolom sa’ lix Hu laj Mormon chiru li chihab’ a’in wan qik’in xb’aan naq laj Mormon kixsik’ ru rab’inkil li Musiq’ej. Chan ru naru nakatenq’aheb’ laa kok’al chi tzolok chirix rab’inkil li Musiq’ej? Patz’ reheb’ naq te’xk’eheb’ xhoonal re rilb’aleb’ li raqal sa’ Raatin laj Mormon 1:3–8. Naru neketz’il rix k’a’ru xe’xtzol sa’ li junjunq chi raqal. Chirix a’an eb’ laa kok’al naru:

  • Neke’xwotz k’a’ru xe’xtzol sa’eb’ li seraq’ sa’ lix Hu laj Mormon chiru li chihab’ a’in (eb’ li jalam-uuch sa’ Kim, Taaqehin naru neke’xtenq’aheb’ chixjultikankil).

  • Neke’xb’icha jun li b’ich chirix li Santil Musiq’ej, maare “Li Santil Musiq’ej” (B’ichleb’aal choq’ reheb’ li Kok’al, 56).

  • Neke’aatinak chirix hoonal naq ke’b’eresiik xb’aan li Musiq’ej chixb’aanunkil k’a’ruhaq li kirosb’tesi jalan chik li kristiaan.

Re xtawb’al xkomon chik li na’leb’, chi’ilmanq li hu Amigos re li po a’in.

Laj Enos natijok, xb’aan laj Robert T. Barrett