Li xMinerva Teichert (1888–1976), Reelelik li rey aj Limhi ut lix tenamit, 1949-1951, oléo en masonite, 35 7/8 × 48 pulgadas. Museo de Arte, Universidad de Brigham Young, 1969

20–26 mayo: “Okenaqo sa’ jun sumwank rik’in a’an”

Mosiah 18–24

Li resil laj Alma ut lix tenamit sa’ Mosiah 18; 23–24 naxk’ut li k’a’ru naraj naxye “ok sa’ lix korral li Dios” (Mosiah 18:8). Naq ke’kub’e xha’ lix tenamit laj Alma, ke’ok sa’ sumwank rik’in li Dios re “k’anjelak chiru ut xpaab’ankil lix taqlahom” (Mosiah 18:10). Us ta naq wan li sumwank a’in choq’ re li junjunq chiru li Dios, wan ajwi’ rilom rik’in chan ru naq ke’ril rib’ chirib’ileb’ rib’. Yaal, qajunes qib’ naq nokob’eek chiru li b’e re sutq’iik rik’in qaChoxahil Yuwa’, ut maajun chik naru chixpaab’ankil li qasumwank choq’ qe, a’b’an a’an ink’a’ naraj naxye naq qajunes wanko. Aajel ru naq taqatenq’a qib’ chiqib’il qib’. Jo’ komon sa’ lix Iglees li Kristo, noko’ok sa’ sumwank naq took’anjelaq chiru li Dios rik’in xtenq’ankil qib’ chiqib’il qib’ sa’ li b’e, ut “taqak’am li qiiq chiqib’il qib’” (Mosiah 18:8–10). Lix tenamit laj Alma tento naq ke’xkuy li riiq, chanchan ajwi’ laa’o. Ut li Qaawa’ nokoxtenq’a re naq “moko ch’a’aj ta chiqu xk’amb’al li qiiq” (Mosiah 24:15) rik’in xk’eeb’al qe jun xch’utameb’ laj santil paab’anel li wankeb’ sa’ aatin naq te’yaab’aq qik’in ut te’xk’ojob’ qach’ool, jo’ chanru naq laa’o wanko sa’ aatin naq taqab’aanu choq’ reheb’ a’an.

Li na’leb’ re tzolok sa’ li ochoch ut sa’ li iglees

Mosiah 18:1–17

Naq nakub’e inha’, ninb’aanu jun sumwank rik’in li Dios.

K’oxla xchamal li reek’ahomeb’ laj santil paab’anel chirix li Jesukristo sa’ Mosiah 18. Ki’ajman naq te’xch’utub’ rib’ chi muqmu, re tzolok chirix a’an (chi’ilmanq li raqal 3). Ut naq kikʼeeman rehebʼ naq teʼruuq chixkʼutbʼal xʼanchalilebʼ xchʼool rikʼin xkʼulbʼal li sumwank re li kubʼihaʼ, “keʼxpoqʼpoqʼi li ruqʼ xbʼaan xsahilebʼ xchʼool, ut keʼxye: Aʼin li ratawom li qachʼool” (Mosiah 18:11).

Naq yooqat chirilbʼalebʼ li raqal aʼin chaabʼilaq raj naq taakʼoxla xnimal ru laa sumwank saʼ laa yuʼam. Naq nakawil Mosiah 18:8–14, kʼoxlahebʼ li patzʼom joʼebʼ aʼin:

• K’a’ru nakatzol sa’eb’ li raqal a’in chirix li k’a’ru xayeechi’i naq xkub’e aaha’? K’a’ru kixyeechi’i li Dios aawe? (che’ilmanq li raqal 10, 13).

• Chan ru naq li sumwank re k’anjelak chiru li Dios naxk’am rib’ rik’in li qak’anjel re rilb’aleb’ li qakomon? (che’ilmanq li raqal 8–9).

• K’a’ru xyaalalil choq’ aawe li “xaqliik jo’ aj yehol nawom chirix li Dios”? (raqal 9).

• Chan ru naq xb’aanunkil li k’a’ru xayeechi’i naq xkub’e aaha’ nakatxtenq’a “chi nujaak rik’in li Musiq’ej”? (Mosiah 18:14). Chan ru naq li Musiq’ej nakatxtenq’a chixpaab’ankil laa sumwank?

Xsumenkileb’ li patz’om a’in naru nakatxk’e chixtz’ilb’al rix k’a’ut naq aajeleb’ ru li sumwank ut li k’ojob’anb’il k’anjel sa’ rilob’aal li Dios. Naru nakataw aana’leb’ sa’ li raatin li Elder Gerrit W. Gong, “Tz’aqonk sa’ li sumwank” (Jolomil ch’utub’aj-ib’ re octubre 2019) malaj li raatin li Awa’b’ej Jean B. Bingham, “Li ok sa’ sumwank rik’in li Dios nokoxkawob’resi, naxkol qix, ut nokoxkawresi choq’ re li junelik loq’alil” (Jolomil ch’utub’aj-ib’ re abril 2022). K’a’ut naq nakatb’antioxin chirixeb’ laa sumwank? K’a’ru yookat chixb’aanunkil re xpaab’ankil li k’a’ru xayeechi’i?

Chi’ilmanq ajwi’ Temas del Evangelio, “Bautismo,” Biblioteca del Evangelio; “Alma, padre, enseña y bautiza en las aguas de Mormón” (video), Biblioteca del Evangelio.

K’ut li yaal li natawman sa’ li loq’laj hu ut li raatineb’ li profeet re roso’jikeb’ li kutan a’in. Naq nakatk’utuk—ut nakattzolok—chijultiko’q aawe naq naru nakanimob’resi li paab’aal chirix li Jesukristo chi chaab’il wi nakajayali laa k’utum rik’ineb’ li loq’laj hu ut li raatineb’ li profeet re roso’jikeb’ li kutan a’in (chi’ilmanq Mosiah 18:19).

Mosiah 18:17–30

Li Dios naxtaqla lix tenamit naq te’xch’utub’ rib’, ut naq te’wanq chi junajaqeb’ ru.

Wankeb’ li neke’k’oxlank re, k’a’ut naq tento taawanq jun li iglees? Il Mosiah 18:17–31, ut k’e reetal k’a’ut naq nim xloq’al choq’ re lix tenamit laj Alma li ch’utub’ank-ib’ sa’ “lix iglees li Kristo” (Mosiah 18:17). K’a’ru nakawil sa’ lix Iglees li Jesukristo anajwan li juntaq’eet rik’in li Iglees sa’ xkutankil chaq laj Alma?

Chan raj ra taasume jun laa wamiiw malaj laa komon li ink’a’ naxpaab’ naq na’ajman ru jun li iglees? K’a’ut naq nakatb’antioxin chirix li wank jo’ komon sa’ lix Iglees li Kristo?

K’oxla k’a’ru naru nakab’aanu re xtenq’ankileb’ li komon sa’ laa teep malaj uq’ej chi wank “chi kemb’il sa’ komonil lix ch’ooleb’ rik’in junajil ut rik’in rahok” (Mosiah 18:21).

Chi’ilmanq ajwi’ Dallin H. Oaks, “Na’ajman ru jun li Iglees,” Jolomil ch’utub’aj-ib’ re octubre 2021; “Li rahok cherib’il eerib’,” Eb’ li B’ich, 201.

Mosiah 21–24

Li Dios nikinixtenq’a chixk’amb’al li wiiq.

Eb’ lix tenamit li rey aj Limhi jo’ ajwi’ lix tenamit laj Alma ke’ok chi preexil, us ta jalan jalanq li ke’wan wi’. K’a’ru naru nakatzol naq taajuntaq’eeta li resil lix tenamit li rey aj Limhi sa’ Mosiah 19–22 rik’in li resil lix tenamit laj Alma sa’ Mosiah 18; 23–24? Naq nakab’aanu a’an, sik’eb’ li na’leb’ li naru tate’xtenq’a sa’ laa yu’am. Qayehaq, k’a’ru naraj naxye naq “timil timil ke’ok chi usaak”? (Mosiah 21:16). Chan ru naru nakayu’ami li na’leb’ a’in?

Mosiah 23:21–24; 24:8–17

Naru tinkanab’ wib’ chiru li Qaawa’.

Us ta ak ke’xjal xk’a’uxl chirix lix maakeb’, laj Alma ut lix tenamit toj ke’ok chi preexil. Li k’a’ru ke’xk’ul naxk’ut naq us ta naqakanab’ qib’ chiru li Qaawa’ ut naqapaab’eb’ li qasumwank, toj te’wanq li ch’a’ajkilal, a’b’anan xb’aanunkil a’an nokoxtenq’a chi numtaak sa’ xb’eeneb’. Naq yooqat chirilb’al Mosiah 23:21–24 ut 24:8–17, k’e reetaleb’ li aatin ut ch’ol aatin li naru tate’xtenq’a chixtzolb’al xkanab’ankil aawib’ chiru li Qaawa’, maak’a’ naxye li wankat wi’ sa’ laa yu’am.

Chi’ilmanq ajwi’, David A. Bednar, “Moko ch’a’aj ta chiruheb’ xk’amb’al li riiqeb’,” Jolomil ch’utub’aj-ib’ re abril 2014.

Li na’leb’ re xtzolb’aleb’ li kok’al

Mosiah 18:7–17

Naq nakub’e inha’, ninb’aanu jun sumwank rik’in li Dios.

• Jun na’leb’ aajel ru re xtenq’ankileb’ laa kok’al chixkawresinkileb’ rib’ choq’ re li kub’iha’, a’an xk’utb’al chiruheb’ li sumwank te’xb’aanu naq te’kub’eeq xha’. Naru nakab’aanu a’an rik’in xk’utb’al chiruheb’ li jalam-uuch wan sa’ xraqik li tusleb’ aatin a’in naq yooqex chirilb’al resil li sumwank a’an sa’ Mosiah 18:9–10. K’oxla xpatz’b’al re jun ch’ina al li ak xkub’e xha’ naq a’an tixk’ut li na’leb’ a’in chiruheb’ li kok’al toj ka’ch’ineb’. Maare taawulaq chiruheb’ laa kok’al rab’inkil k’a’ru xak’ul laa’at naq kikub’e aaha’. Chan ru naq xpaab’ankileb’ laa sumwank rik’in li Dios narosob’tesi laa yu’am?

• Us raj xjultikankil chi kok’ aj xsa’ chiruheb’ li kok’al li ak kub’enaqeb’ xha’ li sumwank ke’ok wi’ ut li neke’x’ak’ob’resi rajlal xamaan rik’in li loq’laj wa’ak. Laa kok’al naru neke’xjuntaq’eeta li sumwank re li kub’iha’ li natawman sa’ Mosiah 18:8–10 rik’ineb’ lix tijul li loq’laj wa’ak (chi’ilmanq Tzol’leb’ ut Sumwank 20:77, 79). K’a’ru naru naqab’aanu re naq li tz’aqonk sa’ li loq’laj wa’ak a’anaq jun xchaq’al ru hoonal ut oxloq’, jo’ chanru kiwan li qakub’iha’?

Naq nakub’e qaha’, naqab’aanu jun sumwank rik’in li Dios.

Mosiah 18:17–28

Naq taakub’eeq inha’, laa’inaqin chik komon sa’ Lix Iglees li Jesukristo reheb’ laj Santil Paab’anel sa’ Roso’jikeb’ li Kutan.

• Ma neke’xnaw laa kok’al k’a’ru naraj naxye li wank jo’ komon sa’ Lix Iglees li Jesukristo reheb’ laj Santil Paab’anel sa’ Roso’jikeb’ li Kutan? Naru nakatenq’aheb’ chixtawb’aleb’ li jalam-uuch li te’reetali k’a’ru ke’xb’aanu li komon re li Iglees sa’ Mosiah 18:17–28. Jo’ eetalil, eb’ li jalam-uuch Li k’ojob’aak sa’ li tijonelil ut Xtojb’al li lajetqil (Hu reheb’ li Jalam-uuch re li Evangelio, 106, 113) naru neke’reetaliheb’ li raqal 18 ut 27–28. Ye reheb’ k’a’ut naq nakatb’antioxin xb’aan naq laa’at komonat sa’ lix Iglees li Jesukristo.

• Xtenq’ankileb’ li kok’al chireek’ankil naq “kemb’ileb’ sa’ komonil lix ch’ooleb’ rik’in junajil ut rik’in rahok” (Mosiah 18:21) naxtenqʼahebʼ chi kanaak saʼ li Iglees chiru xyuʼamebʼ. K’oxla xpatz’b’al reheb’ laa kok’al naq te’ril Mosiah 18:17–28. K’a’ru ke’xb’aanu li komon re lix Iglees li Kristo sa’ lix kutankil laj Alma re xraab’al ut xtenq’ankil rib’ chirib’ilebʼ rib’? Chan ru naru naqab’aanu a’in sa’ li teep, uq’ej, malaj k’aleb’aal wanko wi’? Jun b’ich chirix li rahok jo’ “Awiik’in tinb’eeq laa’in” (B’ichleb’aal choq’ reheb’ li Kok’al, 78–79) naru natenq’an.

Mosiah 24:8–17

Li Dios naru naxseeb’ob’resiheb’ li wiiq.

• Roksinkileb’ li k’anjeleb’aal sa’ li tzolok naru tixchaab’ilob’resi. Naru nakanujob’resi jun li b’oolx rik’ineb’ k’a’aq re ru jwal aal (re reetalinkileb’ li iiq), ut taapatz’ reheb’ laa kok’al naq te’xwaklesi li b’oolx. Naq yooqat chirilb’al Mosiah 24:8–17 rik’ineb’ laa kok’al, patz’ reheb’ naq te’risi jun li k’a’aq re ru sa’ li b’oolx rajlal sut te’rab’i jun k’anjel ke’xb’aanu laj Alma ut lix tenamit re xtz’aamankil lix tenq’ li Dios re xk’amb’aleb’ li riiq. Naru nakaye reheb’ chan ru naq li qaChoxahil Yuwa’ naru naxseeb’ob’resi li qiiq wi naqasik’ lix tenq’.

Re xtawb’al xkomon chik li na’leb’, chi’ilmanq li hu Amigos re li po a’in.

Li ha’ Mormon, xb’aan laj Jorge Cocco