Li xMinerva Teichert (1888–1976), Laj Ammon chiru li rey aj Lamoni, 1949-1951, oléo en masonite, 335 15/16 × 48 pulgadas. Museo de Arte, Universidad de Brigham Young, 1969

6–12 mayo: “Rik’in lix metz’ew li Qaawa’”

Mosiah 7–10

Naq eb’ lix tenamit li rey aj Mosiah wankeb’ “rajlal sa’ tuqtuukilal” sa’ li ch’och’ Tzarahemla (Mosiah 7:1), ke’ok chi k’oxlak chirix jun ch’uut chik reheb’ laj Nefita, li k’iila chihab’ chaq xkoheb’ re te’wanq sa’ li ch’och’ Lehi-Nefi. Ak numenaq junjunq tasal tenamit, ut maak’a’ ke’rab’i chaq lix tenamit laj Mosiah chirixeb’. Jo’kan naq laj Mosiah kixpatz’ re laj Ammon naq tixjolomi jun ch’uut chi winq re xsik’b’aleb’ laj Nefita li elenaqeb’ chaq junxil. Eb’ li winq a’an ke’xtaw naq eb’ laj Nefita a’in, “sa’ xk’ab’a’ li maa’usilal” (Mosiah 7:24), ke’wan chi preexil chiruheb’ laj Lamanita. A’b’an, rik’in lix k’ulunik laj Ammon ut eb’ lix komon, ke’ok chixyo’oninkil naq te’ach’ab’aaq.

Wan naq laa’o chanchano eb’ laj preex aj Nefita a’in, yooko chixk’ulb’al rahilal xb’aan li qamaak, ut yooko chixk’oxlankil chan ta wi’ ru taqataw wi’chik li tuqtuukilal. Wan naq jo’ laj Ammon, nokomusiq’aak chixye’b’al li quq’ reheb’ li qas qiitz’in ut timil timil naqataw naq xb’aan li qab’aanuhom neke’ru “chixtaqsinkil lix jolomeb’, ut chi saho’k sa’ xch’ooleb’, ut chixkanab’ankileb’ rib’ chiru li Dios” (chi’ilmanq Mosiah 7:19). Maak’a’ naxye li wanko wi’, chiqajunilo tento taqajal qak’a’uxl ut “toosutq’iiq rik’in li Qaawa’ chi anchal li rajom qach’ool,” rik’in paab’aal naq “tooxkol” (chi’ilmanq Mosiah 7:33).

Li na’leb’ re tzolok sa’ li ochoch ut sa’ li iglees

Mosiah 7:14–33

Li Jesuskristo wan xwankil re inkolb’al.

Lix k’ulunik laj Ammon kixk’e xyo’onihom li rey aj Limhi, ut a’an kiraj xk’eeb’al li yo’onihom a’an reheb’ lix tenamit. Maare li raatin naru tixk’e aayo’onihom ajwi’ laa’at. Re xnawb’al k’a’ru yoo chi k’ulmank, naru nakatz’il rix lix wanjik lix tenamit laj Limhi sa’ Mosiah 7:20–25. Chirix a’an k’oxlaheb’ li patz’om a’in naq yooqat chirilb’al Mosiah 7:14–33:

• K’a’ru kixye laj Limhi re xkawob’resinkil xpaab’aaleb’ ut xyo’onihomeb’ lix tenamit chirix li Kristo?

• B’arwan reheb’ li ch’ol aatin neke’xk’e aayo’onihom? (che’ilmanq li raqal 19, 33).

• K’a’ru li xak’ul laa’at li xatxtenq’a chixpaab’ankil naq li Dios naru tatxkol ut naq tixb’aanu?

Chi’ilmanq ajwi’ “At xDios Israel,” Eb’ li B’ich, 5.

Mosiah 7:26–27

Kinyo’ob’tesiik “jo’ chanru xjalam-uuch li Dios.”

Sa’ Mosiah 7:26–27, laj Limhi kixch’olob’ junjunq reheb’ li na’leb’ kixk’ut laj Abinadi. Kʼaʼruheb’ li naʼlebʼ nakawil saʼebʼ li raqal aʼin? Chan ru naq ebʼ li naʼlebʼ a’in nekeʼxjal chan ru naq nakawil li Dios, ut chan ru nakawil aawibʼ?

Chi’ilmanq ajwi’ Russell M. Nelson, “El cuerpo: Un don magnífico que debemos apreciar,” Liahona, agosto 2019, 50–55.

Mosiah 8:13–19

Li Qaawa’ naxk’eheb’ li profeet, laj ilol na’leb’, ut laj k’utb’esinel choq’ re xchaab’ilaleb’ li winq.

Naq laj Limhi kirab’i lix nawom xch’ool laj Ammon naq li Qaawa’ kixwaklesi jun aj ilol na’leb’, laj Limhi “kisaho’ xch’ool chi numtajenaq, ut kib’antioxin chiru li Dios” (Mosiah 8:19). K’a’ut naq kireek’a chi jo’kan? K’a’ru nakatzol chirixeb’ laj ilol na’leb’ sa’ li raatin laj Ammon sa’ Mosiah 8:13–19?

Sa’ li kutan a’in, naqaxaqab’eb’ xwankil li Xb’eenil Awa’b’ejil ut lix Molameb’ li Kab’laju chi Apostol jo’ profeet, aj ilol na’leb’, ut aj k’utb’esineleb’. Chan ru naq wanjenaqeb’ jo’ “nimla chaab’ilal” chawu? (Mosiah 8:18). K’a’ru ak ke’xk’ut chawu chirix li Jesukristo?

Chan ru naq laaʼat, joʼ laj Ammon, naru nakat-aatinak chi kaw aachʼool chirix lix aajelilebʼ ru li profeet, laj ilol naʼlebʼ, ut laj kʼutbʼesinel? (chiʼilmanq Mosiah 8:13–18). Qayehaq, k’a’ru naru nakawotz rik’in laa junkab’al malaj sa’eb’ li redes sociales chirix:

• Li yaal li kik’ojob’aak wi’chik sa’ li kutan a’in xb’aan laj Jose Smith ut xkomoneb’ chik xprofeet li Qaawa’ (chan ru naq wan li Dios, li qachoxahilal, malaj naq li junkab’al wan chi junelik). Rilb’al “Lix K’ojob’ankil Wi’chik lix Tz’aqalil lix Evangelio li Jesukristo” malaj “Li Junkab’al: Jun Jek’inb’il Aatin choq’ re li Ruchich’och’” (Biblioteca del Evangelio) naru nakatxtenq’a chixk’oxlankil junjunq reheb’ li yaal a’in.

• Li osob’tesiik li nachal rik’ineb’ li taqlahom malaj k’ojob’anb’il k’anjel (jo’ li Aatin re Chaab’il Na’leb’, li chaq’rab’ re saq ru ch’oolejil, malaj xtz’apb’aleb’ li junkab’al sa’ junajil).

Sa’ li po xnume’ kiqab’iheb’ li profeet, aj ilol na’leb’, ut aj k’utb’esinel sa’ li jolomil ch’utub’aj-ib’. K’a’ruheb’ li aatin li xate’xmusiq’a? K’a’ru taajal sa’ laa yu’am a’ yaal li xatzol? K’a’ru ke’xye lix ilol na’leb’ li Qaawa’ chirix “li kʼaʼaq re ru toj chalel”? (Mosiah 8:17).

Chi’ilmanq ajwi’ Temas del Evangelio, “Profetas,” Biblioteca del Evangelio.

Mosiah 9–10

Naru teb’ink’ul inch’a’ajkilal “rik’in lix metz’ew li Qaawa’.”

Laj Tzeniff kixk’e reetal naq a’eb’ lix maak a’an ke’k’ehok re lix tenamit sa’ ch’a’ajkilal. A’b’an moqon, naq yookeb’ chaq chi pleetik rik’ineb’ laj Lamanita, a’an kixtenq’a lix tenamit chixk’ulb’aleb’ lix ch’a’ajkilal rik’in paab’aal chirix li Qaawa’. Naq nakawil Mosiah 9–10, k’e reetal li ke’xb’aanu lix tenamit laj Tzeniff re xk’utb’al xpaab’aaleb’. Chan ru naq li Dios kixkawob’resiheb’? Chan ru naq ak katxkawob’resi laa’at? K’a’ru naraj naxye choq’ aawe li xik “rik’in lix metz’ew li Qaawa’”? (Mosiah 9:17; 10:10–11).

Mosiah 10:11–17

Li k’a’ru ninsik’ ru xb’aanunkil, naru taakanaaq chiru k’iila tasal tenamit.

Naq nakawil Mosiah 10:11–17, k’e reetal chan ru naq lix b’aanuhomeb’ ut lix k’oxlahomeb’ laj Lamanita ke’xtoch’eb’ li tasal tenamit li ke’chal chirix. K’a’ru naxye a’in chirix lix toch’om li nakasik’ ru laa’at rik’ineb’ laa was aawiitz’in—li us ut li ink’a’ us—jo’eb’ ajwi’ li kristiaan li maji’ neke’yo’la?

Oksiheb’ li k’anjeleb’aal sa’ li k’utuk. Roksinkileb’ li k’anjeleb’aal sa’ li k’utuk naxsahob’resi li tzolok. Jun tzol reheb’ li domino naru naxk’ut chan ru naq lix b’aanuhom jun kristiaan naru tixtoch’ xyu’ameb’ li ralal xk’ajol (chi’ilmanq Mosiah 10:11–17).

Li na’leb’ re xtzolb’aleb’ li kok’al

Mosiah 7:19

Li Dios kixtenq’aheb’ li kristiaan reheb’ li loq’laj hu, ut naru nikinixtenq’a ajwi’ laa’in.

• Naq ke’wan lix tenamit sa’ ch’a’ajkilal, li rey aj Limhi kixwotzeb’ li raqal re li loq’laj hu re xnimob’resinkil lix paab’aaleb’. Patz’ reheb’ laa kok’al naq te’xye aawe li seraq’ ut kristiaan reheb’ li loq’laj hu li neke’xtenq’aheb’ chi paab’ank. Chirix a’an naru nakawil Mosiah 7:19 rik’ineb’ jo’eb’ ajwi’ li seraq’ li yeeb’ileb’ resil sa’ li raqal a’in (chi’ilmanq “Li Paswa” ut “Eb’ laj Israelita sa’ li yamyookil ch’och’” sa’ Eb’ li Esilal sa’ li Najter Chaq’rab’, 70–76). Maare laa kok’al neke’raj xk’utb’esinkileb’ li seraq’. Chan ru naq li Qaawa’ kixtenq’aheb’ li kristiaan sa’eb’ li seraq’ a’in? Chan ru naru nokoxtenq’a?

• Re xtawb’al xkomon chik chirix li tenq’ naxk’e li Qaawa’ qe, sik’ ru junjunq raqal re “Lix Hu laj Mormon naxk’ut” malaj “Kaw lix ch’ool laj Nefi” (B’ichleb’aal choq’ reheb’ li Kok’al, 62─63, 64─65) re xb’ichankil rik’ineb’ li kok’al. Tenq’aheb’ chixk’eeb’al reetal chan ru li Qaawa’ kixtenq’aheb’ li kristiaan sa’ lix Hu laj Mormon—ut chan ru naru nokoxtenq’a laa’o.

Mosiah 8:16–18

Li Dios naxtaqlaheb’ chaq qe li profeet, aj ilol na’leb’, ut aj k’utb’esinel.

• Re aatinak chirixeb’ laj ilol na’leb’, naru nakajuntaq’eetaheb’ rik’in li k’a’aq re ru nokoxtenq’a chi ilok chi chaab’il, jo’ li lem, li binoculares, ut li microscopio. Ut naq yooqat chixyaab’asinkil Mosiah 8:17 chiruheb’ laa kok’al, naru te’xk’e li ruq’ chiru xsa’ ruheb’ chanchan naq yookeb’ chiroksinkil li binoculares rajlal sut te’rab’i li aatin “aj ilol na’leb’” (chi’ilmanq ajwi’ Moises 6:35–36). Aatinan rik’ineb’ chirix li k’a’ru “neke’ril” li profeet rik’in xtenq’ li Qaawa’ li ink’a’ naru naqil laa’o. K’a’ru ak ke’xk’utb’esi chiqu li qaprofeet malaj aj ilol na’leb’, jo’ laj Jose Smith?

• Chirix rilb’al Mosiah 8:16–18 rik’ineb’ laa kok’al, naru nakatenq’aheb’ chixk’oxlankil chan ru xtz’aqob’resinkil ru jun ch’ol aatin jo’ Jun aj ilol na’leb’ a’an chanchan … li nokoxtenq’a … . Qayehaq, jun aj ilol na’leb’ a’an chanchan jun eetalil re trafico li nokoxjayali rik’in li Jesus.

• Naru ajwi’ nakayiib’eb’ kok’ oqej rik’in hu ut nakapatz’ reheb’ laa kok’al naq te’xyiib’ chiruheb’ xjalam-uuch li k’a’ru neke’xye li profeet, aj ilol na’leb’, ut aj k’utb’esinel naq taqab’aanu. Yiib’ jun li b’e rik’ineb’ li kok’ oqej sa’ li na’ajej wankex wi’, ut kanab’eb’ laa kok’al chi b’eek sa’ xb’eeneb’ li kok’ oqej. Chan ru naru jun aj ilol na’leb’ nawan jo’ “nimla chaab’ilal” choq’ qe? (chi’ilmanq Mosiah 8:17–18).

Mosiah 9:14–18; 10:10–11

Naq q’un inmetz’ew, li Qaawa’ naru naxkawob’resi inmetz’ew.

• Naq eb’ li kok’al neke’xnumsi ch’a’ajkilal, wan naq neke’reek’a naq q’uneb’ xmetz’ew malaj ink’a’ neke’ru chixkolb’al rib’eb’. Chan ru taatenq’aheb’ laa kok’al chixkanab’ankileb’ rib’ chiru lix metz’ew li Qaawa’? Naru nakapatz’ reheb’ k’a’ru naqab’aanu re xkawob’resinkil li qajunxaqalil. K’a’ru naraj naxye naq kaweb’ rib’ “jo’ chanru xkawilaleb’ li winq”? (chi’ilmanq Mosiah 10:11). K’a’ru naraj naxye naq kaweb’ rib’ “rik’in xmetz’ew li Qaawa’”? (chi’ilmanq Mosiah 9:17–18; 10:10). Chan ru naq naqak’ul lix metz’ew li Qaawa’? Laa kok’al naru neke’xyiib’ xjalam-uuch li k’a’ru naxtenq’aheb’ chixk’ulb’al xmetz’ew li Qaawa’.

Re xtawb’al xkomon chik li na’leb’, chi’ilmanq li hu Amigos re li po a’in.

Xk’utb’esinb’il matk’ laj Jose Smith, xb’aan laj Clark Kelley Price