Eb’ li ixq ut xtzolb’al li evangelio sa’ li ochoch
Li Kolonel wan choq’ tz’aqal reetalil chan ru textz’aqonq sa’ lix k’anjel a’an re xkawob’resinkil li xtzolb’al li evangelio sa’ li ochoch.
Ex inraarookil komon ixq, jwal ch’ina-us li ch’utlaak eerik’in. A’an a’in jun hoonal q’axal chaab’il sa’ Lix Iglees li Jesukristo reheb’ laj Santil Paab’anel sa’ Roso’jikeb’ li Kutan. Li Qaawa’ yoo chixhoyb’al li nawom sa’ xb’een lix Iglees jo’ kixyeechi’i naq tixb’aanu.
Najultiko’ eere li kixye a’an: “Toj joʼqʼe naru nawan chi tzʼaj lix haʼil li roq haʼ li nabʼeek? Kʼaʼru chi wankilal naru chi ramok ru li choxa? Joʼ chanru ta naq junaq winq tixyeʼ xkaʼchʼinal lix tel re xrambʼal li nimaʼ Missouri saʼ lix bʼe li taqlanbʼil, malaj chixsutqʼisinkil chi qʼajel-ix, joʼkanaq xwankil chixrambʼal li Nimajwal saʼ xhoybʼal li naʼlebʼ chalen chaq saʼ choxa saʼ xbʼeen lix jolomebʼ laj Santil Paabʼanel saʼ Rosoʼjikebʼ li Kutan.”
Jun xcha’alil li xwotzb’al lix nawom yoo chixb’aanunkil li Qaawa’ anajwan wan rilom rik’in xseeb’ankil li xhoyb’al li junelik yaal naxb’aanu sa’ xb’een xjolomeb’ ut sa’ raameb’ lix tenamit. A’an kixye chi saqen ru naq eb’ lix rab’in li qaChoxahil Yuwa’ te’wanq lix aajel ruhil k’anjel sa’ li sachb’a-ch’oolejil seeb’ank a’an. Jun xyaalalil li sachb’a-ch’oolej, a’an naq yoo chixb’eresinkil lix yo’yookil profeet chixka’jultikankil li xtzolb’al li evangelio sa’ ochoch ut sa’ junkab’al.
Maare teepatz’, “Chan ru naq a’an naxk’eheb’ li ixq chi wank jo’ xninq’al ru aj k’anjel re xtenq’ankil li Qaawa’ chixhoyb’al li nawom sa’ xb’eeneb’ lix santil paab’anel?” Li Qaawa’ naxsume a’in sa’ “Li Junkab’al: Jun Jek’inb’il Aatin choq’ re li Ruchich’och’.” Najultiko’ eere li raatinul, a’b’an maare teetaw ru chi ak’il ut taak’e reetal naq li Qaawa’ kirileb’ chi rub’elaj li chaab’il jalok a’in, li yookeb’ chi k’ulmank anajwan. Sa’ li jek’inb’il aatin, kixchaq’rab’iheb’ li ixq chi wank jo’ li xb’eenil aj k’utul re li evangelio sa’ li junkab’al rik’in li aatin a’in: “Eb’ li na’b’ej teneb’anb’il xb’een wa sa’ xb’eeneb’ lix k’iresinkileb’ li ralal xk’ajol.” Jun raqal re a’in, a’an xch’olaninkil li yaalil na’leb’ ut li nawom re li evangelio.
Li jek’inb’il aatin naxye ajwi’: “Eb’ li na’b’ej ut yuwa’b’ej, jo’ rochb’eeneb’ rib’ chi junaqikeb’ xwankil, tento sa’ xb’eeneb’ xtenq’ankil rib’ chirib’ileb’ rib’.” Rochb’eeneb’ rib’ chi junaqikeb’ xwankil, ut juntaq’eet lix wankilaleb’ chi k’iik sa’ musiq’ej ut chixnimob’resinkil xnawomeb’, jo’kan naq neke’junajiik naq neke’xtenq’a rib’. Junaqikeb’ xwankil sa’ lix choxahil eechanihomeb’ re te’taqsiiq xloq’al sa’ wiib’al. Relik chi yaal, ink’a’ naru te’taqsiiq xloq’al li winq chi moko li ixq sa’ junesal.
Chi jo’kan, sa’ jun sumal b’ar wi’ junajinb’ileb’ ut junaqikeb’ xwankil, k’a’ut naq k’eeb’il re jun xrab’in li Dios li xb’eenil teneb’ank chi ch’olanink rik’in li k’a’ru q’axal aajel ru tento taqak’ul chiqajunil, jun qanawom chirix li yaal nachal chaq sa’ choxa? A’ yaal li naru nawil laa’in, a’an xb’aanuhom li Qaawa’ chalen chaq lix yo’ob’tesinkil li junkab’al sa’ li ruchich’och’ a’in.
Relik chi yaal, a’an li xEva li kixk’ul li nawom naq laj Adan tento tixyal li ru li che’ re xnawb’al ru li us ut li ink’a’ us re naq te’xpaab’ chixjunileb’ lix taqlahom li Dios ut te’xtikib’ jun li junkab’al. Ink’a’ ninnaw k’a’ut naq kichal xb’een wa re li xEva, a’b’an junajinb’ileb’ chi tz’aqal laj Adan ut li xEva naq li nawom kihoye’ sa’ xb’een laj Adan.
Jun chik reetalil naq li Qaawa’ kiroksi lix maataneb’ li ixq chi ch’olanink, a’an naq kixkawob’resiheb’ li ralal laj Helaman. Haye’ ninyaab’ak naq nawil ru li esil a’an ut najultiko’ we lix q’unil aatin lin na’ chixk’ojob’ankil inch’ool naq xik we chi k’anjelak sa’ lix ch’uuteb’ aj pleet.
Laj Helaman kixtz’iib’a:
“Keʼtzoleʼ chaq xbʼaanebʼ lix naʼ, naq wi inkʼaʼ nekeʼwiibʼan xchʼool, li Dios tixkolebʼ.
“Ut keʼxnumsi chiwu li raatinebʼ lix naʼebʼ, keʼxye: Moko nawiibʼan ta qachʼool naq keʼxnaw li qanaʼ.”
Us ta ink’a’ ninnaw chi tz’aqal k’a’ut naq li Qaawa’ kixk’e reheb’ li ixq li xb’eenil teneb’ank re xch’olaninkil li junkab’al, nink’oxla naq kixb’aanu chi jo’kan xb’aan naq nim lee seeb’al chi rahok. Na’ajman ru li nimla rahok re reek’ankil li naraj ru anihaq chik xb’een wa chiru li nakawaj ru laa’at. A’an lix tz’aqal rahom li Kristo choq’ re li ani nakatk’anjelak wi’. Li eek’ahom re tz’aqal rahok nachal naq li ani sik’b’il ru chi ch’olanink k’ulub’ej chixk’ulb’al lix wankil lix tojb’al rix li maak xb’aan li Jesukristo. Lix jolomil na’leb’ li Komonil re Tenq’ank, li kixyu’ami lin na’ laa’in, a’an jun musiq’anb’il ch’ol aatin: “Li rahok maajo’q’e na’oso’.”
Jo’ xrab’inex li Dios, wan jun xnimal ru eeseeb’al chixk’eeb’al reetal li naraj ru lee ras eeriitz’in ut chi rahok. Xb’aan a’an naq sa’ junpaat nekexru chixk’ulb’al lix hasb’ li Musiq’ej. Li Musiq’ej naru tixb’eresi li nekek’oxla, li nekeye, ut li nekeb’aanu re xch’olaninkileb’ lee ras eeriitz’in re naq li Qaawa’ taaruuq tixhoy sa’ xb’eeneb’ li nawom, li yaal, ut li kawil ch’oolej.
Jalan jalanq li wankex wi’ sa’ lee yu’am li junjunq eere li yookex chirab’inkil xyaab’ inkux. Wankeb’ li xqa’al li yookeb’ chi tz’aqonk xb’een sut sa’ li jolomil ch’utam reheb’ li ixq. Wankeb’ li saaj ixq li yookeb’ chixkawresinkil rib’ chi wank choq’ aj ch’olaninel jo’ naraj li Dios. Wankeb’ li toje’ xe’sumla ut maji’ wankeb’ xk’ok’al, ut wankeb’ chik li saaj na’b’ej li wan jun malaj wiib’ oxib’ lix kok’al. Wankeb’ li na’b’ej li wan xkok’aleb’ ak ninqeb’ ut wankeb’ chik li na’b’ej wan lix kok’al sa’ mision. Wankeb’ li na’b’ej li wan xkok’aleb’ li xe’laj sa’ xpaab’aaleb’ ut najt wankeb’ rik’in li rochocheb’. Wankeb’ ajwi’ xjunes wankeb’ ut maak’a’ junaq xtiikil ochb’een. Wankeb’ ajwi’ li na’chinb’ej.
A’ut, maak’a’ naxye li wankex wi’, okenaqex—ut aajel eeru—sa’ lix junkab’al li Dios ut sa’ tz’aqal lee junkab’al laa’ex, maare sa’ jun kutan chalel, sa’ li ruchich’och’ a’in, malaj sa’ li ruchich’och’ reheb’ li musiq’ej. Lee teneb’ahom rik’in li Dios a’an xch’olaninkil jo’ k’ihaleb’ naru cheru reheb’ li komon sa’ lix junkab’al a’an ut sa’ lee junkab’al laa’ex rik’in lee rahom ut lee paab’aal chirix li Qaawa’ Jesukristo.
Lix yalb’al eerix, a’an xnawb’al ani teech’olani, chan ru teeb’aanu, ut jo’q’e. Nekeraj ru lix tenq’ankil li Qaawa’. A’an naxnaw ru xch’ooleb’chixjunil, ut naxnaw naq ak kawresinb’ileb’ chixk’ulb’al lee ch’olanihom. Lee tij rik’in paab’aal a’an tz’aqal li taatenq’anq eere. Naru teekanab’ eerib’ chiru xk’ulb’al lix b’eresihom a’an.
A’an kixye li na’leb’ aj waklesihom ch’oolej a’in: “Chextzʼaamanq chiru li Yuwaʼbʼej saʼ lin kʼabʼaʼ, rikʼin xpaabʼankil chi wank eepaabʼaal naq texkʼuluq, ut taawanq eerikʼin li Santil Musiqʼej, li nakʼutbʼesink re chixjunil li kʼaʼaq re ru li aajel ru.”
Rochb’een li tijok, xtz’ilb’aleb’ rix li loq’laj hu a’anaq xcha’alil lix k’iijik lee wankilal re ch’olanink. Wahe’ li yeechi’ihom: “Chi moko chexkʼoxlaq chi rubʼelaj chirix kʼaʼru teeye; chekʼuula bʼan rajlal saʼ lee kʼaʼuxl li aatin re li yuʼamej, ut taakʼeemanq eere saʼ li hoonal ajwiʼ aʼan li jun raqal li taabʼismanq re li junjunq chi winq.”
Jo’kan naq k’i chik li hoonal teeroksi re tijok, re tz’ilok-ix sa’ k’a’uxlej, ut re xk’oxlankil li musiq’ejil na’leb’. Taahoye’q sa’ eeb’een lee nawom chirix li yaal ut taak’iiq lee wankilal chixch’olaninkil li wankeb’ sa’ lee junkab’al.
Te’wanq li hoonal naq teereek’a naq timil timil yookex chi chaab’ilo’k sa’ xtzolb’al chan ru ch’olanink chi chaab’il. Taa’ajmanq ru lee paab’aal re taaruuq texkuyuq. Li Kolonel kixtaqla eere li aatin aj waklesihom ch’oolej a’in:
“Joʼkan ut, mexlubʼ saʼ xbʼaanunkil li us, xbʼaan naq yookex chixkʼeebʼal xkʼojobʼankil jun xnimal ru kʼanjel, ut rikʼin li kʼaʼru kaʼchʼin naʼel chaq li kʼaʼru xnimal li ru.
“Kʼehomaq reetal, li Qaawaʼ naxpatzʼ li aamej, ut li kʼaʼuxlej li kʼeekʼo xchʼool; ut ebʼ li kʼeekʼookebʼ xchʼool ut li teʼabʼinq chiwu teʼxtzeka lix chaabʼilal li chʼochʼ Sion saʼebʼ li rosoʼjik kutan aʼin.”
Rik’in naq wankex arin sa’ li ewu a’in, nak’utman xyaalalil naq wan eech’ool chixk’ulub’ankil lix b’oqom li Qaawa’ chixch’olanink lee ras eeriitz’in. Yaal ajwi’ a’an choq’ reheb’ li q’axal saaj arin sa’ li ewu a’in. Naru teenaw ani tento teech’olani sa’ lee junkab’al. Wi textijoq chi anchal eerajom, jun k’ab’a’ej malaj xnaq’ uhej taachalq sa’ lee k’a’uxl. Wi textijoq re xnawb’al li teeb’aanu malaj teeye, teetaw xsumenkil a’an. Rajlal sut naq nekexpaab’ank, taak’iiq lee wankilal re ch’olanink. Teekawresi eerib’ choq’ re li kutan naq teech’olani lee ralal eek’ajol.
Eb’ li na’b’ej li ninqeb’ xkok’al taaruuq te’tijoq chirix chan ru xch’olaninkil jun ralal malaj xrab’in li chanchan naq ink’a’ naraj ch’olaniik. Maare textijoq re xnawb’al ani taaruuq raj tixtenq’aheb’ lee kok’al sa’ musiq’ej ut taak’ulub’aaq xb’aaneb’. Li Dios narab’i ut naxsumeheb’ li tij k’eeb’ileb’ chi anchaleb’ xch’ool xb’aaneb’ li na’b’ej yookeb’ xk’a’uxl, ut a’an naxtaqla lix tenq’ankileb’.
Jo’kan ajwi’, maare naraho’ xch’ool junaq na’chinb’ej li wan arin sa’ li ewu a’in xb’aan li ch’a’ajkilal naxk’ul sa’ xk’ab’a’eb’ li ralal xk’ajol ut li ri. Naru teetaw xkawilal lee ch’ool ut lee b’eresinkil rik’in lix numsihomeb’ li junkab’al sa’eb’ li loq’laj hu.
Chalen chaq xq’ehil li xEva ut laj Adan, toj li Yuwa’b’ej aj Israel, ut toj chixjunjunqaleb’ li junkab’al sa’ lix Hu laj Mormon, wan jun tz’aqal tzol’leb’ chirix k’a’ru tento xb’aanunkil rik’in li rahil ch’oolejil chirixeb’ li kok’al ink’a’ neke’ab’in: maajaruj xkanab’ankil li rahok.
K’utb’il chiqu lix chaab’il b’aanuhom li Kolonel naq kixch’olaniheb’ li musiq’ejil alalb’ej k’ajolb’ej aj po’resihom ch’oolej re lix Choxahil Yuwa’. Us taq naq eb’a’an ut laa’o nokorahob’tesink, toj ye’b’il li ruq’ li Kolonel. A’an ki’aatinak sa’ 3 Nefi chirix li ras riitz’in sa’ musiq’ej, li kixyal xch’olaninkil a’b’an ink’a’ ke’raj ch’olaniik: “Aay, laa’ex … li wankex sa’ lix junkab’al laj Israel, k’a’jo’ naq kok’ aj xsa’ kexinch’utub’ jo’ jun xan kaxlan naxch’utub’eb’ lix kok’ kaxlan rub’el xxik’, ut kexinch’olani.”
Choq’ reheb’ li komon ixq, maak’a’ naxye xchihab’il, maak’a’ naxye chan ru xjunkab’al, ut maak’a’ naxye lix tenamitul, li Kolonel wan choq’ tz’aqal reetalil chan ru textz’aqonq sa’ lix k’anjel a’an re xkawob’resinkil li xtzolb’al li evangelio sa’ li ochoch ut li junkab’al.
Laa’ex teek’am chaq li tz’aqal rahok ak wan eerik’in sa’ xjalb’al li kok’ k’anjel ut li k’aynaqex wi’ chixb’aanunkil sa’ lee junkab’al. Rik’in a’an taanumtaaq li k’iik sa’ musiq’ej. Naq textijoq rik’in ut choq’ re li komon sa’ lee junkab’al, teereek’a lix rahom li Kolonel choq’ reheb’. Chi jo’kan taanimob’resiiq lee musiq’ejil maatan naq nekesik’ ru. Eb’ li komon sa’ lee junkab’al te’reek’a naq textijoq rik’in jun paab’aal nim wi’chik ru.
Naq li junkab’al nach’utla re rilb’aleb’ li loq’laj hu chi kaw xyaab’ xkux, rik’in a’an ak xerileb’ chik ru ut xextijok chirix re xkawresinkil eerib’. Ak xetaw li hoonal re tijok re naq li Musiq’ej tixkutanob’resi lee k’a’uxl. Chirix a’an, naq laa’ex nekex’ok chirilb’aleb’ ru li loq’laj hu, eb’ li komon sa’ lee junkab’al te’reek’a lee rahom choq’ re li Dios ut choq’ re li raatin. Te’ch’olaniiq xb’aan a’an ut xb’aan lix Musiq’.
Li hoyok a’an naru taa’uxmanq sa’ yalaq xch’utlajik li junkab’al wi nekextijok ut nekek’uub’ eena’leb’ choq’ re . Maare taaraj ru li yalok q’e ut li hoonal, a’b’an te’chalq li sachb’a-ch’oolej. Jultik we jun na’leb’ kixk’ut inna’ chiwu naq toj ka’ch’inin. Toj naru nawil sa’ ink’a’uxl li b’onb’il reetalil ch’och’ li kixyiib’ re xk’utb’esinkil lix b’eenik li apostol aj Pablo. Ink’a’ ninnaw chan ta wi’ ru kixtaw li hoonal ut li metz’ew re xyiib’ankil a’an. Ut toj sa’ li kutan a’in osob’tesinb’ilin xb’aan lix rahom choq’ re li tiikil apostol a’an.
Li junjunq eere teetaw chan ru textz’aqonq sa’ xhoyb’al li yaal sa’ xb’eeneb’ lee junkab’al sa’ lix Iglees li Qaawa’ k’ojob’anb’il wi’chik. Li junjunq eere textijoq, textzoloq, ut texk’oxlaq re xnawb’al li k’anjel ka’ajwi’ taaruuq teeb’aanu laa’ex. A’b’an ninnaw a’in: li junjunq eere, chi laq’looqex rik’ineb’ li ralal li Dios, aajel eeru sa’ li sachb’a-ch’oolejil k’anjel re xtzolb’al ut xyu’aminkil li evangelio li taaseeb’anq re lix ch’utub’ankil laj Israel ut li taakawob’resinq re lix junkab’al li Dios choq’ re lix chaq’al ru k’ulunik li Qaawa’ Jesukristo. Sa’ lix loq’laj k’ab’a’ li Jesukristo, amen.