Wankex chi k’anjelak chiru lee Dios, xb’aan laj Walter Rane

29 abril–5 mayo: “Jun nimla jalok”

Mosiah 4–6

Ma xawab’i chi aatinak anihaq jun sutaq ut xat-eek’asiik chixjalb’al laa yu’am? Maare rik’in li xawab’i xak’e aach’ool naq taajal b’ayaq laa yu’am—malaj ut naq taajal chi us. Li raatin li rey aj Benjamin a’an jun xnimal ru aatin jo’ a’an, ut eb’ li yaalil na’leb’ kixk’ut a’an kireek’asiheb’ chi jo’kan. Li rey aj Benjamin kixwotz rik’in lix tenamit li k’a’ru k’utb’esinb’il chiru xb’aan jun li anjel—naq xninqal ru osob’tesihom taaruuq te’k’ule’q sa’ xk’ab’a’ “lix kik’el li Kristo li natojok rix li maak” (Mosiah 4:2). Xb’aan li raatin, eb’ a’an ke’xjal chan ru naq ke’ril rib’ (chi’ilmanq Mosiah 4:2), li Musiq’ej kixjal li rajomeb’ xch’ool (chi’ilmanq Mosiah 5:2), ut ke’ok sa’ aatin rik’in li Dios naq junelik te’xb’aanu li rajom a’an (chi’ilmanq Mosiah 5:5). Jo’ka’in naq li raatin li rey aj Benjamin kixk’e chi jalaak lix tenamit. Chan ru naq taajaloq aawe laa’at?

Li na’leb’ re tzolok sa’ li ochoch ut sa’ li iglees

Mosiah 4

Sa’ xk’ab’a’ li Jesukristo, naru tink’ul ut taakanaaq wik’in li risinkil inmaak.

Wan naq, us ta nakaweek’a naq kuyb’ileb’ laa maak, maare toj taach’a’ajko’q chawu reek’ankil a’an ut kanaak sa’ xb’ehil li tiikilal. Li rey aj Benjamin kixk’ut chiru lix tenamit chan ru naq te’xk’ul li risinkil lix maakeb’ ut chan ru taakanaaq a’an. Naq nakawil li ch’ol 4 re lix hu laj Mosiah, naru nakapatz’ aawib’ li patz’om jo’eb’ a’in:

Eb’ li raqal 1–8.K’a’ru tento taak’ulmanq re naq li Dios tixk’e chi isiik laa maak? K’a’ru nakatzol chirix li Dios sa’eb’ li raqal a’in li nakatxmusiq’a chixjalb’al aak’a’uxl? Chan ru naru nakanaw naq ak xajal aak’a’uxl?

Eb’ li raqal 11–16.Jo’ naxye sa’eb’ li raqal a’in, k’a’ru nak’ulman sa’ li qayu’am wi naqab’aanu li k’a’ru ch’olob’anb’il sa’ li raqal 11? Chan ru naq laa’at, malaj ani nakara, nekek’ul li jalaak a’in? Juntaq’eeta li jalaak a’in rikin li jalaak ch’olob’anb’il sa’ Mosiah 3:19.

Eb’ li raqal 16–30.Chan ru naq xwotzb’al li k’a’ru aawe rik’ineb’ laa was aawiitz’in nakatxtenq’a re taakanaaq aawik’in li risinkil laa maak? Chan ru naq naru nakawoksi li raqal 27 sa’ lix yalb’al aaqe’ chi wank jo’ li Kristo?

Chan ru naq chiqajunilo laa’o aj lemoox? Jo’ naxye sa’eb’ li raqal a’in, chan ru naq tento taqil chixjunileb’ li ralal xk’ajol li Dios? (chi’ilmanq Mosiah 4:26). Ani naraj ru laa tenq’?

Chi’ilmanq ajwi’ Becky Craven, “Kanaaqex chi jalb’il,” Jolomil ch’utub’aj-ib’ re octubre 2020.

Mosiah 4:5–10

Ninpaab’ li Dios ut li naxye.

Lix b’oqom li rey aj Benjamin re xpaab’ankil li Dios ut li naxye aajel ru sa’ li kutan a’in jo’ chanru naq aajel ru sa’ najter kutan. Naq yooqat chirilb’al Mosiah 4:5–10, sik’eb’ li na’leb’ chirix li Dios li nakate’xtenq’a chixpaab’ankil. K’e reetaleb’ lix b’oqom li rey aj Benjamin sa’ li raqal 10. K’a’ut naq rik’in xpaab’ankil li Dios moko ch’a’aj ta xb’aanunkil li naxb’oq li rey aj Benjamin?

K’oxla xtz’ilb’al rix junjunq reheb’ li raqal a’in sa’ li loq’laj hu re xtz’iib’ankileb’ lix chaab’ilal li Dios: Jeremias 32:17; 1 Jwan 4:8; 2 Nefi 9:17; Alma 32:22; Mormon 9:9; Eter 3:12; Tzol’leb’ ut Sumwank 19:1–3; 88:41 (chi’ilmanq ajwi’ li video “Los atributos de Cristo,” Biblioteca del Evangelio). Naru nakawoksi li xatz’iib’a re xtz’aqob’resinkil ru chi k’iila paay ru jun li ch’ol aatin jo’ “Xb’aan naq ninnaw naq li Dios a’an , naru ninnaw naq a’an .”

Li qapaab’aal chirix li Dios naniman naq naqil a’an sa’ qayu’am. Sa’ Mosiah 4:1–3, k’a’ru kitenq’ank re lix tenamit li rey aj Benjamin “chixnawbʼal chirix lix chaabʼilal li Dios”? (raqal 6). K’oxla jo’q’e aawilom li Dios sa’ laa yu’am. Rik’in rilb’al a’an sa’ laa yu’am, k’a’ru xatzol chirix? K’a’ru yookat chixb’aanunkil (malaj naru raj taab’aanu) re xchamob’resinkil laa paab’aal chirix li Dios?

Chi’ilmanq ajwi’ Jeffrey R. Holland, “La grandiosidad de Dios,” Liahona, noviembre 2003, 70–73; Temas del Evangelio “Dios el Padre,” Biblioteca del Evangelio; “Yo’yo lin Dios, ninnaw,” Eb’ li B’ich, 195.

Xwotzb’aleb’ li santil numsihom. Wankeb’ li numsihom q’axal santeb’ jo’kan naq ink’a’ neke’wotzman. Naq nakab’oqeb’ li kristiaan chixwotzb’al xnumsihomeb’, maamineb’ ru chixb’aanunkil wi ink’a’ neke’raj.

Mosiah 4:29–30

Tento tinwil wibʼ, ut lin kʼaʼuxl, li waatin, ut lin bʼaanuhom.

Li Dios ink’a’ naxye qe jarub’ paay maak naru neke’qab’aanu. Jo’ naxye sa’ Mosiah 4:29–30, k’a’ru b’an naxb’aanu? K’oxla chan ru naq laa k’a’uxl, laa waatin, ut laa b’aanuhom neke’xtoch’ laa yu’am ut xyu’ameb’ laa was aawiitz’in. K’a’ru neke’xb’aanu sa’ laa sumwanjik rik’in li Dios? Chan ru naq “nakawil [aawib’]”?

Mosiah 5:1–5

Lix Musiq’ li Qaawa’ naru tixk’e chi uxmank jun nimla jalaak sa’ inch’ool.

Chi kok’ aj xsa’ na’ab’iman li kristiaan chixyeeb’al, “Ink’a’ naru tinjalaaq. Ak we chi jo’kan.” Chixjunpak’alil a’an, lix numsihomeb’ lix tenamit li rey aj Benjamin naxk’ut chiqu chan ru naq lix Musiq’ li Qaawa’ naru chixjalb’al li qach’ool chi yaal. Naq nakawil Mosiah 5:1–5, k’oxla chan ru naq li “nimla jalaak” li nak’amok sa’ li jalok ch’oolej ak xk’ulman—malaj naru taak’ulmanq—sa’ laa yu’am. K’oxla li jalaak li nak’ulman chi timil timil jo’ ajwi’ li k’a’ru nak’ehok re li “nimla” jalaak. Chan ru naq eb’ li numsihom a’an nakate’xtenq’a naq nakat-aaleek?

Chi’ilmanq ajwi’ Esekiel 36:26–27; Alma 5:14; “Un cambio de corazón,” “El pueblo del rey Benjamín hace un convenio” (eb’ li video), Biblioteca del Evangelio.

Uqʼej aj kʼirtesinel, xbʼaan laj Adam Abram

Mosiah 5:5–15

Nink’ul sa’ inb’een lix k’ab’a’ li Kristo naq nin’ok sa’ sumwank rik’in a’an.

K’a’ru nakatzol sa’ Mosiah 5:7–9 chirix li k’a’ru naraj naxye xk’ulb’al sa’ aab’een lix k’ab’a’ li Kristo? K’a’ru neke’xk’ut li tij re li loq’laj wa’ak (chi’ilmanq Moroni 4–5) chirix a’in? Chan ru naru nakak’ut naq “rehat” li Kolonel?

Chi’ilmanq ajwi’ D. Todd Christofferson, “K’a’ru aj-e lix b’ehil li sumwank,” Jolomil ch’utub’aj-ib’ re abril 2021.

Li na’leb’ re xtzolb’aleb’ li kok’al

Mosiah 4:1–3, 10

Li jalb’a-k’a’uxlej naxk’e sahil ch’oolejil.

• Re k’utuk chirix li sahil ch’oolej k’eeb’il xb’aan li jalb’a-k’a’uxlej, naru nakakanab’eb’ laa kok’al chixtz’ajninkileb’ li ruq’ ut chixk’eeb’al reetal k’a’ru neke’reek’a chirix naq ch’ajb’ileb’ wi’chik. Chirix a’an naru nakajuntaq’eeta a’an rik’in li k’a’ru ke’reek’a li kristiaan sa’ Mosiah 4:1–3 rub’elaj ut chirix naq ke’kuye’ xmaak. Wotz lix nawom aach’ool chirix lix wankil li Kolonel re qasaqob’resinkil sa’ musiq’ej.

• Ma neke’xnaw laa kok’al chan ru te’xjal xk’a’uxl chi tz’aqal ut chi anchal xch’ooleb? Tenq’aheb’ chixk’eeb’al reetal li k’a’ru kixb’aanu lix tenamit li rey aj Benjamin sa’ Mosiah 4:1–3, 10. Naru ajwi’ neke’ril “Jalok k’a’uxl, Jalb’a-k’a’uxlej” sa’ li K’utul Raqal reheb’ li Loq’laj Hu. Chan ru naq li Jesukristo naxk’e chi uxmank li jalb’a’-k’a’uxlej?

Mosiah 4:12–26

Lix evangelio li Jesukristo nikinixmusiq’a chi wank rik’ineb’ li was wiitz’in rik’in rahok ut chaab’ilal.

• Li k’anjelak chiruheb’ li qas qiitz’in naxk’e xsahil qach’ool. Laa kok’al naru neke’aatinak chirix xnumsihomeb’ b’ar wi’ naq xe’rahok ut xe’k’anjelak chiru anihaq, ut k’a’ru xe’reek’a chirix li xe’xb’aanu. B’ar wan junjunq reheb’ lix yaalal naq eb’ li kristiaan maare ink’a’ neke’raj k’anjelak chiruheb’ li ras riitz’in? K’a’ raj ru taqaye re jun kristiaan re xb’oqb’al chixtenq’ankileb’ li kristiaan wankeb’ sa’ rajb’al ru? Sik’ aana’leb’ sa’ Mosiah 4:16–26.

• Li rey aj Benjamin kixk’ut naq wi nokochal rik’in li Kristo ut naqak’ul xkuyb’al qamaak, “toonujaq rik’in lix rahom li Dios” (Mosiah 4:12). A’in nokoxk’e chixraab’al ut chixtenq’ankil li qas qiitz’in. Naru nekeril Mosiah 4:13–16, 26 (malaj jun li b’ich jo’ “Aawik’in tinb’eeq laa’in,” B’ichleb’aal choq’ reheb’ li Kok’al, 78–79) ut teetaweb’ li ch’ol aatin li te’xch’olob’ chan ru naru nokok’anjelak chiruheb’ li qas qiitz’in. Chirix a’an naru neke’xk’utb’esiheb’ li k’a’aq re ru a’an malaj neke’xyiib’ xjalam-uucheb’, ut te’xq’ehi li ch’ol aatin xroksi li junjunq. Chan ru naru naqak’ut qarahom ut qachaab’ilal sa’ ochoch, sa’ li eskweel, malaj sa’ li iglees?

Li Jesukristo kixk’ut chiqu naq toowanq rik’in chaab’ilal rik’ineb’ li qas qiitz’in.

Mosiah 5:5–15

Naq ninb’aanu li sumwank rik’in li Dios, nink’ul xk’ab’a’ li Kristo sa’ inb’een.

• Maare taawulaq chiruheb’ laa kok’al xyiib’ankileb’ kok’ eetalil te’xk’am li k’ab’a’ej “Jesukristo” ut xk’eeb’al chiruheb’ chixk’atq li raameb’ (chi’ilmanq li perel re kok’ k’anjel re li xamaan a’in). Naq yooqeb’ chixb’aanunkil a’an, naru nakayaab’asi Mosiah 5:12 ut nakaye chan ru naq ok sa’ sumwank, malaj yeechi’ihom, rik’in li Dios, a’an chanchan xk’amb’al xk’ab’a’ li Kristo “junelik… chi tz’iib’anb’il sa’ li qach’ool.”

Re xtawb’al xkomon chik li na’leb’, chi’ilmanq li hu Amigos re li po a’in.

Ilb’il chi rajlal xb’aan, xb’aan laj Greg K. Olsen