Xk’ulb’aleb’ lix k’utum li rey aj Benjamin, xb’aan li xMaria Alejandra Gil

22–28 abril: “Taanumtaaq rik’ineb’ li rahok choq’ re li Dios ut chixjunileb’ li winq”

Mosiah 1–3

Naq nakawab’i li aatin rey, maare nakak’oxlaheb’ li koroon, li moos, ut li k’ojarib’aal. Sa’ Mosiah 1–3 taawil resil jun li rey jalan wi’ rik’in chixjunil a’an. Li rey aj Benjamin, ruuchil xk’ulb’al li k’a’ru naraj rik’in xk’anjeleb’ lix tenamit, “kik’anjelak rik’in tz’aqal ruq’” (chi’ilmanq Mosiah 2:14). Ruuchil relajinkil naq jalaneb’ te’k’anjelaq chiru, a’an kik’anjelak chiru lix tenamit “chi anchal li metz’ew, li k’a’uxl ut li kawilal li k’eeb’il re” (Mosiah 2:11). Li rey a’in ink’a’ kiraj naq lix tenamit te’xloq’oni; kixk’ut b’an chiruheb’ naq te’xloq’oni lix Choxahil Rey, li Jesukristo. Li rey aj Benjamin kixtaw ru naq a’an “li Qaawaʼ Qʼaxal Nim Xwankil li naʼawaʼbʼejin” (Mosiah 3:5), li kichal “chaq saʼ choxa” ut xkoʼo “saʼ xyanqebʼ li winq, … re naq taachalq li kolbʼa-ibʼ rikʼinebʼ li ralal xkʼajolebʼ li winq rikʼin xpaabʼankil lix kʼabʼaʼ” (Mosiah 3:5, 9).

Li na’leb’ re tzolok sa’ li ochoch ut sa’ li iglees

Mosiah 1:1–7

“Tz’ileb’ rix [li loq’laj hu] chi yalb’il aaq’e.”

Sa’eb’ li raqal a’in, k’e reetal chan ru naq li loq’laj tz’iib’ahom kirosob’tresi lix tenamit li rey aj Benjamin. Chan ru naq chaab’il wi’chik laa yu’am xb’aan naq wankeb’ li loq’laj hu aawik’in?

Mosiah 2:10–26

Naq nink’anjelak chiruheb’ li was wiitz’in, yookin ajwi’ chi k’anjelak chiru li Dios.

K’a’ru nakak’oxla naq tixye raj li rey aj Benjamin wi ta taapatz’ re k’a’ut naq kik’anjelak “chi anchal li metz’ew, li k’a’uxl ut li kawilal”? (Mosiah 2:11). K’oxla a’in naq yooqat chirilb’al Mosiah 2:10–26. K’a’ru kixk’ut li rey aj Benjamin li nakatxmusiq’a chi k’anjelak chiruheb’ laa was aawiitz’in chi anchal chik aach’ool? Qayehaq, k’a’ru xyaalalil choq’ aawe xnawb’al naq wi nakatk’anjelak chiru laa was aawiitz’in, yookat ajwi’ chi k’anjelak chiru li Dios? (chi’ilmanq Mosiah 2:17). Sik’ aamusiq’anb’il na’leb’ re taanaw chan ru tatruuq chi k’anjelak chiru jun kristiaan chiru li xamaan a’in.

Us ta naqanaw naq tento took’anjelaq chiruheb’ li qas qiitz’in, wan naq naqak’ul li ch’a’ajkilal. Re xtz’ilb’al rix Mosiah 2:10–26 naru nakatz’iib’aheb’ li na’leb’ kixk’ut li rey aj Benjamin li te’tenq’anq aawe chixq’axb’aleb’ ru li ch’a’ajkilal nakate’xram chi k’anjelak chiruheb’ laa was aawiitz’in. K’a’ru ak xak’ul li xk’e chanaw naq yaal li kixk’ut li rey aj Benjamin?

Li Awa’b’ej Joy D. Jones kixseraq’i jun xnumsihom li kijalok re xk’a’uxl chirix li k’anjelak chiru li ras riitz’in. Naru nakawil li seraq’ a’an sa’ “Sa’ xk’ab’a’ a’an” (Jolomil ch’utub’aj-ib’ re octubre 2018), ut nakak’oxla rix li k’anjelak aab’aanuhom chiruheb’ laa was aawiitz’in. Naru ajwi’ nakatz’iib’a junjunq reheb’ ut nakak’oxla chan ru naq li raatin li Awa’b’ej Jones, rochb’een Mosiah 2:17, naru nakatxtenq’a chi k’anjelak chiruheb’ laa was aawiitz’in chi anchal aach’ool. Jun b’ich jo’ “Jun winq neb’a’ aj numel b’e” (Eb’ li B’ich, 17) malaj jun video jo’ “El viejo zapatero” (Biblioteca del Evangelio) naru neke’xk’e xkomon chik laa na’leb’.

Chi’ilmanq ajwi’ Mateo 25:40; “El rey Benjamín enseña acerca del servicio a Dios” (video), Biblioteca del Evangelio; JustServe.org; Temas del Evangelio, “Servicio,” Biblioteca del Evangelio.

Naq nink’anjelak chiruheb’ li was wiitz’in, yookin ajwi’ chi k’anjelak chiru li Dios.

Mosiah 2:38–41

Li sahil ch’oolejil nachal rik’in xpaab’ankileb’ lix taqlahom li Dios.

Chan ru raj taach’olob’ li sahil ch’oolejil li nachal rik’in ab’ink chiru li Dios? Ma wankeb’ li ch’ol aatin sa’ Mosiah 2:38–41 li tate’xtenq’a chixch’olob’ankil k’a’ut naq nakapaab’eb’ lix taqlahom?

Mosiah 3:1–20

Naru tin’ok choq’ aj santil paab’anel sa’ xk’ab’a’ lix tojb’al rix li maak xb’aan li Jesukristo.

Li rey aj Benjamin, jo’ chixjunileb’ li profeet, kixch’olob’ xyaalal li Jesukristo re naq lix tenamit “te’ruuq chixk’ulb’al li risinkil lix maakeb’, ut te’saho’q xch’ool rik’in sahil ch’oolejil q’axal nim” (Mosiah 3:13). A’in junjunq li patz’om naru taak’oxla naq nakawil lix nawom xch’ool li rey aj Benjamin chirix li Kolonel sa’ Mosiah 3:1–20:

• K’a’ru nintzol sa’eb’ li raqal a’in chirix li Kolonel ut lix k’anjel?

• K’a’ru nintzol sa’ Mosiah 5:18–19 chirix li ok choq’ aj santil paab’anel?

• Chan ru naq li Jesukristo kinixtenq’a chi numtaak sa’ xb’een li maak, chixjalb’al li waam, ut chi ok choq’ aj santil paab’anel?

Mosiah 3:5–21

“Li Qaawaʼ Qʼaxal Nim Xwankil … taachalq chaq saʼ choxa.”

K’a’ru naxb’aanu li kaxlan xam choq’ aawe sa’ laa yu’am? Chan raj ru laa yu’am wi ta maak’a’ a’an? Eb’ li patz’om a’in naru nakate’xtenq’a chixk’oxlankil li nimla wankilal naru naxk’e li Kolonel sa’ laa yu’am.

Li anjel li kixk’ut rib’ chiru li rey aj Benjamin kixye naq li Jesukristo a’an “li Qaawaʼ Qʼaxal Nim Xwankil,” jun kʼabʼaʼej li nareetali naq chixjunil li wankil wan rikʼin. K’a’ru nakatzol sa’ Mosiah 3:5–21 chirix li naxb’aanu li Kolonel rik’in li wankil a’an? Chan ru aawilom lix wankil li Kolonel sa’ laa yu’am ut sa’ xyu’ameb’ laa was aawiitz’in? K’a’ru nakatxtenq’a lix wankil chixb’aanunkil ut chi wulak wi’? Chan raj ru laa yu’am wi ta maak’a’ a’an?

Re xtawb’al xkomon chik li na’leb’, chi’ilmanq li hu Liahona ut li hu Para la Fortaleza de la Juventud re li po a’in.

Li na’leb’ re xtzolb’aleb’ li kok’al

Mosiah 2:11–18

Naq nink’anjelak chiruheb’ li was wiitz’in, yookin chi k’anjelak chiru li Dios.

• Sa’ li perel re kok’ k’anjel re li xamaan a’in wan jun li koroon naru neke’xyiib’ laa kok’al. Maare taawulaq chiruheb’ xaqliik sa’ xb’een jun ch’unleb’aal jo’ li rey aj Benjamin naq laa’at yooqat chixwotzb’al junjunq reheb’ li k’a’aq re ru kixk’ut li rey aj Benjamin chiru lix tenamit, li neke’tawman sa’ Mosiah 2–3. Naru ajwi’ nakawoksi “Ch’ol 12: Li rey aj Benjamin” (Eb’ li Esilal sa’ lix Hu laj Mormon, 32–35) re xk’utb’al chiruheb’ k’a’ru kixk’ut li rey aj Benjamin.

• Mosiah 2:17 a’an jun chaab’il raqal naru neke’xtzol laa kok’al. Tenq’aheb’ chixyeeb’al li raqal k’iila sut chi junjunq li aatin. Malaj naru nakatz’iib’a li raqal, a’ut wan junjunq aatin aajel ru ink’a’ taatz’iib’a, ut chirix a’an taapatz’ reheb’ laa kok’al naq te’xtaweb’ li aatin li ink’a’ xatz’iib’a. Chirix a’an naru nakaye reheb’ laa kok’al k’a’ut naq li Dios naraj naq taqatenq’a qib’ chiqib’il qib’.

• Naru nakatenq’aheb’ laa kok’al chirilb’al Mosiah 2:11–18 re xk’eeb’al reetal k’a’ru kixb’aanu li rey aj Benjamin re k’anjelak chiruheb’ li ras riitz’in. Chirix a’an, laa kok’al naru neke’xtz’iib’a chiru kok’ hu chan ru naru neke’k’anjelak chiruheb’ li ras riitz’in. K’eheb’ li kok’ hu sa’ jun sek’, re naq laa kok’al naru te’xsik’ ru jun reheb’ rajlal kutan ut te’xb’aanu li k’a’ru naxye choq’ re jun kristiaan.

Eb’ li kok’al neke’xtaw ru chi us naq neke’ka’sutiman li nak’ute’. Matxuwak chixb’aanunkileb’ li kok’ k’anjel naab’al sut, a’ tz’aqal rik’ineb’ li kok’al toj ka’ch’ineb’ xyu’am. Li ka’sutink tixtenq’aheb’ li kok’al chixjultikankil li neke’xtzol.

Li rey aj Benjamin kixk’ut naq naru nokok’anjelak chiru li Dios rik’in k’anjelak chiruheb’ li qas qiitz’in.

Mosiah 2:19–25

Chixjunileb’ li wosob’tesinkil nachal chaq rik’in lin Choxahil Yuwa’.

• Li rey aj Benjamin kik’anjelak chiru lix tenamit chi musiq’anb’il xb’aan lix b’antioxihom chiru li Dios. Chan ru taawaklesi xch’ooleb’ laa kok’al chi b’antioxink jo’ chanru a’an? Naru nekeril Mosiah 2:21 ut neketz’iib’aheb’ li osob’tesink k’eeb’il qe xb’aan li qaChoxahil Yuwa’. Naru ajwi’ nakatz’iib’a xkomoneb’ chik li osob’tesink li te’xk’oxla laa kok’al.

• Naru nekeb’aanu li b’atz’unk a’in re xtenq’ankileb’ laa kok’al chixk’eeb’al reetaleb’ li osob’tesink naxk’e li qaChoxahil Yuwa’. Laa kok’al naru neke’xnumsi chirib’ileb’ rib’ jun xjalam-uuch li Kolonel naq yooqeb’ chixb’ichankil malaj chirab’inkil jun b’ich chirix li b’antioxink (chi’ilmanq “B’antioxink” sa’ li tusleb’aal na’leb’ sa’ li B’ichleb’aal choq’ reheb’ li Kok’al). Kanab’omaq b’ichank malaj xaqab’omaq li b’ich chi kok’ aj xsa’, ut a’ yaal ani aj-ik’in nakana li jalam-uuch, a’an taa’aatinaq chirix li osob’tesihom li nab’antioxin wi’. Jo’ naxye sa’ Mosiah 2:22–24, chan ru naru naqak’ut naq naqab’antioxiheb’ li qosob’tesinkil.

Mosiah 3:5–10, 19

Li Jesukristo tinixtenq’a chi wulak joʼ chanru naq wan aʼan.

• Jun li anjel kixye re li rey aj Benjamin eb’ li na’leb’ aajeleb’ ru chirix lix yu’am ut lix k’anjel li Jesukristo. Naru nekesik’eb’ xjalam-uuch li kik’ulman sa’ Mosiah 3:5–10 (chi’ilmanq, jo’ eetalil, Hu reheb’ li Jalam-uuch re li Evangelio, 30, 41, 42, 57, 59). Naq yooqat chirilb’al Mosiah 3:5─10, laa kok’al naru neke’xtaqsi li ruq’eb’ naq te’rab’i k’a’ruhaq sa’eb’ li raqal li k’utb’il sa’eb’ li jalam-uuch.

• Ma xe’tenq’an jun sutaq laa kok’al chixk’uub’ankil junaq xtib’el wa rik’in rilb’al xtusulal chi tz’iib’anb’il? Naru nakat-aatinak chirix a’an ut nakawoksi Mosiah 3:19 re xyiib’ankil “xtusulal” chan ru wulak jo’ li Jesukristo. Chan ru nokoxtenq’a li Jesukristo chi wulak jo’ chanru a’an?

Re xtawb’al xkomon chik li na’leb’, chi’ilmanq li hu Amigos re li po a’in.

Lix yehom li rey aj Benjamin, xb’aan laj Jeremy Winborg