Jalok ch’oolej li cham ut li nakana chirix li qaChoxahil Yuwa’ ut li Qaawa’ Jesukristo
Li qajayalihom, a’an xk’eeb’al chi ka’pak’al li na’ux sa’ li Iglees ut li na’ux sa’ li ochoch, re naq taanimanq li paab’aal, li musiq’ejil wank, ut li jalok ch’oolej.
Jo’ toja’ xye li Awa’b’ej Russell M. Nelson rik’in chaq’al ruhil aatin, chiru naab’al kutan eb’ laj b’eresinel sa’ li Iglees yookeb’ chi k’anjelak chirix “jun k’uub’anb’il na’leb’ b’aanunb’ilaq sa’ li ochoch ut tenq’anb’ilaq sa’ li Iglees re xtzolb’al li tzol’leb’, xkawob’resinkil li paab’aal, ut xnimankil li loq’onink sa’ junesal.” Chirix a’an li Awa’b’ej Nelson xye resil jun jalok re “taawanq chi ka’pak’al li k’utuk chirix li evangelio, sa’ li ochoch ut sa’ li Iglees.”
Re xk’eeb’al chi uxmank li ajom a’in—ch’olob’anb’il ut b’eresinb’il xb’aan li Awa’b’ej Russell M. Nelson, ut k’ulub’anb’il xb’aan lix Ch’utameb’ li Xb’eenil Awa’b’ejil ut lix Molameb’ li Kab’laju chi Apostol—taajalmanq xtusulaleb’ li ch’utam re domingo jo’ tinye anajwan, ut taatiklaaq li jalok a’in sa’ enero 2019.
Eb’ li ch’utam re li Iglees sa’ domingo
Sa’eb’ li ch’utam re li Iglees sa’ domingo, taawanq jun ch’utam re li loq’laj wa’ak, 60 minuut xnajtil, rajlal domingo, li jayalinb’ilaq rik’in li Kolonel, li k’ojob’anb’il k’anjel re li loq’laj wa’ak, ut li musiq’ejil esil. Chirix b’ayaq li hoonal re xik sa’eb’ li tzoleb’aal, eb’ li komon re li Iglees te’wanq sa’ jun tzoleb’aal, 50 minuut xnajtil, li taajalmanq rajlal domingo:
-
Taawanq li Dominkil Tzoleb’aal sa’ li xb’een ut li rox domingo re li po.
-
Te’wanq li ch’utam reheb’ li molam re li tijonelil, re li Komonil re Tenq’ank, ut reheb’ li Saaj Ixq sa’ li xkab’ ut li xkaa domingo.
-
Eb’ li ch’utam sa’ li ro’ domingo te’wanq chi b’eresinb’il xb’aan li obiisp.
Taa’uxmanq li Tzoleb’aal reheb’ li Kok’al rajlal xamaan chiru li 50 minuut a’in, ut taawanq xhoonal li b’ichank jo’ ajwi’ eb’ li tzoleb’aal.
Sa’ xk’oxlankil lix tusulaleb’ li ch’utam sa’eb’ li domingo, eb’ laj b’eresinel li neke’jolomink re li Iglees chiru naab’al chihab’ xe’xk’e reetal naq choq’ re junjunq reheb’ li qaraarookil komon, ch’a’aj naq wan li ch’utam chiru oxib oor sa’ domingo. Mas wi’chik na’ilman a’in rik’ineb’ li na’b’ej yuwa’b’ej li wankeb’ xkok’al toj ka’ch’ineb’ xyu’am, eb’ li kok’al sa’ li Tzoleb’aal reheb’ li Kok’al, eb’ li tiix, eb’ li toja’ xe’ok sa’ li Iglees, ut wankeb’ chik.
A’b’anan mas wi’chik li yoo chi jalmank chiru yal xk’osb’al ru lix tusulaleb li ch’utam sa’ domingo. Li Awa’b’ej Nelson ak xb’antioxi li nimla k’anjel li xb’aanuman rik’in naq tiikex chixpaab’ankil li b’oqb’ilex chaq chixb’aanunkil junxil. A’an, ut chixjunileb’ laj b’eresinel sa’ li Iglees, neke’raj xk’amb’al chik li sahil ch’oolejil re li evangelio rik’ineb’ li na’b’ej yuwa’b’ej, li kok’al, eb’ li saaj, eb’ li moko sumsuukeb’ ta, li tiixeb’, li toja’ xe’ok, ut eb’ li yookeb’ chi tzole’k xb’aaneb’ li misioneer, rik’in jun li k’anjel li wan chi ka’pak’al, li taab’aanumanq sa’ ochoch ut li tenq’anb’ilaq xb’aan li Iglees. A’an a’in junjunq lix yaalalil ut li osob’tesink li taachalq rik’in a’in, ut rik’in jalaneb’ chik li jalok li toja’ xe’b’aanuman:
-
Xchamob’resinkil li jalok ch’oolej chirix li qaChoxahil Yuwa’ ut li Qaawa’ Jesukristo, ut xnimob’resinkil li paab’aal chirixeb’ a’an.
-
Xkawob’resinkileb’ li komon ut li junkab’al rik’in jun xtusulal li tzolok li b’aanunb’il sa’ li ochoch ut tenq’anb’il xb’aan li Iglees, li naxk’am chaq li sahil ch’oolejil xb’aan xyu’aminkil li evangelio.
-
Roxloq’inkil li hilob’aal kutan, rik’in xjayalinkil qib’ rik’in li k’ojob’anb’il k’anjel re li loq’laj wa’ak.
-
Xtenq’ankil chixjunileb’ li ralal xk’ajol li qaChoxahil Yuwa’, li yo’yookeb’ ut li kamenaqeb’, rik’in li k’anjel re jultikank aatin, ut rik’in xk’ulb’aleb’ li k’ojob’anb’il k’anjel ut li eb’ li sumwank re li santil ochoch.
Xtzolb’al li evangelio, jayalinb’il sa’ li ochoch, tenq’anb’il xb’aan li Iglees
Li tusul hoonal a’in re domingo naxkanab’ li hoonal choq’ re li q’ojyin re junkab’al, ut re xtzolb’al li evangelio sa’ kab’l sa’ domingo, malaj sa’ jalaneb’ chik li hoonal jo’ te’xsik’ ru li komon ut li junkab’al. Taaruuq raj taab’aanumanq jun hoonal re xb’aanunkil kok’ k’anjel sa’ junkab’al sa’ li lunes, malaj sa’ jalan chik kutan. Chi jo’kan, eb’ laj b’eresinel tento naq toj te’xkanab’ li lunes ewu chi yamyo, chi maak’a’ li ch’utam ut li k’anjel re li Iglees. A’ut tento xk’uub’ankil li hoonal choq’ re li q’ojyin re junkab’al, re xtzolb’al li evangelio, ut xkomon chik li kok’ k’anjel choq’ reheb’ li komon ut li junkab’al, a’ yaal chan ru neke’raj ru.
Li tzolok sa’ kab’l sa’ junesal ut sa’ junkab’al, k’a’jo’ naq taawanq chi tenq’anb’il xb’aan jun li ak’ tusulal re tzolok, ut jun li ak’ k’anjeleb’aal, Kim, Taaqehin, choq’ reheb’ li komon ut li junkab’al, li naxk’am rib’ rik’in li k’a’ru yoo chi k’utmank sa’ li Dominkil Tzoleb’aal ut sa’ li Tzoleb’aal reheb’ li Kok’al. Sa’ enero, eb’ li saaj komon re li Iglees, ut eb’ li tzoleb’aal sa’ li Dominkil Tzoleb’aal ut li Tzoleb’aal reheb’ li Kok’al, yooqeb’ chixtzolb’al li Ak’ Chaq’rab’. Li ak’ k’anjeleb’aal, Kim, Taaqehin, choq’ reheb’ li komon ut li junkab’al—li jo’kan ajwi’ taak’utuq chirix li Ak’ Chaq’rab’—yiib’anb’il re xtenq’ankileb’ li komon chixtzolb’al li evangelio sa’ kab’l. Li hu naxye, “Li hu a’in, a’an choq’ reheb’ chixjunil li komon ut li junkab’al sa’ li Iglees. Yiib’anb’il re qatenq’ankil chixtzolb’al li evangelio—maak’a’ naxye wi qajunes malaj rik’in qajunkab’al. … Li tusulal sa’ li ak’ k’anjeleb’aal a’in wan chi yiib’anb’il re roksinkil rajlal xamaan.”
Eb’ li ak’ tzolok re Kim, Taaqehin, choq’ reheb’ li kok’al, li taa’oksimanq sa’ li Iglees, tixk’am rib’ rik’in li tusulal re rajlal xamaan. Li tzolok sa’ li Dominkil Tzoleb’aal sa’ li xb’een ut rox domingo taawanq chi k’uub’anb’il re tixk’am rib’ rik’in li ak’ hu, Kim, Taaqehin, choq’ re li ochoch. Sa’ li xkab’ ut xkaa domingo, eb’ li ninqi komon sa’ li Tijonelil ut sa’ li Komonil re Tenq’ank toj te’xtzol li raatineb’ laj b’eresinel re li Iglees, ut mas wi’chik li raatineb’ li qaprofeet sa’eb’ li kutan a’in. Eb’ li saaj ixq ut li saaj winq sa’ li Tijonelil re Aaron te’xtzoleb’ li na’leb’ chirix li evangelio sa’eb’ li domingo a’an.
Li ak k’anjeleb’aal re tzolok sa’ kab’l naxk’e “li na’leb’ re xtzolb’aleb’ li loq’laj hu ut choq’ re li q’ojyin re junkab’al.” Sa’ li tusulal re rajlal xamaan wankeb’ li na’leb’ re tzolok ut li kok’ k’anjel choq’ reheb’ li komon ut li junkab’al. Sa’ li hu Kim, Taaqehin, choq’ reheb’ li komon ut li junkab’al, wankeb’ naab’al li jalam-uuch li te’tenq’anq re li tzolok sa’ junesal ut sa’ junkab’al, ut mas wi’chik choq’ reheb’ li kok’al. Li ak’ k’anjeleb’aal a’in taak’eemanq re li junjunq kab’al chiru diciembre re li chihab’ a’in.
Li Awa’b’ej Nelson, chalen chaq naq x’aatinak xb’een wa reheb’ li komon sa’ li Iglees sa’ enero, xwaklesi qach’ool re taqakawresi qib’ choq’ re li xkab’ xk’ulunik li Jesukristo, rik’in b’eek sa’ xb’ehil li sumwank.
Sa’ xk’ab’a’ li yoo chi ilmank sa’ li ruchich’och’, aajel ru xnimankil lix jalajik qach’ool ut xkawob’resinkil li paab’aal chirix li qaChoxahil Yuwa’ ut chirix li Jesukristo ut lix tojb’al rix li maak xb’aan a’an. Li Qaawa’ xooxkawresi “chi junjunqal li raqal” choq’ re li xuwajel kutan li wanko wi’ anajwan. Sa’eb’ li chihab’ li toja’ xe’nume’, li Qaawa’ xooxb’eresi chi aatinak chirix li xninqal ru na’leb’ jo’ a’in:
-
Roxloq’inkil li hilob’aal kutan, ut li loq’laj k’ojob’anb’il k’anjel re li loq’laj wa’ak, li yooko chaq chixk’eeb’al xwankil chiru oxib’ chihab’.
-
Chi b’eresinb’il xb’aan li obiisp, eb’ lix molameb’ li xb’eenil ut eb’ li Komonil re Tenq’ank li kawob’resinb’ileb’, wankeb’ chi jayalinb’il sa’ li rajom ut lix choxahil teneb’ankil li Iglees, ut yookeb’ chixtenq’ankileb’ li komon chi ok sa’eb’ li loq’laj sumwank ut chixpaab’ankileb’.
-
Li ilok komon chi “sant wi’chik ut taqenaq wi’chik” yoo chi b’aanumank rik’in sahil ch’oolejil.
-
Naq naqatikib’ qak’anjel chi wan roso’jik chiqu, eb’ li sumwank re li santil ochoch ut li k’anjel re xsik’b’al resil li qaxe’ qatoon wankeb’ chik choq’ jun raqal aajel ru re lix b’ehil li sumwank.
Li jalok li xyeeman resil sa’ li eq’la a’in a’an ajwi’ jun k’amok b’e choq’ reheb’ li ch’a’ajkilal re li kutan wanko wi’.
Sa’ li tzolok na’ux sa’ li Iglees, junelik wanjenaq chi k’eeb’il xwankil li Dominkil Tzoleb’aal. Naqanaw naq wi chaab’il li k’utuk ut wi kawresinb’ileb’ li komon sa’ li tzoleb’aal, usaq wi’chik li taqak’ul sa’ li iglees sa’ domingo. Noko’osob’tesiik rik’in naq chi kok’ aj xsa’, li Musiq’ej naxnimob’resi ut naxkawob’resi li jalok ch’oolej sa’ li Iglees.
Li ak’ tzolok li b’aanunb’il sa’ kab’l ut tenq’anb’il sa’ li Iglees, tento naq tixchaab’ilob’resi lix k’anjel li paab’aal ut li k’a’ru na’uxman sa’ li junkab’al, jo’ ajwi’ lix k’anjel li paab’aal ut li k’a’ru na’uxman sa’ junesal. Naqanaw lix nimal li musiq’ej ut xnimal li jalok ch’oolej li naru natawman sa’ li ochoch. Naab’al chihab’ chaq xb’aanuman jun tz’ilok-ix, ut xtawman naq choq’ reheb’ li saaj winq ut saaj ixq, nachal lix wankil li Santil Musiq’ej naq na’ux xtzolb’aleb’ li loq’laj hu ut li tijok sa’ li ochoch. Li qajayalihom, a’an xk’eeb’al chi ka’pak’al li na’ux sa’ li Iglees ut li na’ux sa’ li ochoch, re naq taanimanq li paab’aal ut li musiq’ejil wank ut li jalok ch’oolej chirix li qaChoxahil Yuwa’ ut li Qaawa’ Jesukristo.
Sa’ li jun raqal re li jalok a’in li b’aanunb’il sa’ kab’l ut li tenq’anb’il sa’ li Iglees, li junjunq komon ut junkab’al naru tixk’uub’ xna’leb’ rik’in tijok chirix chan ru ut jo’q’e taab’aanumanq. Qayehaq, us ta a’in k’a’jo’ naq taarosob’tesiheb’ chixjunil li junkab’al, a’ yaal jo’ li na’ajman ru sa’ li junjunq na’ajej, usaq ajwi’ choq’ reheb’ li saaj winq ut ixq moko sumsuukeb’ ta, eb’ li na’b’ej malaj yuwa’b’ej li maak’a’eb’ xsum, eb’ li junkab’al b’ar wi’ moko chixjunileb’ ta komoneb’, eb’ li ak’ komon, ut xkomoneb’ chik, naq te’xch’utub’ rib’, ink’a’ ka’ajwi’ sa’eb’ li ch’utam re domingo, re te’wanq sa’ komonil sa’ li evangelio, ut re te’wanq chi kawob’resinb’ileb’ rik’in xtzolb’al sa’ komonil li hu chirix li taab’aanumanq sa’ kab’l chi tenq’anb’il sa’ li Iglees. Chixjunil li ani naraj naru chixb’aanunkil chi jo’kan.
Sa’ naab’al chi na’ajej re li ruchich’och’, wankeb’ li komon li neke’xsik’ ru kanaak sa’ li ch’utleb’aal kab’l naq xe’yaalo’ li ch’utam re domingo, re te’wanq sa’ komonil. Maak’a’ wan sa’ li jalok a’in li yeeb’il resil anajwan li taaramoq reheb’ chixb’aanunkil li chaab’il na’leb’ a’in.
Re xtenq’ankileb’ li komon chixkawresinkil rib’ choq’ re li hilob’aal kutan, wankeb’ li teep li neke’xtaqla jun correo electronico, jun texto, malaj jun esil sa’ redes sociales chiru li xamaan. Rik’in li jalok yoo chi uxmank, naqak’oxla naq q’axal us xtaqlankil li esil chi jo’kan. Li esil a’in naru chixjultikankil reheb’ li komon k’a’ru xtusulal li ch’utam choq’ re li xamaan a’an, k’a’ru li tzolok taak’utmanq, ut tixtenq’aheb’ chi aatinak chirix li evangelio sa’ kab’l. Jo’kan ajwi’, sa’eb’ li ch’utam re domingo choq’ reheb’ li ninqi komon, taak’eemanq li na’leb’ re naq li tzolok sa’ Iglees tixk’am rib’ rik’in li tzolok sa’ kab’l rajlal xamaan.
Tento taa’uxq li ch’utam re li loq’laj wa’ak ut li tzoleb’aal rik’in naab’al li tijok, re naq taak’eemanq xwankil li musiq’ejil na’leb’ ut ink’a’ yal li k’anjel re jolomink. Jo’ jun eetalil, eb’ li esil chirix li k’a’ru taab’aanumanq sa’ li teep naru chi taqlamank chiru li xamaan, malaj taajek’imanq sa’ jun li hu. Sa’ li ch’utam re li loq’laj wa’ak tento taawanq li tijok sa’ xtiklajik ut sa’ roso’jik, a’ut sa’ li xkab’ ch’utam, ka’ajwi’ na’ajman ru li tijok sa’ roso’jik.
Jo’ ak xyeeman, li ak’ tusulal re domingo ink’a’ taatiklaaq toj enero re 2019. K’iila paay k’a’ut naq taawanq chi jo’kan. Li wiib’ li mas aajel ru a’aneb’, xb’een, re taawanq hoonal re xjek’inkil li hu Kim, Taaqehin, choq’ reheb’ li komon ut li junkab’al, ut xkab’, re xk’eeb’al xhoonaleb’ li awa’b’ej re oqech ut eb’ li obiisp re xtuqub’ankil lix tusulaleb’ li ch’utam re naq lix k’ihaleb’ li teep te’ruuq chi ch’utlaak chi ink’a’ ewu sa’ li kutan.
Naq eb’ laj b’eresinel yookeb’ chaq chixsik’b’al li k’utb’esinb’il na’leb’, li k’a’ru xe’xk’ul sa’eb’ li chihab’ a’in, a’an xk’eeb’al xkawilal li ch’utam re li loq’laj wa’ak, roxloq’inkil li hilob’aal kutan, ut xwaklesinkileb’ xch’ool ut xtenq’ankileb’ li na’b’ej yuwa’b’ej ut eb’ li komon re naq li rochocheb’ te’wanq choq’ xna’aj li musiq’ejil kawilal ut xnimal li paab’aal—jun na’ajej re nimla sahil ch’oolejil.
Eb’ li osob’tesink k’a’jo’ xchaab’ilaleb’
K’a’ru xyaalalileb’ li jalok a’in choq’ reheb’ li komon sa’ Lix Iglees li Jesukristo reheb’ laj Santil Paab’anel sa’ Roso’jikeb’ li Kutan? Naqeek’a naq eb’ li komon k’a’jo’ naq te’osob’tesiiq. Li domingo naru nawan choq’ jun kutan re xtzolb’al ut xk’utb’al li evangelio sa’ li iglees ut sa’ li ochoch. Naq eb’ li komon ut li junkab’al neke’ok chi ch’utlaak sa’ junkab’al, chixsik’b’al resil lix xe’toonal, chixb’aanunkil li k’anjel re ilok komon, chi k’anjelak chiruheb’ li ras riitz’in, chi loq’onink sa’ junesal, ut chi saho’k xch’ooleb’ sa’ junkab’al, li hilob’aal kutan taawanq chi yaal choq’ jun sahil ch’oolejil.
Jun li junkab’al sa’ Brazil wankeb’ choq’ komon sa’ jun oqech b’ar wi’ xyale’ rix li ak’ hu choq’ re li ochoch, Kim, Taaqehin. Li yuwa’b’ej, aj Fernando xk’ab’a, wanjenaq sa’ jun mision, ut rochb’een li xNancy li rixaqil yoo chixk’iresinkil kaahib’ li kok’al, ut a’an xye, “Naq xe’xtikib’ li k’anjel re Kim, Taaqehin sa’ li qa’oqech, k’a’jo’ naq xsaho’ inch’ool, ut xink’oxla, “taajalmanq chan ru naq naqatzoleb’ li loq’laj hu sa’ kab’l.” Xk’ulman chi yaal sa’ li qochoch, ut jo’ aj b’eresinel sa’ li Iglees, wilom naq xk’ulman sa’ jalaneb’ chik li ochoch. … Nokoxtenq’a chi aatinak chirixeb’ li loq’laj hu sa’ li qochoch. Li wixaqil ut laa’in xchamo’ li qanawom chirix li k’a’ru yoo chi k’utmank. … nokoxtenq’a … chixnimob’resinkil li qanawom chirix li evangelio, ut chixnimankil li qapaab’aal ut lix nawom qach’ool. … Ninch’olob’ xyaalal … naq ninnaw naq musiq’anb’il xb’aan li Qaawa’ re naq rik’in xtzolb’aleb’ li na’leb’ ut li tzol’leb’ sa’eb’ li loq’laj hu, taachalq chik li paab’aal, lix nawom ch’oolej, ut li saqen sa’eb’ li junkab’al … us ta li ruchich’och’ q’axal t’anenaq.”
Naq xqayal rix a’in sa’eb’ li oqech chiru chixjunil li ruchich’och’, k’a’jo’ naq xwulak chiruheb’ li ak’ hu choq’ re li ochoch, Kim, Taaqehin. Wankeb’ naab’al li xe’xye naq ruuchil yal rilb’aleb’ ru li loq’laj hu, yookeb’ chik chixtz’ilb’aleb’ rix. Xk’eeman ajwi’ reetal naq xnimob’resi li paab’aal, ut naq chaab’il li xb’aanu choq’ reheb’ li teep.
Li jalok ch’oolej li cham ut li taakanaaq
Li rajb’al li jalok a’in, a’an re taa’uxq li jalok ch’oolej li cham ut li taakanaaq, reheb’ li ak ninqeb’ ut reheb’ li toj yookeb’ chi ninqanq. Li xb’een perel re li hu choq’ reheb’ li komon ut li junkab’al naxye, “Li na’ajman ru sa’ chixjunil li tzolok ut li k’utuk li na’uxman sa’ li evangelio, a’an xnimob’resinkil lix jalajik qach’ool, ut qatenq’ankil chi wank chi mas wi’chik jo’ li Jesukristo. … A’in naraj naxye xkanab’ankil qib’ chiru li Kristo re tixjal li qaam.” Na’ajman naq “ink’a’ ka’ajwi’ na’uxman sa’ li tzoleb’aal, a’b’an sa’ rochoch ut sa’ xch’ool junaq. Na’ajman ru naq taqayal qaq’e chi rajlal wulaj wulaj re xtawb’al ru ut xyu’aminkil li evangelio. Re taa’uxq li tz’aqal jalok ch’oolej, na’ajman ru lix wankil li Santil Musiq’ej.”
Li jayalihom aajel ru, ut li osob’tesink q’axal nim li na’ux xb’aan li jalok ch’oolej li cham ut li nakana, a’an xk’ulb’al chi tiik qach’ool eb’ li sumwank ut li k’ojob’anb’il k’anjel re lix b’ehil li sumwank.
Texqakanab’ chixk’uub’ankil eena’leb’ sa’ komonil ut chixsik’b’al li k’utb’esinb’il na’leb’ re xk’anjelankil li jalok a’in—chi ink’a’ teeq’ax ru li aajel raj ru xsik’b’al, ut chi ink’a’ teemin ru li te’xb’aanu li komon ut li junkab’al. Taawotzmanq chik li na’leb’ sa’eb’ li kutan chalel, ut taawanq jun li hu te’xtaqla li Xb’eenil Awa’b’ejil, rik’in jun li ch’olob’ank.
Ninch’olob’ cheru naq sa’ xk’uub’ankil qana’leb’ sa’ komonil lix Ch’utam li Xb’eenil Awa’b’ejil ut lix Molameb’ li Kab’laju chi Apostol sa’ li santil ochoch, ut chirix naq li qaraarookil profeet xtz’aama k’utb’esinb’il na’leb’ rik’in li Qaawa’ re taaxik chi uub’ej rik’in li jalok a’in, jun nimla musiq’aak x’eek’aman sa’ komonil. Laj Russell M. Nelson a’an li qayo’yookil awa’b’ej ut profeet. Li k’a’ru xch’olob’aman anajwan tixk’am li ninqi osob’tesink choq’ reheb’ li neke’k’ulub’ank re li jalok chi anchaleb’ xch’ool ut neke’xsik’ lix b’eresihom li Santil Musiq’ej. Q’axal wi’chik naq toonach’o’q rik’in li qaChoxahil Yuwa’ ut li Qaawa’ ut Kolonel Jesukristo, li ninch’olob’ xyaalal chi xaqxo inch’ool. Sa’ lix k’ab’a’ li Jesukristo, amen.