“27 mayo–2 junio: “A’aneb’ xtenamit li Dios neke’yehe’ re.” Mosiah 25–28,” Kim, Taaqehin—Choq’ re li ochoch ut li iglees: Lix Hu laj Mormon 2024 (2023)
“27 mayo–2 junio. Mosiah 25–28,” Kim, Taaqehin—Choq’ re li ochoch ut li iglees: 2024 (2023)
Jalam-uuch
jun li anjel naxk’ut rib’ chiru laj Alma ut eb’ li ralal laj Mosiah
Lix jalajik xch’ool laj Alma li alalb’ej, xb’aan laj Gary L. Kapp
27 mayo–2 junio: “A’aneb’ xtenamit li Dios neke’yehe’ re”
Chirix oxib’ tasal tenamit chi jachb’il ru sa’ wiib’ li ch’och’, ke’junajiman wi’chik ru li tenamit aj Nefita. Lix tenamit li rey aj Limhi, lix tenamit laj Alma, ut lix tenamit laj Mosiah—jo’kan ajwi’ lix tenamit laj Tzarahemla, li maawa’eb’ ralal xk’ajol laj Nefi—k’eeb’ileb’ chik chixjunileb’ “sa’ ajl rik’ineb’ laj Nefita” (Mosiah 25:13). Naab’al reheb’ ke’raj ajwi’ ok choq’ komon sa’ lix Iglees li Qaawa’, jo’ ak ke’xb’aanu lix tenamit laj Alma. Jo’kan naq eb’ li “ke’ajok re xk’ulb’al sa’ xb’eeneb’ lix k’ab’a’ li Kristo” ke’kub’e xha’, “ut a’aneb’ xtenamit li Dios neke’yehe’ re” (Mosiah 25:23–24). Chirix k’iila chihab’ re pleetik-ib’ ut preexil, chanchan ta wi’ naq eb’ laj Nefita ak okeb’ re chi wank sa’ tuqtuukilal.
A’b’an moko najt ta chirix a’an, eb’ li maawa’eb’ aj paab’anel ke’ok chixrahob’tesinkileb’ laj santil paab’anel. Q’axal ra a’in xb’aan naq naab’al reheb’ li ink’a’ chik neke’paab’an, a’aneb’ li ralal xk’ajoleb’ laj paab’anel—li “tasal tenamit li toj yookeb’ chi ninqank” (Mosiah 26:1), jo’eb’ li ralal laj Mosiah ut jun ralal laj Alma. Sa’ li seraq’ wan resil lix sachb’a-ch’oolejil k’ulunik jun li anjel. A’b’an li tz’aqal sachb’a-ch’oolej re li seraq’ maawa’ xk’ulunik jun li anjel chiruheb’ li alalb’ej sachenaqeb’. Li jalok ch’oolej a’an jun sachb’a-ch’oolej li tento taak’ulmanq sa’ li qaam chiqajunjunqal.
Li na’leb’ re tzolok sa’ li ochoch ut sa’ li iglees
Eb’ lix moos li Dios li tiikeb’ xch’ool neke’xsik’ xb’aanunkil li rajom a’an.
Wan naq maare taqak’oxla naq jun jolominel re li Iglees, jo’ laj Alma, tz’aqal naxnaw li k’a’ru us xb’aanunkil. Sa’ Mosiah 26 naqil resil jun ch’a’ajkilal sa’ li Iglees li maajun sut rilom laj Alma. K’a’ru kixb’aanu laj Alma sa’ li hoonal a’an? (chi’ilmanq Mosiah 26:13–14, 33–34, 38–39). K’a’ru naxk’ut lix numsihom laj Alma chirix li k’a’ru naru nakab’aanu naq wan jun ch’a’ajkilal sa’ laa junkab’al malaj sa’ laa k’anjel sa’ li Iglees?
K’a’ru xk’ut li Qaawa’ chiru laj Alma sa’ Mosiah 26:15–32? K’e reetal naq junjunq reheb’ lix sumehom li Qaawa’ moko k’eeb’ileb’ ta jo’ tz’aqal xsumenkil lix patz’om laj Alma. K’a’ru naxk’ut a’in chirix li tijok ut xk’ulb’al li k’utb’esinb’il na’leb’ sa’ junesal?
Eb’ li jolomil na’leb’ neke’kana chi junelik. K’oxla chan ru naq eb’ li seraq’ ut eb’ li k’utum sa’eb’ li loq’laj hu neke’k’anjelak sa’ laa yu’am. Qayehaq, naru nakapatz’ aawib’, “K’a’ru xink’ul laa’in li chanchan ajwi’ li kixk’ul laj Alma?” malaj “K’a’ru kixk’ut laj Alma li naru tinixtenq’a laa’in?”
Li Dios tixkuy inmaak wi tinjal ink’a’uxl ut tinkuyeb’ xmaak li was wiitz’in.
Wan xkʼihal li naʼlebʼ chirix li jalok kʼaʼuxlej ut li kuyuk maak saʼ Mosiah 26–27. Sikʼebʼ li aatin ut chʼol aatin li nekeʼkʼutuk chirix li jalbʼa-kʼaʼuxlej ut li kuyuk maak saʼ Mosiah 26:22–24, 29–31; 27:23–37.
Wankebʼ li inkʼaʼ nekeʼxnaw ma tzʼaqal yaal naq li Dios naxkuyebʼ xmaak. Kʼaʼru nakakʼoxla naq tixye raj laj Alma li yuwaʼbʼej re jun komon saʼ li Iglees aran Tzarahemla li yoo xkʼaʼuxl chi joʼkan? Kʼaʼru kixtzol laj Alma rikʼin li Qaawaʼ saʼ Mosiah 26:15–31 li taaruuq tixtenqʼa li komon aʼan? (chiʼilmanq ajwiʼ Moroni 6:8; Tzolʼlebʼ ut Sumwank 19:16–18; 58:42–43).
Rik’in li Jesukristo, naru ninjala choq’ re li chaab’il.
Nak’utun chi saqen ru naq laj Alma li alalb’ej kiraj ru yo’laak wi’chik sa’ musiq’ej. A’an ut eb’ li ralal laj Mosiah a’aneb’ chaq “laj maak li qʼaxal yibʼebʼ ru” (Mosiah 28:4). A’b’anan, moko najt ta chirix lix jalajik xch’ool, laj Alma kixch’olob’ xyaalal naq aajel ru li jalok ch’oolej—choq’ re chixjunil: “Misach aach’ool,” chan, “naq chixjunileb’ li winq … tento te’yo’laaq wi’chik” (Mosiah 27:25; tiqb’il xkawil li aatin).
Naq nakawil resil li k’a’ru kixnumsi laj Alma sa’ Mosiah 27:8–37, naru nakayal xk’eeb’al aawib’ sa’ xseraq’ a’an. Ma nakanaw k’a’ru tento taajal sa’ laa yu’am? Ani, jo’ lix yuwa’ laj Alma, yoo chi tijok chawix “rik’in nimla paab’aal”? K’a’ru li xak’ul li xtenq’ank aawe re “xq’unb’esinkil aach’ool chirix lix wankil li Dios ut li wankilal k’eeb’il xb’aan a’an”? (Mosiah 27:14). K’a’ru li “xnimal ru k’a’aq re ru” xb’aanu choq’ aawe li Qaawa’ malaj choq’ re laa junkab’al li tento taajultiko’q aawe? (Mosiah 27:16). K’a’ru nakatzol rik’in li raatin ut lix b’aanuhom laj Alma li alalb’ej chirix li naraj naxye li yo’laak wi’chik? K’a’ruheb’ li reetalil a’an li aawilom?
K’e aahoonal chixtz’iib’ankil chan ru naq li Qaawa’ yoo chatenq’ankil chi jalaak—malaj yo’laak wi’chik—us ta timil timil yookat chi jalaak chiru xjunpaatil lix jalajik laj Alma. Ma wan jun b’ich naru nakab’icha malaj nakawab’i li tixk’ut li nakaweek’a, maare “Sachso ninkana”? (Eb’ li B’ich 118). Ani maare taatenq’aaq rik’in rab’inkil k’a’ru aak’ulum laa’at?
Li Elder David A. Bednar kixjuntaq’eeta li yo’laak wi’chik rik’in li nak’ulman naq jun pepino na’ok choq’ pepinillo (chi’ilmanq “Os es necesario nacer de nuevo,” Liahona, mayo 2007, 19–22). K’a’ru naxk’ut li na’leb’ a’in chawu chirix li jalok ch’oolej?
Li Dios narab’iheb’ lin tij ut tixsumeheb’ a’ yaal jo’ chanru li rajom ut lix hoonal a’an.
Maare ak xanumsi li kixnumsi laj Alma li yuwa’b’ej rik’in jun komon sa’ laa junakab’al li yoo chixsik’b’al ru li ink’a’ us. K’a’ru nakataw sa’ Mosiah 27:8–24 li naxk’e aayo’onihom? Chan ru naq eb’ li raqal a’an neke’xjaleb’ laa tij choq’ reheb’ laa komon?
Re xtawb’al xkomon chik li na’leb’, chi’ilmanq li hu Liahona ut li hu Para la Fortaleza de la Juventud re li po a’in.
Re xtenq’ankileb’ laa kok’al chixk’eeb’al reetal k’a’ru kixk’ut li Qaawa’ chiru laj Alma chirix li kuyuk maak, naru nakapatz’ reheb’ naq te’ril Mosiah 26:29–31 ut te’rajla jarub’ sut wan li aatin “kuyuk maak” aran. K’a’ru neke’xk’ut li raqal a’in chirix xkuyb’al xmaakeb’ li qas qiitz’in? (Chi’ilmanq ajwi’ “Chinaatenq’a re tinkuyeb’ lix maak,” B’ichleb’aal choq’ reheb’ li Kok’al, 52.)
Re xka’jultikankil li kuyuk maak kixb’aanu li Kolonel, naru nakak’ut xjalam-uuch a’an naq kiwan chiru li krus ut teeril Lukas 23:33–34. K’a’ru kixpatz’ li Jesus re li qaChoxahil Yuwa’ naq tixb’aanu choq’ reheb’ li ke’k’ehok re chiru krus? Chirix li aatinak a’in, laa kok’al naru neke’xk’utb’esi li kuyuk maak chirib’ileb’ rib’.
Wan naq ch’a’aj xkuyb’al qamaak qajunes qib’ naq wan qamajelel. Chan ru naq li kixye li Dios re laj Alma naru natenq’an? Laa kok’al naru neke’xk’oxla naq yookeb’ chi aatinak rik’in jun kristiaan li ink’a’ naxpaab’ naq li Dios tixkuy lix maak. Patz’ reheb’ laa kok’al naq te’xtaw jun na’leb’ sa’ Mosiah 26:22–23, 29–30 li taatenq’anq re li kristiaan a’an.
Lix jalajik xch’ool laj Alma li alalb’ej ut eb’ li ralal laj Mosiah naru naxk’ut chiruheb’ laa kok’al naq, rik’in lix wankil li Kolonel, yalaq ani naru najala. Malaj eb’ laa kok’al naru neke’roksiheb’ li jalam-uuch sa’ li tusleb’ aatin a’in, li perel re kok’ k’anjel re li xamaan a’in, ut junjunq li jalam-uuch re Mosiah 27:8–37 re xyeeb’al li seraq’ (chi’ilmanq ajwi’ “Ch’ol 18: Laj Alma li alalb’ej naxjal xk’a’uxl,” sa’ Eb’ li Esilal sa’ lix Hu laj Mormon, 49–52). Ka’jultika li raqal 24, re xk’utb’al naq laj Alma kixjal xk’a’uxl ut li Jesukristo kixtenq’a chi jalaak. Kanab’eb’ laa kok’al chixk’utb’esinkil li seraq’ wi te’raj.
Jalam-uuch
neke’xk’am laj Alma li alalb’ej sa’ rochoch lix yuwa’
Lix yuwa’ kisaho’ sa’ xch’ool, xb’aan laj Walter Rane
Naru nintijok ut ninkuy insa’ re naq li Dios taarosob’tesiheb’ li raab’ileb’ inb’aan.
Ilomaq Mosiah 27:8─24, ut patz’ reheb’ laa kok’al naq te’xk’e reetal k’a’ru ke’xb’aanu laj Alma ut lix tenamit re xtenq’ankil laj Alma li alalb’ej. Ma wan jun sutaq xakuy aasa’ ut xatijok choq’ re jun kristiaan? Wotz li xak’ul rik’ineb’ laa kok’al, ut kanab’eb’ ajwi’ chi wotzok.
Ma neke’xnaw ru laa kok’al jun kristiaan naraj ru tenq’aak xb’aan li Dios? Jo’ kixb’aanu laj Alma, naru nekextijok sa’ komonil chirix li kristiaan a’an, ut wi naru chiruheb’ laa kok’al, naru ajwi’ nekekuy eesa’ choq’ re.
Re xtawb’al xkomon chik li na’leb’, chi’ilmanq li hu Amigos re li po a’in.
Jalam-uuch
jun li anjel naxk’utb’esi rib’ chiru laj Alma li alalb’ej
B’onb’il jalam-uuch re lix k’utb’esinkil rib’ jun li anjel chiru laj Alma li alalb’ej, xb’aan laj Kevin Keele