Sa’ xk’ab’a’ a’an
Xnawb’al ani ut k’a’ut naq nokok’anjelak chiruheb’ li qas qiitz’in nokoxtenq’a chixtawb’al ru naq li xnimal xk’utb’esinkil li rahok a’an xpaab’ankil li Dios.
Sa’ li q’ojyin a’in, ninye lin rahom ut lin b’antioxihom choq’ eere chi junjunqal, ex inraarookil komon ixq. A’ yaal jarub’ chihab’ wan qe, ut li na’ajej wanko wi’ malaj chan ru qawanjik, sa’ li q’ojyin a’in naqach’utub’ qib’ sa’ junajil, kawilal, ajom ut xnawom qach’ool chirix naq raarooko ut b’eresinb’ilo xb’aan li qaChoxahil Yuwa’, li qaKolonel, li Jesukristo, ut li qayo’yookil profeet, li Awa’b’ej Russell M. Nelson.
Naq ak’aq chaq qasumlajik, lin b’eelom ut laa’in koob’oqe’ xb’aan li qa’obiisp re taqula’ani ut taqatenq’a jun li junkab’al li ink’a’ neke’wulak sa’ li iglees chiru naab’al chihab’. Xqak’ulub’a li b’oqom rik’in chaab’il na’leb’ ut moqon xoowulak chirula’aninkileb’. Sa’ junpaat xqanaw naq a’aneb’ ink’a’ nek’eraj xk’ulb’al li rula’anihomeb’ li komon re li Iglees.
Jo’kan naq sa’ li jun chik ula’anink xqab’aanu reheb’ xqak’am jun sek’ li galleta, xqak’oxla naq li kok’ chocolaat wan chi sa’ te’xq’unob’resi xch’ooleb’. Moko kama’an ta kik’ulman. Li junkab’al kooratina chirix li okeb’aal, a’an kixk’e chiqanaw naq moko k’ulb’ilo ta aran. Naq koosutq’i sa’ li qochoch xqak’oxla chi saqen ru naq chaab’il raj xqab’aanu, wi xqayeechi’i raj reheb’ li kok’ galleta Rice Krispies.
Li ink’a’ naqil sa’ musiq’ej kixb’aanu naq li qab’aanuhom moko chaab’il ta na’el. Li tz’eqtaanaak maajaruj chaab’il ru. Sa’ xnumik li kutan xqayoob’ xpatz’b’al qib’, “K’a’ut naq naqab’aanu a’an? K’a’ru li naqaj rik’in a’an?
Li Elder Carl B. Cook kixye chaq a’in: “Li k’anjelak sa’ li Iglees maare ch’a’ajaq b’ayaq wi napatz’man qe xb’aanunkil k’a’ruhaq li tooxxeb’esi, malaj wi nokolub’ chi k’anjelak, malaj wi nokob’oqe’ xb’aanunkil k’a’ruhaq li ink’a’ naqataw xsahil sa’ xtiklajik.” Yooko chirilb’al li xyaalalil li raatin li Elder Cook naq xqak’oxla naq aajel ru taqasik’ junaq aj b’eresinel qe li nimaq chik li rilob’aal chi uub’ej chiru li naqil laa’o.
Jo’kan b’i’, chirix naab’al xtz’ilb’al rix ut tijok chi anchal qach’ool xqak’ul qasumenkil chirix k’a’ut naq nokok’anjelak. Kiwan jun jalaak sa’ li qak’a’uxl, jun xjalb’al qach’ool; relik chi yaal jun k’utb’esinb’il na’leb’.Sa’ xsik’b’al qab’eresinkil sa’eb’ li loq’laj hu, li Qaawa’ kixk’ut chiqu chan ru naq li k’anjelak chiruheb’ li qas qiitz’in moko ch’a’ajaq ta ut ch’olch’ooq ru. A’an a’in li raqal kiqil ru li kixjal qach’ool ut li qilom: “Taara li Qaawa’ laa Dios chi anchal aach’ool, ut chi anchal aametz’ew, aak’a’uxl, ut aakawilal; ut sa’ lix k’ab’a’ li Jesukristo tatk’anjelaq chiru.”Us ta ak naqanaw chaq ru chi us li raqal a’in, chanchan naq kooratina chi ak’ ru ut chi wan xwankil.
Kiqak’e reetal naq yooko chixyalb’al qaq’e chi anchal qach’ool re k’anjelak chiru li junkab’al a’an ut chiru ajwi’ li qa’obiisp, a’b’an tento naq xqapatz’ qib’ ma tz’aqal yooko chi k’anjelak chiruheb’ xb’aan naq naqara li Qaawa’. Li rey aj Benjamin kixch’olob’ ru lix jalanil a’in naq kixye, “K’ehomaq reetal, ninye eere naq rik’in naq kinye eere naq xinnumsi inkutan chi k’anjelak cheru, moko nawaj ta xnimankil wib’, xb’aan naq yal wanjenaqin chi k’anjelak chiru li Dios.”
Jo’kan b’i’, chi yaal naq, ani aj chi-u kik’anjelak li rey aj Benjamin? Chiru li qaChoxahil Yuwa’ ut chiru li Kolonel. Xnawb’al ani ut k’a’ut naqnokok’anjelak chiruheb’ li qas qiitz’in nokoxtenq’a chixtawb’al ru naq li xnimal xk’utb’esinkil li rahok a’an xpaab’ankil li Dios.
Chirix naq kijala li qilob’aal chi ka’ch’inaq, ke’jala ajwi’ li qatij. Kiqayo’oni chi anchal qach’ool rula’aninkileb’ li junkab’al a’an xb’aan naq naqara li Qaawa’. Yooko chixb’aanunkil sa’ xk’ab’a’ a’an. A’an kixb’aanu naq lix yalb’al qaq’e kijala. Chirix naq naab’al po nokokanab’aak chirix li ochoch, li junkab’al ke’xyoob’ qoksinkil. Chiru xnumik li hoonal, xqayoob’ tijok sa’ komonil ut aatinak chirix li evangelio. Kiqamiiwi qib’ chi tz’aqal maak’a’ ro’so’jik ru. Naq naqaraheb’ li ralal xk’ajol, yooko chaq chixloq’oninkil ut xraab’al ajwi’ a’an.
Ma jultik eere junaq hoonal naq rik’in rahok keeye’ lee ruq’ rik’in xmetz’ew eech’ol re xtenq’ankil junaq kiraj ru xtenq’ankil ut xereek’a naq lix yalb’al eeq’e moko k’eeb’il ta reetal malaj ink’a’ k’eeb’il xloq’al ut moko aatawal ta ru? Sa’ li hoonal a’an, ma xepatz’ sa’ eech’ool lix loq’al lee k’anjel? Wi kama’an, maare li raatin li rey aj Benjamin tixjal ru li nawiib’an ru eech’ool ut li narahob’tesin eere: “Xb’aan naq yal wanjenaqin chi k’anjelak chiru li Dios.”
Sa’ xna’aj xkab’lankil li raaxiik’, rik’in li k’anjelak chiru qas qiitz’in naru naqakab’la xjunajinkil qib’ chi tz’aqal re ru rik’in li qaChoxahil Yuwa’. Li xraab’al ut xpaab’ankil a’an, naxram ru li ratawankil k’ehe’k sa’ ajl malaj xk’ulb’al b’antioxihom, ut naxte xb’e lix rahom re naq taahoye’q choq’ qe ut qik’in laa’o.
Wan sut naq sa’ xtiklajik maare took’anjelaq xb’aan naq taqlanb’ilo malaj xb’aan naq teneb’anb’il sa’ qab’een xb’aanunkil, a’b’an naru naq li qak’anjel tixk’e junaq nim wi’chik ru na’leb’ sa’ qach’ool li tixb’aanu naq li k’anjel naqab’aanu a’anaq “jun li b’e jwal chaab’il wi’chik ru”—jo’ lix b’oqom li Awa’b’ej Nelson re “rilb’aleb’ li komon rik’in li wankil ut li wankilal k’eeb’il xb’aan li Dios.”
Naq naqak’e li qilob’aal sa’ chixjunil li xb’aanuhom li Dios choq’ qe, li qak’anjel nachal rik’in jun aamej li nab’antioxin. Naq naqakanab’ xk’oxlankil naq li qak’anjel tento tixnimob’resi qawankil, naqak’e reetal naq li rilob’aal li qak’anjel taawanq re xk’eeb’al li Dios sa’ xb’een chixjunil.
Li Awa’b’ej M. Russell Ballard kixk’ut, “Ka’ajwi’ naq taqara li Dios ut li Kristo chi anchal qach’ool, qak’a’uxl ut qakawilal, tooruuq chixwotzb’al li rahok a’an rik’ineb’ li qas qiitz’in rik’ineb’ chaab’il b’aanuhom re k’anjelak.”
Li xb’een re li lajeeb’ chi taqlahom naxjultika li loq’laj chaab’il na’leb’ a’in: “Laa’in li Qaawa’ ut laa Dios. … Miwan jalan chik aaDios chiwu laa’in.” Lix na’aj li taqlahom a’in nokoxtenq’a chixtawb’al ru naq,wi naqak’e a’an sa’ xb’een na’ajej, sa’ xraqik, chixjunil chik li k’a’aq re ru te’xtaw xna’aj, jo’kan ajwi’ li qak’anjel choq’ reheb’ li qas qiitz’in. Naq naqasik’ ru, xk’eeb’al a’an sa’ li xb’een na’ajej sa’ li qayu’am, a’an naru taarosob’tesi li qab’aanuhom choq’ re li qusilal ut choq’ re li rusilaleb’ li qas qiitz’in.
Li Qaawa’ kixk’e li na’leb’ a’in, “Chex’iloq wankin wi’ sa’ li junjunq eek’oxlahom.” Ut rajlal xamaan naqab’aanu li sumwank re xb’aanunkil a’an— “xjultikankil junelik.” Ma naru naq li choxahil ilob’aal a’an taa’oksimanq raj sa’ chixjunil li naqab’aanu? Ma naru naq jun ch’ina k’anjel taa’ok choq’ jun nimla k’anjel re xk’utb’al li qarahom ut li qapaab’aal chirix a’an? Nink’oxla naq naru, ut naq tixb’aanu a’an.
Naru taqab’aanu naq li junjunq chi na’leb’ taajalmanq ru choq’ jun na’leb’ re xloq’oninkil ru a’an. Naru taqab’aanu naq li junjunq chi na’leb’ taajalmanq ru choq’ jun na’leb’ re xloq’oninkil ru a’an.
Jo’ kixye laj Ammon, “Relik chi yaal, ninnaw naq laa’in maak’a’ nin’ok wi’; chirix inmetz’ew, q’unin; jo’kan naq moko injunes ta tinnima wib’; tinnima b’an wib’ rik’in lin Dios, xb’aan naq sa’ xmetz’ew a’an tinruuq chixb’aanunkil chixjunil li k’a’aq re ru.”
Naq li k’anjelak chiru li qaDios naxk’e rib’ sa’ xb’een na’ajej sa’ li qayu’am, nokosach, ut sa’ li xhoonalil naqataw wi’chik qib’.
Li Kolonel kixk’ut li na’leb’ a’in chi moko ch’a’aj ta ru: ”Chi jo’kan ut chekanab’ chi lemtz’unk lee saqen chiru li tenamit a’in, re te’ruuq chirilb’al eechaab’il k’anjel ut te’xnima xloq’al lee Yuwa’ li wan sa’ choxa.”
Tinwotz eerik’in junjunq li aatin re chaab’il na’leb’ li ke’tawman sa’ jun ochoch reheb’ li neb’a’ aran Calcuta, India: “Wi q’un aach’ool, maare li komon tate’xkaqali malaj te’xwiib’a ru xch’ool aawik’in. A’b’an q’unaq aach’ool junelik. Chiru jun q’ojyin maare anihaq tixjuk’ li xakab’la chiru k’iila chihab’. A’b’anan kab’lan junelik. Wulaj kab’ej li kristiaan taasachq sa’ xch’ooleb’ li chaab’il usilal xab’aanu anajwan. A’b’an chaab’il li taab’aanu juenlik. K’e re li ruchich’och’ chixjunil li chaab’il wan aawe, ut maare maajun wa tz’aqalaq. A’b’an k’e re li ruchich’och’ chixjunil li chaab’il wan aawe. Relik chi yaal, nakawil, a’an takanaaq rik’in li Dios ut aawik’in laa’at.”
Ex was wiitz’in ixq, junelik nakana qik’in laa’o ut rik’in li Qaawa’. Jo’ kixye li Awa’b’ej James E. Faust: ““K’a’ru xnimal rajom ru li ruchich’och’ sa’eb’ li kutan a’in?” … “Ma maawa’ tab’i’ a’an naq li junjunq chi kristiaan tixk’am rib’, chi kok’ aj xsa’, chi rajlal ut chi junelik rik’in li Kolonel?” Jun k’amok-ib’ chi kama’an naxloch xxamlel li choxahilal li wan qik’in, ut maak’a’ naru naxk’e reetalil chi nim ru sa’ li qayu’am li wulak chixnawb’al ut xtawb’al ru li qachoxahilal rik’in li Dios.”
Kama’an ajwi’ naq laj Alma kixch’olob’ re li ralal: “Hehe’, chixjunil li nakab’aanu chiwanq choq’ re li Qaawa’, ut a’ yaal b’ar nakatxik chiwanq rik’in li Qaawa’; relik chi yaal, ut chixjunil li nakak’oxla chib’eresiiq re li Qaawa’; relik chi yaal, ut chiwanq li reek’ahom aach’ool chi k’eeb’il rik’in li Qaawa’ chi junelik q’e kutan.”
Jo’ li na’leb’ a’an, li Awa’b’ej Russell M. Nelson xk’ut chiqu, “Naq naqataw ru li xtojb’al rix li qamaak xb’aan li Jesukristo, chixjunil li naqeek’a’ chirix li naqamayeja namuqe’ ru xb’aan li xchamal b’antioxink, xb’aan li qahoonal re k’anjelak chiru a’an.”
Ex was wiitz’in ixq, ninye lix nawom inch’ool chirix naq li Jesukristo, rik’in chixjunil lix wankil lix tojb’al rix li maak kixb’aanu, nak’anjelaksa’ qab’een laa’o ut sa’ qach’ool, a’an naxyoob’ k’anjelak qik’in laa’o re rosob’tesinkileb’ li qas qiitz’in. Laa’o nokok’anjelak chiruheb’ a’an, a’b’an naqab’aanu sa’ xraab’al ut k’anjelak chiru a’an. Nokowulak jo’ li naxye li Santil Hu: “Yooq chixsik’b’al xchaab’ilal li ras riitz’in, ut chixb’aanunkil chixjunil li k’a’aq re ru chi junaj ru lix sa’ li ru sa’ lix loq’al li Dios.”
Maare kixnaw chaq li qa’obiisp naq li na’leb’ a’an tento taqatzol wochb’een lin b’eelom chirix li xyalb’al qaq’e rik’in chi anchal qach’ool, us ta ink’a’ tz’aqal re ru, chirix rilb’aleb’ li ralal xk’ajol raarookeb’ xb’aan a’an. Ninye lix nawom inch’ool li tz’aqal ninnaw chirix lix chaab’ilal ut lix rahom li naxwotz qik’in, jo’ chanru naqayal qaq’e chi k’anjelak chiru a’an. Sa’ xloq’laj k’ab’a’ li Jesukristo , amen